± أهو يا عم خمس ماتشات طحن ورا بعض ولا تقولي برشلونة ولا غيره برضو معرفتش تسد قصادي.. تعيش وتاخد غيرهم
= انت فاكرني مش عارف ألعب لا يابني أنا سيبتك تغلبني بس عشان في بيتي وإكرام الضيف واجب برضو..
فضحك عمر ثم اعتدل في جلسته وقال:
± مفكرتش في كلام خالد؟
= يا عم فكك منه، الكلام ده مبيأكلش عيش... الدنيا كلها ماشية بالفلوس دلوقتي واحنا هنخلص من الكلية دي وهمَّها ونشوفلنا أي بلد نشتغل فيها ونعيش حياتنا بقا
± أكتر من كده! ما احنا واكلين شاربين نايمين ومقضيينها لعب وفُسَح من هنا لهنا.. هنعيش أكتر من كدة ايه
= كل ده كلام فارغ لسه فيه حاجات مجربناهاش
± حاجات زى ايه!
فغمز لؤي بعينه وربَّت على كتف عمر وقال:
= هتعرف بعدين...
✽ ✽ ✽
º بصي أنا جاية مخصوص عشان اعتذرلك على اللى حصل...
= تعتذريلى! لا طبعًا متقوليش كده يا سمر انتي أختي واحنا متربيين سوا ومحصلش حاجة يعنى مجرد موقف وعدَّى
º ماشى يا ستي.. احكيلي بقا يومك بيمشي ازاي؟
= والله ببدأ بصلاة الفجر وبجهز حاجتي وأروح الكلية أحضر المحاضرات، نعمل حلقة في المسجد وكده يعنى.. بعدها برجع، لو كنت هعمل حاجة في البيت وأقرأ الورد بتاعي وأصلى وأنام
º مش كنتى قولتيلى إن إدارة الجامعة عندك منعت موضوع الحلقات ده من فترة؟!
= أيوة فعلًا.. بس احنا بنعملها كدة في الخفاء يعنى أنا وصحابي المقربين وبعض البنات الطيبة كدة اللى بيحبوا يسمعوا أي حاجة تذكَّرهم بربنا وبيفرحوا جدا باللمَّة دي
º اه حاجة جميلة فعلًا.. ومين من صحابك بيعمل حلقات غيرك
= غالبا ببقى أنا وعائشة بس ساعات مثلًا بنت من الموجودين تكون سمعت درس أو محاضرة لشيخ معين فتحب تشاركنا الأجر وتخلينا نستفيد
º اه يعنى انتي وعائشة الأساس.. وبتعملوا الحلقة دي كام مرة بقا؟؟
= بسبب ضغط المحاضرات ملناش منفذ غير يوم الإتنين والخميس وبنستغل كمان إننا بنكون صايمين عشان يتضاعف الأجر بإذن الله..
º اها.. أنا عاوزة آجي أحضر معاكي مرة ينفع ولا ايه؟
= بجد يا سمر!؟ اللهم بارك طبعًا ينفع إن شاء الله..
º بس هدخل ازاي!
= هحاول أدورلك على كارنيه قديم عندي أو ممكن وأنا رايحة بكرة استأذنلك أمن الجامعة وأعرفهم إنك هتيجي المرة الجاية بإذن الله
أنت تقرأ
كالونِّي | Καλλονή
Randomلعلك تساءلت ما تلك "الكالونّي"... كالوني هي مدينة في ليسبوس باليونان.. عدد سكانها 1978 نسمة حسب تعداد 2011.. تبلغ مساحتها 36.58 كم² المهم ما علاقة هذا بحديثنا اليوم؟؟ هل بطلتنا يونانية؟ أم حديثنا عن اليونان؟ في الواقع.. لا علاقة بين ما قلته، وبين...
