شكد حلوه ريحه الأم وشكثر طيب عطرها ..
الاب البر الآمن والإخوان سور وحصن ..
تيقنت محد يحافظ عليه غيرهم
وماحس بالأمان غير بحضن ماما وبظل بابا واخواني
..
فتحت عيوني شهكت خالاتي وماما يم راسي ع الجربايه وعيونهم مورمه من البجي
الظاهر جنت نايمه بس شو راسي يوجعني وبطني ودايخه
ماما شكو ليش تبجون !!
ماما دنكت ومسحت دموعها ماكو شي حبيبتي أزمه وعدت وان شاء الله حقج مايضيع شلت راسي من المخده
اااخ جسمي ليش هيج مكسر ريحة ديتول معقم قويه وأدوية ع الميز وأبر
شنو الموضوع ؟
خالتي ام عبير أشرت لماما وخالاتي الباقيات طلعن كامت وراهن سدت الباب فتحت عيوني أكثر هاي غرفتي !
خاله منو جابني هنا !
حسام وين !
شصار !!
رجعتلي الأحداث ببالي لزمت راسي شعري محلول ولابسه دشداشه من ملابسي القديمة وكانونه بيدي بالوريد
اتذكرت لزمتني الرجفه
صرخت
خالتي حضنتي دفعتها وأصرخ وارجف
فتحت العلاج وطلعت أبره
صاحت ماما أجت ماما بسرعة لزمتني وخالتي ضربتني الابره
بقيت أصرخ واون تذكرت اللي صار بلحظات ..
تذكرت كلشي
حسيت بنعاس ودخت الظاهر هاي الابره فاليوم لو مهدئ لأن ارتخيت اسمع بجي ماما وخالاتي غفيت بس اسمع كلامهن
يكولن سوده ببوجهه
الله ينتقم منه
الله ينتقم منهم كلهم
وفعلا الله انتقم منهم واخذلي بحقي منهم بسرعه ..
بعد اللي صار اغمى عليه وطلعتني ام أسامه وأخذتني لأهلي واخواني وبابا هجموا على بيت ابو اسامة والجيران التمت بهالاثناء رجع حسام وصار جدال بينهم وضربوا أسامه شبع كتل منهم
حسام من الصدمه دخل للبيت طلع سلاح ورجع ضرب اخو طلقه برأسه مات بمكانه والشرطه وصلت والدنيا انكلبت بعد تحقيقات وأكثر من قضيه طولت
ونبراس اللي تكفل بقضيتي باعتباره محامي وتقارير بالمستشفى سوولي فحوصات ع اساس اعتداء واغتصاب ولجنه وتحاليل ومن حسن حظي الحمد لله صار عدي إسقاط للحمل بساعتها مات الطفل برحمي وخلصت من كلشي متعلق بيهم
نبراس رفع دعوه طلاق على حسام بقت القضيه بالمحكمة
مشاكل وفضايح بالمنطقه وقال وقيل لمده شهرين ابو أسامه اعترف بأن هو اللي قتل أسامه ويمكن هاي الحسنه الوحيدة اللي سواهه
ام أسامة ورنا رجعوا لبيتهم بمنطقه الثوره اللي صار اسمها مدينه الصدر وحسام جن جنونه وشرد
اختفى ومحد يعرف عنه شيء
القاضي حكملي بالطلاق بعد شهرين ضاعن من عمري وي حسام وعائلته المجانين وشهرين بعد الحادثة انتظرت الحكم حتى احصل على حريتي وإثبات براءتي وعزة نفسي گدام العالم
..
تعالجت من الصدمه وبعد ماخلصت العدة بابا وماما خذوني سفره لإيران وسوريا ولبنان زياره وسياحه بقينه شهرين هناك وزرنه فراس مأجر شقه ورجعنه للعراق
تعافيت جزءيا رغم الكوابيس والأحلام اللي بقت آثارها ومانمحت وخوفي من كل خيال يمر من يمي ومن كل شخص غريب يشبه صوت حسام لو إسمه لو حتى يدحجني بالغلط أفز احس برهبه وخوف واتذكر اللي صار
بس بمرور الوقت صرت قويه بمساعدة ماما وبابا واخواني وكل اللي يحبوني تقويت ماكو شي يظل على حاله
رجعت من السفر نشطه وقويه
وبعد سنه رجعت كملت الثالث متوسط ونجحت سنة وره سنه وتفوقت ودخلت كليه هندسه حاسبات وماكنت اختلط بأي شاب انعزلت عن كل الطلاب والطالبات والكل صار يحسبلي حساب
توعدت نفسي مااوافق على أي ناس يحجون بطاري الزواج نهائي
كرست نفسي للنجاح واشترالي بابا موبايل ولابتوب وانشغلت بمواقع التواصل الاجتماعي وكونت حياة مستقله عن الواقع خاصة بيه وحدي
تعلمت هواي شغلات من السنين الراحت صارت عندي خبره بالتعامل مع الآخرين التجربه الماضية والقاسيه خلتني قويه وبشخصيه مميزه ...
يتبع.....
