تَسَاقُطْ
#بعد مرور يومين......
_آدم أسمعني أنت لو خشيت ليها هسي مافي زول حيضمن سلامتك .
= ماجد أنت بتتكلم كيف الجوة دي مرتي أنا عايزني أسيبها في الحالة دي كدا وما أعمل ليها حاجة .
_ ما هي كمان أختي أنا فكرت زيك وخشيت ليها وحاولت أتكلم معاها وما أستفدت شئ غير كانت حتكسر لي رقبتي ، أنت هسي أهدى وروق عليك الله هي زاتها شكلها نامت .
_ طيب عرضتوها علي دكتور ولا حاجة ؟ .
= أيوا وقال لينا تودوها مصح نفسي وإلا كدا ما حتتحسن تخيل عايز مننا نرميها مع المجانين !! .
_ لا حول ولا قوة إلا بالله ، اللهم أجرني في مصيبتي هذه ، عزوان ما مجنونة عشان نوديها مصح عقلي .
= تعال ارتاح شوية بتكون تعبان من السفر مافي زول كلهم مشو المحكمة بتاعت غسان .
مشو الصالة وآدم قال ليهو وهو بقعد علي الكرسي : أنا ما فاهم يعني بحاكموهو علي شنو الناس ديل ؟ .
ماجد اتنهد وقال : علي انو قتل مجرم مهم جدا وأتسبب في موت 3 أطفال وأستخدم بيتكوين في الشبكة المظلمة وضيع علي الشرطة السودانية والدولية معلومات كانت ممكن تكون سبب في القبض علي مجرمين أكبر .
_ بس هو ولد صغير ما عدل انو يحملوهو جرائم أكبر منو ، ما من حق أي زول يحاسبو هو دافع عن نفسو بس .
= بس دا ما بيمنع أنو غسان غلط لمن دخل الديب ويب وهو حاليا بدفع الثمن في ثلاثة أمهات اتحرق قلبهم علي أطفالهم ودفنوهم ناقصين ومقطعين بعد ما ماتو أسوء موتة ما كانو يستاهلوها ، غسان ما كان براهو مذنب أسامة كمان بس قدر يهرب من العقاب بمساعدة أهلو والغبي أخوي ، قريب أسامة أسمو ج هو الدخلهم وأداهم البيتكوين وكل حاجة سمعت انهم قبضو عليهو هو كمان وختوهو في السجن وأظن انو حيتقبض قريب علي الجبان المدسي في حضن أبوهو في السعودية ، هو صح غلطان بس انا كأخوهو الكبير واجبي أني أحميهو بروحي صدقني يا آدم أنا مستعد أعمل أي شئ في سبيل أخلص أخوي الصغير من المصيبة دي ، حرفياً أي شئ .
_ شكلو دا موسم سقوط المصايب علي بيت الجعفري وبيت النور ربنا يكون في عونا ، الحنعملو في سبيل نخلص أحبابنا ما هين .
= ما فهمت ، حنعمل شنو ؟ .
_ هو من ناحية حنعمل حاجة أنا وأنت حنعمل بس هي شنو ربي وربك أعلم .
فجأة الباب بقى يخبط شديد آدم وماجد أتخلعو وطارو طيران علي الباب أول ما فتحوهو كان ياسر وستو ومعاهم كم شرطي ، ماجد قال ليهم : خير يا جماعة في شنو خوفتوني والله .
