الكاتبه والمبدعه / أديم الراشد.
.
وفي بيت ابو خلف
الكل كان مقيل الا وعد اللي تنتظر على احر من الجمر وابتسمت وضحكت من كل قلبها وهي تشوف ردة فعل عقاب اللي مات من القهر اخذت طرحتها وطلعت تفتح الباب : خير خييير وش دق الثيران هذا!؟ عقاب : هلا هلا معلوم ندق دق ثيران دام اللي بيفتح بقره
ضحكت وعد : قايله لك حرام يسمونك رجال
كان عقاب حاط يده على طرف الباب ووعد وراء الباب وصفقت وعد الباب على يده وصرخ عقاب وهو يسحب يده : يابننتت ال... سكت وهو يضم يده على صدره بقهر وضرب الباب برجله وهو يسمعها تضحك: والله والله تندمييين والله لتعيشين المر اصناف تسمعييين!؟ وعد: اللي ما تطوله بيدك طوله برجلك
رجعت وهي في كامل روقانها ومبسوطه انها اخذت حقها منه
_______________________.
اما عقاب رجع وهو معصب
دخل البيت وهو يمشي بغضب وقابله محمد : يلا يا عقاب ورانا طياره يلا
قال عقاب بغضضب: مابي اذلف لمكان مابي
مضاوي : سلام قول من رب رحيييم شكلهم حضروا
عقاب: انتي انطمي تسمعين
مضاوي : خييييير
هيا: بس خلاص انتي
الجد : بسم لله علامه ذا الجني
ام ناصر: جاته حالته خلوووه
محمد: وش فيييييه اخوك!؟
عزوز: مدري مدري طلع لسياره وهو مبسوط ورجع نار
عهد : الله يستر
محمد : خلوه خلوه بروح اكلمه
اتجهه لمحمد وشافه مفضي شنطته كلها بغضب وماسك شهد ترتبها وهو يضرب يده برجله بقهر
محمد : عقاب علامك !؟ عقاب: مافيني شي
محمد : شهد حبيبتي خلينا
طلعت شهد وقرب محمد: وش فيك !؟؟ وش صاير
عقاب : ماصار شي
محمد : طيب علامك هونت
عقاب وقف بصراخ: مافيني شي هونت مجنون ما علي شرهه
محمد: بس عاد لا تجلس تصارخ تكلم زين
عقاب وهو يحاول يهدا: عمي الله يخليك ماعاد ابي اسافر ولا اطس لمكان عندي شغل بخلصه
محمد : بكيفك اجل
طلع وترك عقاب اللي يحلف مية يمين ودين ليذوق وعد الموت بنفسه
_______________________.
العصر في بيت النوخذه
كانت ليلى جالسه جنب نهيان وهو يعلمها كيف تدق
ومريم وشيخه جالسين يناظرونهم ببتسامه وابو نهيان وام نهيان
نهيان: خلاص الحين نوقف وبالليل نكمل
ليلى: زين بس قبل نوقف الله يخليك خلنا نغني
ابو نهيان: اي والله يا نهيان غن لنا من زمان ما سمعتنا صوتك
نهيان: ابشر
طل جابر من الشباك وهو يضحك: تكفى نهيان اذا غنيت غن شي يوصل للقلب
ليلى صفقت : ايه ايه
ضحك ثنيان وهو يبدى يدق (ابعتذر ... عن كل شي ... وصرخوا جابر وليلى معه :إلا الهوى .. ما للهوى عندي عذر ..
وكملوا معه يغنون ويضحكون ووقفت ليلى وهي تغني الكوبليه وهي تشرحه على نفسها وتضحك (اتصدقين ... ما اخترت أنا أحبك ... ما احدٍ يحب اللي يبي ...
ياحبي المرّ ... العذب ... )
وقف نهيان ما غنى وكملت ليلى والكل يصفق لها ويضحك
_______________________.
وفي بيت ابو خلف
طلع خلف وهو بعد ماصحى النوم وهو ضايق خلقه واخلاقه وقف وهو يضبط شماغه وملامح الضيق واضحه على وجهه
لكن لف وهو مستغرب الغناء للي بالمطبخ وريحة الكيك طل وانصدم: وعد!؟ وش عندك!؟ ركض فيصل: منيييين طالعه الشمس اليوم
قربت ندى وهي معها سلة الغسيل: اذكروا الله تكفون ماصدقنا تروق
وجدان اللي كانت محشوره تغسل المواعين بعد تخبيص وعد : ياخي ليه الروقان مايشملني وتعفوني من المواعين
اماني : الا احسسسن عشان تصيرين سنعه
وجدان: مابي ياخي
قربت حنان: اطلعي خليها انا اكمل
وعد: حنااان وخري عنها خليها تعلم
وام وعد اللي كانت جالسه بالحوش هي وام خلف ضحكت: كفو خلوها تسنعها
اماني : عاااد وعد اذا مسكت احد تعلمه الشغل يعني تعلمه
وعد: خليف لا تروح لين تذوق الكيكه
خلف: كنت بروح بس هونت والله ، بس اقدر اعرف وش المناسبه
وعد قربت وهي معها قطعه عطتها خلف : ابد مسويتها مكافأه لنفسي ومصالحه ذاتيه
فيصل بضحك: كل هالفلسفه وبتدرسين بعد!؟ حمدلله ابوي رفض
ضحكت وعد : ماعليه خذ راحتك
انهبل فيصل من الوناسه انها ماهاوشت : حمدلله هاذي فرصه ما تتاخر
ركض سالم وغيث: نشم رييييحة كيك
وعد: ايي لكن افرشوا يلا الفرشه عشان نجلس كلنا وانت غيث ناد وروح ناد مضااوي وهيا والبنات وجدتي وخذ هالصحن عطه عزوز يلا
فيصل: لا لا هاتوا صحن عزوز انا اوديه
خلف : عطيني قطعتي هنا بأكل واطلع وراي شغل وجهزي قطعه على طرف ابيها لنادر
وعد: ابشر
وركض غيث وهو يدق الباب وفتحت مضاوي قبله : مسوييين كيك
غيث: ايييه ومسويته بعد
شهقت مضاوي :شصاير بالدنيا!؟ ضحك غيث: تقول مكأفاه لنفسها
ضحكت مضاوي ودخلت وركض غيث ينادي وسمعه عقاب
وطلع هيا والجده وراح غيث لسحر وعهد وشهد : بنات وعد تقول تعالوا قهوة العصريه
وقفوا بيروحون بس طلع عقاب بغضب: وللله للي تطلع لكسر رجلها تسمعون
سحر: ليش!؟ عقاب: كذا مزاج .
عهد: ليه يا عقاب!؟ وش سوينا عشان تحكرنا!؟ صد عقاب بغضب: والله ياعهد لو تنطقين كلمه ثانيه ما ترضين العواقب
سكتوا وطلعوا لغرفتهم بضيق لكن قبل يطلع عقاب شاف غيث راجع : عقاب جدتي تقول خل البنات يجون
عقاب: اقول اذلف احسن لك
طلع غيث خايف ورجع و وعد واقفه بحقد وراء البابب: وش قال
غيث: عيا وهاوشني
وعد:هين
راحت وهي تجلس قدام جدتها: جدتي!؟ شوفي عقاب رافض ان خواته يجون يتقهوون معنا
ام خلف: لييه وش فيه الله يصلحه
ندى: من الشر اللي براسه
هيا: هو معصب حتى السفر كنسله و يمكن يبيهم
ااماني: ماهو عذر !؟ وش ذنبهم خواته
وعد : جدتي ترضين بنات عيالك يتفرقون عشان مزاج السيد عقاب
ام وعد: وعد خلاص
ام ناصر : هيا تعالي قوميني هذا ماعاد يستحي
وقف معها هيا ورجعوا لبيتهم وعقاب واقف بغضب يعدل شماغه
ام ناصر: عقاب وجع يوجع العدو
عقاب : وش فيك ياجده وش فيك
ام ناصر: ماعاد الا هي تحبس بنات ولدي نايف عن بنات عمهم معصي والله
عقاب : جدتي لا تحوسين الدنيا خواتي مايروحون ابيهم اليوم
ام ناصر: معصي والله معصي ماعاد الا تشغلهم خدم تبي شي اقض شغلتك بنفسك اما انك تحبسهم لا يستانسون ويوسعون صدرهم ماقالها الله يا عقاب
اعتلى صراخ عقاب والبنات يسمعون من طرف الباب الثاني ووعد مستانسه وكان عقاب يدري ان وعد مرسله جدتها لكن سوت اللي براسها وجابت ام ناصر البنات وعقاب واقف بغضب وطلع وهو يضرب الباب برجله
وجلسوا سحر وعهد وشهد وهم متفشلين من تصرف عقاب
لكن ماهي الا ثواني وتغير الجو لسوالف وضحك ونسوا عقاب اللي بيموت من القهر
_______________________.
وفي اسفل الحاره
في المكان المعهود كان خلف جالس بهدوء يفكر وفز على صوت نادر : خليف انت هنا
خلف:ايه توني وصلت
نادر: جيت وجابك الله
خلف : وش فيك !؟ نادر: اول شي وين عقاب
خلف : عقااب طار يقول بيسافر مع عمي محمد
نادر: الله الله ياعقا..
قبل يخلصون كلامهم دخل عقاب مثل العاصفه وجلس بغضب
خلف: بسم لله الرحمن الرحيم وش فيك ؟ ليه مارحت مع عمي محمد
نادر: وش فيك معصب!؟ صاير شي
عقاب: ماصار شي بس ماعاد بسافر
خلف: لييييه!؟ وش طرا
عقاب بكذب: طلبونا في مهمه مقدر اغادر البلاد
خلف:اشوى خوفتني
نادر: يلا خيره الهم زين انكم تجمعتوا الحين احتاج فزعتكم
فزوا كلهم: وشو !؟ نادر ببتسامه بارده:زواجي بعد اسبوعين .
عقاب : وشوو!؟ بعد اسبوعين انخبلت انت !؟ خلف: وش ذا السرعه ياولد!؟
نادر: ياخي ابوي وابو البنت اتفقوا كذا انا من الصدمه عجزت حتى اعلق
خلف : وش السوات
نادر: السوات انك تقوم انت وياها وتفزع معي يعني نبي نرتب امورنا قبل العرس
عقاب : ابشر اللي تبيه بس اشر وابشر
نادر: ما تقصر
خلف : انت قلنا وش ينقص وحنا نكمله
نادر مد الورقه بينهم اللي فيها الاغراض وهم متعودين يساعدون بعض في كل الحالات واللي معه يعطي اللي ما معه
وكانت حالتهم الماديه متوسطه كلهم
خلف: اول شي البيت كيف وضعه!؟ نادر: امي وابوي بيروحون حفر الباطن بيجلسون عند جدي ثلاث شهور لين يتشافى تعرفون بعد حالته تعبانه
عقاب : يعني بتكون فالبيت لحالك
نادر: ايه
عقاب : بسيطه اثث غرفتك وباقي البيت مأثث يعني التزاماتك خفيفه
نادر: ايه
عقاب : اجل اسمع اثاث غرفتك علي
نادر: لا تكفى دور شي هين مالي خلق اشتري لك غرفه اذا تزوجت
ضحك عقاب: لا ما عليك مسموح
نادر: لا ياعيال انا ابيكم بالخفايف كابي تثقلون على انفسكم
خلف: اقول اعقل بس حنا وشوله اسمنا اصحاب !؟ عشان نوقف بالثقايل ووقت الزنقه يلا عقاب الغرفه وانا علي كل النواقص الباقيه وقف نادر يحضنهم بضحك: كفو كفو هذا هم اصحابي
عقاب : وامك وابوك متى بيروحون!؟؟ نادر: هنا مربط الفرس
خلف : وشو بعد
نادر: ابوي يقول ندخلك على زوجتك من هنا ونطلع للحفر من هنا
خلف : في عز الليل!؟؟؟؟
عقاب: انا احس هالزواج لخبطه
نادر: لحظه سفر امي وابوي عشان يروحون لجدي بسرعه حالته صعبه بالقوه ابوي مدبر له ممرض يجلس عنده هالاسبوعين يعني حالته مستعجله وابوي خايف عليه
خلف : مهما كان طلعتهم بالليل صعبه !؟ نادر: هو انا بجلس يومين هنا وبعدين اطلع وراهم اسلم على جدي واطلع اتمشى
عقاب : انت ابخص
وقف خلف: زين انا تاخرت على الدكان لكن شوف وش ينقص وبلغني
نادر: الله يرزقك من واسع فضله ياخليف
خلف : امين
عقاب : يلا انا بعد بروح اشوف دوامي
نادر: كلنا رايحين
كل واحد راح لمكان وعقاب رايح يقطع اجازته عشن ما تنحسب عليه وهو يبي يتفضوى لقلة حياء وعد
_______________________.
في السوق
دخل خلف وهو يسلم على اهل السوق لكن وقف ببتسامه يناظر ضاري اللي كان بالسوق وهو يسند حرمه كبيره بالسن على ذراعه ومشغول في المحلات لكن صوته عالي كالعاده
اتجهه خلف مبتسم اول ماشافه عند محلهم : حياك الله
لف ضاري وابتسم : انت يااااهلا والله ومسهلا
سلموا على بعض وابعدوا وضاري للحين ماسك امه ماتركها ولا حتى خلاها وراها زي مايسوون بعض الشباب اللي يستحون من اهلهم
ابتسم ضاري : تراك رحت ماعلمتني اسمك
ضحك خلف: ابد معك خلف ال قايد من اصحاب هالمحل
ضاري بفرح: والله شرفتنا يا خلف عاد جيت وجابك الله
خلف: امرني
لف ضاري على امه :يمه وين الراديو !؟ رفعت ام ضاري الكيس وهي رابطه وفي داخله راديوا قديم اخذه ضاري وهو يعطيه خلف : راديو امي خربان من صبح الله تبي تزينه ولا زان قلت اجيبه لمحلكم تصلحونه
اخذه خلف وهو منزل راسه مايناظر ام ضاري : على خشمي تبشر انت وامك
سحب الكرسي يحطه قدامهم: ارتاحي ياخاله
جلس ضاري امه وقال: وش تشربون
لف ضاري يناظر: اذا عندكم قهوه
خلف: ابشر
صب خلف لهم القهوه وضاري يبدي امه على نفسه في كل شي
وجلس خلف وهو يضبط الراديو وضاري يسولف ويسأله عن كل شي يسويه
ورفعه خلف: وهذا راديوك وصلحناه ياخاله
ام ضاري: عساها يدك ما تمسها النار
خلف: اميين وياك
لف ضاري لها بضحك ويمازحها: ايييه صلح راديو العجوز وبتزعجنا باغاني بدر الغريب
ضحك خلف: الله يطول بعمرها خلها توسع صدرها
ام ضاري صدت وهي تضحك ووقف ضاري: كم الحساب ياخلف
وقف خلف مبتسم : ابد هالمره على حسابي ضايفتكم
قبل يحلف خلف فز ضاري : والله ما تدفعها كلها
خلف : يا ابن الحلال اذكر الله اسمعي طيب نص علي ونص عليك
ضحك ضاري :اجل تم
دفع النص وطلع وهو يودع خلف ويسولف مع امه وضحك خلف بعجب من هالشخص
لكن وقف عيونه على جابر اللي جاي ومعه واحد غريب لكن معهم وراهم حرميتن ( ليلى ، ومريم)
فز قلبه لا شعورياً وهو يتذكر بنت النوخذه اللي شافها ترقص لكن الحين عيونها واضحها وعيونه حلوه وجريئه لكن مجرد ما طاحت عينها بعينه صدت بخوف ولفت
_______________________.
اما ليلى كانت تمشى مع اخوانها وهي جايه بس تتمشى لكن حست ان احد يراقبها ولفت انصدمت انه خلف !؟ مدت يدها لقلبها بخوف ( شفيه هذا!؟ ليش يخزني ! عمى بعيييينه مايتسحي ماينتخي )
صدت وهي تقرب لجابر بخوف
ولف جابر: شفيچ !؟
ليلى: ولا شي
جابر: فلوس ماااكو ترا لا تلزقين
ضحك نهيان: تعالي انا اعطيچ
ضحكت ليلى بخوف انهم يشوفونه : لا مابي بس ابي امشي معاه
سحبها نهيان عنده وهم كلهم متوقعين انها تبي فلوس
_______________________.
وجلس خلف وهو منحرج من نفسه ( الله يفشل العدو شافتك البنت يا مريض!؟ وش عرفك انت هي ولا ماهي هي )
طلع من الدكان رايح للبقاله اللي قدامهم اخذ عصير بارد وجلس يبي يبرد قلبه اللي فجأه صار يدق
ولف لكن تصلبت عيونه على الدكان اللي قبالهم كانت وحده جالسه على الكرسي وتشرب عصير والباقين لاهيين بالمحل
واول ما رفعت طرف النقاب عشان تشرب بان خدها وبانت الشامه
وهي ماهي منتبهه لكن خلف انتبه وشرق بعصيره ووقف يكح بذهول
وركض ممدوح يخبط على ظهره : بسم لله عليك وش فيك
ابعده خلف : مافيني شي
نزل العصير وطلع وهو يمسح وجهه وللمره الثالثه لف على صوت نهيان: ليلى حبيبتي يلا خلصنا
وقفت ليلى وهي متوتره من وجود خلف اللي توها تلمحه
اما خلف رجع لمحله وهو منلخم مفجوع ومصدوم
هاللي ترقص بالفيديو هي ليلى
اليوم عرف اسمها وعرف انها من بيت النوخذه وشاف الشامه اللي جذبته
لكن من هاللي معها من هاللي يقولها حبيبتي ... !
دخل وجلس ماشاف جده ولا شاف ابوه
ابو خلف : خليف علامك
فز خلف : بسم لله الرحمن الرحيم
ابو ناصر: وش فيك منخطف لونك
فز ابوه وركض له: تعبان!؟ مكتوم فيك شي
خلف : لا يبه لا
ابو خلف : اجل وش فيك
خلف : شرقان بس
ابو ناصر: بس ؟
خلف: ايه ايه
رجعوا لاماكنهم ورجع خلف ورا مكتبه وهو ثانيه يضيع في الشامه وصاحبة الشامه وساعه تبدل ملامحه لاستغراب اذا تذكر الرجال اللي معها
_______________________.
وفي بيت ابو خلف
الكل مجتمعين ويسولفون وقفت سحر وعهد
عهد: يلا شهد
وعد: وين رايحين
عهد بهمس: بنروح للبيت اكيد عقاب بيرجع واختف يزعل علينا ومايخلينا بكره نروح الحفل
حنان: ايه احسن لاتعاندون ويسوي سالفه
سحر: هو ذا اللي بيصير
شهد: والله انا ماني رايحه بجلس مع وجدان
مضاوي: انتي وياها ما تملون من بعض
وجدان :لا زي ما انتم ما تملون
اماني : اسمعوا طيب مايمديه يجي الحين اكيد مع خلف وجدي بالمحل خلونا نطلع فوق نلعب
مضاوي: ماعليكم انا اتوسط لكم
هيا: ايييه هين شفنا وساطتك اليوم يوم عصب
ندى : ماعلينا بس خلونا نلحق قبل
طلعوا كل البنات السطح
مضاوي : نبي نلعب غميضه
وعد :نلعب بس ياويلك تنغزيين احد او تضربين
ندى : لا تصدقينها كذابه اول مانبدى تبدا حركاتها
هيا: صدق مضاوي فكينا
مضاوي : خلاص طيب
اماني : كذااااابه خلوها تبدا اول وحده عشان ماتسوي شي
مضاوي : خلاص ببدا
اخذت الطرحه وهي تربطها على عيونها وابتدوا يلعبونر
وكل ما تمسك وحده ينقلب السطح كله صراخ
لكن وقفهم سالم وغيث اللي يناظرون
وعد : وش فيكم!؟
غيث : نبي نلعب معكم
ندى: تلعبون مع البنات!؟ غيث: وش نسوي عزوز وفيصل يطردونا وانتم تطردونا
حنان: خليهم تعالو تعالو
تجمعوا يلعبون ويضحكوووون ومبسوطييين
_______________________.
