حاليا احنا بال ٢٠٠٤ والوضع الامني كلش موزين واحداث هواي صارت بالعراق وخاصه ببغداد دمار نفسي ماذكرتها اللي ذكرته فقط مايتعلق بيه اني وعائلتي
بعد ما خلصت هالسنه نجحت لثالث متوسط والحمد لله بعد معاناة ونجاحي ماكان بتفوق نجاح عادي والسلام المهم عبرت هالمرحله اللي قضيت بيها سنتين خسرتهن من عمري
بابا واخواني كلهم جابولي هدايا وفرحوا بيه وام اسامه جابتلي قطعه قماش عود فرحت بنجاحي ورجعت تلح على موضوع الزواج
كنت اتمنى يصير حدث يلغي هالزواج مامرتاحه وماريد اكمل بهالطريق
اكثر من سنه واني متزوجه شخص لاملتقين ولا حاجي وياي ولااعرف عنه شي بالعكس احس بخوف منه ولمجرد ينذكر كدامي احس بروحي رايحه لامتحان صعب لو مقابله مديرتنة بالمدرسه من تعاقب الطالبات
ابو اسامه توسط عد عمي وعمي زارنه وقرروا يحددون موعد الزواج بس بعد زواج اخواني محمد واحمد
سمعت من عمي يكول اركان كمل دراسته بالكليه العسكريه للضباط ولحد الان مصار عنده طفل واحتمال يسافرون لإيران هو وزوجته علمود علاج
محمد الوحيد باخواني اللي كدر يوكف بوجه ماما ويفرض رأيه ويختار البنت اللي ح تكون شريكه حياته
السالفه هاي ماكانت ايجابيه بالعكس ثارت مشاكل بالعائله وخاصه بالنسبه لفراس
فراس قبل سنتين طلب من ماما تخطبله زميلته بالجامعه وماما رفضت وبعد ولادة عبير تغيرت علاقته بيها وبدت تصير مشاكل بينهم ودائما يتعاركون وتزعل عبير وتروح لبيت اهلها رغم ما كلنه متعلقين بشهودة الصغيره من سنين ماصار طفل بالبيت وشهودة ملت علينه الدنيا ومن تروح كلنه نحس بفراغ بس فراس زودها وماعجبه يبقى على زواجه
ماما وبابا دائما على خلاف وياه بكل وقت والمشاكل زادت
اشتغل بصيدليه بالليل ويرجع متاخر
يعني منشوفه بالبيت قله حتى ايام العطل يطلع لحد مافاجأنه انه يريد يسافر للبنان ايفاد ويبقى هناك وسافر بدون مايودع زوجته عبير ولاحضر زواج احمد ومحمد
بعد سفر فراس ماما مقبلت تبقى عبير عند اهلها ورجعتها لان تعلقنه بشهودة كبرت وسوالفها حلت وتعودنه على وجودها بالبيت
بابا وعمو ابو اركان متفقين يسافرون تجارة وسياحه وخاصه بعد انفتاح العراق للسفر لدول العالم بس بعد زواجي يسافرون
بعد شهر من زواج احمد ومحمد اتضح أن زوجته لمحمد عدها اقرباء بامريكا وبقت تلح على محمد تطلع لامريكا وبعدين تتدز عليه ويشتغلون هناك باعتبار عدهم شهادة بكلية الاداب الانكليزي ويحصلون وضيفه هناك وهذا الموضوع خبلها لماما والبيت صار مينطاق من المشاكل وماما تعاركت ويه زوجته لمحمد وطردتها من البيت
اني جنت مااتدخل نهائيا بس متعجبني تصرفات ماما وتحكمها بالكل واخواني كبروا بس هيه متسمحلهم ياخذون راحتهم واللي يقهر فراس المسكين اللي منعرف عنه شي بسببها
نهايه شهر ايلول تحدد موعد زواجي اني وحسام لان بابا وعمو مقررين يسافرون بشهر تشرين الاول
العرس كله جان على حساب بابا تكفل بكلشي وماتذمر بالعكس افتخر بهالشي لان بنته الوحيدة والمدلله ورفع راسي كدام الناس وعيالي اللي كنت خايفه منهم ولحد يوم الزفه ادعو الله يسبب سبب ومايتم الزواج
تمنيت فراس يحضر عرسي اشتاقيتله وبجيت على فراگه بس خالاتي ماقبلن هدأني كالن ميصلح وفال موزين عليه ابجي بهاليوم
رحت للصالون ولبست البدله البيضه والذهب وهناك اخذت هواي صور وحدي وويه شهوده وخالاتي وبناتهن وماما وزوجات اخواني بس مرت محمد زعلانه عد اهلها ماحضرت
من الصالون نبراس اخذني بسيارته للبيت بالصاله العائله كلها مجتمعه انتبهت زوجه اركان صايرة غير شكل ضعفانه وحقدها واضح من عيونها ميته قهر تجاهلتها معذورة يمكن اركان حارگ دمها بيه
رگصوني وزفوني والكل فرحان بس اني گلبي مقبوض
للمغرب دخل بابا وعمو باسوني وطلعوني للطارمه بالحديقه منتظرين اهل حسام لبسوني الغشاوة البيضه على راسي ويرشون عليه مااعرف شنو هذا البخاخ الابيض وورد وجكليت وصلت يم أبو اسامه لزم ايدي وباسني براسي وطلع بالشارع جايبين فرقه يعزفون طبل ومزمار والهلاهل وهوسه وحسام وشباب هواي موجودين مااعرفهم البيت مسافه امتار كبالنه مادخلنه بقينه بالباب ومصور موجود اخذلنه صور اني على لفتي البدله ردن طويل والغشاوة ثخينه بس لزمني حسام من ايدي دقايق علمود الصور ووخر بسرعه
اجوا جماعه شالوا وسوو هوسات وياه اني دخلتني ماما وام اسامه للبيت غرفة حسام فوك صعدت كوة من البدله رفعنها وراي وصعدن دخلت وحدي وكعدوني على الجربايه استغربت ليش مو حسام يصعدني !
حتى بعرس اخواني شفتهم يصعدون سوة ويه عروساتهم شنو الموضوع !
يتبع....
