بسنه ال ٢٠٠٢ داومت بالاول متوسط
ماما چانت خايفه عليه زيادة لا مو زيادة بشكل مو طبيعي يمكن لان أني البنت الوحيدة عدها لو أخر العنقود لو لأن فعلا المجتمع خطر والوضع صعب بالعراق بضروف البلد وكل أم تخاف على بناتها وخاصه اذا كانت حلوة وشكلها مميز
بعد مابلغت گمت اسمع بابا وماما يحچون بخطابه وناس يردوني لابنهم وأكثر من واحد فتح الموضوع ويه بابا وماما عليه
رغم ما اسوي نفسي متجاهله الموضوع..
ابن عمي اركان اكبر مني بخمس سنوات خطبوله بنيه سمعت ان هو كايل يريدني
الحمد لله خالاتي واولادهم كبار ومتزوجين ووبناتهم هم متزوجات چان واجهت صعوبات وياهم بس بقه اركان يلح لان ربينه سوة وبقيت بباله وتغيرت نظرته اللي من بلغت
بدت السنه الدراسيه وماما رفضت اروح للمدرسه رغم ماتوسلت شگد بيها تخليني اكمل دراستي رفضت
فراس توسطلي وگللها اني اوصلها الصبح وحيدر يجيبها
بصعوبه والحاح يلا وافقت
بداية السنه داومت وحاولت مااهتم لكلام ماما وحرصها الزايد عليه وكل شويه توصيني وصيه اخذني فراس من طلع لدوامه بالمستشفى وصلني وراح
دخلت وشفت المدرسه جبيرة وتختلف عن مدرستي بالابتدائيه
بالبدايه استغربت منها والنظام بيها مختلف كلشي من الطالبات والمعلمات جنت اسميها معلمه بعدين تعودت كمت اكول مدرسه
الطالبات كبار ومهتمات بنفسهن اكثر من اللازم وسوالفهن غير شكل
تحفظت على كل سالفه خوفا من ماما تظل توهس وتقلق وتسويلي مشاكل
كل ما تسالني ماكول شي عادي دراسه صعبه وكتب جديده ونظام جديد وفعلا جانت الدراسه صعبه بس اخواني شطار وساعدوني هوايه وخاصه بالانكليزي
وحيدر جان خامس علمي ينتظرني بباب المدرسه يرجعني للبيت دوامه عكس دوامي والتزم وياي خطيه من بدايه السنه وتكفل بتوصيلي بطريق الرجعه للبيت
مرت الايام اروح بطريقي وارجع بطريقي وبالمدرسه مااختلط بالبنات هالكد تعرفت على بنيه حبابه اسمها نور تقربت مني وجانت تحجيلي عن ابن خالتها وعلاقتها بي حب بالخفيه
اني كنت اسمع واتخيل نفسي ويه اركان شكد سمعت انه يريدني من بابا بس لحد الان مالتقيت بي بس من كنت بالابتدائيه شفته ببيت عمي بزواج اخته وجنت صغيرة مااهتميتله بس حسيت بنظراته واعجابه ألي
نور اكثر من مرة طلبت مني ازورهم بالبيت وعائلاتنه تتعرف على بعض بس اني حجيتلها عن طبع ماما مجانت تحب تطلع وتزور ناس غربه بس خالاتي ومكضيه وقتها بشغل البيت وتخابر خالاتي بالتلفون الأرضي ومرات يزورونه
بالبيت
علاقتها بمرت عمي ام اركان مو هالكد بس عمي يشتغل ويه بابا بالتجارة بالسوگ
عرفت بعدين انه خطبني منه اكثر من مرة ولمح بس بابا أجل الموضوع باعتبار بعدني صغيره وع الاكثر ماما كانت رافضه متحبها لام أركان
خافت منها عليه تحكمني وسوالف عيال مااعرف بعد الموضوع جان بس حجي وتلميحات واني جنت اسمعهم واتجاهل مااهتم ليش اهتم بعدني ماعدي مشاعر تجاه احد ولا اريد انشغل بارتباط حبيت الدراسه والحريه بالمدرسه اللي انحرمت منها بالبيت
كملت امتحانات نصف السنه واجت العطله ضجت كلش لفراق المدرسه ونور صديقتي ورجعت لحبس البيت وتذمر ماما المستمر وتضييقها عليه
بيوم زارنه عمو ابو اركان ومرته واركان اني جنت بالمطبخ اساعد ماما دخلوا للصاله مفتوحه ع المطبخ
صار كبالي اركان تعجبت لشكله صاير طويل وكبران عن قبل
هو هم تعجب من شافني لان كبرت وبلغت رغم ما جنت مبهذله وبالدشداشه وشعري مامشط بس رفع حواجبه وحسيت بعيونه لهفه
ماما خزرتي
زنزون روحي دخلي لغرفه فراس عزليها وشغلي التلفزيون ولاتتطلعين افتهمتي ؟ وعصرت زنديق اااخ موتتني
اي ماما شبيج صار رايحه ..
رحت سلمت وصعدت بس عيني بقت على اركان ورگبتي افترت لحد ماصعدت الدرج وهو يعاين وراي من فوك لجوة من اصعد
وگفت بالباب اتصنتت
بابا طلب من عمو ينتظر كم سنه بس ماقبل راد بسرعه يصير الزواج
ماما ومرت عمو اختلفن والظاهر تعاركن لان سمعتهن ام اركان تگول خلصت البنات اخطبله احلى منها بس اركان مصر عاجبته وبت عمه اولى من الغريب
ماما انقهرت كالت والله هيه بس هالوحيدة عدنه والمدلله ومهرها غالي
كلمه منها وكلمه من ام اركان الظاهر مااتفقوا بس بابا اعتذر منهم وطلع وراهم بالحديقه ركضت لشباك غرفه فراس فتحته ردت اشوف لو اسمع شي الفضول كتلني دخل فراس زمخ بيه نززني
لاتطيحين من الشباك شبيج زنزون !
عدلت نفسي وردت اطلع لزم ايدي
زنزون تعالي گعدي رايدج بشغله
گول فراس شنو !
گعدنه ع الچربايه
دريتي بماما خطبتلي عبير بت خالتي ؟
صدگ !!
لا ماافتهمت شوكت !
تحسر ودنگ
فراس عبير حلوة وخوش بنيه مابيها عيب شبيك ضايج !
زنزون أني احب بنيه چانت طالبه وياي بالجامعه وهسه نشتغل سوة بالصيدليه وفاتحت ماما بالسالفه رفضت لهذا استعجلت وخطبتلي عبير ولا اني مامفكر بيها ومالي نفس بيها اصلا
.....
يتبع .....
