من رجعت لبيت أهل حسام لحد هاللحضة اختنكت حسام انتقم مني لأن عفته وبتت ليله عد اهلي بحيث توني اروح لأهلي وماانطاني مجال اناقش لو اعترض
من تاكدت منه نام وقت الغروب طلعت من غرفتي للسطح اريد اشتم الهوة اختنكت عادي اني بدون حجاب عدهم ومكياج وعطر وشعري مفتوح على متوني وبقميص النوم بس من اطلع من الغرفه البس قميص نوم ردان وطويل ومرات الروب
اسامه بقى يعاين عليه برغبه من شافني وهالشي واضح بعيونه
لفيت نفسي ورجعت خطوات لورة سمعت صوت حسام يصرخ بكل قوته
زينه ..زينه
اسامه دار وجهه لغرفتي اني فلتت من يمه وركضت لحكني فتحت الباب طلع حسام ببوجهي وجرني من متني لچ وين رحتي شال راسه انتبه لاسامه وراي بمسافه خنزر عليه ودفعني للغرفه وطبگ الباب كل قوته الصوت سد اذاني
وين طلعتي ؟
رجفت وكتله حسام شبيك جنت دا اروح الحمام
جرني من إذني سمعي لج مالج شغل باي واحد عايش هنا وخاصه اسامه ومرته افتهمتي !
اي اي افتهمت ايدك فدوة اذيتني لا تنگطع إذني
وخر أيده وشبگني حييل وبقى يشم برگبتي ويهمس أكطمها اذانج مرة ثانية اذا تخالفين اوامري هزيت براسي اي أن شاء الله ماخالفك بس اهدة
بدلي دشداشة طويله حتى ننزل جوة نتعشى
صار
فتحت الكنتور چان يطلع صوت موسيقى من جنطتي
التفتت شفته مخنزر
زينه شنو هالصوت !
منين طلع !
حسام نسيت اكلك هذا نقال موبايل بابا اشتراه ألي
شنو !
اخذ الجنطه فتحها بسرعه وطشر الغراض بالكاع وطلعه طلع مكتوب حيدر ورقم
لچ زينه من الصبح جايبته بجنطتج ليش مكلتي ؟
صرخ ودفعني لباب الكنتور ولف شعري بيده كم مرة كتلج لاتمنين عليه بغراض ابوج واملاكه ومتفضله عليه جايبتلي جهاز موبايل بنت ال ..
بجيت
حسام والله ردت اكلك بس نسيت
اني اعلمج بنت ال ..
دفعني وطلع من الغرفه لطمت على وجهي دخيلك ربي شراح يسوي هالمخبل جسمي يرجف وطلعت وراه اصرخ حسام .. حسام دقيقه وين رايح صار اسامه ببوجهي يمكن چان يتصنت شفته مدهوش اشرلي شكو !
مارديت ونزلت ركض من الدرج شفت ام اسامه
خاله وين حسام ؟
اسم الله يوم شبيج وجهج اصفر حسام طلع بالشارع
ابو اسامه بيدة بطل شرب وكاعد بالصاله ويصفگ هالله هالله علگت بت التاجر وي الخبل
گتله بداخلي باع شيحجي هذا ابو الخبل الله لايوفقكم عائله مخابيل
سمعت صوت اسامه وياه بالباب كله معليك افتهمت دفعه ودخل لجوة اسامه لحكه جر قميصه لك دا حاجيك ابن ال ..
افتر حسام وضربه بوكس ام اسامه تصرخ وأني بس الرجفه لزمتني أجت مرته لاسامه وكفت بينهم وتصيح صلوا على محمد شبيكم
حسام اشرلي امشي لج كدامي
يربي غير عدي رجلين واكدر امشي يرجفن استلمني تتدفع مااعرف شلون صعدت
ظل يشتم ويكفر ويسب نزعني ومزك السيت اللابسته
بت ال ..
اخر مرة تنزلين جوة مامحتشمه ومصلخه افتهمتي لبسي دشداشة طويله يلا
طلعت دشداشة لبست ودموعي تجري
لاتگلبيها مناحه افتهمتي موبايل ورجعته وممنوع تجيبين اي شغله بدون علمي افتهمي ترة احرگ اهلج واطيح حظج
گعدت بالكاع رجليه متشيلني شنو هالعيشه والحكم والضيم عمري ماشفت ولاسمعت اكو هيج بشر وشنو هالالفاظ والتعامل بين الاخوان عندي خمس اخوان ولا مرة شفتهم تعاركوا ولا حتى بالمزح
دقايق سمعت صوت جوة هوسه فتح الباب حسام ونزل سحلت نفسي سحل مابيه حيل بعد الهبطه سمعت صوت ماما صرخت ماما وركض بعدني ماكملت الدرج ماخلوها تدخل ابو اسامه سكران وظل يشتم ويسب بيها ام اسامه تكلها فدوة اروح لج طلعي هسه بعدين نتفاهم واسامه يصرخ وحسام يصرخ حتى بعد ماافتهم الحجي ولااميز شيحجون دخت وگعت من كم درجه فتحت عيوني شفت اسامه شايلني وماما تبجي حسام دفعه واخذني من عندة وصعدني لفوك خلاني على الجربايه
رنا جابتلي عصير ماما يمي لزمت ايدها وحجيت بهمس يوم ماريد الموبايل فدوة سببلي مشاكل روحي انتي هسة ومن يرجع بابا من السفر يجي ياخذني
حسام صرخ شنو لج شنو ياخذج اني رجلج واذا طلعتي منا اكسر رجلج
ماما خانگتها العبرة شبكتني
يوم ارتاحي هسه واذا شفتي نفسج بعدج دايخه اخذج للمستشفى
حسام صرخ لا مستشفى شنو مابيها شي روحي انتي هسه تكوم وترجع احسن من قبل
ام اسامه اشرت لماما كامت والحسرة بعيونها
وكفت كباله حسام خاله دير بالك عليها واني باجر الصبح جايه اشوفها
طلعت ماما بقينه وحدنه حسيت بي ح ينتقم مني من نظراته الحاقدة ظل يشمر بالحچي تمددت وتجاهلته گام شغل التلفزيون وكل شويه يگول اف و اف
اختصرت السالفه وتنازلت ماريد احد من اهلي ينهان بسببي لو يتعرض للسب والشتم من هيج همج
وحسام اعرف شلون ارضي اعرف نقطه ضعفه
قضينه وقت طويل بالفراش وعدت الليله على خير للصبح طلع للشغل وصاني مااوصل لباب البيت ووصى امه وطلع اني هم تصرفت بعقل ساعدت ام اسامه وسوسن بالطبخ والتنظيف رناوي مكابله التلفزيون والمسلسلات حافظتها وحافظه اسماء الفنانين وسوسن سوالفها حلوة حاولت اتأقلم وياهم أجت ماما وبقت تعاتب بام اسامه طلبت منها متتدخل بحياتي كدامهم شفتها ضاجت ومن طلعت لحكتها للباب بستها وشبكتها وبجيتيوم فدوة اروح لج ذوله ناس همج ولسانهم متبري منهم زين البارحه ابو اسامه يفشر عليج !
اووف يبنيتي امده حظي وحظج منين طلعلونه طلعت رواحهم
شاورتها يوم الله يخليج لاتسولفين لاخواني ولا لبابا ترة تصير مشاكل واني ارتب الوضع راحت ماما رجعت تلكتني ام اسامه عفيه عليج بنيتي هيج اريدج طيعي رجالج وامج واهلج مايتدخلون بحياتج وان شاء الله حياتج سعيده
ابتسمت وبداخلي أكول سعيدة وي عائله المخابيل عفتها وصعدت فوگ رتبت للغرفه وبدلت وتمكيجت وتعطرت قريب جيته لحسام التفتت الباب مردود ولاحسيت اسامه واكف ويعاين عليه !
...
يتبع ...
