ذات تلاقي
مضى أسبوع وفي الفترة دي غسان كان عايش في حالة خوف غريبة متخيل انو ممكن في اي لحظة يجيهو المجرم يخطفو ويعذبو قدام ملايين المختلين عقليا بس اسامة كانو بطمنو وبذكرو انو الشرطة مراقبة المكان وما حيحصل ليهو حاجة ولكن بدت الشكوك تتسلل لأهلو وحاولو كم يعرفو اتغير مالو بس ما لقو عندو سبب مقنع ، مرافي اتلاقت مع الدكتور المسؤول عن حالة بيان وهو شرح ليها حالتها بالتفصيل بس رفض يحكي ليها قصتها وقال ليها حتحكي ليك هي في يوم زي ما حكتها لي ووعدتها اني ما أكلم زول غير انو دا من شروط المهنة ما نطلع أسرار المريض برة هي اتفهمت الموضوع ولمن لقى تجاوب من بيان مع مرافي مسكها ليها رسمي وبقت مسؤولة تماما عنها بس حذرها انو هي قد تبدو لطيفة بس هي خطرة شديد بتجيد الكاراتيه وكانت بتضرب الممرضيين لمن يجوها وحاولت كم مرة تهرب كانت من اعند المرضى وأشرسهم فعشان كدا كانو بدوها كهرباء ومهدئات وعلاجاا وبقت هادية نوعا ما يمكن انهارت واستسلمت للواقع او اقتنعت بانها لازم تتعالج عشان ترجع سليمة وتطلع مافي زول عارف سر خفوتها دا بس هو مؤشر ايجابي شديد ، ست البنات بدت تتاقلم مع شغلها الجديد وكونت علاقة لطيفة مع عايدة وطارق اما ربا وسماح بقو معاها الشحمة والنار خصوصا بعد ما ربا اعترفت لماجد بمشاعرها وهو رفضها بلباقة وطلب منها تنساهو لانو ما ليهو في الأرتباط وفكرة العرس ما مؤيدها حاليا المهم هو وعدها انو ما حيغير تعاملو معاها وحيعتبرها إنسانة غالية عليهو وبس ، أما نيكولا فنجحت في جلب سامي لإينا بالسحر طبعا وجاء طلب يدها من خالها عبدالله لأنو أبوها ميت والجمعة عقد طوالي والعرس بعد أسبوعين ، علي كدا آدم وعزوان حيسافرو البلد بعد يومين عشان يحضرو عقد إينا وأخيرا أبطالنا الثلاثة حيتلاقو وحتبدا #المأساة الكبرى .
ـــــــــــــــــــــــــــــــــــــــــــــــــــــــــــــــــــــــــــــ
_العزوة عزيزتي عزوة مالي آراك حزينة؟
_لا شئ يا زوجي الحبيب انها الهرمونات تفعل فعلتها في .
_هرمونات شنو آ المسنوحة ما تقوليلي هرمونات الحمل بس .
_حمل شنو آ الغشيم ما تفرح ساي لسع ما بقينا ثلاثة .
_عفوا منو السمح ليك تتكهني بميتافزيقية ولدنا يمكن هو حاليا بدا يكون في الشرنقة وحيوريك عما قريب أنو موجود .
_بعد التمحيص والتدقيق بقول كلامك صح يا شفيف لازم إيدلوجيتنا حول الموضوع دا تكون أرقي من كدا وعشان الوضع يكون مستتب لازم نكون جاهزين لإنزال الستار عن الهرمونات وأستقبال الفارس .
_عزوان تشان سوقووي هنتوني واتشي دايسكي .
_كياااااا ، احم باكا آدم سايونراااه .
_هيه تشوتو ماااتي كانجو .
_ناني؟
_كاجي بينشن نو جتسو .
_واااي خربت اللعبة او الرصة أو ايا كانت هي شنو لكن بالجد ضحكتني خصوصا لمن عملت فيها عميق .
_سرعة استيعابك وردك في نفس الثانية قريبة لي انا كنت قايلك هطلة ساي طلعتي راسطة ممسحة بالباسطة .
_اي طلع الأبجيقة الجواك ما هو انتو كلكم كدا دايما معتبرننا أقل منكم وماكلين حقوقنا ومدننا بالجزمة بس عشان احنا نسوان معناتو ما بنعرف شئ وانتو الرجال محور اي شئ .
_هيي هييي ما عندنا نسوان فيمنست يطالبن بالمساواة وحقوق المرأة غادي غادي كدا يا اللخت .
_هي خلاص كفاية مثلنا انواع الشعب السوداني كلو في عشرة دقائق ههههههه مفروض ناخد جائزة اوسكار علي أدائنا الإرتجالي دا .
_مش ههههههه ، ضحكنا وهظرنا كتير يلا خلينا في الجد انت مالك عليك الله؟ .
_مافي شئ يا آدم في شنو يعني حيكون؟
_أفهم من كدا أنو موضوع سفرنا البلد ما مخوفك اتكلمي بصراحة أنا عارفك متخوفة من نيكولا ومشاعري ليها بس أحب أطمنك دا كان من الماضي وهسي مافي أي شئ من الكلام دا انا بحبك انتي بس يا عزوان افهمي .
_انا واثقة من ناحيتك وعارفة انك بتحبني موت بس ما ضامنة نيكولا يمكن تغويك وتشلبك مني وفي الأخير اطلع انا برا حياتكم .
_مستحييل دا يحصل هاا العويرة دي انتي ما تديها فرقة فيك بكرا بديك قروش تمشي السوق وتشتري العايزاهو لازم تغيظيها بجمالك وأناقتك وتوري نسوان الفريق كلهم انك اختيار آدم ابراهيم والأجر علي الله .
_هيهيهيهي احييي انا منك اتاريك بتعرف لأمور المغارز دي كويس حاضر يا سيدي بكرا الصباح انا جوة السوق دا انا حأجهجه عوين عيلتكم كلها اصبر وشوف بس .
_عوين؟ عوين آ زوجتي العزيزة؟ لقطتيها من وين دي كمان .
_ما تنسى اننا مسافرين البلد بعد بكرا فبديت ألقط لي كلمات كدا اتجدع بيهم قدامهم عشان ما يقولو مدلعة ولسانها أعوج الزول لازم يكون مرن ويعرف يغوص في كل المجتمعات ولا شنو يا بعلي؟ .
_هاا؟؟ ايوا فعلا فعلا ويستحسن كمان انو المرونة دي تكون بالفهم بس ما تتكلمي افهمي بس اتفقنا .
_صح صح انت صح خلاص تمام .
ـــــــــــــــــــــــــــــــــــــــــــــــــــــــــــــــــــــــــــــ
_اها وصلتو وين في التحقيقات قدرتو تصلو لحاجة مهمة ؟
_حاليا لا بس أمبارح المساء وصلت رسالة تهديد في ايميل غسان بتقول "وقتك خلص وقريبا حأصل ليك" ودا بثبت جدية المجرم في خطف غسان سعادتك .
_مستحييل اسمح بدا يحصل الولد دا أمانة في رقبتنا ولو حصلت ليهو حاجة حيكون عار كبير علينا وعلي الشرطة كلها .
_لازم أعترف انو القضية دي أول مرة اتعامل معاها لانها ما منتشرة في بلدنا دي كتير والبلاغات بتنعد علي أصابع اليد بس لو نجحنا في القضية دي حتعود علينا بالخيرات الوفيرة ابتداء من الترقيات والاشادات الحتجينا من القيادات والدولة وبكدا حينضاف انجاز جديد وفريد في سجلاتنا وعلي الصعيد الدولي حنجبر الأنتربول تعترف بمهارة وقدرة الشرطة السودانية لأنو الهكرز والمجرمين الألكترونيين بقو معضلة وشوكة حوت واقفة في حلق الشرطة في كل العالم .
_دايما قاعد تبهرني بمخ الثعالب دا انت داهية بالجد بس المرة دي انا سبقتك وحسبتها قبلك هههههه يا شاطر .
_تلميذك سعادتك افهم من كدا انك حتصطاد في الموية العكرة مسبقا صح؟
_أنت رأيك شنو؟
_خلاص تمام أستلمت عن أذنك حضرة العميد لازم امشي
_ما تنسى تورينى الأخبار المهمة أول بأول المهمة هاا ما توجع دماغي بالتقارير الروتينية دي سامع ؟
_مفهوم سعادتك .
_يلا اتفضل شوف شغلك .
ـــــــــــــــــــــــــــــــــــــــــــــــــــــــــــــــــــــــــــــ
#بيت عبدالرحمن الجعفري....
انفتح الشباك الفاصل بين البيتين وظهرت منو سلمى وهي بتقول بغضب: هيييييي انتي اسمعي كلامي دا كويس وختيهو حلقة في اضانك انا دجل وشعوذة وكلام فارغ في بيتي ما بنفع معاي دايرة تمارسي قرفك دا شوفي ليك محل تاني ، يااااخي خنقتينا وكتمتي نفسنا من ريحة الدم والقرف البتسويهو دا ما لقيتي الا الاوضة الفيها شباك بفتح في أوضتي عشان تأذيني بافعالك دي يا دجالة برررري برررري برررري برررري يبرى ويستبرا عبدالرحمن من واحدة دجالة وبتعصى الله زيك تكون بتو .
_خلصتي خلاص؟ ممكن تقفلي شباك أبوك دا وتشوفي شغلتك بعيد عني عشان والله العظيم ما عندي اخلاق ليك بتعريفة .
_شنووو ابوووو منو يا بت الحرام والله الليلة ما اخليك تغلطي في أبوي كمان التحت التراب اصبري لي بربيك الليلة يا عديمة الرباية يا مقطعة يا لاجئة .
وبقت تكورك وتنبزها لحدي ما وصلت باب السر وبقت تدقو بهستيريا ، نيكولا كانت واصلة أخرها مشت فتحت ليها الباب طوالي سلمى أتهجمت عليها وبقت تضربها وتمعط ليها شعرها ، بس نيكولا عضتها لمن صرخت واتعترت ليها بحجر كبير كان جمب الباب ووقعت في الواطة نيكولا طوالي شالت الحجر وبقت تضربها علي رأسها بغضب لحدي ما وعت لنفسها بالعملتو ووقفت وانفاسها قايمة ، بس كان فات الأوان خلاص وروح سلمى طلعت لربها .
يتبع......
- 8 -
