بدت تحضيرات زواج اخويه نبراس وجان كلشي بسرعه لان الوضع مخربط وقصف وهاونات وكل فتره يدخلون على البيوت مداهمات وتفتيش على الحزبيين حتى مااشتريت ملابس جديده نفس بدلتي اللي لبستها بزواج فراس وخالاتي أجن قبل يوم وتحضرنه وصار عرسه بالبيت زوجه اركان أجت وي مرت عمي سمعتها تشكي منها لان ماصار عدها حمل واركان معاند يريد يسافر للخارج ومشاكل ومامرتاحين
ليش هو منو المرتاح ياريت ماما واخواني يطيعون بابا ونعوف بغداد نسافر من العراق ونرتاح تعبت من سالفه لسالفه حتى نومتنه قلقه ومنا أجت سالفه جيراننه الجدد والولد حسام اللي خابصتني ماما بي شحلاته وشطوله
ام اسامه جانت معزومه للعرس وكأنما وحده من العائله لزمت المطبخ وطلعتنه كالت كلشي عليه انتن اهتمن بالخطار والمعازيم وفعلا موقفها حلو لان ساعدتنه وجننه مخبوصين وماما كلش تحبها لام اسامه وتحمد بيها كدام خالاتي
رنا بنتها بالسادس الابتدائي كل شويه تحجيلي عن حسام وترغبني بي
زوجة اركان ماخلصت منها هم ببالها اركان جان رايدني وتعاين عليه بحقد ماخلصت هوسه العرس الا وراسي شكبرة صار والحمد لله ماصار شي وتم ع خير
كرايبنه كلهم طلعوا والعرسان صعدوا لغرفتهم بقت ام اسامه تعزل البيت ويه ماما وكالت باجر بليل نزوركم حسام يريد يشوفها لزنزون ماما رحبت بيها وانخبصت وفرحت
الصبح كعدتني من وكت جابتلي كوستم احمر من عبير دخلت سبحت ولبسته ورتبت نفسي للموعد وخليت حجاب على راسي اجوا الجماعه سلمت على ابو اسامه رجال جبير كلش شايب ومبهذل وام اسامه طايرة من الفرحه وحسام لابس قميص اسود وبنطرون كابوي ازرك ماركزت ببوجهه وهو هم واضح عليه الخجل مدنك كعدت كباله ربع ساعه ماشال عينه وباوعلي ابد ماما اشرتلي احط العصير كدامه كوة فهمت عليها كمت عثرت بالزوليه ابو اسامه طفر وصاح اسم الله بويه
شفته الولد حسام شال راسه وضحك ورجع دنك
شكد عيب خجلت من الكل بس شفت عيونه صدك خضر فاتح وملامحه كلش حلوه واحلى شي ضحكته حطيت العصير كباله عاين لصدري وتنحنح
خجلت اكثر وفلتت للمطبخ بسرعه بقت نضراته ببالي معقوله هذا ح يصير زوجي ونجتمع سوة ببيت واحد !
من طلعوا بابا جان معاجبه الوضع لان الجماعه ببيت للايجار وحالتهم الماديه ضعيفه ماما بقت تتذكرة بنفسها وتكله ها ابو فراس عرفت هسة ليش ماردت تصير عدنه بنيه !
تتذكر جدي وابويه الله يرحمهم شسووا بيك وبأهلك يالا صرت من نصيبك !
حديثهم طال واني جنت مستمعه ومتحمسه
وبيومها قلبي انقبض كلش خايفه
مالي رأي بالموضوع ومااكدر ارفض بس طلبت من بابا انو يشترط عليهم اكمل دراستي ع الاقل
مر أسبوع وماما مشغوله بالخطار وبالعرسان وام أسامه مافاركتنه اذا متجي الصبح تجي العصر واذا تتأخر ماما تتدز حيدر يصيحها
بعد الاسبوع ام اسامه بالحديقه سمعتها تحجي ويه بابا وتكله اريد افرح بابني وماعدي احد وبيتي فارغ وهيه ام البيت وسوالف نسوان وترغيبات بابا انحرج منها وكللها يصير خير أن شاء الله
ماما ماطلبت شي منهم وماعرف شيجيبون من تجهيزات تكفلت بالشغله ماما وخالتي طلعن اشترن الذهب وكم شغله واني بمكاني بالبيت
بدون حساب ولا تحديد وقت ماحس الا يوم العقد وجابوا شيخ للبيت بنات خالتي اجن رتبن شعري ع السريع ومكياج
وكوستم ابيض وشال ابيض وتور فوكه و الكل هلاهل وركص وفرحانات وعبير ومنار زوجه نبراس طايرات من الفرحه مااعرف شنو الموضوع صدگ مثل الاطرش بالزفه
الشيخ من ورة الباب صاحني وسألني موافقه ؟
ماما شاورتني كولي نعم كلت وصعدت الهلاهل طلعوني للصاله كراسي كوة امشي الحذاء عاليه كلش
وخجلانه من بابا وعمي وازواج خالاتي واخواني متت من الخجل
وصلت حسام لزم ايدي ماشفته شلابس التور ثخين وارتبكت لبسني الحلقه وساعه وسوار ذهب وباسني براسي شميت عطرة رجفت بعدين كعدنه رفعوا التور انتبهت للولد اللي دك الباب وطلب نفط صار كبالي مباشره وعيونه تتطلع شرار تخوف بعدين عرفت بي هذا اسامه أخو حسام الجبير حسام جان مرتبك لان ماعاين عليه ولاتقرب مني شربوا العصير ماتأخروا وطلعوا حسيت بنفسي غير شكل اخواني مقهورين عليه لان ح يفاركوني بوسوني وحضنوني كلهم
حيدر جانت عيوننه تدمع وبابا هم
ماما گلتلهم قريبه علينه من نشتاقلها نزورها لو تجينه شبيكم حزنتوا
يمكن لهالسبب ماما وافقت مارادتني ابعد عنها واظل قريبه منها بعد الزواج
بهالفتره مالتقيت بحسام ولاحجينه ماعدهم تلفون ارضي ورة اسبوع بابا كال نعقد بالمحكمه ياخذنه بسيارته اني وحسام هنا تحمست توقعت نتعرف
ع بعض
من رحنا كعدت بالكشن الورة وحسام بالصدر يعني ماصارلي مجال احجي وياه وتفشلت
بس سمعت صوته وسوالفه ويه بابا مرتب ومعدل دخلنه للمحكمه نبراس محضر كلشي بس وقعت وبصمت وطلعت رجعت للسيارة كعدت فتحت الجامه وعيني على كل اثنين داخلين للمحكمه يعقدون وعوائلهم وياهم شكد حلوين يضحكون ويتشاقون
لعد اني ليش هيج ؟
شو هذا ساكت
وماحچه وياي ولا كلمه !
...يتبع
