الحلقه "1" ( كالقهوه 🎵❤ )
•
•
•
•
•
•
•
( الروتين المعتاد .. يفوق زياد من النوم ع صوت المنبه يقفلو ويقوم ياخد دوش .. يخرج يلبس بنطلون جينز اسود و قميص ابيض عليه بلوفر اسود والكوفيه . يروح ع اوضه اختو يبوس راسها ويروح لمامتو يسلم عليها ويصحيها . ينزل ويركب عربيتو ويطلع ع البحر . يبص من بعيد ع منظر الشتا ومنظر البحر ويبتسم ويروح ع الكافيه المعتاد )
فريد ( صاحب الكافيه ) : اهلا اهلا زياد بيه
زياد : ازيك يا عم فريد
( زياد . 25 سنه . هوايته الكتابه والرسم . بيشتغل دكتور نفسي . بشرتو قمحاويه وعنيه رمادي شعرو بني . مدمن حاجه اسمها قهوه . ومخلي حياتو كلها عباره عن روتين ثابت . يصحي ع الكافيه المعتاد الكرسي المعتاد المكان المعتاد قلمو والدفتر المعتادين والقهوه المعتاده . وع الشغل ومن الشغل ع البيت سهران يشرب قهوه . وبس )
فريد : بصحه والحمد لله ، حالا والقهوه بتاعت حضرتك تكون جاهزه ، اتفضل يا زياد بيه اتفضل . الترابيزه محجوذالك
زياد : تسلم ياعم فريد
( يروح زياد يقعد في المكان المعتاد . كرسي قصادو ترابيزه صغيره قصاد الشباك اللي بيطل ع البحر . يبص زياد ع الشباك وهو عليه قطرات مايه من المطر . يبتسم لما يلاقي قهوتو وصلت وفي ثانيه يبدا يطلع الدفتر بتاعو ويكتب وهو بيشرب القهوه )
" هل نحن رغم زحمه البشر وحيدون ؟ .. وهل نحن نريد شيئا . ولا نجد اي شيء ؟ ... هل كل شيئ ( لا شئ ) ؟! "
( يقطع تفكيره صوت الفون )
يوسف : صباحك عسل
( يوسف اقرب واحد لزياد بيحبو بعض جدا وادو في السن . بشرتو فاتحه وشعرو اسود وعنيه بني غامق دمو خفيف جدا وخاطب )
زياد : ايه يا يوسف اخبارك ؟
يوسف : فله
زياد : امممم شكلك رايق
يوسف : شكلك كنت بتكتب وانت تحتسي رشفه من كوب القهوه ، هموت واقري الدفتر دا واعرف انت بتكتب فيه ايه 😂
( يسكت زياد ويبص لبعيد )
يوسف : اكبر فصيل في العالم ، هتيجي العياده امتي؟
زياد : ع الساعه 12
يوسف : اوك متتاخرش . باي
( يقفل زياد ويخلص قهوتو ويحط الحساب ع الترابيزه ويشيل الدفتر في جيبو ويركب العربيه ويمشي يروح العياده . )
يوسف : حبيبي
زياد : ايه الاخبار هنا .
يوسف : حظك انهارده عدد المرضي قليل 😉
زياد : في ايه يا يوسف بتغمز كدا ليه 😂
يوسف : عاوزين نلعب جيمز بقا انا زهقت 😂
زياد : لو خلصت بدري
يوسف : انت فاضي يوم ؟
زياد : ليه ؟
يوسف : يعني كنت بفكر اروح لدكتور نفساني ف قولت اروح بعيد ليه
زياد : ليه انت عندك مشكله ؟
يوسف : اه
زياد : ايه طمني
يوسف : عندي صحبي دا استغفر الله العظيم يا جدع ، عارف ، قعدو صحبي دا مع ابو الهول لحد ما ابو الهول اتحول لصنم
زياد ( وهو بيضحك ) : طب وصحبك دا مقالكش انو كمان محتاج يلعب جيمز ؟
يوسف : قول اقسم كدا
زياد : اقسم
يوسف : ايه التهريج دا روح شوف شغلك يا بيه عاوزين نقفل العياده انهارده بدري
( يضحك زياد ويروح ع العياده بتاعتو ويبدا يشوف شغلو يخلص اليوم يخلص بدري ويرجع مع يوسف ع البيت وقاعدين يلعبو جيمز مع بعض )
زياد : قولي بقا ناوي تتجوزها امتي
يوسف : تعباني اوي يا زياد
زياد : ليه
يوسف : بتتلككلي ع الواحده كأنها عاوزه تتخانق وخلاص دي ممكن تغير لو قولتلها امك عامله ايه
( يضحك زياد ويحط ايدو علي بقو يحاول يداري ضحكتو )
يوسف : بتضحك ! بتكلم جد والله ، ما تاخدها كدا يوم كدا في الكافيه الهادي دا تشرب معاك قهوه وتكلمها وتعقلها
( يتوتر زياد )
زياد : يوسف معلش انت عارف اني مبحبش اشرب قهوه في الكافيه دا مع حد .. ابقا كلمها وقولها تجيلي العياده
يوسف : جووووووووووووووووووووووووول 😂💃
زياد : زباله !
( يعدي الوقت ويرجع زياد ع البيت يتغدي ويقعد مع اهلو شويه ويخلص يقوم يقفل الاوضه ويقعد ع المكتب بتاعو ويفضل سرحان . يخرج الدفتر بتاعو ويبدا يكتب )
" علي كل انسان ان يتعايش مع فكرة انه قابل للترك وقابل للنسيان ، لانه في كل مره تظن انك ثمين عند احدهم . فتكون النهاية مؤلمه !..."
( يسمع الباب بيخبط يتوتر ويقفل الدفتر بتاعو بسرعه ، تدخل اختو وماسكه في ايدها كوبايه قهوه )
زياد : ادخلي يا مي
مي : طلاما متوتر كدا يبقا كنت بتكتب ، مش ناوي تفرجني بقا بتكتب ايه !
زياد : لما تبطلي تحلوي هبقا ابطل اخبي
مي : بكره هتلاقيني حاطه ع وشي مايه نار عشان متخبيش
زياد : تسلم ايدك ❤
( يبوس ايدها وراسها )
مي : كل بعقلي حلاوه يا ولا عشان متورينيش بردو ، ماشي بس انا مش مسامحه 😂
( تطلع مي ، يبتسم زياد ويحط الهاند فري في ودنو ويشغل اغاني ويطلع البلكونه ويفضل يتفرج ع منظر الشتا وهو بيشرب كوبايه القهوه بتاعتو .. وبعد قعده طويله من الهدوء يدخل وينام )
( يصحي تاني يوم يغسل وشو ويلبس جينز كحلي وقميص ابيض وبلوفر كحلي ويصحي امو يبوسها ويركب عربيتو ويمشي )
( في مكان تاني ، تفضل سايقه بخنقه ، تدمع في الطريق لكن تمسح دمعتها وتتجه للكافيه الراقي ، توصل للكافيه تنزل وتدخل تلاقي ترابيزه فاضيه في وش الشباك مخصصه لشخص واحد ويعتبر احسن مكان في الكافيه ، من غير ما تفكر تروح وتقعد ، يجيلها صاحب الكافيه بسرعه )
فريد : الترابيزه دي محجوزه يا انسه
هاجر : بس انا مش شايفه اي اسم عليها
فريد : حضرتك لو صاحبها جه ولقاكي صدقيني مش هيحصل كويس !
هاجر : بص يا ( وتبص ع الكارت اللي متعلق في التيشرت بتاعو ) بص يا عم فريد لو سمحت سيبني وانا اوعدك هدفعلك ضعف اللي صاحبها بيدفعو
فريد : وليه كل دا يا انسه الكافيه مليان ترابيزات
هاجر : صدقني لو مقعدش هنا هيجرالي حاجه من الخنقه
فريد ( بزهق ): تطلبي اي حضرتك
هاجر : قهوه .. لو سمحت
( يمشي عم فريد تطلع هاجر دفتر صغير من جيبها وتبدا تكتب )
" في صباح ذلك اليوم ؛ شعرت ان روحي ثقيله عليَ . فقل لي ايها الطبيب .. ما هو دواء خنقه الصدر ؟ استعد للاجابه لي . فأنا لم اعد اتحمل وقادمه اليك
(في الطريق يتصل يوسف علي زياد )
يوسف : صباحو احبب
زياد : صباح الروقان
يوسف : كلمت امينه وقالت جايه ع العياده انهارده
(ينزل زياد من العربيه في اتجاهو للكافيه )
زياد : اه امتي ؟
يوسف : بعد ما تخلص اخر مريض النهارده العدد قليل بردو
( يبص زياد ع الترابيزه بتاعتو يلاقيها قاعده وبتشرب قهوه وبتكتب ، يحمر وشو من كتر العصبيه )
زياد : اقفل يا يوسف
( ومن غير ما يسمع الرد قفل الخط .. )
زياد : يا انسه
( متردش هاجر لانها مش سمعاه )
زياد : يا انسه ؟!
( متردش )
زياد : يا انسه !!!
( يتعصب زياد لكن يلاقيها مندمجه جدا في الكتابه لدرجه انها تنزل دمعه من عنيها ، يركز في القهوه واندماجها في الكتباه وحبها لانها تبقا في وش البحر ، ينسي وينادي تاني متردش يتعصب عليها ويروح ماسكها من دراعها )
زياد : انا بتكلم !!
هاجر : انت ازاي تمسكني ب الشكل دا ؟!
زياد : وانتي ازاي تقعدي في المكان دا !!
هاجر : والله مش مكتوب عليه اسمك !
( يشخط زياد مره واحده لدرجه انها تتفجع )
زياد : عم فريد !!
( يجي عم فريد بسرعه )
زياد : انت ازاي تسمحلها انها تقعد في المكان دا ؟!
فريد : قولتلها والله يابني
هاجر : وفيها ايه مقعدتش علي منصب الوزير !
زياد : احنا لسه ع الصبح ومافيش مخلوق في المكان سايبه كل المكان دا ومش لاقيه غير الترابيزه دي !!
هاجر : والله ميخصكش اقعد فين ومقعدش فين !
زياد : متجننيش !!
( ويهبد زياد ع الترابيزه تتكب القهوه ع الدفتر بتاعها )
هاجر : القهوه !
( تعدل الكوبايه تاني تلاقي الدفتر بتاعها اتبهدل كلو )
هاجر : الدفتر 💔
( متمسكش نفسها وتنزل دموعها جامد ، يشوفها زياد ويبص في ساعتو يلاقيها 12 يجري ع العربيه ويروح ع شغلو ويسيبها في وجعها وخنقتها اللي زودهالها .. )
زياد : رايح فين
يوسف : ورايا مشوار ع السريع كدا
زياد : والمرضي
يوسف : اجلتهم لبكره بس في حاله شكلها متدمره نفسيًا ودي حولتهالك
زياد : امتي واسمها ايه
يوسف : هتيجي بكرا اسمها "هاجر محمد اسماعيل " تقريبا
زياد : تمام
يوسف : امينه جيالك الساعه 5 ها ، جود لاك يا صحبي
( يمشي يوسف ويعدي الوقت وتجي الساعه 5 ، قاعد زياد بيشرب قهوتو . تدخل امينه )
زياد : اتفضلي يا امينه
امينه : عامل ايه يا زيزو
( امينه 23 سنه ، شعرها اسود متوسط في الطول ، بشرتها فاتحه وعنيها رمادي ، متوسطه في الطول وتبقا خطيبه يوسف )
زياد : اقعدي
( تقعد امينه ع كرسي )
زياد : مالك انتي ويوسف بقا ؟ بيشتكيلي منك كتير
امينه : صاحبك عينو زايغه
زياد : عينو زايغه ولا انتي مفكره ان عينو زايغه ؟
امينه : البيه خاطب يعني المفروض يخف شويه من الكلام مع البنات وكل ما اقولو يقولي اصحابي ومش اصحابي ولا كأنو خاطب جموسه مبتحسش
زياد : طب ما هما فعلًا اصحابو بيربطهم علاقة شغل وساعات بيبقا مضطر
امينه : طب ما انت مش خاطب ومع ذلك مش بتكلم بنات وبتكلمني بصعوبه عشان بس خطيبه صاحبك لكن دا خاطب وعلي وش جواز وبيكلم نص بنات مصر !
زياد : ملكيش دعوه بيا انا مبكلمش بنات عشان انا مش عاوز ، لكن صدقيني لو عاوز هتلاقيني بكلم النص التاني
امينه : انت بتهزر يا زياد
زياد : صدقيني يوسف عارف حدودو كويس ماهو لو عينو زايغه فعلا هيدبس نفسو معاكي ليه ويخطبك جتك نيله ، متبقيش عبيطه بقا انتو علي وش جواز
( تسكت امينه وتبص في الارض )
زياد : فكري كويس وبلاش تتعاركو علي اتفه الاسباب وياستي انا هكلمهولك برضو
امينه : ربنا يخليك ليا يا زيزو
زياد ( بابتسامه ) : بتحبيه ؟
امينه : لسه ملقتش وصف للي في قلبي نحيتو ، يعني بحبو دي قليلة اوي
زياد : ربنا يخليكو لبعض
امينه : طب انا همشي بقا مش عاوز حاجه
زياد : تسلميلي
( تمشي امينه وبعدها بشويه يمشي زياد يرجع ع بيتو يسلم ع اهلو كالعاده ويتغدي ويدخل الاوضه يقعد ع مكتبو ويحط الهاند فري في ودنو وبعدها بشويه تدخل اختو بالقهوه )
مي : يارايق
زياد : تعالي اقعدي
( تقعد مي )
زياد : عامله ايه في دراستك ، نقصاكي اي حاجه او محتاجه حاجه ؟
مي : انت مش مخليني احتاج حاجه
زياد : يابت
مي : والله ابدًا
زياد : طب يلا اتكلي عشان عاوز اكتب
مي : انت ليه مش بتكتب وانا موجوده وليه مش بتقرالي اللي بتكتبو ، هو كلام قبيح ؟! 😂
زياد : امشي يا مي 😂!
( تطلع مي من الاوضه يطلع الدفتر بتاعو ويبدا يكتب وهو بيشرب القهوه )
" مرّ عليّ صباحٌ ولم احتسي قهوتي ! كيف تجروء هذه الفتاه علي ان تغير ما اعتد فعله منذ سنوات ... "
( يتعاد في تفكيرو منظرها وهي بتعيط لما قهوتها اتكبت علي دفترها ، افتكر عنيها اللي كانت مخبيه وجع كتير جواها ، ينسي ويقوم ينام .. )
( تصحي من نومها ، تبص في مرايتها تشوف عنيها وارمه من العياط ... تدخل تاخد دوش وتتلغبط نقط المايه بدموعها اللي بتنزل من سكات .. تدخل اوضتها وتلبس بنطلون جينز اسود عليه سويتر اسود وتاخد شنطتها وتقف لحظه علي باب الشقه .. تبص علي الفراغ اللي ملي البيت وتبص علي اوضه بباها ومامتها ، تنزل منها دمعه تمسحها وتنزل تجري .. تركب تاكسي وتروح ع الكافيه واول ما تدخل تفتكر اللي حصلها مع زياد تقعد في مكان في وش مكان زياد .. كرسي واحد بترابيزه واحده في وش الشباك المقابل للبحر .. وكأنو مكان مخصص للانعزال ... )
فريد : تشربي اي يا انسه ؟
هاجر : قهوه ساده لو سمحت
( يدخل زياد الكافيه وكان متوقع انو هيلاقيها قاعده في نفس المكان بس ميلاقيهاش ، يروح ويقعد في مكانو ويطلع الدفتر بتاعو ويمسك القلم ، بس يقف عن الكتابه لما يشوفها قصادو ، وهي بتشرب قهوتها تيجي عنيها في عنيها ، يشوف اثار الدموع علي وشها والهموم في عنيها ، وترجع تبص تاني للبحر .. )
فريد : القهوه يابني
زياد : متشكر يا عم فريد
( يبصلها زياد ويبص تاني للبحر يشرب قهوتو . يرن الفون )
يوسف : صباح القهوه 😂☕
زياد : صباح الغلاسه
يوسف : فضي نفسك عشان الحاله اللي قولتلك عليها
زياد : حاضر يا يوسف
يوسف : انت لسه في الكافيه ؟
زياد : اه شويه وجاي
يوسف : اوك باي
( يقفل زياد الفون . يشرب اخر شويه من القهوه ويحط الدفتر في جيبو ويبص بصه اخيره عليها يلمحها بتكتب في دفتر صغير وبتشرب القهوه ، يبتسم ويسيب الحساب ع الترابيزه ويركب عربيتو ويمشي يروح ع العياده )
زياد : انت قايل امتي
يوسف : يعني قولتلها ع الساعه 1 ونص
زياد : طيب تمام
يوسف : كلمت امينه
زياد : اه وخف شويه يا يوسف 😂
يوسف : صدقتها هي صح
زياد : مش عليا الحركات دي .. احنا عشره وانا عارفك كويس
يوسف : لا هي اللي بتتلكك
زياد : بتحبك يا حمار ، وطلاما حبتك يبقا حقها تخاف عليك ، انا بحسدك عليها والله مش عارف هي مستحملاك ازاي
يوسف : وانت قولتلها كل الكلام دا
زياد : قولتلها انها غلطانه عشان متزودهاش بس انا بقولك اهو انت الغلطان يا يوسف ، لو لقتها بتكلم شباب هتضايق ولا لا ؟
يوسف : احم .. هضايق طبعا 😒
زياد : روح ع مكتبك يا يوسف وفكر كدا وكلمها وصالحها ، مش هتلاقي اللي يحبك زيها تاني صدقني
( يروح يوسف ع مكتبو ويروح زياد ع مكتبو يظبط شويه اوراق ويقعد ، تيجي الساعه 1 ونص تتصل السكرتيره ل زياد )
السكرتيره : هاجر محمد اسماعيل يا دكتور
زياد : دخليها
( يفضل يكتب زياد علي شويه اوراق ، تدخل هاجر مع صحبتها ويقعدو ، تقعد هاجر ومخبيه وشها بين كفوفها وفي عالم تاني )
زياد : مين فيكو هاجر ؟
ندي : هي يا دكتور انا صحبتها ، معلش انا كنت بوصلها بس عشان انا جيباها هنا بالعافيه
زياد : طيب ممكن تروحي انتي او تستنيها بره
ندي : طيب ، انا هستناكي برا ها
( تطلع ندي وتقفل الباب وراها ، يقف زياد من بعيد باصص علي ايديها وهي بتترعش ، يجي ويقعد جمبها ويشيل ايديها من علي وشها ، يبص في عنيها يلاقيها هي .. )
