تصرفات اسامه كلش غريبه ونظراته ملفته وواضح انه مهتم بيه ومعجب وعندة رغبه شيطانيه وياي وهالشي تجاهلته اكثر من مرة
من كلي تعالي زينه متت من الخوف وحسيت نار صعدت براسي
هو مو من عادته يدخل بالحمام الفوك على اساس الحمام هذا بس النه لان عرسان
الحمد لله بعدني بباب الحمام مادخلت رجعت ركض لغرفتي لكيت حسام يبدل رحت لميز المرايه وأخذت منديل ومسحت وجهي وعيوني وايديه يرجفن
شبيج زينه وين رحتي !
زينه !
ها ؟
شبيج !
مابيه رحت اغسل بس ..
بس شنو ولج !
ها .. بس لكيت سوسن بالحمام
ايا الخايسه بت الهوش كم مرة وصيتها متدخل بالحمام مالنه هاي متعلمه على السواكي والغنم اكيد كلت الصابونه
صدك ضحكني
حرام عليك حسام خطيه والله
شويه هدأت وسكتت الرجفه جان ذبحني حسام لو عرف ويسوي عركه ويه أخو
كملنه تبديل خليت حجاب راخي على راسي ونزلنه ام اسامه تعجبت شنو هالجمال زنزون عين الحارة باردة ديروا بالكم يوم ولاتتعطلون
طلعنه نتمشى لان حسام ماعدة سيارة الجو كلش حلو بليل نهايه شهر التاسع بس حسام طلع روحي عينج لاتباوعين للزلم لاتضحكين لا تلزميني خاف اشوف جماعه عرف امشي بصفه وساده حلكي تعبت كضيناهه بس نمشي
حسام تعبت فدوة خل نگعد
گعدنه على صبه بالگاع
حسام جوعانه اشتريلي لفه همبرگر
أش لج همبرگر شنو ابقي هنا هسه جايج لاتتحركين
عافني وراح رخيت الحجاب أكثر والحذاء ضبت على رجلي دقايق ورجع جايب لفتين فلافل من الكشك
هاي شنو حسام !
أكلي وسكتي ماعاجبج جيبي اني اكلهن اثنينهن
لا اكل يمعود جيبها
اكلنه صدك طيبه ماادري لان جوعانه
زينه تعلمي وياي على البساطه شبي الفلافل الهمبرگر تاكلي عد اهلج
صار ياعيني هسه اني شگلت
يلا كملي بسرعه حتى نگوم ماريد الرايح والراد يعاين عليج بعدين شنو هاي حذاءج لبسيها بسرعه
لبستها وكملت لزمت ايدة
ولج لاتلزميني بالشارع عيب بغرفتنه شتردين تسوين سوي
تمشينه اشترالي حب الشمس وظلينه نكرز شافني ساكته
زينه ماعدي اشتريلج كرزات من الغالي طلع جيوبه لبرة
شوفي مفلس
شبيك حسام هسة اني شگلت
لا عيونج كالت مبينه ماعاجبج الوضع
اوف حسام لامن احجي ترضى ولامن اسكت ترضى
ولج شنو هاي طلع لسانج خل نرجع واروايج شلون اگطمه
لطمت على حلگي واشرتله خلص بعد كلشي مااحجي
تمشينه وصلنه بمكان محد اكو ناس قليل من بعيد
زينه شخبار سيارته لفراس اخوج ؟
تحسرت وسكتت
ولج ماتحچين ؟
مو قبل شوي كتلي لتحجين !
لا احچي بداعتي
حسام شذكرك بسيارة فراس ؟
حبيبتي هسة لو ابوج ينطيج السيارة نطلع بيها ونفرفر جان تكسرت رجلينه هسه والله افرج بيها من الشمال للجنوب
صدك تحچي ؟
ليش لا .. انتي بس ضبطي امورج ويه ابوج
حسام انته موبايل وگلبت الدنيا وسويت مشكله شكبرها انوب سيارة !
لچ اني سويت مشكله شكبرها لو امچ !
بعدين ماريد تلتهين بالمخابرات والسوالف وتضيعين الوقت وتنشغلين عني
عوفيها ما عجبتني شغله الموبايل
بس السيارة غير سالفه
مكتيلي وين هسه مخليها ؟
بالكراج ورة البيت
زنزون انتي الغاليه المدلله بس يرجع ابوج روحي طلبيها منه
مااعرف حسام اتذكر حيدر طلبه من بابا ورفض گله انجح هالسنه وتفوق واشتريلك احسن منها
اي ليش لا تاجر وزنگين بالعافيه عليكم
انته تحسب على بابا !
شبيج الخير اللي يعم على اخوانج يعم عليج لو تردين نبيع ذهبچ ونشتري سيارة ؟
حسام ذهبي مااكدر اتصرف بي
وليش يابه !
هديه من بابا وماما وخالاتي شلون ابيعه حريمات وخسارة ينباع
خوش محفضيج دمشي امشي نصعد باص رجليه تكسرت من المشي ودير بالج تعاينين منا منا
هزيت بيدي يلا بالله شگله هذا هسه
رجعنه بالباص وهاي جانت اول طلعه نطلعها اني وحسام عشاني فلافل وحب الشمس وضوجني بسوالفه
واخر طلعه توبني بعد اطلع وياه
وبالبيت بقيت كلش حذرة من اسامه ببالي اللي سواه من صاحني بالحمام ظليت قلقه وخايفه ومن يطلع حسام اقفل باب الغرفة بس المشكله من انزل احسه يراقبني ويتعمد يتقرب مني بكل مكان
الصبح يكلي صباح الخير وصوته بي رجفه ويقترب مني يتخيلي يريد يبوسني لو وحدنا بس سوسن ملزكتله وراه وراه متعوفه ومره دزها طلبت مني عطر وقلم الحمره اللي اخلي منه وأخذت قميص نوم مستعمل ماقبلت اطيها واحد مغسول ونظيف استغربت من طلبها
ورنا موجودة هم وياي قريبه مني
كلش بريئه هالبنت وسوالفها طفوليه وحلوة قربتها مني حتى اسامه ميحصل فرصه وينفرد وياي ويختلي بيه رغم ما اكثر من مرة يدحج بيه ويشمني لو يراقبني بكل خطوة يوترني ويثير عندي الخوف
وام اسامه مرات تطلع للسوك وترجع بسرعه متتأخر
اما ابو اسامه بس يدرم واذا يشرب ام اسامه تحبسه بغرفتهم يظل يصيح ويصرخ بعدين يهدأ وينام
ومرت الايام على هالحال لحد بدايه العام الدراسي داومت رنا بس حسام رفض اداوم وعاند وأني هم ماردت السالفه توصل لاهلي وتصير مشاكل حتى منعني اروحلهم لحد مارجع بابا من السفر وهو زارني بليل ببيت اهل حسام فاجأني
واجه محمل بالهدايا
...
يتبع .....
