الفترة اللي بعد عقد المحكمه تعلقوا اخواني بيه كلش بحيث حسيت بنفسي شكثر عزيزة وغاليه عدهم
مو بس اخواني بابا اشترى للبيت والي مخصوص تلفزيون حديث ريموند وستلايت جان توة داخل بالسوق وثلاجه وتبريد وزوالي ودواشگ كلها هدايا اخذها وياي لبيت عيالي من غير الذهب اللي ماما ضامته الي من جنت صغيره وخالاتي وبناتهن ماقصرن كلشي جابن من خلاط وسشوار ومكياج ماركه وبدلات جهاز كامل بقيت ايام متعجبه بالغراض وارتب بيهن واصفطهن بجنط
ماما جانت تخجل تحجي وياي بمواضيع الزواج وصت منار وعبير يدرسن براسي ويعلمني بين فترة وفتره
بدت السنه الجديده تحضرت وطلعت ملابس المدرسه شفت بابا وماما مامرتاحين لروحتي وقلقين بس اني اصريت وماهتميت وفراس شجعني وگال اني اوصلج
الصبح طلعت من البيت بسيارة فراس ببالي خايفه اشوف الحارس خليل وخايفه حسام يعارض روحتي للمدرسه هو وينه حسام محسوب عليه رجال وماتقابلنه ولاتعارفنه لسه
وصلت للمدرسه لكيتها مخربطه صايرة واثار قصف وضرب اسلحه من غير الفوضى اللي بالشوارع بطريقي انتبهتلها
لفيت وجهي ودخلت منتبهت للحارس الواكف بالباب دخلت للاداره حجيت ويه المعاونه وقبلت اكمل عادي نفس المرحله السابقه بدون تسجيل جديد دخلت ركض ادور على نور ماشفتها البنات اكثرهم مجايين للدوام كملت يومي بصعوبه لان وحدي والصف الثاني بنات من الصف الاول جدد مااعرفهن بس كلهن ينظرلي بتعجب لان حافه وجهي ولابسه حلقه
خلص اليوم بصعوبه طلعت تمشيت ببطء خايفه اشوف الحارس خليل بس انتبهت الحارس غيره مو هوه الحمد لله اني هم ماسألت ولاحجيت
طلعت ادور على حيدر ماشفته تقدمت للجهه الثانيه جان اشوف حسام !
بالبدايه ارتبكت اقتربت منه اطول مني بس ضعيف وشكله مقهور مني مااعرف لان حتى ماسلم اني سلمت رد بأنفه من وره خشمه هلو !
مشيت بصفه بس هوه تقدم كدامي وماحجه كلمه وصلني لباب البيت وراح دخلت بالصاله ماما ونسوان اخواني كاعدات شافني ضايجه من تصرف حسام ومن يومي الممل بالمدرسه شمرت الجنطه وصرخت
ماما شنو هذا حسام صنم لو اخرس !
ضحكن منار وعبير ماما زمخت بيهن واشرلتي لغرفتي شلت الجنطه ورحت دخلت لحكتني
شبيج زنزون !
ماما ميصير هيج من رحت لعقد المحكمه ماحجه وياي وهسه جايني للمدرسه شكو ليش مااجه حيدر ؟
شلون ح صير مرته واعيش وياه وهو هيج !
اشش سدي حلكج وحمدي ربج قبل تكملين ابوج فرض عليه شرط مارضه لاهو ولا ابو ولا أخو
شنو !
أخو !
واخو شكو بيه يتحكم شعليه ؟
ولج زنزون بنيتي
ام اسامه أجت الصبح من عرفت بيج رايحه للمدرسه كالت حسام يروحلها ويجيبها وبعدين شكو بيها مو خطيبج وعاقد عليج !
فدوة اروح لج صيري ناضجه شوي وفكري مثل الكبار وراج بيت واطفال ومسؤؤليه متفرحين تصيرين ام ؟
اووف ماما خليني ابدل واكل لكمه من الصبح ماكلت شي وعوفيني بحالي
..
طلعت ماما بقيت افكر بكلامها تغديت ونمت الظهر للعصر سمعت بابا يحجي ويه اخواني علمود زواجي اهل حسام مستعجلين وبابا رافض الموعد يريد بعد يتأجل لحد ماكمل الثالث متوسط وهمه رافضين يعني اذا هيج ورة سنتين ومستحيل يوافقون
صادف ولادت عبير وكل شي بي صالح وكل تاخير بي خير لان انشغل الكل بيها حتى يتاخر زواجي كم شهر
جابت بنوته حلوة والكل فرحان
فراس صار اب وأجته بنت تجنن سموها شهد وماما وبابا صارو جدو والبيت صار هوسه من الخطار واهل عبير خالتي وبناتها بقوا عدنه لأربعين الطفله
بعدها الايام اللي مرت عليه كلش ثكيله وممله ولو اني بالدروس والواجبات جنت زينه لان اغلب المواد أتذكرها من العام الراح
بالمدرسه بالروحه فراس يوديني وبالرجعه لو حيدر ينتظرني لو الكه حسام مثل الصنم منتظرني يوصلني لباب البيت ويروح بدون ميحجي بس عيونه تحجي هواي واحس بي يرتبك وحتى يعرگ من يشوفني
بالايام اللي يرجعني حيدر يلزم ايدي ونسولف ونضحك طول الطريق بس الايام اللي يرجعني حسام يمشي مسافه عني وامشي وراه ركض ويقهرني كلش يحسسني بكوني مقيدة ومسويه ذنب بروحتي للمدرسه
على اتفاق بابا اكمل هالسنه عد اهلي والبقيه عدهم
بصعوبه كملت الامتحانات وام اسامه كل ما تزورنه تشمر بالحجي وابني خطيه و كاتل نفسه ويريدج بساع مليت منها كمت من تجي اسوي نفسي بالحمام لو ادرس بغرفتي حتى مااتسمم من كلامها وملحتها الزايده
بهالايام بابا وماما اتفقوا يزوجون أحمد ومحمد سوة لان ح يتخرجون وغرفهم جاهزة بابا حضر الاخشاب والنواقص وكالعادة ماما وخالاتي اللي يخطبن العرايس بس محمد اعترض وجان يختلف عن اخواني طلب ماما تخطبله زميلته بالجامعه وأصر وبقه يتعارك وياهم لو هيه لو ميتزوج
خلاهم گدام الواقع
لدرجه فعلا ماما خذت خالتي الجبيرة وراحت تخطبها من اهلها ...
يتبع...
