كالقهوه
الحلقه "12" ( كالقهوه 🎵❤ )
•
•
•
•
•
•
•
( تفضل واقفه تحت البيت متردده تطلع او لا وفي الاخر تاخد قرار انها تطلع . وفعلا تطلع وتخبط ع الباب تفتحلها مي )
مي : هاجر .. تعالي يا هاجر اتفضلي
( تدخل هاجر من سكات تقعد ع الكنبه تطلعلها الام )
الام : في ايه يابنتي مالك ؟ ومال زياد ، وانتي ازاي لسه لابسه الفستان بتاع فرح يوسف كده ؟!
هاجر : هو زياد موجود ؟
الام : لا يابنتي متخافيش
( تبص هاجر في عيون ام زياد وتحضنها تحس بحنان امها اللي كانت محتاجاه وتبدأ تعيط لاول مره بعد ما سابت بيت ندي وتعيط بحرقه كأنها بتلخص كل كلامها في العياط )
الام : اهدي بس يابنتي وخلينا نعرف نتكلم !
هاجر : متعرفيش فين زياد يامي
مي : زياد نزل من الصبح ومش عارفين راح فين وامبارح جه وقفل الاوضه علي نفسو ومكلمش حد .. في ايه يا هاجر ؟
الام : طمنيني علي ابني يابنتي
هاجر : هحكيلكو كل حاجه 💔
( في مكان مخصص لكرة السله , مكان كبير جدا وواسع وهادي مفيهوش حد غير زياد ويوسف بيلعبو كرة سلة بقالهم كتير يحس يوسف بالتعب ويفضل زياد مكمل )
يوسف : حرام عليك يابني بقالنا ساعتين متواصلين بنلعب
زياد ( وهو بيجري وبيحط الكره في السله ) : مش عايز اوصل لمرحلة ان دكتور نفسي يدور علي دكتور نفسي
يوسف : طب انت مخنوق وعايز تلعب ، انا العب ليه انا واحد عايز اروح لمراتي سليم
زياد : قولتلي هاجي اتفرج بس وانت اللي نزلت قصادي محدش قالك تتحداني 😂
يوسف : لا ياعم انا رجعت في كلامي وهتفرج بس 😂
زياد : طب اقولك .. انا عارف انك تافه ، ما تشغلنا مهرجان ويلا نرقص
يوسف : ن ايه !!!!!!!!!
زياد : ياعم اخلص ياعم لسه هتبصلي 😂😒
( يشغل يوسف مهرجان ويبدأو يرقصو في نص الملعب رقص مهرجانات وبعد ما يخلصو يبص يوسف لزياد بفرحه )
يوسف : انا مبسوط منك اوي يا زياد ، مبسوط انك بتحاول تغلب خنقتك وبتحاول تفرح نفسك بنفسك وعلي اد ما تقدر بتقاوم ♥️
( وياخده يوسف بالحضن يحضنو زياد ويبدا يدمع جامد ويضحك ضحكه مصطنعه )
زياد : اديني بحاول بقاوم
( تقوم ام زياد وتزعق من كلام هاجر )
الام : يعني ايه تباتي في الشارع ومجيتيش ليه !
مي : ازاي يا مي بعد اللي حصل مجيتيش
هاجر : هاجي ب انهي وش ؟! يجيلي عين ازاي احط عيني في عيون زياد بعد اللي حصل ؟ انا جرحتو وكدبتو وهينتو ! انا مش عارفه انا ازاي اتجرأت وجيت هنا انا ماشيه ..
الام : بصي يابنتي مهما كانت مشاكلك مع ابني ، انا ماليش اتدخل وعلاقتي بيكي هتفضل زي ماهي وانك تباتي في الشارع لوحدك ولابسه هدوم خفيفه يعني في عز البرد اكبر بكتير عندي من ان ابني يتوجع بسبب سوء تفاهم وواحده مش محترمه عاوزة توقع بينكو !
هاجر : النوم عندي في الشارع في عز البرد بهدوم خفيفه دا اقل عقاب ممكن اعاقبو لنفسي بسبب اللي عملتو في زياد .. انا مش عارفه ايه اللي جابني بس كنت محتاجه اقول الحقيقه لحد .. وبعد اذنك يا طنط انا همشي قبل زياد ما يجي ويبقا منظري وحش قدامو
( تبص الام ل مي بنظره تفهمها مي وتروح تقفل الباب بالمفتاح )
الام : لو هتوصل ان ابني هيبات في الشارع .. انتي هتفضلي قاعده وعايشه معانا ! انتي بنتي وانا مسمحش ابدا ان بنتي تبات في الشارع ليه يعني
هاجر : طنط الله يخليكي بلاش تندميني اني جيتلك
الام : انا قولت كلمتي يا اما هنأجرلك شقه ونيجي نقعد معاكي انا ومي
مي : طب ماما ممكن نتكلم في الموضوع دا بعدين هاجر لازم تكلم زياد وتفهمو كل حاجه
الام : بصي يا حبيبتي انتي هتخشي تاخديلك دوش كدا يفوقك عشان شكلك تعبان والبسيلك هدوم نضيفه وروقي كدا واستني زياد ، وارجوكي اسمعي كلامي ومتتعبينيش في المحايله
( تتعب هاجر من المناقشه وتسمع كلام ام زياد وتدخل تاخد دوش يريح اعصابها ويريحها شويه وتطلع تلبس سويت بانس رصاصي علي سويت شيرت اسود ومتقدرش تلم شعرها تسرحو وتسيبو مفرود )
( يجي زياد من بره قبل ما يخبط ع الباب يحس بوجع في قلبو لما يشم ريحه البرفان بتاعت هاجر ينسي ويخبط ع الباب تفتحلو امو )
الام : عوزاك في كلمتين
زياد : خير يا امي
الام : هاجر مستنياك جوه عايزه تتكلم معاك
زياد : انتي ازاي تدخلي البني ادمة دي بيتي !
الام : اولا توطي صوتك .. ثانيا هي هتقعد معانا فتره وممكن تبقا فتره كبيره ثالثا مهما كان المشاكل اللي بينك وبينها ، انت عارف ان ملهاش حد هنا غيرنا ومش هنسيبها تبات في الشارع زي ما حصل امبارح !
زياد : هي امبارح باتت في الشارع ؟
الام : ايوه يا زياد
زياد : ليه حصل ايه ؟!
الام : اعرف منها هي كل حاجه
زياد : اعملي معروف انا مش عاوز اكلمها
الام : انا قولت كلمه يا زياد .. انا داخله اعمل الاكل واختك هتذاكر ، هاجر مستنياك في اوضتك وياريت متضايقهاش اوي عشان جايه ونفسيتها متدمره
( يبصلها زياد بحيرة ، تدخل ع المطبخ وتسيبو واقف ، ويقرر زياد انو يدخلها ، يفتح باب الاوضه جامد وكأنو داخل ناوي علي عراك ولسه هيزعق لقاها قاعده ع الكرسي وحاضنه مخده وسانده راسها ع ضهر الكرسي ونايمه نوم عميق وباين عليها التعب ، يضعف زياد بعد ما يشوفها متبهدله كدا وعصبيتو تروح ويروح يقف قصادها وفضل يهز دراعها عشان تفوق مش راضيه تفوق ، يمسك ايديها ويصحيها براحه )
زياد : هاجر . هاجر فوقي
( تفتح هاجر عنيها بتعب يبعد هو عنها بعدين تمسح عنيها ولما تلاقيه قصادها تقوم وتقف وتبص لزياد فيبص زياد للارض )
هاجر : ممكن بس تحضني الاول بعدين تخاصمني زي ما انت عايز ؟! 💔
( ميستغربش زياد من طلبها لان حضن الحبيب لحبيبتو في وقت ضعفها بيقوي وهي كانت ضعيفه .. يبص زياد في عنيها تاني وكأنو بيشوفها لاول مره تقرب هي خطوات منو يبصلها هو بصه اخيره ويغمض عنيه ويروح واخدها في حضنو ويضمها لقلبو جامد ويفضل حاضنها اكتر من ربع ساعه وكأنهم بيعاتبو بعض علي هيئة حضن ! )
( يحس زياد انو هيضعف اكتر ويتمالك نفسو من العياط وراح سايبها وبعد عنها راح ع المكتب وحط شنطتو وعطاها ضهرو )
هاجر : زياد ممكن تسمعني !
زياد : اطلعي بره
هاجر : زياد سبني اشرحلك بس هفهمك
زياد : بصي يا بنت الناس طول ما انتي قاعده في البيت دا كأنك مش شيفاني ولا كانك تعرفيني واتفضلي بره عشان عايز اغير هدومي
( تبصلو هاجر بعدم احباط وتطلع تروح المطبخ )
الام : متكلمتوش
هاجر : مش عاوز يسمعني وحقو !💔
الام : معلش واحده واحده قلبو هيصفي ابني وعرفاه
هاجر : تحبي اساعدك ؟💔
الام : ربنا يخليكي يا حببتي ، تحت عنيكي اسود اوي انا بقول تدخلي تريحي شويه
هاجر : ربنا يخليكي يا طنط .. واسفه لو تعبتكو معايا انا هحاول اشوفلي شقة باسرع وقت
الام : ومين قالك انك لو جبتي شقه هنسيبك تقعدي فيها لوحدك .. انتي معانا لحد ما خالتك ترجع من السفر ويارب ما ترجع 💜
( تبصلها هاجر بعينين مليانين ب الشكر تفهم ام زياد نظراتها وتطبطب عليها تبوس هاجر راسها وتروح في مي )
هاجر : انا اسفه يا مي لو هعطلك انا بس كنت عاوزه اريح خمس دقايق كدا منمتش بقالي 3 ايام
مي : يا حبيبتي السرير واسع الاوضه هتنور والله انا كان نفسي انام علي الكنبة من زمان تصدقي بقا 😂 بس شويه وهصحيكي تتغدي معانا
هاجر : مش مهم المهم انام بس 5 دقايق
( تقعدها مي ع السرير وتغطيها ، واول ما هاجر تتغطي تروح في نوم عميق تبصلها مي بحزن وتكمل مذاكره . يفتح زياد الباب ومكنش يتوقع انو يلاقي هاجر يشوفها وهي نايمه ومرهقه كدا يحس بوجع في قلبو ويشاور لمي تطلعلو )
