.
الكاتبه والمبدعه / أديم الراشد .
.
_____________________.
خلف : ليه ضاري ما انظلم بعد يانادر يانادر وين اودي وجهي منه ووش بقوله انا داااااري والله داااري انه غلط وانه شين لكن ماقدرت اتهاون بضاري ابد ماقدرت
سكت نادر ماعرف وش يرد الموقف مظلوم من كل الاتجاهات خلف وضاري وعقاب ومضاوي كلهم مظلومين وموقفهم حرج
بعد هالكلام عم الصمت وقرر خلف ينام قبل تصكه نوبه جديده
وعقاب مثله ونادر بعد وكلهم شايلين هم ضاري ولو عرف وش بيصير
_______________________.
ومن بكره
بدا خلف يدور بالكويت ويسأل عن جابر واغلب الردود كانت مشرفه والكل يمدح ويثني ولكن اعترض في طريقه شخص وقال/سلام عليكم يا اخوان
الكل: وعليكم السلام
يعقوب:منو فيكم خلف القايد
خلف : انا امر سم !!
يعقوب:ما يامر عليك ظالم لكن سمعت انك تسأل عن جابر ولد النوخذه
خلف: اي نعم
يعقوب : وسمعت بعد انك تسأل في امر زواج
خلف : اي نعم
يعقوب : ودام الموضوع زواج وعمر انا يا اخوي جاي اعطيك للي انا اعرفه وانا ادري ان بنات الناس مو لعبه وادري ان كل واحد يدور لاهله الستر ورجال كفو
الكل انتبهه له وخلف اكثرهم وبدا يعقوب يألف امور وامور عن جابر مفجعه وانفعل عقاب بغضب من الكلام سمعه
لكن خلف كان في قلبه تحذير ليلى وقال بهدوء : مشكور لكن من انت ؟ومن يقالك!؟
يعقوب : انا يعقوب ولد عمته ورغم اني ولد عمته لكن مهما كان انا عندي خوات واعرف شعور انك تبي لاختك رجال يخاف الله وطيب
ابتسم خلف اول ما تذكر اسمه اللي كتبته ليلى اول واحد فالقايمه وسحب يده من يعقوب : ماقصرت
تركه وراح واسرع عقاب بغضب: خليف من بعد هالكلام يخسي جابروه يتزوج اماني
نادر: اكيد
التفتت لهم خلف ببتسامه: واذا قلت لكم انه كذاب
لفوا يناظرونه باستغراب : كيييف!؟ خلف: كذاب ونصاب ومنافق
نادر: شلون عرفت ؟؟؟
خلف تورط لكن قال: قبل فتره كنت اسولف مع جابر وقال بينهم وبين عماته مشاكل ومحد يطيق احد وقال انهم كذا مره سوو فيه هالحركات
عقاب: وليش مايكون جابر كذاب
خلف: لاني عاشرته واعرفه واعرف صدقه وكذبه وكل اهل الديره يمدحونه وهذا الوحيد اللي ذمه
نادر: صراحه في ذي صدقت ودامك تعرفه اجل وش يردك
خلف: كنت متردد بس الحين خلاص
عقاب : يعني راجعين
خلف : اي نعم
طلعوا متجهين للخفجي وخلف مبتسم ومبسووط انه واثق جداً في ليلى وانها تكون له العون في كل مكان
_______________________.
في الخفجي
كانت مضاوي هاديه اليوم الثاني ولا احد ناقشها يعرفون تقلبات مزاجها كان ودها تروح تقول لابوها بس كانت خايفه وقررت تسكت .
اخذت قهوتها وطلعت بضيق متجهه لبيت ابو خلف
وشافت حوريه جالسه بالحوش ومحد عندها الكل صار يجلس فوق وتاركينها صدت بقرف وقربت بتطلع لكن دخل ابو خلف اللي كان مبتسم ابتسامه وسيعه لحوريه وكانت هاذي اول مره يكون بهالابتسامه والحفاوه
وقفت حوريه تستقبله وفي هاللحظه حست مضاوي انها بترجع ( الله يكرمكم ) من المنظر
سحبت نفسها وطلعت فوق ودخلت وهي تنزل الترمس وقالت بقرف: يعع يع يع انا اول مره يطيح ناصر من عيوني كذا
لفوا كلهم عليها بضحك وهم صاروا متقبلين الوضع
ندى: وش فييييك !؟ مضاوي: ابوكم يابنات يصدم
وجدان: اسكتي لا يسمعونك امي وعمتي كفايه صدورهم ضايقه
مضاوي : عساهم مايجون ويشوفونه كذا
حنان: وش بيسوون امر الله
اماني: وااااي حنان الله يعطيني برودك
حنان: وش اسوي يعني
مضاوي:لا تسوين شي اسكتي بس ، خلف ماجاء
ندى: كلم الصبح يقول شوي ويمشون اخذ اخبار الچويتي كلها
تنهدت مضاوي بحسره: الله يقويه
وجدان: وين بنات عمي!؟
مضاوي : يعزلون وينظفون مع هيا
اماني: نفسي اعرف انتي وش فايدتك
مضاوي : فايدتي انضرب على قلبي واقابلكر
ندى: قوموا بنروح لهم نساعدهم ارحم من منظر ابوي وحوريه
وجدان: صادقه
قاموا كلهم متجهين بيت الجد قايد وتركوا الدنيا باللي فيها لحوريه
_______________________.
وفي بيت ضاري
رجع بالليل متأخر وكان عذره لامه انه يحتفل مع اخوياه مايبي يضيق صدرها ابد ولا يزعلها كان كاتم قهره وغيضه بنفسه مايدري كيف بيتصرف وخصوصاً ان زواجه من مضاوي تحدد بعد شهرين من الحين وحمد ربه انه طول الفتره اللي كان متوقع انه بيقطعها حب وطرب لكن الحين تبدل الحال وصار يفكر كيف بينهي هالقضيه ويسكرها بأقل الخساير
صحى من هواجيسه على صوت امه اللي تمشي بالحوش وتخطط وين بتسوي الغرفه الاضافيه لمضاوي واللي بتكون كبييير وكيف بتخلصها وكيف بتأثثها ولفت تناديه: ضاري ضاري تعال تعال
وقف بهدوء: سمي
ام ضاري : صحصح يمه من هالنوم وشد حيلك انت معرس والوقت يركض
تنهد ضاري ببتسامه مكسوره: ابشري
ام ضاري: رووح هناك يمه متر لي الحوش اشوف
رفع ثوبه ضاري وبدا يمتر برجوله وهو يتصنع الفرح عشان امه وهذا شي مو جديد عليه لانه يااااما تعود يزيف الضحك والفرح وقفت على هاللحظه!؟ وكمل مع انه واحلامها وهو حتى خلف وعقاب مايبي يشوفهم هالفتره
_______________________.
وفي بيت مبارك .
كانت وعد تستعد للمعهد اللي اتصلوا فيها وقالوا بكررره تبدين دوام .
كانت تدور مع مبارك في السوق وكان مبارك خاضع نوعاً ما لطلباتها بما انه رسمياً صار معجب ومتيم فيها ينتظر بس ساعة الرضا .
كان يحاول انه يتودد لها ويكسبها وهو صار متيقن وعارف ان وعد ماتمشي بالقوه ابد
اما وعد كان معجبها الرتم الثابت بينها وبين مبارك وكانت حابه تأثيرها عليه
اخذت كل شي تحتاجه ورجعت للبيت واول مابدت تطلع اغراضها صدمها مبارك اللي قال بهدوء: ألبسي اغراضك خلينا نشوفها عليك
تجمدت وعد بس قالت ببتسامه: لا لا لا خلها مفاجأه كل يوم بيومه
لا شعورياً قال مبارك: يعني غصب تطلع هالثلاث شهور من عيني
رفعت وعد كتفها ببتسامه: تحمل
اخذت اغراضها وابعدت واخذ اغراضه مبارك وطلع من البيت بكبره مايتحمل كل هالثقل والجمال ابد
_______________________.
واخيراً وصلوا الشباب للخفجي
وبسرعه اخذ نادر طريقه لبيته مستعجل يحس انه بهاليوم اشتاق لشوق فعلاً اشتاق لها حييييل اشتاق لها دخل وهو مبتسم واول ماطاحت عينه عليها وهي تدور وتقرا كتاب جابه لها قبل يروح ورفعت راسها وشهقت بفرح اول ماشافته مبتسم اسرعت له وهي نيتها السلام العادي لكن تقبلها نادر اللي احتضنها بشوق عجز يردع نفسه لا يحضنها ولا ابعدت شوق بالعكس استقرت بحضنه وهي خجلانه لكن تحس انه أمان الدنيا كلها فيه
ابعدوا اول ماسمعوا صوت ان نادر تقول : والله ماعرفنا لك كل يوم لك نية
لف نادر اول مافهم قصدها واتجهه لها يسلم عليها ويحضنها هي بعد لكن ابعدته وهي تقول : وفره لغيري نادر: افا يمه
ام نادر: هاه قضيتوا من الكويت
نادر : ايه حمدلله
شوق : جوعان اسوي لك شي
نادر: لا لا ارتاحي متغدي وشبعان بس ابي انام ، تبين شي يمه
ناظرته امه بطرف عين:سلامتك
راح نادر اللي يسابق الخطوات وهو خاطره يسأل شوق اذا احد اذاها وهو مو موجود
وفعلاً جات شوق بعده وهي تاخذ اغراضه ولف: هاه شوق عسى ماصار شي بغيابي
ابتسمت شوق بعبط : ايه
طاح قلب نادر وقرب :وش صار
رفعت شوق الكتاب بضحك: ختمت هالكتاب اللي جبته
ابعدها نادر بضحك: الله يسامحك طاح قلبي
ضحكت شوق : وش بيصير ماصار الا كل خير لكن لك فقده والله
ابتسم نادر برضا وجلس : مو بس انا لحالي للي لي فقده
سكتت شوق بحب وخجل وهي يكفيها مابين الفتره والثانيه تسمع هالكلمات من ناادر
_______________________.
في بيت ابو خلف .
وصل خلف للبيت وده انه يبشر ليلى بموافقتهم على جابر بس كيييف يبشرها هاذي يبي لها تفكير دخل وشاف الكل جالسين فالحوش الصغير وسكوت سيد الموقف
خلف: سلام عليكم
الكل : وعليكم السلام
فزت امه له تسلم عليه: حمدلله السلامه يمه كيفك الحين ان شاء الله بخير
خلف:بخير الحمدلله
ام وعد: عسى ما تعبت من الجو
خلف : لا لا حمدلله
ابو خلف : وش حصلت
خلف : حصلت كل خير وجابر رجال كفو وما ينرد
ابو خلف : شلوون يعني نزوج اختك كويتي
خلف: ايييه كويتي وش فيها يعني
ابو خلف : الظاهر انك انهبلت
خلف بانفعال : ابد والله ما انهبلت بالعكس انا ماعلي لوم
لاول مره وقف ابو خلف وقال: بعدين نتكلم فالموضوع لكن اليوم انا عندي لكم خبر
الكل لف له وصار يناظره وقال : ابشركم بيجي لكم اخو .
الكل تجمد يناظرونه ووقف فيصل بذهول وقال :نعععععم
وقفت ام وعد تناظره وتناظر حوريه: ووشووو حامل !؟ مسرع!؟ ابو خلف : ايييه حامل وقلت لكم زواجي من فتره
فجأه وقف خلف يناظر ابوه بهدوء وكأنه ما سمع وقال: بكره بكلم جابر وبقوله موافقين
اخذ اغراضه بغضب وطلع وهو مصدوم من سالفة حمل حوريه ! اللي تعتبر سريعه!؟
كلهم كانوا مصدومين وكلهم ماكانوا مستعدين والكل طلعوا بدون اي كلمه زياده او مباركه
ووقفت حوريه تمثل الضيق وقالت: شفت ياناصر انهم مايبوني ولا يبون ولدك
ابو خلف: ماعليك منهم انا ابييييك وابي ولدك ماعليك
ضحكت حوريه ضحكه مستفزه من اثرها طلع فيصل من المجلس بغضب وهو يستغفر بصوت عالي وطلع بيت جده بغضب دق الباب وفتحت هيا باستغراب : شفيك كسرت الباب
فيصل: جدي ويينه
هيا: جوى خييير وش صاير
فيصل: بلوى بلوى
دخل وهو ينادي: جدددي عمي جدتي
الكل طلع له مستغربين: فيصل وش فيك
فيصل: جدي تصرف ياجدي
ابو ناصر: بسم لله وش فيك تكلم يا ولد
فيصل : جدي حوريه حامل
سكتوا كلهم بصدمه وقالت ام ناصر: وشووو حامل وهي ماصار لها يومين محمد : زواجه من قبل يمه وش فيك
ابو ناصر : وش اتصرف فيه يا ولدي حرمه وحملت وش اسوي
فيصل: بكيفها لكن ياجدي تصرف وخل ابوي يطلعها من البيت ياجدي ما نقدر نتحمل اكثر من كذا ياجدي انت لو تشوف حال ابوي ما تصدق
ام ناصر: ماعليه يمه ماعلييييه انا اوريه انا اسنعه
ابو ناصر: اعقلي يا مره وش بتقولين لرجال عمره فوق٥٠ عقله في راسه ويعرف خلاصه
طلع عقاب مستغرب : وش فيكم؟؟
محمد: من غير ناصر وسوالفه بعد
عقاب : لا حول الله .
محمد : يبه مهما كان حنا ما نرضى هالحال ولازم يطلع بها برا مكان ماجابها يرجعها
ابو ناصر: اصبروا اصبروا نفكر مانبي نتسرع
محمد : خليف وين!؟ فيصل: طلع معصب
الكل: لاحول الله
سكتوا ينتظرون قرار الجد اللي بيكون فاصل مع حال ابو ناصر اللي طاح من عيون عياله بهالتصرفات
_______________________.
في السوق
رجع خلف فتح المحل اللي كان اليوم مسكر وما انفتح الا الحين وماله مفر الا هالسوق
جلس بغضب وزعل متضايق متضايق حيل ومخنوق تمنى من كلللللل قلبه يجي ضاري لكن خايف من انه ينكشف له ويبان عليه الكدر والضيق
اخذ نفس بضيقق لكن فضل انه يطلع من المحل ويروح يمشي احسن
سكره وطلع وهو يمشي بهدوء صادفه جابر اللي كان يحاول يتحاشى خلف عشان ما يأثر على قرار خلف
لكن ناداه خلف اللي كان في لحظة غضب من ابوه اللي فجأه انسحب من كل شي وترك كل المسؤوليات على خلف من دون مقدمات وانسحب عشان يكون مع حوريه هالدخيله اللي محد رحب فيها ولا احد مرتاح لها
جابر: هلا خلف
خلف : شلونك عساك بخير
جابر: حمدلله بخير انت شلونك
خلف : حمدلله وهاذي وصلتي من الكويت الحبيبه
جابر ابتسم بهدوء وتوتر: حمدلله على السلامه
خلف : الله يسلمك ويشهد الله علي يا جابر اني سألت عنك وانا كلي ثقه اني ما بحصل فيك عيب وعذروب وادري انك رجال كفو وتستاهل الخير كله
جابر : الله يخليك يا خلف والله شهادتك يااخوي اعتز فيها
خلف :تستاهل كل طيب وابشرك ان ربي كتب لك عندنا نصيب وبلغ النوخذه ومتى ماحبيت تملك عطنا خبر وحياك الله
للحظة كان جابر وددده يشق ثيابه من الفرح وده يطير لكن تمالك نفسه بلحظه قبل ينفضح وابتسم بركاده: الله يبشرك بالخير يا خلف وان شاء للله اني عند حسن ظنكم وان شاء الله ان ربي يقدرني على كل طيب
خلف : ان شاء لله ان شاء الله
من فرط الفرح بدت ابتسامة جابر تتسع ولا شك فيه خلف لانه مو معه اصلا تفكيره متشتت ومتقسم
استاذن خلف ورجع وهو الحين بيصير في مواجهة ابوه اللي بيقوم الدنيا ويقعدها ان خلف وافق بدون ما يبتون هالامر لكن الامر اللي حس خلف انه خاف منه انه ما رجع لاماني ولا سمع ردها الاخير وهنا خاااااف انه تسرع وخاطر بأماني بعد
ورجع على البيت مسررررع يبي يسمع شي يريحه لانه من ذهول المواقف صار ينسى
دخل مسرع بدون ما يركز في حوريه اللي كانت تكلم واول ما دخل خلف سكرت السماعه بخوف ماعطاها خلف اهتمام وطاااار لغرفة اخواته وفتح الباب بدون مايدق وهو مرتبك
فزوا كلهم بخوف : خلف وش فيك ً.
تفشل خلف وصد وهو يقول :درعمت كذا وروعتكم لكن اماني تعالي ابيك .
وقفت اماني بتوتر : وش فيك
خلف : تعالي
طلع خلف لسطح وطلعت وراه اماني بخوف : خلف لاتخوفني
اخذ خلف نفس وهو يقول : اسمعي انا سألت عن جابر وما تركت واحد الا وسألته عنه بالكويت ولا بالسعوديه والرجال طلع كفو وابن حلال وانا ما اشوف فيه عيب ابد ويستاهلك وانتي تستاهلينه
قالت اماني بهدوء : خلف انا ما عندي مانع اذا انت راضي وتشوفه كفو انا ماعندي مانع انا اللي تشوفه انت انا امشي عليه
ابتسم خلف براحه: اجل الله يوفقك ويتمم عليك
نزل وترك اماني اللي بتسمت وهي ماتدري وش شعورها وش تحس فيه هاللحظه الا انها كلها ثقه بخلف واي احد يجي من طرف خلف
_______________________.
في بيت النوخذه
ووصل جابر اللي بيموت من الفرح ودخل وهو ينادي: يببببه يممممه ليلووووه وينكم
طلعت ليلى : بسم لله شنو فييييك
ام نهيان:جابر شفيك يمه خرعتنا
اتجهه لها جابر بفرح : وين ابوي وين النوخذه
طلع ابو نهيان : جابر شفيك جنيت!
جابر: يببي يمه يببي ابشرچ وافقوا وافقوا
ابو نهيان: من قالك!؟ جابر: توووه خلف بالسوق قابلني وقالي موافقين وبلغ النوخذه ومتى ما بغيت تجي تملچ حياك
ارتفع صوت ام نهيان تغرط وهي تحضن جابر : ياعله سعيييد ومبارك يممه الله يفرحني بعرسك وعيالك ياحبيبي
ليلى كانت بتموت من الفرح اقبلت وهي تسلم على جابر وتبارك له وفرحانه فيه وفرحانه ان خلف عرف يتصرف ولا ضيعهم من يده
ولف جابر على ابوه بحماس: متى نروح نملچ (نملك🌚) يبه
ابو نهيان: اول شي بالمبارك وبعدين بكره نروح حق ابو خلف ونتفق معاه
جابر: زييين زين
ليلى: تعااال خلنا ندق على نهيان وشيخوه ونقولهم
راحواا يركضون لتليفون وابو نهيان يراقبهم بهدوء عياله بدو يتزوجون واحد واحد وشكله البيت بيفضى عليه
_______________________.
الكل كمل يومه عادي "ومن بكره "
في بيت وعد
اللي جهزت واستعدت وراحت للمعهد اللي تحلم فييييه ليالي وسنين ودخلت وهي تناظر حولها وتلف حول نفسها عشر مرات تشوف البنات والحيااه اللي احلمت فيها
دخلت ببتسامه واول ما استقبلتها المشرفه جلست وعد منصته لكل شي ينقال وتحلم بكل وظيفه او منصب ترشحها المشرفه لهالدراسه اللي يدرسونها
ماكان ودها الوقت ينتهي وتطلع وطلعت لمبارك وهي مبسوووطه واستغرب مبارك الرضا والفرح اللي هي فيه واستبشر خييير وانبسط وقبل يبدا بموضوع
لفت وعد : مبارك طلبتك
مبارك اللي لا شعورياً قال: تم .
ابتسمت وعد وعرفت انها تمكنت منه : ودني لاهلي ببشرهم
مبارك: زين
اخذها لبيت اهلها ونزلت ببتسامه ورضا لكن كشرت اول ماشافت عقاب طالع لدوامه ويناظرها بطرف عينه
دخلت وقفت تدق الباب وفتح غيث اللي صرخ بوناسه: وعد دخلت وعد بفرح: هلا ياحبيبي هلا
غيث: ادخلي كلهم جوا
وعد : زين زين
دخلت وعد وهي تشوف الكل بالحوش وابتسمت اول ماشافت حوريه ماهي فيه لكن فيه خلف وفيصل جالسين كالعاده يفطرون
وعد: سلاااام الكل : هلاااا وعليكم السلام
وقفوا يسلمون على وعد اللي واقفه مبتسمه بكل قوتها
وفز فيصل يناظرها من بعييييد ويقرب ويبعد ويضحك: اكتب يا تاااااريخ وعد مبسوطه وتضحك
ضربته وعد بضحك: انثبر عندي لكم خبر يموت من الفرح
فزوا كلهم وكلهم بصوت عالي قالوا: حامللللل
بهتت ملامح وعد وقالت بسرعه: لااااا وش فيكم انتم
جلسوا كلهم خلف: بشري يلا وش عندك
وعد رفعت ورقة المعهد بفرح : اخيييييراً وبعد سنين من الانتظار ابشركم رسمياً دخلت المعهد وداومت اول يوم وهذاني توني جيت منه
فزوا البنات يصارخون بفرح ويحضنونها ويضمونها وخلف معهم : يلا الحمدلله اخيراً حققتي حلمك الله يتمم لك بخير
فيصل : ماشاااااء الله من متى عندنا هالدراسه
وعد : فيصلووووه عقليتك المتخلفه ذي لو سمحت فكني منها
ام وعد : بس ياوعد يا يمه بتنشغلين عن زوجك وبيتك
وعد: لا تخافين انا اعرف اتصرف وبعدين مبارك موافق
ندى: وللله طلع مبارك احسن من ما هقينا
خلف : المهم انه رجال
وعد : اييه وش صار وش ما صار عطوني اخر الاخبار
فزت وجدان: ابشرك اماني وافقت على الچويتي
وعد : ماشاء الله مبروك مبروك
ابتسمت اماني : الله يبارك فيك
ام خلف : الله يوفقكم يابنات وان شاء الله ربي يكتب نصيب حنان وندى ووجدان بعد
الكل : امين
وقفت اماني : اسمعي اجل قنبلة الموسم
فيصل: شينة الحلايا يقول ابوي انها حامل
شهقت وعد برعب: وشووو حامل !؟ مسرع
ام خلف : كتب لها ربي عاد
وعد : وهي وينها الجنيه!
حنان: راحت المستشفى تتطمن على حملها
ندى: ياللله عساها ماترجع سالمه يارب
خلف : خلونا منهم خلاص
فيصل: ماعليكم كلها ايام ويقشعها جدي من البيت
خلف :وجدي وش دخله!؟ فيصل: انا كلمته وعلمته وقال هو وعمي محمد بيتصروفون ويطلعونها من بيتنا كفايه الحشره اللي حاشرينا اياها
ام خلف : الله يهديك يا فيصل جدك رجال كبير تبي تذبحه بالمشاكل
خلف : خلوه يحلها لاني ما اتحمل اكثر
وقف وهو يعدل ثوبه ووقفت وعد: وين رايح!؟
خلف : السوق .
وعد : خذني معك بالله ودي بكم غرض
خلف : يلا يلا
ندى: جيبي لنا معك خرابيط
فيصل: لحظه على طاري الخرابيط تدرون ان ابوي ماعاد يدري عن البصمه صرت اعطي ابو ممدوح الورقه وينزل كل شي بدون مايطلب بصمه
شهقت وجدان: وررببببك
فيصل: وربي
خلف : اجل دامه كذا اكتب ورقه وروح انت وسالم ونزل كل شي بالبقاله وجبه
سالم بخوف: واذا سأل وعصب
ابتسمت ندى بخبث: واذا سأل اللي طلبت شينة الحلايا
ام خلف : استغفر الله ياعيال وش تبون فيها
لاول مره يكون خلف بهالخبث وقال: هي وش تبي فينا خليها تحمل غلطها
اخذ وعد وطلع وترك باقي المهمه لفيصل وندى اللي مقهورين من حوريه وودهم ينكدون عليها بأهون الاسباب
_______________________.
في سيارة مبارك
بعد ما نزل وعد شاف عقاب اللي قرب مبتسم وهو نيته يسلم عليه بس لكن عزمه مبارك للغداء ووافق عقاب
كان عقاب راكد من جهة وعد ماله نيه ابد يدخل بموضوعها لكن قال: هاه يا مبارك مالك نيه تداوم
مبارك: ان شاء الله بكره بباشر دوام بنت عمك دخلت المعهد ولا عاد هي يمنا لازم اشغل نفسي انا بعد
نزلت لقمة عقاب من يده واستعت عيونه بصدمه: وشووو معهد!؟ مبارك : ايييه معهد
عقاب : شلون تخليها تدخل وانت وين مسؤولياتك وبيتك هالمعهد بيشغلها وتسيب البيت والدنيا
مبارك زل وقال: وش اسوي عشان اتفاقنا ومقدر اخلفه ويقومون علي ... وسكت فجأه
اتسعت عيون عقاب: اتفاق! ومن هاللي بيقومون عليك اذا اخلفته!؟ عيال عمي
مبارك: لا لا
عقاب بغضب: اجل تكللللم وش بلاك
تردد مبارك كثير بس بعد اصرار عقاب تكلم مبارك بكل شي من كذبة وعد للخلاف اللي تصوب على اثره وللاتفاق و للمعهد
وقف عقاب بذهول وهو يحط يده على راسه بصدمه من مكر وعد وكذبها وغير كذا قوتها( والله ما انتي بهينه يا وعد الظاهر اني استخفيت فيك بالحيل اجل كل ذا يطلع منك لكن هييين هييييين )
مبارك: وش فيك ؟
عقاب : خبل انت ولا وشو انت كيف تسكت عن حقك !؟ وحتى لو هي مثل ما تقول مسكونه ومعها عاشق المفروض ما تسكت
مبارك: وش اسوي يعني
عقاب : تطير تجيب شيخ يقرا عليها واذا هي فيها شي بتتأثر هذا واحد واثنين هالمعهد اساس كل الخراب في حياتك ودخوله مجرد حييله لكن خلك رجال واخذ حقك وانا مرضى عليك الغلط حتى لو هي بنت عمي .
ابتدت افكار عقاب الخبيثه تلعب بعقل مبارك اللي وقف بغضب وطلع وهو ماعاد يركده شي ابداً ابداً
اما عقاب جلس مذهول من وعد وهو يردد بنفسه
ويقول ( وش سر هالقوه يا وعد!؟ وش هالشي اللي عندك واخضعتي به مبارك اللي ما يخضع لاحد ابداً!) _______________________.
اما في بيت النوخذه
بعد ما طلعوا جابر وابوه كانت ليلى تقوم وتقعد ودها تروح السوق ودها تعرف من خلف وش صار ودها تشوف خلف
ولفت ودارت على راس امها لين رضت انهم يطلعون وهالمره اخذت العود بحجة ان الاوتار مقطوعه وبتدور له قطع في دكان القايد
وتلثمت وتغطت مضبوط وطلعت مع امها وهي تتلفت متوقعه تشوف خلف مع اصحابه بس شافته عند احد المحلات مع وحده
واتجهت لمحلهم عشان تلفت انتباهه ان فيه زبون وشافها خلف
اللي كان يسمع لوعد واستشاراتها لكن نسى وعد ونسى الدنيا وتركها وراح لدكان ولفت وعد باستغراب منه لكن شافت زبونه عند المحل ورجعت تكمل اغراضها
اما خلف اللي يخف خطوته مر من جنبها عشان يدخل وهمس : نورتي الدكان يا بنت النوخذه
ابتسمت ليلى وهمست: حمدلله على السلامه ياخلف
خلف : الله يسلمك
ليلى مدت العود بحرج : خذ هذا العود مالي اوتاره اختربت علي
رفعه خلف ببتسامه وهو يلفه وهمس: عز الله محد سبقني وحسد الجمادات على اصحابها
طار قلب ليلى من الفرح لكن قالت بتوتر واضح: هو ماكو شي فيه بس انا جيت بعرف شنو صار بالكويت
خلف بهمس : ابد مثل ماوصيتيني سويت ومثل ما توقعتي صار ...
قبل يكمل خلف قال: والله يا اختي ما نصلح العود ابد ماعندنا الخبره الكافيه
انتبهت ليلى للبنت اللي جت وقالت: انزين يعطيك العافيه ماقصرت والراديو اللي عندك ااذا جهز ارسله
خلف : طيب
راحت ليلى بارتباك ماتدري من هاللي جات بس انها كانت مبسوطه بشوفة خلف
ولف خلف لوعد : خلصتي!؟ وعد : ايه خلصت يومك انسحبت ما انت داري عن احد
ضحك خلف بتوتر: ما اقدر اخلي الزبونه
وعد ضحكة باستهزاء: قصدك ما تقدر تخلي ليلى
لف خلف بقوه: وش تخربطين انتي !؟
وعد : انا ماني غبيه ياخلف !؟ انا اعرف ليلى ولا فييييه وحده فالديره كلها معها عود الا ليلى وغير ذا وش قصدها بالراديو
خلف : مجنونه انتي وش ييجيب ليلى هنا وبعدين الردايو رادييو عادي
وعد : ماشفتها جابت راديو!
خلف بغضب: وعد لا تحديني اقول شي ما ابيه
وعد : لا تقول ياحبيبي لكن عمري ما خبرتك تلعب على بنات الناس
خلف بغضب: ما لعبت بأحد انا وانتي تدرين وش هي نيتي لليلى
وعد : مهما كانت نيتك لا تطول هالمهزله
اخذت اغراضها وطلعت وهي ضد هاللي يصير وخلف بعد ضده لكن مايدري كيف يخضع لمشاعره وتجره بدون احساس .
قعد بضيق لكن تذكر ان ليلى ما تعرف التفاصيل لكن استبعد انه يقولها لان مامعه اي فرصه
_______________________.
في بيت نادر
للي كان مرتاح هاليومين ومبسوط بما ان حياته مستقره وقف بعد ما افطر ناوي يطلع لشغله واول مافتح الباب تجمعت شياطين الارض قدام وجهه اول ماشاف ابو شوق وام شوق
ودخل ابو شوق وهو يقول : ماودك تقلطنا
صد نادر بضيق : حياك الله
وقربت ام شوق تسلم عليه: شلونك يا نادر
نادر: بخير تفضلوا
دخلهم المجلس وهو كارههم بس مهما كانوا اهل شوق ودخل ينادي امه وابوه اللي كان عندهم خبر بالزياره وراحوا لهم ودخل نادر يدور شوق اللي طلعت مستغربه: مين هنا!؟
نادر : ا امك وابوك
ابتسمت شوق بفرح: وللله ! متى جو
نادر: من شوي
طلعت شوق بفرح تركض لهم وانكسر قلب نادر اللي كان يشوف اهلها ظالمينها ومع ذلك تركض لهم وبتطير من الوناسه
راح وراها وكان مثل ماهو متوقع استقبال بااارد وجامد وكأنهم متفشلين من سلام شوق الحار لهم قدام ابو نادر اللي يعتبرونه ناقد عليهم
ماقدر نادر يتحمل كملتين زياده منهم وطلع وهو ماكلف على نفسه يضيفهم وكيف بيهتم فيهم وهاذي طريقتكم مع شوق
اخذ طريقه لبيت ضاري اللي من امس مفقود مايندرى وينه وهو محد يطلعه من ضيقه الا ضاري لكن مايدري كيف بيجلس معه ويخبي عنه سالفة ان زوجته ماتبيه
_______________________.
وفي بيت ضاري
كان يتبع تعليمات امه اللي من الحين بدت تجهز لزواجه وتجهز البيت وتعدله عشان ضاري لكن ضاري خارجياً متماسك لكن داخله فااارغ وتعبان وبدا يدور في راسه موضوع في راسه انه يدور اهله واذا حصلهم بيترك كل شي بما فيهم مضاوي وحياته كلها وياخذ امه بس
جلس قدام المسجد وهو يفكر كيف رموه اهله وش السبب وش شعورهم الحين! وهل هو فعلاً ولد حرام وهذا اصعب من اي شي ثاني
فز على صوت نادر ينادي من بعيد: ضاااري وييينك يارجال مختفي
وقف ضاري ببتسامه باهته: تووي مخلص شغل قلت اريح
نادر: الله الله من الحين شغل
ابتسم ضاري : اوووه امي لو بيدها جهزت كل شي الليله وحطت الزواج بكره
ابتسم نادر بضيق: اللي يخليها لك ويتمم فرحها بك
ضاري : امين .
سكت نادر بس لف على ضاري : فيك شي؟؟
ضاري : لا وش بيكون فيني .
نادر: احسك متضايق
ضاري : لا بس متخوف من المستقبل تعرف وضعي يا نادر وصعب علي الحياه الجايه
نادر تربط لسانه ماعرف وش يقول بس قال: ماعليك يا ضاري هي حياه نفسها نفس اللي قبل وعاادي جداً انت عشت شايل امك ونفسك ما رح يصعب عليك شخص اضافي
ضحك ضاري : صح ماهو صعب
ماعرف نادر يحدد جهة كلامه بس من كل قلبه دعى انه ما يكون يعرف لان الخيببببه حمل ثقيييل وصعب
_______________________.
وفي بيت ابو خلف
وصلت وعد وقبل ترتاح سمعوا دق الباب وبعدها رجع سالم يركض : وعد مبارك عند الباب يقول اطلعي بسرعه
وعد : زييين
اخذت اغراضها ولفت على صوت ندى: تكفين اجلسي عندنا لليل
وعد : والله ودي بس تعبانه وبروح انام وراي معهد بكره
حنان:الله يوفقك يا وعد يا عمري
ابتسمت وعد بحب وطلعت شافت سيارة مبارك وركبت وهي ماهي متوقعه منه اي تصرف ولافي بالها اي شي الا النووم والراحه بعد تعب اليوم
دخلت البيت ماهي حاسه بشي لكن لفت اول ما سمعت صوت باب ينقفل وشهقت اول ماشاف رجل غريب ملتحي وجالس شهقت ورجعت لكن مسكها مبارك في لحظة مربكة وثبتها بكل قوته من الصدمه عجزت وعد تتحرك لكن اكتشفت انه شيخ اول ما قرب يقرا على وينفث وعجزت حرفياً ماكان فيها طاقه ابداً كانت مهلوكه ومصدومه ماتوقعت هالهجوم حاولت تقاوم مافيه فايده لين وقف الشيخ واعلن القرار المصيري وقال: زوجتك مافيها شي لا معها مس ولا عمره كان معها
اخذ اغراضه وطلع وقبل تعترض وعد وقف مبارك بذهول يقول : تكذبييييين علي يا وعد وانا اللي صدقتك وامنت فيك
حاولت وعد توقف وترد عليه لكن باغتها بكف ألجمها وقفت بذهول تناظره بصدمه ما مداها ابد تتخطى هالموقف الا انقض عليها مبارك اللي كان مرعب بشكل كبير وهنا صحت وعد وحاولت تخلص نفسها وحاولت تفلت وحاولت تتصرف لكن ماكان يمديها تتحرر من قضبة مبارك القويه وكفوفه المتتاليه ما بقى لها حل الا صراخها لكنها انلجمت في لحظه... وانتهى فيها كل شي ...🌚
_______________________.
والليل في بيت الجد قايد .
رجع عقاب بهدوء كأنه ماسوى شي ووقف ببين اعمامه وعيال اعمامه وجدته وقال: انا اليوم حبيت اقولكم اني بخطب وجد بنت خالي وابيكم تكونون معي
محمد : ماشاء الله ماشاء الله اخيراً نوييت
عقاب : العمر يمشي يا عمي
ام ناصر : يوم نويت تتزوج ورا ما اخذت من بنات عمك
رد خلف بسرعه وهو رافض ان خواته ينعرضون كل مره على عقاب : كل انسان حر باختياره وكل انسان يختار شريك حياته براحته مب لازم ولد عم ياخذ بنت عمه
محمد : صادق يا خلف وهاللي بياخذها عقاب ان شاء الله فيها الخير
ابو ناصر: اللي ترتاح له يا عقاب سووه وحنا معك ما حنا مخلينك
عقاب : هذا العشم ياجدي
ابو خلف : وش جاب بنت خالك على بالك
عقاب : اقترحتها جدتي لي واشوفها مناسبه لي
خلف : موفق وولله يكتب لك كل خير
محمد : وانت ياخلف ما حان دورك
التفت خلف باستهزاء وضحك:لاااا ياعمي توي صغير وتوه بدري وتوه ابوي عريس
الكل سكت والتفت ابو خلف : خلييف احشم نفسك
سكت خلف فتره وقال: دام المواضيع مفتوحه اجل بقولكم ان جابر رجال كفو يستاهل اماني وكلمتهم وقلت لهم ان الموافقه تمت
ابو خلف : نعععم من سمح لك توافق وماهي على كيفك
ابو ناصر اللي اول مره يكون ضد ولده ناصر قال: لا يا ناصر على كيفه دام ابوه ماهو فاضي ودام ابوه انسحب وترك كل شيٍ على ظهره كل شي على كيفه دامه ادرى بمصلحة خواته وراح وسأل عن الرجال وعرف اصله وفصله في حال انك متوزي مع هاللي جبتها ما ندري اصلها وفصلها من وين ولا ندري وش هي من ادميه يومك ما استحيت على وجهك وحشمت عيالك واهلك في بيتك وتصرفت تصرفات ما يتصرفها الا جاهل
محمد : ابوي معه حق ولازم تشوف لك حل يا انك تسنع امورك وتحترم بيتك واهلك يا انك تطلعها في بيت غير هالبيت
فيصل : ما نبي حوريه معنا فالبيت ومانبيك تطيح من عيونا زود
الكل لف على فيصل اللي ردة فعله مقهوره وسكت ابو خلف وقرر ينسحب من الموضوع قبل يكبر وراح وتركهم بالمجلس مجتمعين
وطلع فيصل متضايق وزعلان وركض عزوز وراه وهو يوقفه: فيصل فيصل اصبر وين رايح
فيصل : مخنوق مخنووق مابي ارجع للبيت ولا ابي اشوف شي
عزوز: طيب طيب اذكر الله واهدا وكل شي بيصير زي ما تبي بس اصبر
وقف فيصل بقهر: ياعزوز ما انت فاهمني والله ما تقدر تفهمني وانت ماشفت اللي اشوفه كل يوم واللي اسمعه
عزوز : انا ادري ان ماهو هين عليك تشوف ابوك اللي طول عمره قوي بهالمنظر الهزيل لكن اصبر جدي وعمي بيحلونها وخلف ماهو مخليكم اكيد
فيصل : اااااه بس اااه
جلس بقهر وجلس عزوز جنبه ويواسيه وهو اللي مايحب فيصل يتضايق ونفس الشعور فيصل يحسه باتجاه عزوز ..
________________________.
..
..
..
