تفاجات لمنظر اسامه جان لابس بجامه وفانيلا تعلاكه ويلعب بشعر صدرة ولحيته
كتله شكد صارلك هنا واكف !
خير رايد شي ؟
تنحنح ..
توني اجيت اريد قميص من حسام
يا قميص !
دخل فتح الكنتور وطلع قميص اسود الغريب حسام اخشن منه واطول شلون يلبس منه ملابس
بعدني بمكاني اخذ القميص واجه اقترب مني لبسه كلي دكميلي الدكم
نعم !
ضحك وغمزلي وطلع
هزيت بيدي دخيل الله هذا مخبل من نوع ثاني سديت الباب ورجعت ارتب بشعري دقايق اجه حسام
سلم رديت السلام نزعته ملابسه
أجت امج الحبابه
حسام أجت تشوفني شصار
جر اذاني شو تراددين !
اسفه
اي هيج لاتراددين بعد وبعدين امي كالت شكتيلها عاشت ايدج هسه صرتي خوش بنيه شبگني وظل يبوس جوعان اتغدة بيج وبعدين ننزل نتغده
هزيت براسي اي
كملنه غداه الخاص ونزلنه تغدينه جوة ابو اسامه مقرف ريحته شرب على بعد مترين وام اسامه متخلي يكعد ويانه تكومه وتدخله لغرفته
تغدينه بالصاله سوسن واسامه كدامنه كل ما اشيل راسي اشوف اسامه يعاين لحلگي تعمدت اقترب من حسام واوكله بيدي وهو كل شويه يبوس ايدي لو يعض اصبعي من ياكل ويتشاقه ويضحك
ويگول هذا الاكل الطيب من ايد زنزونتي الحلوة
اسامه ضاج كام وكال صعدولي الجاي لغرفتي وراح
سوسن طفرت وراه
اوف يربي شلون عذاب بقى حسام يتحارش بيه ويكرص تتدنيت عنه گلي هاي شبيج مو قبل شوي جنتي شحلاتج
حسام تعبانه رايحه لغرفتي ارتاح ام اسامه كالت اي يوم روحي رناوي تشيل الاكل
رنا كالت واني شعليه اريد اشوف المسلسل
بقت تتلاغه ويه امها صعدت سمعت صوت اسامه يصرخ ويضرب بباب الغرفة وسوسن تبچي ماافتهمت شيكول
ردت اقترب من الباب سمعت صوت حسام وراي ركضت لغرفتي دخل حسام
شبكته
شالني اموت عليج وباسني
حسام فدوة خل نطلع
وين نطلع ولج بعد شوي اخذلي غفه واروجع افتح المحل
مااعرف حسام ضايجه
شنو هاي السالفه منين طلعتيها مو جنتي عد اهلج ومتونسه شوفي امي هسة تاخذج انتي ورنا للسوك بس كلشي لاتشترين الله وكيلج مطلوب على عرسنه ماعدي ولافلس
اوف ماريد حتى طلعه ماريد
شبيج ولج !
حسام عبالي نطلع اني وياك نتمشى كدام العالم واتعيقل بيك اكول هذا رجلي
كام يضحك ولج طلع بيج بله يلا اذا هيج نطلع بليل تحضري بس اتعشه بيج مو عبالج
اضطريت اتنازل واتعامل وياه باسلوب الناعم لان تعبت من صراخه وضربه وشتايمه سايرته وسايسته والباقي على الله بس تصرفات اسامه كلش ما عجبتني وخايفه منه
انتظرت حسام يغفى تسحبت ونزلت جوة بحجه اساعد ام اسامه بالمطبخ والمواعين كلت اسالها عن اسامه ومرته
بالبداية ماحجت تهربت بعدين جرجرتها وكتلها عدي كم شغلة لرناوي والج
فرحت وتشكرت مني وبقت تحجيلي عنهم اسامه جان شرطي بالبصرة بس بعد السقوط عاف وضيفته خاف يقتلوا بحجه بعثي وزوجته تزوجها هناك ماصار عدها جهال وطلكها اكثر من مرة وردها وحسب كلامها غصبوا يردها لان ابوها شيخ عشيرة معروف وينتقم منه اذا عافها
رنا نجحت للسادس الابتدائي وابو اسامه مرات يطلع لمحل تصليح وغسل السيارات اللي يشتغل بي حسام حاليا ومرات يكضيها شرب ونوم بالبيت
نزلت سوسن وجهها مزورك من الضرب ام اسامه شهكت شبيج يوم شسوالج اسامه !
ها خاله ماكو شي كلشي مساولي هاي انضربت بالشباك غسلت وجهها وخلت الجاي على النار كالت اسامه يريد جاي
طلعت ام اسامه اعتقد صعدت لفوك
اقتربت منها وسألتها
سوسن ليش باقيه وياه ماعدكم جهال واسامه عصبي وايدة والضرب بعدني ماكملت كلامي قاطعتني
شنو ايدة والضرب منو كلالج غلطانه اسامه رجال حوك واني اموت عليه ماريد اعوفه مالج شغل انتي حيري بروحج ودبري حالج
خذت الجاي بصينيه وصعدت
صدك استغربت شنو هاي موزين انصحها شلون هيج انخبصت !
صفنت على كلامها وفكرت بنفسي صدك خايفه اصير مثلها والله بس هالشهر اذا ماصار عدي حمل من حسام اعوفه شعدي باقيه وبلكي من احبل يعقل ويحس بالمسؤوليه ويخفف خبال
نزل حسام وشربنه جاي بالمطبخ سويتله وصلته للباب ظل يبوس دفعته كوة خلصت منه فدوة اروح لك بس خلص يلا روح انتظرك لاتتاخر ع موعدنه طلع طبگت الباب ودخلت من باب المطبخ شفت اسامه واكف من شباك المطبخ يعاين علينه غسلت الاستكانات ورتبت المطبخ بعده واگف وراي ماتحرك ارتبكت وكع استكان بالكاع انكسر دنگت المه ركض لزم ايدي عوفي اني اشيله لاتتعورين بقة يعاين على صدري من الدشداشه طلع من دنكت گمت غسلت ايديه وركضت لفوك كلش خفت من نظراته وتصرفاته
بقيت بالغرفه مانزلت تسليت بالتلفزيون ياربي لو حسام مخلي الموبايل جان خابرت اهلي وتسليت وياهم حضرت ملابسي كوستمي الذهبي وتمكيجت وادندن باغاني من التلفزيون واركص صار وكت جيه حسام اجه تعبان شافني زمخ بيه شنو هالمكياج أن شاء الله تردين تتطلعين هيجاولا الله يساعدك ثانيا شبيك ياعيني غير عروس
امشي غسلي ولچ مالي خلگج عروس بغرفتج مو بالشارع غير اگطعه اللي يعاين عليج
اف طلعت من الغرفه دفعت باب الحمام ودخلت لكيت اسامه مخلي معجون حلاقه ودا يحلق بلحيته بدون ملابس بس شورت قصير لابس
رجعت خطوه شهكت ودنكت شكد خجلت
اسفه اسامه عبالي الحمام فارغ
ضحك وگلي تعالي زينه
شنو !
...
يتبع ...
