اللي سمعته من خالاتي وبناتهن وحتى عبير ومنار ورؤى زوجه احمد يختلف عن اللي عشته ويه حسام ماحاسه بأمان وخايفه منه واحسه تزوجني بس حتى يرضي رغبته وشهوته
الليله الاولى اللي قضيتها وياه اسوء ليله مرت عليه بحياتي
كل شويه افز وارجع انام ماصدكت شوكت صار الصبح فتحت عيوني شفت الساعه بالسبعه الصبح لكيته متمدد بالكاع بنفس مكانه البارحه مگابل التلفزيون واني ع الجربايه
الحمد لله أمنت لان مارجع وتقربلي مره لخ
تسحبت ببطء لبست گلبيه وردي وحجاب ابيض ونزلت من الغرفه كلشي مااندل مالحكت اشوف البيت وجنت جوعانه كلش من الغدة اللي تغديته عد اهلي ماكلت بعد
البيت مالهم بناءة قديم وصغير وين بيتنه شكد اختلاف بالاثاث والبناء وهذا حتى مبهذل الطابق الفوك غرفتين وحمام صغير ودرج للسطح ودرج نازل نزلت لجوة سمعت صوت بالمطبخ نسوان يحجن وريحه جكاير رجعت صعدت خفت يستلموني اسئله
يربي جوعانه شاكل دورت بالغرفه ماكو شي ام اسامه منزله الاكل وحتى چكليت ماكو
ترددت اكعده لحسام نايم وفاتح حلكه عبالك سنه منايم شغلت التلفزيون گلبت بالقنوات ونصيت الصوت لايگعد سمعت صوت برة حسام حسام تقربت منه وندسته حسام گوم رايديك برة فز وجرني من شعري
آي حسام شبيك !
ولچ ليش عفتيني هنا تكسرت خرب يومچ ليش ماگعدتيني ؟
دفعني وگام لبس دشداشة وطلع
يربي شلون بي هذا ليش هيچ يعاملني !
طلع غير شكل وين جان معدل ومرتب مافد يوم سمعته بالشارع حجه ولا اي واحد شكى منه بالمنطقه
بين على حقيقته وين الهدوء اللي جان عده قبل الزواج !
جنت اسمي صنم وماما عاجبها خبصتني بي أخلاقه هسه ظهرت وطلعت سوالفه الحقيقة
بقيتة الوج مارجع حسام سمعت صوت نسوان كمت وگفت انفتحت باب الغرفة دخلت خالتي ام عبير وبيدها جنطه هدايا وام اسامه بيدها صينيه ريوگ وچاي وحليب
طفرت شبگت خالتي وصحت خاله وين ماما وكمشت بيها يالله شكد اشتاقيتلها كأنما فاركتها سنه واني البارحه عفتها
ام اسامه خلت الريوگ بالگاع خالتي اشرتلها طلعت راحت وراهه قفلت الباب
خاله فدوة اروح لج اخذيني وياج حبابه ماريد ابقى هنا
احچي وارجف
ماما اهدي شبيج خالاتي مو هيچ يابنيتي اگعدي اگعدي نتريگ واحچيلي
ياربي صدك ميته جوع گعدنه واكلت گيمر عرب ومربه تفاح شغل ماما دائما تسويلنه وتضم كل موسم بموسمه الفواكه يجنن الطعم كملت صدك جنت جوعانه بعدها حچيت لخالتي كلشي ضحكت وبقت تغمزلي وتكرص بيه وتضحك
خاله اكلج همجي متوحش
فهميني يبعد خالتچ اهدي كلهم هيج بالبدايه بعدين يعطلون عن العمل وضحكت
صفنت وكلشي ماافتهمت
خاله حبابه اريد ماما ليش مااجت
ماما اهدي امچ جابت الريوگ ورجعت تطبخ الغدة ودا تحضر لسفر بابا كم يوم ويسافر وبيتكم بعدة ماخلى من الخطار
سمعيني وصيري عاقله وناضجه تكدرين تسيطرين عليه مدامه ميت عليج وهاويج ومبين ماشايف ولا لازم مرة قبلج
بقت خالتي تحجي حجي جبير وقوي كوة استوعبت غيرت فكرتي كليا واني ببالي ارجع لاهلي ماظل يمه بعد ليله ثانيه ع اللي سواه البارحه
هدأتني ووعدتني ليوم السبعه تجي تاخذني وابات عدهم يم ماما واخواني ويسوولي حفله ببيت اهلي وكلشي ح يكون بخير بس أتعلم شلون اتعامل وياه واسيطر عليه
راحت خالتي للظهر بقيت وحدي بالغرفه محد صعد وحسام هم بقه جوة مااعرف گرايبهم وناس عدهم للثلاثه الظهر صعدت رنا اخت حسام جابتلي صينيه صغيره بيها ماعون برياني لحم وروبه وخبز وخضرة كالت زينه هذا غداچ أكلي حسام مشغول راح اخذله ملابسه ومناشف خذتهن ونزلت اني هم فرحت لان ارتاح منه اكلت الاكل كله ياربي شگد طيب بي ريحه ماما ونفسها الطيبه وشكد اشتاقيتلها لماما ياربي شوكت اشوفها
بدلت ملابسي وشغلت التلفزيون ورتبت الغرفه ضفت لمسات جديده وفتحت البردات والشبابيك وعطرتها وشغلت اغاني بالستلايت عجبني ارگص تأكدت من الباب مسدود رگصت وهز للگاع بيوم عرس اخواني مارگصت هيج صدگ غيرت شويه وارتاحت نفسيتي
شفت الوقت تأخر للمغرب عركت
اخذت مناشف وملابسي وطلعت فتحت الباب سمعت حركه قريبه بالدرج خيال دشداشة رصاصي مانتبهت ولاركزت لشكله
رحت للحمام سبحت تأخرت نص ساعة تقريبا ورجعت للغرفه لكيت الباب مفتوح دخلت ادندن باغنيه ... تفاجات الفرشه اللي على الچربايه مخربطه والمخاديد مطشرة والكنتور مفتوح وغراضي اللي على ميز المرايه المكياج والعطور كلها مخربطه ومفتوحه حتى العطر راشين منه
شنو هاي ياستار منو هيج مسوي !
سديت باب الغرفة اندكت فزيت گلت منو !
رنا گالت اني زينه اجيت اخذ الصينيه واخلي ملابس حسام
فتحت الباب دخلت
الله زينه من تسبحين وجهج يضوي صلوات على محمد
ابتسمت
خذت الصينيه وطلعت
ظل ببالي وبقيت محتارة منو هيج مسوي بغرفتي اقل من نص ساعه سبحت بيها وهيج صار بغرفتينشفت ومشطت شعري وبدلت سمعت صوت حسام دك باب الغرفة ركضت فتحتها مخنزر عليه لج ليش قافله الباب !
هاا حسام تأخرت عليه من الصبح شنو من عريس دفعني وفات
شتردين اگابلج وأكعد !
لا عيني براحتك
منو جان جوة ؟
مالج شغل تعاي مرغيلي رجليه
هااا !
شبيج ماشايفه امج تمرغ لابوج؟
تمرغ شنو
ولج تدليك يعني
ها اي اشوفها دائما تتدلك لبابا
اي تعاي يالا
اي ليش لا
جان متمدد على الچربايه بالشورت نزلت ادلك رجليه شفته استرخه وارتاح
اكلك حسام
ها !
منو عدكم بالبيت اكو واحد صعد لغرفتنه اليوم وخربط الغراض بيها طفر من مكانه ورفسني ببطني
شنو ولج شتقصدين اهلي يدورون بغراضج !
من عابتلج يلا وخري سديتي نفسي
شبيك حسام ليش هيج تحجي وياي !
بعدين مو قصدي
لا قصدچ
جرني من متني وخنزر عليه
سمعيني يبت التاجر مو عبالج تتفضلين عليه وعلى اهلي بالكم غرض اللي جابهن ابوج والذهب انسي ولاتفكرين بعد بخيرهم تعيشين حالج من حالنه على الخبز والتمر ويوم اكو غدة يوم ماكو افتهمتي ؟؟؟
... يتبع
