بداية النهاية
كان الهدوء طاغي علي بيت الجعفري لحدي ما الباب فتح ودخلت بثينة وهي بتقول: عمتي إحسان ألحقي مصيبة ،مصيبة كبيرة القرية كلها عرفت أنو نيكولا بت عبدالرحمن .
حاجة إحسان كانت قاعدة في العنقريب تسبح قامت بخلعة وقالت ليها: كيف الكلام دا يا بثينة الناس دي عرفت كيف والكلمهم منو ؟ لا حول ولا قوة الا بالله خسارة سنين الشقى الشقيناها انا وجلال عشان نأسس البيت دا ونكسب أحترام الناس لينا .
سوسن مسكتها وقالت ليها: اهدي يا أمي خلاص بتتحل إن شاء الله اصلا عاجلا ام اجلا الناس حتعرف السر دا ما حيكون مدسوس للأبد والموضوع بسيط والله شئنا ام ابينا نيكولا دي بتنا ومننا وفينا ولازم نعترف بيها . (دي هارشنها طبعا)
_عليك الله أسكتي يا سوسن ما ناقصاك ،انتي سمعتي الكلام دا وين يا بثينة القالو ليك منو؟
_والله يا عمتي مشيت أجيب لي شوية خضار أكان القى ليك النسوان في الملجة جت بتكلمو في الموضوع دا ومن شافوني وقفت وراهن سكتن وأي وحدة بقت تتهامس مع الجنبها بس في وحدة كدا مسلطة خلاص قالتلي صحي الكلام السامعنو دا البت الكنتو رابنها طلعت بت ولدكم من وحدة حبشية انا طوالي قلت ليها القال ليكم الكلام الفارغ دا منو قالتلي القرية كلها ما عليها الا سيرتكم والقرى الجنبنا دي جت عرفت بالخبر عاد بيت الجعفري مشهور وشيخ جلال بتنسي هو والعارف بكلم الما العارف انا طوالي خليتهم في حتتهم ديك وجيت جارية جرري .
حاجة إحسان:دي أكيد بت الحرام الما بتتسمى ديك الليلة بوريهو ليها كان ما طردتها برة بيتي وأتبريت منها قصاد امة لا إله الله .
_نيكولا نايمة لسع دقيقة يما ما تستعجلي يمكن ما هي العملت كدا
_زحي كدا يا سوسن من قدامي البت دي مما جات شغالة فينا تهديدات وأحنا ساكتين ليها وكان دافعتي ليها تاني لا بتي لا بعرفك.
_دا كلام شنو يما !!
_السمعتيهو يا سوسن .
دفرت باب الغرفة بكل قوتها وخشت جوة نيكولا ومودة قامو مخلوعين وما فاهمين حاجة ، حاجة إحسان ضربت نيكولا بعكازها في رجلها لمن صرخت وقالت ليها: أنتي قايلة نفسك كان وريتي للناس انتي منو حنعترف بيك في البيت دا؟؟ وربي لو وريتي السودان كلو أنك بت عبدالرحمن حتفضلي في نظرنا بت الخدامة الرخيصة الغلط معاها ولدي وسترها ما أكتر من كدا فاهمة ولا لا؟؟
_أقسم برب الكعبة انا ما كلمت زول ولا فاهمة انتي بتقولي في شنو زاتو؟
_كذاااابة ك ذااابة ما علي الحركات دي أنا .
مودة مسكت عكازها وقالت ليها: ما بسمح ليك تضربي نيكولا قدامي والله هي ما جات هنا عشان تتهان وتنضرب جات عشان تطالب بحقوقها الشرعية أنا للأن مستغربة فيها ساكتة ومستحملة لييه كل دا ؟ مع انها بتقدر تغطس حجركم كلكم في دقائق بس الظاهر لسع بتحبكم ومحترماكم بس انا تاني ما حأسمح بكدا ولا انا ارضى يهينو صحبتي واختي وأنا ساكتة و احلف ليك بأسم الله الواحد الأحد نيكولا ما كلمت زول بالحقيقة شوفو انتو كلمتو منو ومشى شر غسيلكم علي كل الأحوال الحقيقة انكشفت ودا في صالح نيكولا .
حاجة إحسان لزتها وقالت ليها: انت الحشرك بيناتنا شنو واحدة مطلوقة ما عندها أهل يلموها شكلك كدا صح؟ يلا غوري من وشي بلاش قلة أدب معاك قال ما بسمح ليك تضربي صحبتي قدامي ههههه غايتو الخدم ديل عينهم بقت قوية .(الخدم ما مقصود بيهم البكنسو ويمسحو لا دا مصطلح عنصري عندنا في السودان بطلقوهو علي البت اللونها غامق ونخرتها مفطسة وشعرها قرقدي بعتذر علي الوصف الجارح بس كان لازم أوضح ) .
