من البدايه حسيت بغرابه .. بشي مختلف وموطبيعي
ليش هيج حسام يتصرف !
بقيت وحدي بالغرفه
وخرت الغشاوة التور شفت الغرفه حلوة بس مو بضخامة غرف نوم اخواني بسيطه ومرتبه بس صغيره مو جبيرة وبابا مجهزها بالهدايا اللي جابها وطلعها وراي من تلفزيون وستلايت وتبريد وفراشات وزوالي
دقايق صعدت ام اسامه جابت صينيه مغطيتها بقماش ابيض خلتها بالكاع گالت خاله هذا عشاكم وحسام يتعطل دا يزفونه ربعه وصحبانه انتي دخلي للحمام اذا تحبين وبدلي
استغربت اكثر
شنو هذا نظام جديد بالعرس !
المفروض يصعد وياي و يجي هو وينزعني غير عرسان !
مارديت عليها ولااعترضت كمت كدام المرايه نزعت الذهب والاكسسوارات اللي براسي خليتهن بصندوگ وغراضي كلهن مرتبات من قبل يوم خالتي محضرتهن ومرتبتهن گعدت على الكرسي عاينت وجهي بالمرايه شلون طالعه زنزون شكد مغيره بيج الحفافه والمكياج وطالعه اكبر من عمري تحسرت وتمنيت هواي شغلات مثل اللي جنت اشوفها بالافلام والمسلسلات
سرحت بخيالي دقايق ..
ماحسيت بالوقت ..
اسمع صوت بعيد بالشارع هوسات وچيلات بنادق الظاهر بعدهم دايزفونه
فتحت الدولاب وطلعت قمصان النوم ماما موصيتني البس الابيض بس اني طلعت الاسود هيه ليله سودة من اولها بس القميص الاسود جان كلش حلو وبي شغل تور لماع وشيفون ودناديش بعدني دا البس فتح الباب حسام صار گبالي سد الباب وتنحنح
بدة ينزع اني عدلت نفسي ودرت وجهي عنه گلي جوعانه ؟
لا مااشتهي
تنحنح .. متأكدة ؟
التفتت شفته نازع كلشي باقي بالشورت شگد خجلت
تعاي زينه خل ناكل اني جوعان
واخيرا سمعت منه جمله مفيده
هزيت براسي وگعدت بالگاع ماعدهم ميز طعام فتحت الاكل دجاج مشوي وحلويات كعد بصفي لزم ايدي عصرها وخنزر عيونه كبار كلش وملامحمه بينت اقترب مني وسحبني بقوة اول مره انتبه خشمه جبير وشواربه بيهن لون وشفايفه كبار خفت منه كلش
حسام فدوة ايدي ح تنكسر
ضحك ودفعني ورجع لمكانه
ضجت من تصرفه هذا وانسدت نفسي عن الاكل
بلش ياكل بشراهه ويعاين على جسمي واني كلشي ماكلت من الهبطه مسح حلكه وايديه بقطعه القماش البيضه واشرلي اكوم للجربايه وفاتح عيونه وحلكه عليه كمت وخايفه منه وبعدني بداخلي اتمنى من كل قلبي يصير حدث ينهي هالتمثيليه السخيفه ياربي حتى لو الامريكان يسوون مداهمه يفتشون يقصفون المنطقه بس مايتقرب مني
كام قفل باب الغرفة ونزع الشورت وهجم عليه اضعاف الشراهه اللي شفتها منه من أكل واني من الخوف جمدت
غمضت واحس كل مكان بجسمي متعرض لصعقه كهربائيه مااعرف شگد من الوقت كمل وشمر عليه الفرشه وطلع
فتحت عيوني حسيت الكحل والمسكارة ساحت وغوشت عليه الشوف
دخت ..
لفيت نفسي وبمكاني ارجف ماتحركت وماعرف شسوي دخلت ام اسامه تهلهل صميت اذاني دوختني أكثر
اشم ريحه مو طيبه بجسمي
اخذت نفس قوي وكتلها خاله فدوة وين ماما ؟
بنتي هنا اني امچ انسي امج واهلج
شششنو !
اريد امي روحي صيحيها هسه
أششش خاله سكتي لايسمعوج ويطيحون حظي اني وياچ
خنگتني العبرة استغربت من كلامها
وسكتت مارديت عليها
بس بداخلي أكول هاي شداتحچي !
وماما شلون تعوفني وتروح لاهيه ولاوحده من خالاتي ع الاقل نسوان اخواني اي وحده يربي ليش هيج !
سحبت الفرشه اللي جواي وانطتني روب احمر طويل لبسته وخذتني بيدها من الباب طلعت ماادري شلون مشيت اكو حمام مسافه عن غرفتي دخلتني وگالت انتظرج بالباب من تكملين صيحيني
نزعت ماكو بانيو بس حوض صغير وطبله ومرايه صغيره شفت وجهي شلون مبهذله عبالك محتركه
بجيت بس خليت ايدي على حلكي خفت تسمعني ام اسامه سبحت وتمنيت مااطلع من الحمام تمنيت اغمض وافتح يطلع هذا كله كابوس وارجع بغرفتي وببيت بابا واسمع صوت اخواني وصوت شهد اشتاقيتلهم كلهم تندمت ياربي شسوي هسه
معقوله هذا مصيري
هيج أعيش بقيه حياتي
وي وحش مثل حسام !
تندمت ..بس بعد شيفيد الندم
طلعت لكيتها منتظرتني وهم رجعت هلهلت دخلتني للغرفه لكيت حسام گاعد وياكل فواكه ومشغل التلفزيون مخلي على قنوات رياضه وعالي الصوت حتى منتبه من دخلت زحفت للجربايه وتلفلفت لزمتني الرجفه وتحلفت بي ابن امه بعد ويتقرب مني مرة لخ الا انتقم منه ..
يتبع ...
