.
الكاتبه والمبدعه / أديم الراشد .
.
______________________
بدوا اهل الخفجي
يرتبون امورهم ويرجعون بيوتهم زي ماكانت واللي تضرر بيته يعدله واهل الكويت بعد استعدوا انهم يرجعون للكويت ويرتبون امورهم بعد الحرب
ومن اللي صار ما احد إلتقى بأحد
الا في حارتهم القديمه في الخفجي لللي تأثرت من الحرب واجتمعوا الرجال كلهم يعيدون هيكلتها وترتيبها لكن ابو نهيان كان مضطر انه يرجع لبيته فالخفجي فتره ويرجع للكويت يبي وضع الكويت يستقر اول
كانوا كل واحد يداري خراب بيته ويعدله باللي يقدر عليه
وكل الحاره من جديد مجتمعه وكل واحد يساعد الثاني
بدوا الشباب ببيت الجد
وهم كلهم رافعين ثيابهم رابيطنها على بطونهم ومشمرين ويعدلون اللي يقدرون عليه
وفي عز اندماج خلف وقف متصلب اول ما قال فيصل: تهقون دكان جدي انعدم بعد!؟ تكهرب خلف اول ما تذكر السي دي ولف بسرعه ونزل كل شي بيده
عقاب : وين بتروح!؟ خلف : بجي
اسرع بخطواته وهو نسى السي دي مايدري اذا هو بمكانه او لا وصل السوق شاف الدمار في كل مكان من اثر المعركه لكن المحلات اغلبها صادمهرمن بينها محل جده ركض للباب المكسور شاف الدنيا محتاسه بس مو مهم اتجهه للمخبى اللي حط في السي دي وهو ينبش ويدور ماهو مهتم للغبار ابد ولا لصدره ولا لشي
تنهد براحه اول ما حصله اخذه وهو ينفض عنه الغبار : الحمدلله ما راح
وقف وهو يحطه بجيبه وطلع وترك المحل لان مافيه شي يتخرب اكثر
رجع للحي ومر بيت النوخذه وشاف النوخذه ونهيان يرممون اللي يقدرون عليه وجابر جالس
قرر ينسحب قبل يشوفونه بس وقفه صوت جابر اللي شافه وفز بلهفه: خلف
التفت خلف بهدوء: هلا جابر
تقدم بخطوات ثقيله ووصل لنهيان: حمدلله على السلامه يا نهيان قرت عينكم بديرتكم
نهيان: هلا خلف تقر عينك بشوف نبيك ان شاء الله ، والحمدلله ازمه وعدت ومشكور على كل شي سويته وما قصرت خلف : افا عليك ماسويت شي هذا واجبي
كان خلف يتحاشى النوخذه والنوخذه يتحاشاه
جابر: دش ويانا نشرب چاي قهوه
خلف : لا لا بالعافيه وراي شغل
انسحب بسرعه وخايف يجيه رفض يكسر ظهره
_______________________.
وفي بيت ضاري .
ماكان متضرر خارجياً كثير وقدر ينجزه في يوم ودخل بتعب وجلس وهو يشوف مضاوي تنظف وامه تساعدها شوي
وبعد دقايق جات مضاوي وبيدها كاس شاهي وفطيره : ضاري خذ
اخذه ضاري :وشو!؟ مضاوي: وصلنا من بيت جدي وخبيت لك منه لانه ماطبخنا وقلت اكيد بتجي جيعان مهدود حيلك
ضاري : زين مشكوره
من ايام رجع ضاري لرسميه مع مضاوي بعد هوشته مع عقاب ولاحظت مضاوي وبدا يضيق صدرها من هالوضع
وراحت تجهز اي شي عشاء لان خلاص المغرب اذن وصلواا والكل تعبان واكيد بينامون
جهزت السفره وطلعت وهي تشوف ام ضاري منسدحه شوي وضاري جالس يقرا الجرايد :يلا جهز العشاء
راحوا كلهم ومضاوي على جمره مالها نفس اي شي
ام ضاري: مضاوي وش فيك ما تاكلين
مضاوي: مالي نفس
ام ضاري : ليه يمه ما اكلتي
مضاوي قالت بسرعه ما تبي تناقش: فيني غثيان يا خالتي مو مشتهيه
فزت ام ضاري بفرح: والله!؟ من متى هالغثيان !
فهمت مضاوي قصدها وصدت بضيق: من شوي وعادي هو ملازمني من زمان
ام ضاري سكتت وهي تدعي ان للي ببالها صح لكن ضاري ماكان مشارك ابد
خصلوا وشالت مضاوي كل شي ونظفت ودخلت غرفتها وكان ضاري على وشك النوم واتجهت له وجلست قدامه بغضب: ممكن تقول وش مسويه لك هالمره!؟ وشوله قالب خلقتك علي
التفت ضاري .: شوفي عاد ترا تعبان ومالي خلق الهواش ابعدي احسن لك
مضاوي: ماني مبعده لان هالعيشه اللي عايشينها ماهي عيشه بتقولي وش فيك ولا شلون
ضاري : لا والله ان كان فيه عيشه شينه عايشينها فهو بسببك انتي
مضاوي: انا وش سويت انا!؟ ضاري بقهر طلع اللي بقلبه كله: انتتتي اللي رضيتي بهالزواج انتي اللي حطيتي في موقف الشفقه قدام عقاب وغيره انتي للي رضيتي هالتعب كله انتي اللي تسببتي بالخيبه لي وخليتيني اعجز حتى انطق بحرف كسرتي عيني ماقدرت احطها بعين عقاب وهو كل مره والثانيه يقول الله يعين عمتي عليك واكيد مبتلشه فيك ..! ليه لييييه دامك ماتبيني ليه رضيتي من البدايه !؟ ليه خليتي امي تعشم وتفرح وتكبر فرحتها فيك لين عجزت اقولها مابي هالزواج خوفاً تموت بقهرها!؟ كل هاللي حنا في بسبب قرارك الجاهل الاناني !وجايه تسأليني لييييه!؟
غمضت مضاوي بقهر وقالت بصوت متذبذب : انا ما قلت لعقاب شي عنك ومستحيل اقوله شي يكسر عينك انا صح كنت رافضه لاني خايفه مو لانك سيء والله مانويت لك الخيبه ولا نويت الحياه الشينه ولا ابي لك ولي التعاسه صح قررت لحظة خوف لكن ما نويت لك نيه سيئه يا ضاري .
وقف ضاري بضيق وهي يضرب كفوفه ببعض: وش ارد عليك الحين!؟ وش اقولك! اقول خطانا الشر وتعالي نكمل ولا كأن شي صار ، تبيني اقول عوافي ما حصل شي واطلع وبكره يقابلني عقاب وهو يتمخطر ويضحك ويقول :الله يصبرها عليك!؟؟
حاولت مضاوي ترد لكن ماقدرت وش تشوف القهر بعيون ضاري هي كانت غلطانه وبعد ما تزوجت عرفت ان ضاري ماهو سيء زي ماكانت تفكر بالعكس كان جدا جداً انسان لطيف وطيب وندمت انها عيشته هالشي وهي ما تدري كيف عرف برفضها لكن رغم سعادتها معهم الحين وفي بيته الان انها فضلت انها تريحه من هذا كله وتبعد عنه وقالت: ابشر ابشر بريحك من هذا كله وانا اوعدك اني اروح لخالتي واشرح لها ان الغلط مني واخذ اغراضي وارجع بيت اهلي ووجهك ابيض يا ضاري والله يعلم اني غلطت بحقك ومابي منك الا تسامحني ويعلم الله اني ما عشت معكم الا الحياه الهنيه ولا ابي اعيشها على حساب ضيقك وانا اسفه
انصدم ضاري ما توقع هالخضوع توقعها ترد عليه الصاع صاعين وتقلب الدنيا فوق راسه وتطلعه الغلطان كالعاده بس انصدم انها استسلمت لكن تبادر لعقله انها (اكيد تبي الفكه ولا صدقت جت فرصه تفكها منه ) وسكت وطلع مارد عليها ابد
اما مضاوي طول فتره الحرب وهي يدها على قلبها تخاف يطلع ضاري ولا يروح للحدود ويصيبه شي كانت تموت من الخوف اذا تأخر دقايق تعودت عليه طول هالسنه معها ويعاندها ويعطيها على جوها ماتعودت ضيقه وزعله ابد وجلست وهي زعلانه وضايق صدرها ماتدري وش تسوي
_______________________.
وفي بيت عقاب
كان ناوي ياخذ خواته معه يعيشون لكن حلف جدته وجده ماياخذهم ولا يطلعون من بيت ربو فيه عمرهم كله
كان ببيته وجالس بهدوء ساكت ما تكلم ابد رغم ان جود تحوم حوله لكن ماهو يمها ابداً
اخذ فتره يفكر بخليفه ولد مبارك وعد طول هالفتره مانعته من ان عقاب يشوفه كان يحس بالندم وندمان علو اي شي سيء عيشه مبارك لكن الغريب انه طول هالايام كان مقهور على سالفة ضرب عمه لوعد !؟ صح وعد تقهره لكن يرحمها بعد هالللي صار فيها مايدري كيف بيتصرف عشان يشوف خليفه بعيد عن رفض وعد مايدري كيف بيخطط
وجد: عقااااب اكلمك ماترد
عقاب : خييير خييير وش بلاك تزنين فوق راسك يابنت الناس
وجد : اقولك ان جدتي اخذتني لحرمه شاطره وعطتني دواء عشان اقدر احمل ويثبت حملي ان شاء لله
عقاب : سكري سالفة هالحمل والعيال ماهو وقتهم
وجد: شلون يعني!؟ بنجلس كذا بدون عيال
صرخ عقاب بقهر: ايييه ايييه انا هونت مابي عيال خلاص ارتحتي
وجد سكتت قبل يتمادى الموضوع وطلع عقاب هو بعد طفشان من هالموضوع .
__________________.
وفي بيت نادر .
اللي مازال فالشقه ماجاء لان بيته تدمر بشكل كبير ولازم يشتغل عليه كان مستغرب صمت شوق وقرب وهو يحاول يفهم وش فيها: شوق وش فيك صاير شي
شوق :هاه لا لا بس شكلي بسخن
رفع يده نادر لجبينها ونزلها: حرارتك ماهي مرتفه
شوق: مدري يمكن خمول عادي
نادر: زين وش رايك نروح بيت امي وابوي هالفتره لين ينتهي بيتنا
فزت شوق بسرعه: لا لا تكفى نجلس هنا
نادر شك على طول وقال بغضب: ليييه وش صاير!؟ الحين تقولين لي وش مخبيه ووش صاير والا الله ياشوق والله ماترضين عاقبة الامر
انهارت شوق تبكي وانفجع نادر اللي جاء مسرع وجلس جنبها: افا يا شوق تبكييين!؟ لييه وش صاير وش مضيق صدرك قولي لي
شوق ماقدرت تحمل اكثر وبدت تقول لنادر تهديد امه لها وابعد نادر بغضب: ومن قالك اصلا اني برضا لو زوجوني ومن قالك اصلا اني ابيك تحملين الحين!؟ مب احنا اتفقنا ما تحملين الحين!! وشعليك بكلام غيري
شوق :بس هذولا امك وابوي واكيد بترضى بكل حلولهم مثل ما رضيت فيني
زعل نادر من ردها وقرب وهو يجلسس: انتي ما انتي مثل غيرك عشان تقولين هالكلام !؟ يمكن بداية زواجنا غلط لكن ابد والله انا راضي فيك وابيك واحبك ومستحيل اتزوج غيرك لو اموت ولا يضيق صدرك من هالكلام ابد زي ما اتفقنا بنصبر سنه ولا سنتين وبعدين اذا ربي اراد نجيب عيال هاذي حياتنا احنا واحنارنقرر كل شي فيها ولا عاد تزعلين من شي عمره ما يتحقق
ناظرته شوق بحب واقبلت عليه تحضنه وتعلق فيه وهي كل يوم يزيد تعلقها بنادر اللي ابد ماكان مجرد زوج بس
_______________________.
وفي بيت النوخذه
بيت حوسة البيت استقروا اخيراً بالحوش وهم مبسوطين مستانسين وجوهم حلو
ولف نهيان : يبه متى بنرد الكويت
ابو نهيان: ان شاء الله كم يوم ونرد
ام نهيان: ان شاء الله انها اخر اوجاع الكويت وبنرد وبنفرح ونستانس
والتفت نهيان وهو مبتسم: اذا ردينا لازم نزوج جبار نبي نستانس
التفت جابر بهدوء وقال: لا لا انا لا ابي اتزوج ولا شي بجلس هنيه بالسعوديه والله يحفظ الكويت واهلها
ام نهيان: ليه يايمه لييه ما تجي ويانا انت للحين تعبان
ابو نهيان: شنو هالكلام!؟ شلون يعني ما رح ترد ويانا
جابر اللي من يوم انسحب خلف وهو متضايق متوقع ان خلف زعلان عليه واكيد ما رح ترجع علاقتهم
جابر: شنو تبون فيني !؟ تردوني معكم بدون روح!؟ كان جابر صريح في حبه لأماني ولفت ليلى تناظر بحزن ودها تقوله انها تشاركه نفس الشعور هي بعد من دون روح ومالها حيله .
الكل سكت يناظرون ابو نهياان اللي ضاق صدره ولا عرف يتكلم ولا يرد كان يشوف حال جابر متدمر وليلى ماهي بعيد عنه مايدري كيف بيتصرف معهم وقرر ينسحب وطلع من عندهم وتركهم وبدو ينسحبون كلهم شوي شوي لين بقت ليلى وجابر لحالهم
وقربت ليلى وهي تستند على كتف جابر وهي تشد على ذراعه: لا تزعل رووحك بأذن الله ربي بيجمعك مع اماني باذن الله
جابر تنهد بصمت مايدري كيف بيجتمع معها غير باحلامه
_______________________.
اما في بيت ابو خلف
نام الكبار وبقى خلف وفيصل وخواته مجتمعين بالسطح على اساس انهم يتابعون فيلم!؟ لكن محد فيهم مع الفيلم
كان وعد كالعاده ولدها بحضنها وهي سرحانه بعالم ثاني عالمها اللي تدمر وانتهى ماتدري كيف بتكون حياتها وهي معها هالولد وكيف بتربيه!؟ ايه خلف موجود بس خلف بعد عالم ثاني في هم ثاني في حنين وشوق وتعب
كان منسدح على رجول اماني اللي تسوي له مساج لراسه اللي انقطع صداع ابد وهو كل يفكر يغفى يفز برعب من هاجس رفض ابو نهيان
وسلسلة تفكير خلف تتصل بأماني اللي في كل مره تصدف فيها جابر يتقطع قلبها عليه وهو مب قادر يقول بإستقامه كانت تشوف عيونه اذا مروا تطير فيهم لين يختفون ماتدري ليه كانت مؤمنه في ان نظرته هاذي ماله شغل بقرار طلاقه لها لكن كانت تخمد تفكيرها خوف من انها تعلق بوهم
اما ندى وحنان ووجدان وفيصل كانوا مستقرين بالفكر والمشاعر
_______________________.
في الطرف الثاني في بيت الجد قايد
كانت عهد في عزله مع نفسها ماتكلم احد والكل زعلان عليها
كانت شهد وعزوز هم الوحيدين اللي عايشين بسكينه
لان هيا كانت تعيد هيكلة اغراض زواجها لان حمدلله رجع تحدد هالاسبوع وماكانت مع العالم كانت فرحانه ومبسوطه وتعدي انه يتم على خير
وسحر اللي من بعد خطبة ماجد وهي في دوامة ماتدري ليه ماجد خطبها !؟ ماتدري كيف بتكون الحياه معه وخصوصاً ان كل شي باقي معلق من يوم مشكلة عهد ووعد وماتدري يكمل ولا ينسحب
_______________________.
ومن بكره
صحت ديرتهم على اصوات الرجال فالسوق ياااه ياكثر ما اشتاقوا لسوق وللجمعه بعد هالحرب
طلعوا الرجال لسوق وبدوا يرتبون دكاكينهم وهم كل فتره يستريحون بنص السوق ويتقهوون ويرجعون يكملون ومعهم النوخذه اللي كانت علاقه مع الجد قايد وعائلته حساسه
والكل ملاحظ نفورهم من بعض
وفي دكان الجد قايد قال ابو ناصر: اقول ياخلف وينه ضاري ما شفناه اليوم
التفت عقاب بهدوء ينتظر رد خلف اللي قال: والله مدري امس قابلني يقول مشغول .
فيصل : اروح اناديه
ابو خلف: اقول انثبر ساعد خلف بس
عزوز:ههههههههههههههه اللقافه
ابو ناصر: وانت معه يلا
نزل خلف اللي بيده وهو يقول : انا بروح دورة المياه لا احد يجي اغراضي
الكل : زين
طلع وهو ينفض كفوفه عن الغبار واول ما وصل البراحه اللي عند المسجد سمع صوت النوخذه يناديه والتفت وهو قلبه يدق ومن عيونه الغاضبه و عرف قراره اللي بيكسر ظهره يعرف كلامه زين ويعرف انه ما ناداه بهالمكان اللي ضربه فيه الا ناوي يقطع هالموضوع ويرفض لو بيوافق كان كلمه فالسوق والكل يشوف وصد ماقرر يرجع له ولا يرد عليه وهو يقلبه يوجعه بمراره وحزن ويدري ان من هاللحظه بيسيطر الحزن والفقد على قلبه
_______________________.
وفي بيت ام ضاري
صحى ضاري على صوت هادي ماهو الازعاج المعتاد فتح عيونه بكل قوته وهو يشوف مضاوي مجمعه كل اغراضها فعلياً كلها ولبست عباتها واتجهت للباب لكن فز واقف وهو يسمع صوت ماهو متأكد منه لكن تأكد منه اول ماسحبها ولفها وتأكد انه صوت بكي وانها تبكي وهاذي اول مره يشوفها تبكي انصدم انصدم وتجمد لكن قال : وين رايحه ؟!
ما مسحت مضاوي دموعها وهي تناظر له بنظرات وداع : بروح بيت اودع خالتي واطلع بيت اهلي
فجأه انقبض قلب ضاري مايدري ليش اوجعه مايدري كيف قال: لا لا وين تروحين انهبلتي!؟ ناظرته مضاوي باستغراب وكمل بارتباك : اقصد لا تروحين لامي
مضاوي :ليش!؟!
بسرعه قال ضاري : امي امس نامت تعبانه مابي هالشي يتعبها اكثر
شهقت مضاوي : شلون تعبت!؟ انا بنفسي تطمنت عليها قبل تنام كانت بخير وش صار لها !؟ قلت لها شي انت
ضاري : لا بس مصدعه مافيها شي
مضاوي هدت وقالت: ماعليه اهون اقولها بنفسي
مسكها ضاري من جديد : انتظري لا تروحين
مضاوي : ليش!؟ انهبل ضاري ماكان يبيها تروح مايدري من وش خايف لكن كان يناظرها بعيون متشتته مايدري كيف بيتلكم
اما مضاوي كان قلبها يدق تحس بيطلع من صدرها خايفه بعد انها تروح كانت مستعده تقوله ( قول لا تروحين ووالله ما اروح بس قلها ياضاري ) كل هالكلام بصدرها وهي تناظر يده على ذراعها
رغم لخبطت قرارات ضاري الا انه هاللحظه ما هو متأكد الا انه مايبيها تروح وقال: لأنه حصل خير وماصار شي يستاهل انك تطلعين من بيتك وتروحين وتتركين زوجك وخالتك
بعد كلامه غمضت مضاوي بقوه عشان ماتبكي كانت تنتظره يقول لا تروحين لكن كلامه كان اعمق ماكانت تدري كيف بتفسره بس الاكيد انه يقول لا تروحين بس بطريقه اعمق ( لاول مره يطلق على نفسه هذا اللقب ويقول انه زوجها !؟ معقول انه تغير قراره!؟ او يستهزء فيها ويبي يكسرها مثل ماكسرته.
اما ضاري من بعد ماشاف دموعها ونام امس وهو يفكر في كلامها كيف متحسفه انها قررت انها ترفضه وكيف انها تقول انها مبسوطه معهم عجز يسمح لها تروح ماكان يحس بأحساس كبير اتجاهها لكن الاكيد ان في طرف قلبه شعور يرتاح مع مضاوي ولا يتخيل البيت بدونها
اخذ نفس وهو يقول : اذا ودك اجلسي ونطوي هالصفحات الشينه كلها ونتخطى كل هالعثرات ونبدا من جديد ، واخطبك من جديد وانا راضي وتوافقين من جديد وانتي راضيه.
سكتت مضاوي فتره تحاول تصدق تستوعب لكن الصدق اللي بعيون ضاري خلاها تقول : ابد والله موافقه وانا راضيه وفي كامل قواي العقليه بعد وانت مثلك ماينرد يا ضاري
انهبل ضاري من الوناسه صار يضحك بهستيريا وضحكت معه مضاوي وهم ماهم متوقعين انهم بيرضون ببعض فالنهايه
بعد نوبة ضحك رفع راسه ضاري وهو ياخذ نفس : خلاص اجل دام طاح الحطب وكل شي زين اليوم بسوي الفطور انا وانتي رجعي هالاغراض قبل تشوفهم امي
مضاوي : زين
طلع ضاري مبسوط مستانس وطااير فوق الغيم
_______________________.
وعند خلف
كان صاد مايبي يسمع النوخذه ابد قلبه موجعه مايبي يأكد اللي في باله
النوخذه : خلللف انا اكلمك اسمعني
التفت خلف بصعوبه يناظره بهدوء :سم
ابو نهيان: من ساع اصوت ما ترد علي
خلف : ما اسمعك
ابو نهيان: انا جيتك هنيه مابي هالكلام يطلع من بينا وجاي اعرض عليك عرض اذا وافقت عليه بزوجك ليلى
فز خلف واعتدل : وشو !؟
ابر نهيان: ما تتزوج ليلى ألا اذا رديت اماني حق جابر
ناظره خلف فتره وهو ساكت وبعدين قال: وانت تهقى ان ابوي بيرضى يردها !؟ هذا مستحيل لا ابوي ولا أماني ترجع لشخص مرسل ورقة طلاقه مع شخص غريب
النوخذه: انا اللي اجبرته على الطلاق وانا بعد اللي منعته وانا اللي ارسلت الورقه ولولا اني اشوف حاله هالايام تعبان كان مارديت اطلب هالطلب منك
وتذكر ان انت السبب في هذا كله وانت الللي غلطت مابي اكثر حكي لكن بيني وبينك اماني وجابر
قال كلامه وراح وترك خلف واقف بين قلبه وعزة النفس صح هو غلط لكن هذا ما يعطي حق انه يرغم اماني من جديد
ولكن اتخذ قراره على طول وعلق مصيره برأي اماني وابوه ان رضوا رضينا وان رفضوا الله يعينه يتحمل
كان محتاج طرف قوي بالموضوع يساعده قبل يكلم ابوي لازم احد يدله على خيار صح
رجع لدكان يخف رجله شافهم جالسين بس ماشاف محمد انسحب بسرعه وراح بيت جده يدور على محمد
دق الباب وفتحت هيا : خلف وش فيك تدق كذا!؟ خلف : عمي محمد موجود!؟
هيا : لا طلع يقول مشوار قريب وراجع
خلف : زين اذا جاء ناديني انا بالبيت
هيا : طيب بس وش فيك صاير شي!؟
خلف :لا لا
راح لبيتهم ودخل يدور وعد : عمه وينها وعد!؟ ام وعد : بالغرفه
ام خلف : وش فيك يمه منخطف لونك!
خلف: لا بس عشان مشيت مسافه طويله
طلع ودخل وهو يشوف سالم وفيصل يلعبون مع خليفه والبنات يسولفون مع بعض
خلف :بنات غيث وسالم اطلعوا ابي وعد
ندى : الله الله من متى اسرار
حنان: وشعليك انتي
خلف :يلا يلا مامعي وقت
طلعوا كلهم وخافت وعد : خلف وش فيك
فتح الباب خلف يبي يتأكد اذا فيه احد وشاف كلهم عند الباب وصرخ:خيييير .
هجوا ونزلوا وسكر الباب خلف ورجع: وعد فيه شي صار واحتاج رايك
وعد: بسم الله خير وش صاير
خلف اخذ فتره ساكت وبعدين قال: انا خطبت ليلى من النوخذه
شهقت وعد: وشووو ؟! وش سويت وش سويت؟؟ خلف انهبلت شلون ترجع له بعد اللي سواه فيك واللي صار بأماني
خلف : يا وعد انا الغلطان ولا ناسيه!؟ لو انا في مكانه بسوي اللي سواه واكثر
وعد : حتى ولو انت مب لعبه في يده
خلف : ياوعد الله يصلحك انا ابيك عون وصرتي فرعون
وعد : شوف يا خلف تحب ليلى ومستعد تضحي عشانها مايخالف لكن وش ذنب اماني تكسر عينها معهم
خلف : ابد والله ما اكسرها اماني لها القرار ان رضت زين وان مارضت لو يموتون واموت انا مستحيل تتزوجه
وعد : زين وابوي!؟ خلف : ابوي بتفاهم معه انا وعمي محمد
وعد : والله مدري
سكت خلف مايدري وش الحل ووعد بعد احتارت ماتدري وش تسوي لكن القرار اللي اتفقوا عليه انه يشاور محمد ماله الا محمد
_______________________.
في الدمام
عند ماجد عجز يصبر وهو مايدري عن عقاب وقراراته وتفكيره نوى يلحقهم للخفجي يبي ينتهي من هالموضوع ويضمن سحر من نصيبه واخذ طريقه وهو يفكر لو هون عقاب ورفض!؟ وش بيسوي ! بس هو عطاه كلمه
توتر ماجد توتر وانحبست انفاسه عقاب مايطمن وعقاب يقلب وهو خايف منه
_______________________.
وعند نادر
بدا يحس بالملل وهو لحاله واتجهه لشوق اللي تنظف
نادر: شوق
شوق : سم نادر
نادر : ماودك نرجع الخفجي
شوق : الا والله بس وين نسكن!؟ بيتنا راح فيها
نادر: بيتنا مطول عشان يزين لكن فيه بيت امي وابوي نجي فيه لين يرجعون من المزرعه
سكتت شوق وهي خايفه تجي امه وتبدا المشاكل لكن قال نادر: اوعدك ما تصير مشاكل ابد
شووق : اجل نروح وش يجلسنا
نادر: اي والله عجزت اجلس بدون العيال
شوق: خلاص بجمع اغراضنا ونطلع .
نادر: يلا بروح اخلص الايجار .
نزل نادر مستعجل وهو وده يطير للخفجي ماجاز له جو الدمام واصحابه ماهم فيه
_______________________.
وفي بيت عقاب
رجع من الدكان وهو سارح فكره وفي راسه موال وبيغينه اخذ شماغه والتفت على صوت وجد: وين بتروح!؟ عقاب: بيت جدي
وجد: اجي معك!؟
عقاب : لا اجلسي وبرسلك خواتي
وجد: طيب
طلع واتجهه بيت جده وشاف جده جالس مع جدته بلحالهم
عقاب : اقول ياجدي وينه عمي محمد وعمي ناصر
ابو ناصر: محمد توه جاء ويبدل وناصر بيجي
عقاب : ايه اجل نادهم كلهم بنتقهوى
ابو ناصر:بيجون ! انت وش فيك !
عقاب : ابد مافيني الا كل خير
سكت وجاء محمد مستعجل : انا بروح لخلف
عقاب : ليه!؟ محمد : مدري يناديني هو وعد اكيد شي في اوراق مبارك
ابو ناصر: زين اذا خلصتوا تعالوا القهوه
محمد: ابشر
طلع يدق الباب الفاصل وفتح غيث : عمي خلف في غرفتنا
محمد : زين
طلع محمد وهو يدق الباب وفز خلف يخبي الاوراق وسي دي: من
محمد: انا
فتح خلف الباب : ايه حياك الله
محمد: وش فيك!؟
خلف : تعال اجلس تبي قهوه شي
جلس محمد :لا لا تكلم وترتني
خلف بحرج: وللله ياعمي مدري وش اقولك ومنحرج منك بس مالي الا انت
محمد : وشو ياخلف لا توجع قلبي تكلم
خلف : تعرف النوخذه عنده بنت
محمد: ايه
خلف بتردد قال: المهم اني احبها من فتره وابيها
اتسعت عيون محمد بذهول : وشو !! ضاقت عليك ما لقيت الا بنت النوخذه تحبها!؟ تحب اللي طلقوا اختك حتى ما وقفوا على الباب
خلف : المشكله اني انا سبب هالطلاق
فز محمد ووقف : وشوو!؟ وش مسوي ياخلف وش مهبب
خلف : استريح وبقولك كل شي ماله داعي كلهم يسمعون
جلس محمد على اعصابه وبدا خلف يقوله القصه بدون مايذكر انه شافها بالسي دي ترقص قال انه شافها بالسوق مره بدون غطى وان كل اللي بينهم رسايل ماطلع لشي ثاني وكمل ليين وقف عند الحدث اليوم
وسكت محمد ووجهه مليان غضب خلف: انا ابيك لي عون ياعمي
ضربه محمد بخفه على كتفه: خبل انت خبل!!؟ وش هاللي سويته !؟وانا ناقد على النوخذه طلع بيض الله وجهه انه ماذبحك !؟ كيف ترضى ياخلف كيف ترضى
خلف : ياعمي صار اللي صار والله يلعن الشيطان لكن والله انه كان حب نقي وعفيف ولولا سالفة حوريه كان الحين متزوجيين
محمد: مافي شي يبرر لك غلطك مهما كان انت غلطان وتخيل بس إنا فتحنا الموضوع مع ابوك!؟ توقع انه بيوافق مستحييييل ولا حتى ابوي وفيصل وكلهم!؟ تقدر تقولي وش عذرك لهم!؟ خلف : انا مالي الا انت تساعدني وانا كل شي عندي تحت قرارك اماني اذا رضت كان بها ما رضت بلاه هالزواج .
محمد : وش اقولك بالله عليك وش اقولك
سكت خلف ينتظر رد ومحمد يدور بالغرفه مصدوم ان خلف يطلع منه كل هذا!؟ طول عمره كان قمة فالاخلاق مايدري متى انجرف ورا تيار هالحب لكن محمد كان متيقن ان الحب مايعرف حدود واخلاق يطلع الانسان عن وضعه الطبيعي لكن في اخر تفكيره التفت وهو يبي يتأكد: لا يكون رفضت سحر عشانها!؟ خلف : ياعمي ياعمي موضوع سحر منتهي من زمان ولا انا اللي اخترتها ولا هي بعد اختارتني مشينا على كلام الكبار ! اللي ما يعفون احد ابد لكن فالنهايه مالنا نصييب مع بعض والبنت ربي وفقها وبتزوج خلاص .
محمد :انا لو افكر مليون سنه ما اتخيل انك توقف قدامي بهالموضوع
وقف خلف بغضب: المراد!! بتساعدني ولا انا ادبر اموري
محمد : اجلس اجلس بنفكر كيف نحل هالازمه
جلسوا وبعد فتره التفت محمد : مالك الا حل واحد تقنع ابوك وتبرد حرة اماني وتكسب موضوع ليلى في صالحك قدام ابوك
خلف : شلون!؟ محمد : قل لنوخذه يجي يخطب رسمي مثل اول مره
خلف : واذا ابوي حاس الدنيا
محمد: لا ، انت سو نفسك مادريت واول ما يجي اخذ ابوك وفيصل وطلع برا واقنعهم ان الراي الاول والاخير لاماني وانك بتخطب بنت النوخذه ند لأماني يعني زي الامان لحياة اماني واللي يصير بأماني يصير ب ليلى
خلف : ياعمي انا ما ابي أذي ليلى لو بكلمه
محمد : اسمعني اذا ربي كتب وتزوجتوا وقتها اشرح لها الموضوع كله وان ما معك حل غيره واذا النوخذه بيغدر في اماني معناته الموضوع منتهي ومابينكم شي يجمعكم وهم أذوا اختك واذا رفضت اماني بعد مالك مع بنت النوخذه امل
سكت خلف ضايق لكن ما معه الا هالحل لكن الاصعب كيف بيجمعهم بمجلس واحد
محمد : قم قم للقهوه وان شاء الله خير لا تشيل هم
خلف: يارب
_______________________.
واخيراً
في بيت الجد قايد اجتمعوا الكل للقهوه وجاء خلف ومحمد ووجيهم ما تتفسر لكن محد سأل لان عقاب أشغلهم بكلامه اول ما قال : دامكم تجمعتوا انا عندي موضوع بكلمكم فيه ومتأمل خير ان شاء الله
ابو خلف : خير ياعقاب
ابو ناصر: ان شاء للله خير ياولدي
عقاب :والله ياجدي انا من بعد الحرب وانا لا ليلي ليل ولا نهاري نهار ومبارك الله يرحمه ماغاب عن بالي وهو يوصيني على ولده ولا انسى كلامه قبل يموت عن ولده ومن طرف ثاني انا قبل خطبت وعد لكنها وافقت على مبارك وكتب لله لهم الحياه المكتوبه لهم ودام الحين هذا الوضع انا بخطب وعد منكم وانا مستعد اتكفل بولد مبارك ولا ينقص عليه شي وراسي يشم الهوى ووعد بنت عمي ومثل ما بغيتها قبل ابيها الحين وانا لها سند بكل الاحوال
انكتم المجلس رسمياً انكتم لا صوت ولا نفس محد مستوعب اللي يقوله عقاب ابد ومحد يقدر يقرر عن وعد لان وعد بتقلب الدنيا على راسهم
اخيراً نطق خلف وقال : لكن ياعقاب انت متزوج ! كيف بتتصرف في هالموضوع
عقاب : مايعيبني اني متزوج والشرع حلل اربع اما من ناحية زوجتي هي تدري اني في نهاية المطاف بتزوج وطالما انها كل ما حملت تسقط
ابو خلف :والله يا عقاب انت عزيز وغالي ولكن الشور الاول شور وعد وهي اللي تقرر
عقاب : ابد اللي يرضيها تبشر به
محمد مايدري وش صار في عيال اخوانه كل واحد هايم ببحرٍ لحاله مليان مشاكل وهموم : ماودي يا عقاب اقول هالحركي لكن وانا عمك كلنا ندري ان وعد محملتك سبب موت مبارك ومن هالناحيه ماظنتي ترضى
سكت عقاب وقال: انتم شاوروها ان رضت زين على زين وان مارضت براحتها
ماعاد احد تكلم وكلهم شايلين هم كيف بيبلغون وعد
_______________________.
وعند ضاري
اللي من صبح الله مشتط وتكفل يسوي القهوه والشاهي والفطور وكل شي وان مضاوي اليوم ما تقرب على شي بس تجلس
وكانت ام ضاري مستغربه ابتسامته الللي شاقه وجهه ومضاوي بعد وغير النظرات اللي تدور بينهم لكن حمدت ربها لانها دايماً تشوف المشاكل بينهم ولا تقدر تسوي شي وواضح انهم مبسوطين اليوم
في المطبخ كان ضاري يشتغل بحماس ومضاوي واقفه تناظره بهدوء وتتأمل انها طول هالسنه كانت قاتله ابتسامة ضاري الحلوه ودافنه فرحته اللي توها تشوفها : خلني اساعدك
ضاري : ابد ماتسوين شي اجلسي بس وانا اليوم اسنع كل شي
مضاوي: بكييفك بكيفك والله الموضوع لصالحي وانت بكيفك
ضاري: ايه ايه اطلعي الحين على حقيقتك
مضاوي : ابد والله مشتريه راحت بالله راحت سنه اكرف وانت جالس اكرف الحين
ضاري : تمونين ماعليه
ابتسمت مضاوي وهي تساعده ببعض الاشياء غصب عليه عشان بس ما يتعب لحاله
_______________________.
وعند ماجد
وصل واتجهه لبيت الجد قايد بعد ماقاله غيث انهم فيه
دق الباب وفتح عزوز: هلا هلا بالنسيب
ارتاح ماجد من كلمته وابتسم: هلا فيك يا عزوز
فيصل: حياك خالي
دخل ماجد : سلام ياجماعه
الكل : وعليكم السلام
وقفوا يسلمون عليه وهو عيونه على عقاب ماصدق جلس وارتاح وجهز نفسه يبدا
ابو ناصر: زين لحقتنا يا ماجد .
ماجد : اي والله قلت لازم وانهي اللي بديته وارتب اموري
انغث عقاب بس ماحب يخربها مع ماجد لانه اقوى نقطة عند وعد يعني لو بيرفضه بترفضه وعد بعد وهو مايبي هالشي : اي والله صدقت
ابو خلف : زين ماسويت
خلف : تقهوو الحين وكملوا
ابو ناصر : صب القهوه يا عزوز لنسيبك
صب القهوه عزوز وهو فرحان ومتشقق وترك القهوه بعد فتره ودخل وطلع لغرفة البنات مبتسم : سحر سوي شاهي
شهد: انا اسويه
عزوز: لا نبي سحر تسويه
شهد: عشتوا!؟ ضحكت سحر وطلعت مع عزوز اللي يلتفت عليها ببتسامه
سحر: وش فيك
عزوز ببتسامه: تدرين ان ماجد هنا جاي يكمل مع عقاب اموركم
لفت سحر بغصه:صدق!؟
عزوز: ايه الله يا سحر يا اني مبسوط ومستانس لك مره ماجد رجال والنعم وكفو ويبي يساعدك ان شاء اللله تدرسين وبيكون لك عون ان شاء الله
ابتسمت سحر لفرحته: الله يكتب اللي فيه خير
عزوز : يارب وعقبال ما نزوجكم كلكم
سحر: افا جالسين على قلبك
عزوز: لا وربي بس ابيكم تزوجون وترتاحون وتلقون الرجال اللي يسندكم لو لا سمح الله صار لنا شي
سحر: بسم لله عليكم الله يديمكم لنا ذخر
ابتسم عزوز بحب ويحلم ان خواته يعيشون براحه وحب
_______________________.
عند النوخذه
رجع لبيته وهو يسمع سوالف عياله وجلس هو مرتبك ما ارتاح لمسألة اماني واكيد ابو خلف بيرفض كان يراقب جابر بهدوء والتفت انتباه جابر اللي قال: يبه شنو فيك!؟ ابو نهيان:ماكو شي يبه
نهيان: يعورك شي!؟
ابو نهيان: لا لكن عندي موضوع وبخلصه
جابر: شنو!
ابو نهيان: اذا تم بتعرفون
قام وراح وتركهم ولفت ليلى بهدوء: خير شنو صاير
نهيان: ما ادري سكوت ابوي يخوف
جابر كان خايف انه يجبره على بنات عماته اللي يتنحش منهم طول هالفتره وكان ساكت مايبي يدخل بالموضوع ابد
اما ليلى كانت خايفه انه ناوي يسوي لخلف شي وهذا اكبر مخاوفها لكن رجعت على صوت نهيان اللي قلب الصينيه وهو يضحك:اقول ليلوه غني غني وانا بدق نغير جو
ضحكت ليلى ولفت لجابر: جابر يختار الاغنيه تنهد جابر وهو له فتره يسمع هالاغنيه قال :غني لعبدلله الرويشد احترق اذا ذكرتك
عم الصمت بكسرة خاطر وغنت ليلى من (أحترق ان ذكرتك .... ألين وصلت الشطر اللي كسر قلب جابر
يا حبيبه يا أماني عشتها لكن أماني
يا حبيبه يا قمر ما طل ّ في ظلمة زماني
أعذريها خطوتي لو تبتعد
مقدر أوفي و لاقدر أخون العهد
حاير و حالي صعب حاير و إنت السبب..
محد يحد بهالكلمات الا جابر اللي فعلاً محترق قلبه ومتقطع على اماني وده يروح لها يفهمها انه ماله ذنب في هذا كله بس ابد ماله حيله
جلست امه جنبه وهي تمسح على كتفه ماتدري وش تسوي
حتى نهيان مايدري كيف يتصرف اما ليلى تحترق انها سبب في بعد جابر عن اماني
_______________________.
وفي بيت الجد
انتفق عقاب مع ماجد يكون الزواج بعد شهر والملكه بنفس يوم الزواج ووافق ماجد ماعنده مانع وانفضت الجلسه وكلٍ راح لبيته
بيت ابو خلف
كانوا مايدرون كيف يفتحون الموضوع مع وعد اللي جالسه بهدوء
وقال ابو خلف: اطلعوا ابي وعد بكلام واقعد ياخلف
كلهم طلعوا وبقت وعد ماطرا له شي ابداً
ابو خلف: وعد يابنتي انا بكلمك بموضوع وترا الراي رايك محدٍ جابرك
خلف : كلمتك بيدك وانتي تقررين
وعد ما ارتاحت: خير وش فيكم
ابو خلف : عقاب يخطبك
اتسعت عيون وعد ووقفت : وشو
خلف : اقعدي ياوعد اقعدي واعرفي ما انتي مجبوره تقدرين ترفضين وبيت ابوك يعزك
ابو خلف : عقاب يقول ان مبارك موصيه عليكم وغير هذا عقاب من قبل مبارك وهو يخطبك وشاريك ويبيك
سكتت وعد بغضب يفور بدمها ( يبيني!!؟ وموصيه مبارك علي!؟ الظاهر مالي خلاص منك يا عقاب لين اجيب اجلك لكن هين هين هي اصلا خاربه ويا انا ياانت)
لفت عليهم وصدمهم وقالت: موافقه دام مبارك موصيه
جمد خلف وابوه ماعرفوا يردون
وقال خلف: وشو !؟؟
وعد: موافقه لكن بشرط
ابو خلف : وش !
وعد : زواجي منه عقد قران فقط لا عرس ولاعشاء ولا حفل ويجي هو ياخذني هنا
استغربوا شرطها متوقعين شي اكبر لكن وعد اصدمتهم
ابو خلف : وبس!؟ وعد : وبس
خلف: ودراستك
وعد : لا دراستي بيني وبينه
كانت وعد مبيته النيه يا انها تخضع عقاب يا انها تذبحه وتنهي شره
ابو خلف : زين زين
طلعت وعد يطبخ الحقد في عروقها وتاركه ولدها مع ماجد وخواتها وهي تحلف يمين ودين لتنتقم لمبارك وتذوق عقاب الموت
اماا خلف كان مصدوم مايدري وش يفكر فيه !؟ كل شي مزحوم في راسه
لكن ينتظر بكره يجي عشان يروح النوخذه ويقوله الحل
_______________________.
الليل .
في بيت ضاري اللي طول اليوم ما طلع فرحته غريبه!؟ وشعوره اغرب ، من المغرب قاعد قدام امه وعيونه على غرفته ما غابت وكأنه ينتظر متى يقوم يروح لمضاوي
وام ضاري ماتدري وش فيه بس يوصلها فرحته من عيونه وقررت انها تقوم تنام وتخليه لانها ماهي مستفيده من جلسته معها
وقف ضاري معها: وين يمه تونا الليل طويل !
ضحكت ام ضاري: ليلك الطويل ماهو عندي روح اقضه مع هاللي طارت عيونك تحتريها تطلع انا عجوز بحط راسي وانام وانتم توكم
ضحك ضاري بفشله وسكت ودخلت امه وهو اتجهه لغرفته درعم ودخل بدون مايفكر يدق الباب لكن اول ماتسكر الباب اختلفت نبضات قلبه
كانت مضاوي من فتره كاشخه وتحتريه قررت تكون بأقرب هيئه للعروس يستاهل ضاري انه يفرح
عند ضاري كان يشوفها احلى مليون مره من يوم كانت عروس مايدري ليه لكن اكيد انه صار يشوفها بقلبه
ارتبك ماعرف وش يقول ووش يسوي بس ابتسم وقال: لا اله الا الله وش ذا الزين كله
طالعته مضاوي بخجل وابتسمت لكن ماردت واخيراً وصل ضاري عندها وهو يحس ان قلبه بيوقف رغم فرحته الا انه فيه خوف للان
فالاخير قدر انه يتقدم خطوه في حياته و ...🌚
_______________________.
في بيت ابو خلف
عجز خلف ينام كل القرارات بيده ولو غلط تضيع حياة كثير لكن فز اول ماطرا له شي لازم يسويه لف يناظر اخوانه شافهم في حالة نومهم المعتاد وعشان يوصل الباب لازم يوخر فيصل اللي يعيش معركة وهو نايم ومسكر كل المداخل عليهم
بالقوه سحبه لين ابعده وطلع اتجهه لغرفة البنات وهو يدق بهدوء
وفتحت وجدان كالعاده وطل خلف :نمتوا
وجدان : احد يعرف ينام وعنده ذا النتفه ( تقصد خليفه )
ضحك خلف واتجهه لوعد وهو ياخذه: احسن عساك لا نمتي الله يقويه عليك حبيب خاله
ندى: ياليتك تاخذ حبيب خاله تريحنا لان لو جلس كذا يصيح بكره ما رح تلقون فطور
اماني: والله بالنسبه لي صوته يطربني
حنان: وانا بعد
وعد : وش فيك انت ما نمت
خلف التفت لأماني :جيت ابي اماني تخلص لي شغله هناك
اماني : وش هي!؟
خلف : دقيقه
نزل خليفه بهدوء بعد دقايق اللي نام بحضنه ووقف وهو ياخذ اماني معه وطلع
ندى بهمس : وش يبي فيها!؟
وعد : يمكن عنده شكله شي يبيها تساعده
وجدان: تكفون اسكتوا دام خليفه نام نبي ننام احنا بعد
ضحكت ندى: يوووه حنان نامت من زمان
لفوا على حنان اللي دخلت بنوم عميق مادرت باللي حولها
_______________________.
في السطح
جلس خلف وهو يأشر لاماني تجلس جنبه: تعالي
اماني: خلف وش فيك فجعتني
خلف : عندي موضوع بكلمك فيه لكن والله اني مستحي منك وادري بطيح من عينك لكن والله مافيه شي بيدي
شهقت اماني: افا ياخلف مستحيل تطيح من عيني لو مدري وش يصير قول وش فيك ولا تستحي
خلف : اجل اسمعي
بدا خلف يقولها السالفه زي ماقالها للكل ما اختفت ملامح الصدمه من وجهه أماني اللي ناظرته بذهول
خلف : اللي ابيك تعرفينه الحين ان جابر ماله شغل بهاللي صار ولا يعرف شي كل اللي صار صار بسببي انا والنوخذه رجع من جديد ووافق على خطبتي لليلى ولكن الشرط انك ترجعين لجابر
وانا ابد ما اطالبك ترضين لا والله الشور شورك وبيدك وان رفضتي صدقيني بكون معك ومستحيل اخليك مهما كان وكل شي بالدنيا ذي يهون عشان خاطرك وليلى يجي بدالها مليون وحده لكن اختي ما ابدلها باحد ابد
( قال هالكلام وقلبه يوجعه لان مستحيل احد يحل محل ليلى ولا يمكن يفكر يتزوج غيرها والموت ارحم من انه يناظر غيرها لكن مايبي اماني تنجبر على شي )
اماني ما استوعبت ابد من كل اللي قاله خلف كانت على مشارف انها تنسى جابر او تتناسى شكله اللي ماطلع من بالها وهم جايبينه من المستشفى كانت مقفله بابه وتقول انها مالها حق تفكر فيه !؟ كيف الحين يرجع كيف يصير مصيرها مصيره ومصير خلف وليلى بيدها
ناظرت عيون خلف اللي باين الأسى والفقد فيها تعرف هالنظره لها ايام تلمحها فيها عيونها ماتدري ليه تعلقت بجابر بعد ماكانت بعيده كل البعد عنه ولا تفكر فيه!؟
كانت لازم تعطي قرار لكن كيف تعطي وهي داخلها متكهرب ومتلخبط
خلف : انتي معي!؟
ناظرته اماني بهدوء وابتسمت وقالت: قلتها قبل وارجع اقولها انا من يدك هاذي ليدك هاذي واكيد انك بتختار لي كل شي زين
خلف : اماني لا تقولين كذا انا ابي قرار
اماني :دامك تقول جابر ماله شغل انا ماعندي اعتراض
دقق خلف فيها بذهول: كيف يعني!؟
اماني : يعني موافقه اذا خطبوا مره ثانيه لكن الشرط مايملك الا يوم الزواج عشان مانرجع لنفس الدوامه
ضحك خلف ماهو مستوعب وقال: عطيني كلمه اكيده
ضحكت اماني : موافقه
وقف خلف مبتسم وفرحان : الله يكتب لك الخير وتأكدي للمره الثانيه ان جابر مافيه مثله لولا اللي صار
ابتسمت اماني بهدوء: اكيد ما تختار لي الا الكفو
ابتسم خلف مايدري وين يوديها من الفرحه ضمها للحظه وهو يقول : زين اجل بكره اكلم ابوي لكن بيني وبينك لا تقولين لاحد
اماني: ابشر
راحت وهي في داخلها شعور كأن العصفور يطير بجواتها مع ان معرفتها بجابر قليله بس وش تسوي صار له في قلبها مكان
اما خلف راح ينام وهو يحلم انه يتزوج ليلى لكن عسى ابوه مايعارض ..
_______________________
.. .. ..
