.
الكاتبه والمبدعه / أديم الراشد .
.
والكل ابعد عنه لين اخذ نفسه وهدت النوبه وهو منسدح على رجل امه وهو منهد حيله
ام خلف: بسم لله عليك ياحبيبي وش صار لك وش اثر عليك
خلف بصوت مبحوح: ماصار شي يمه بس بطلع ارتاح
ندى: تبي شي!
خلف : لا
اخذته امه لغرفته وانسدح بتعب وقربت امه: فيه شي مزعلك يمه !
خلف : لا لا بس اهملت العلاج
ام خلف : ياخلف ياحبيبي لا تخوفني عليك لا تهمل نفسك والله اني يدي على قلبي اخاف يصير شي لك
خلف : لا تخافين يمه حمدلله انا بخير
ام خلف: زين يمه انتبه لنفسك
خلف : زين
طلعت وتركته ومسح وجه بتعب وهو زاد همه واكيد ليلى فهمت كلامه غلط وكيف بيحل هذا كله الحين
_______________________.
وفي بيت الجد قايد
الناس مجتمعه ومضاوي تهوجس بضيق عقاب ما تعوده كذا ما تحبه يكون بهالضيق
نزلت وهي تسمع صوت ابو خلف ينادي عقاب وهو جالس مع ابوه بالمجلس
مضاوي: عقاب تعبان ونايم
ابو خلف : صحيه خليه يجي وبعدين محد ينام هالحزه
صدت مضاوي وطلعت وهي تصحي عقاب اللي على غير العاده وقف وطلع ونزل لعمه
عقاب : سم ياعمي
ابو خلف: وراك نايم هالوقت ! وليه تعبان
عقاب : مانمت زين بالليل كنت في شغل ورجعت تعبان ونمت
ابو خلف : زين
جاء محمد وجلس بهدوء : سلام عليكم
الكل : عليكم السلام
لف ابو خلف : مضاوي اطلعي وسكري الباب
مضاوي : زين
طلعت ووقفت بحيره وهي متاكده فيه شي بس ما تدري وشو !؟ لف ابو خلف بحرج: ابوي ومحمد اسمعوني ! جاء واحد اسمه مبارك من معارف عقاب وخطب مني وعد
ما احد استغرب لانهم يعرفون وقال محمد : طيب!
ابو خلف : وانا شاورت عقاب وكنت متردد وعقاب مدح الرجال وقال اذا وعد رفضت مبارك هو بيخطبها
اعتدل عقاب يبي يطلع من ضيق ويرجع لهمه الوحيد وهو وعد
لف ابو ناصر بذهول : صدق!؟ ماقلت لنا
عقاب : خليت الموضوع لعمي وهو يفكر
ابو ناصر: كمل يا ناصر!
ابو خلف بحرج: كان ودي ان عقاب يتزوج وعد لكن وعد وافقت على مبارك
اتسعت عيون الجد بذهول : رفضت عقاب
ابتسم عقاب بداخله وهو يقول( مهما سويتي نفسك فطينه بتظلين غبيه يا وعد ) ورد بحزم: لا ياجدي مارفضتني! لكن وافقت على مبارك وهذا اساس الامر وانا طرحت الخطبه بحيث انه اذا رفضت مبارك
محمد كان يراقب عقاب اللي ماله اي ردة فعل الا انه زعل من كلمة( رفضت عقاب )
ابو ناصر: وش في مبارك زود ؟؟
محمد : مافيه زود الا بالقسمه والنصيب واذا ربي ماكتب لوعد نصيب مع عقاب معناته الامر انتهى
ابو خلف : ياعقاب وانا عمك لا يضيق صدرك انت اشر على اي وحده من بناتي وابشر بها
عقاب ابتسم بهدوء: افا ياعم بناتك اكبر من اني أمر واشر اذا ما وافقوا برضاهم ما ينجبرون لكن ياعمي الافضل نأجل المووضوع شوي
ابو ناصر صد بضيق: ومبارك ذا وش هو من رجال!؟ بدا ابو خلف يكرر اللي قاله له عقاب وهو واثق ان عقاب يبي لوعد الخير
اما عقاب كان ماسك نفسه غصب لا يقوم ويفسرونه انه ميت على وعد
محمد: ومتى بتكلم الرجال!؟ ابو خلف : كلمته والمغرب بيجي ونتفاهم على اللي باقي
محمد : الله يكتب الخير
لين هنا وتقفل الموضوع بس عند مضاوي توه بدا وتوها تفسر وتفهم تصرفات عقاب ووعد الغاضبه رجعت بذهول بدون ما احد يحس فيها وهي مصدومه ان عقاب الكارهه لوعد يقدم على هالخطوه ووعد كارهه لعقاب ويعرف هالشي ! بس انقهرت على عقاب تظن ضيقه له علاقه برفض وعد وهي مهما كان ماترضى على عقاب وزي ما انقهرت على خلف لعقاب من ضيقها نصيب اخذت طريقها لبيت ابو خلف دقت الباب وفتح غيث : هلا عمه مضاوي
مضاوي : هلا غيث وين خواتك!؟ مالكم صوت
غيث: خواتي كلهم فالغرفه مايبون يزعجون خلف عشانه تعب من شوي ووبس وعد فالسطح
مضاوي : ليه خلف تعبان!
غيث: زي كل مره
مضاوي : زين
طلعت للسطح تركض ودخلت وشافت وعد جالسه بهدوووء على الزوليه مثل عادتها قدامها القهوه
مضاوي : زين اني لقيتك لحالك
لفت وعد لها: ليه!؟ وش تبين فيني لحالي!
مضاوي بغضب: ابد ودي اسألك عن فارس الاحلام اللي خطبك ورفضتي عقاب ووافقتي عليه
احتدت نظره وعد لها بقهر وقالت : وش هالكلام اللي تخربطين فيه هالحزه؟
مضاوي : ليييه متى ودك ناخذ موعد عشان نتكلم معك
وعد : مضاوي ترا ماني ناقصتك! وش تبين!؟ مضاوي : ابي افهم وشوله ترفضين عقاب وعشان مين ؟
ضحكت وعد : صاحيه انتي جايه تسأليني انا ليه رافضه عقاب !
مضاوي : ايييه اسالك انتي ولا على راسك ريشه!
وعد :لا والله في راسي عقل ! انا مابعد انهبلت عشان اتزوج ولد اخوك المريض هذا
مضاوي : ترا سكت لك بما فيه الكفايه عقاب اصحى واحد فيكم؟
وعد : زييين الله يديم رضاك عليه ! لكن ابعدي عني انتي وسيرته خلاص لان اسمه صار يجيب لي غثيان
مضاوي : والله مدري وين بيوديك هالغرور
وعد : يوديني للمكان اللي ما اشوف فيه مرض عقاب وطغيانه
مضاوي : ما اصدق انك بكل هالحقد والكرهه!؟ وعد : مضاوي اسمعيني زين انا مابي ابني مشاكل مع الكل
والزواج مو غصب و مو لازم احب عقاب واموت عليه عشان ترضون ولا لازم اوافق عشان محد يزعل ، ما ألومك عقاب ولد اخوك وتحبييينه وما ودك يضره شي بس اعرفي اشوف الموت ولا اشوفه وانتي اكثر وحده تدرين اني انا وعقاب كل الضد اللي فالعالم موجود بينا مابي ادخل حياة انا ادري انها كلها مشاكل
صدت مضاوي بضيق : يمكن الموضوع خيره بس تعلمي ما تكونين بهالقسوه كلها
ابتسمت وعد بضيق: ماعليه لو ماكنت قاسيه كان من زمااااااان رحت وطي
راحت مضاوي بضيق وتركتها وهي تدري صح هي وعقاب ضد لكن ماكان المفروض يكون رد وعد قاسي بكل هالكرهه الموجهه لعقاب هاذي وجهة نظر مضاوي المحبه لعقاب ولا تدري عن اللي صاير
_______________________.
في الليل
في بيت ابو خلف الكل مستعد لجية مبارك والكل غالباً متضايق والكل جامد وكان خلف واقف بضيق مايدري من وين يلاقيها ومن وين بيحل هالمشاكل
واقف جنبه عقاب بكل شموخ وهو يوقف على اول عتبات انتقامه من وعد مبسوط ومستانس
على الطرف عزوز وفيصل اللي كانوا متقبلين الوضع بشكل عادي
ومحمد اللي واقف بحزن ضايق من حال عايلتهم اللي يحسه متشتت ولا وده الكرهه بين عيال العمومه ينتشر رغم ان وعد سعت انها توقفه بهالزواج لكن مايدري تنجح ولا تفشل
ابو خلف كان شبه راكد ضايق من وعد وزعلان منها بس مهما كان وده تتزوج ويرزقها الله حياه حلوه
ابو ناصر رغم احلامه اللي كانت مبنيه على زواج خلف وعقاب من سحر ووعد ويضمن احفاده حلوه الا ان احلامه تنهدم قدام راحتهم وسعادتهم
وصل مبارك وصوته المسموع من اخر الشارع وهو يرد السلام ووصل للوعد اللي واقفه فوق وغمضت بكل قوتها اول ماشافت هيكله ومنظره وايقنت بالهلاك لكن ماعاد فيها رجعه
دخل مبارك يسلم بحراره وجلس والكل يناظره وقال: يا ابو خلف انا كلمتك خاطب لبنتك وبعد ماعطيتني الضو الاخضر جيت بتمم كلامي واخطب رسمي ويشرفني اخطب يد كريمتك على سنه الله ورسوله زوجة لي
ابو خلف : شرفتنا يا مبارك وانا يوم كلمتك قلت لك إني ان شاء الله عطيتك وان شاء الله نصيبك عندنا
مبارك التفت لعقاب يبتسم: بارك الله فيك يا ابو خلف وانا تحت امرك باللي تطلبه وابشر وتم
ابو ناصر: قبل نطلب وقبل حاضر وتم ، انا اشوفك جاي تخطب لحالك! وين اهلك!
مبارك: انا ياعم مالي الا الله امي وابوي توفوا من زمن وانا وحيدهم وتزوجت وماكتب ربي نصيب وهذاني ادور نصيبي عندكم
ابو خلف : رحمة الله عليهم
الكل : امين
كان خلف مدقق عليه ويراقب تصرفاته خراجياً كان انسان هيبه ومحترم
وبدا ابو خلف يعرض عليه شروطهم اللي كلها كانت عاديه مهر وبيت وإلخ ... مبارك: تم ياعم
ابو خلف :الله يتمم لك
مبارك: متى تحبون الملكه والزواج
ابو خلف لف يناظر حوله يبي منهم اقتراحات وقال مبارك: يناسبكم بعد شهر !
ابو خلف : ايه زين
مبارك: اجل تم وان شاء الله من بكره يوصلكم المهر
ابو خلف: تم
لف خلف بضيق يصب القهوه لهم وهو وده يرفض لكن خلاص الامر منتهي ومبارك ماكان سيء قدامهم ابداً وكل اجابته راكزه
وابتسم عقاب بفرح وهو يبارك لمبارك وللكل طبعاً وبعد فترة طلع مبارك ورمى خلف اللي معه وطلع ورا ابوه اللي دخل وشاف الكل مجتمعين ومحد يدي عن خطبه عقاب الا ناس معدودين
ابو خلف : تمت خطبة وعد وان شاء الله العرس بعد شهر
وقفوا الكل فرحانين لكن وعد ماكان فيه وطلع خلف يركض قبل يوصلون البنات ووصل السطح وشاف تجمع الملابس من الحبل بلا مباله باللي صاير تحت راح لها بهدوء وقال: ابوي تمم لمبارك
ضحكت وعد بكل قوه: ماشاء الله اجل بارك لي !
خلف بتدقيق: خاطرك ابارك لك صدق !
مثل ماتعودت وعد دايماً تكون قويه ومتحكمه في دمعتها ابتسمت وهي توقف قريب منه: افا ياخلف ! طول عمركم تنتظرون هاليوم والحين مترددين في كلمة مبروك
قرب خلف يحضنها بهدوء وهو يدعي انها فعلاً فرحانه ما تدعي الفرح : مبروك يا وعد اذا هالمبروك بتسعدك الف مبروك وانا اخوك
لف على اصوات البنات اللي طلعوا مبسوطين وهم يغنون ويضحكون وهم لازم يفرحون لوعد وهم فاهمين ان كل شي قسمه ونصيب
لفوا حولها يغنون ويرقصون ويضحكون وخلف مبتسم بينهم ووعد مبتسمه وجات امها وام خلف وهيا ومضاوي
وقالت وجدان: خلف بنات عمي بيجون
خلف : ا زين انا اصلا رايح
نزل خلف يدعي ان ربي ينزل الفرح على قلب وعد طلع يمشي تارك الفرح وراه ببيت اهله لكن مجرد ماشاف ابو نهيان اجتمعت الهموم فوق راسه
سمع صوته ابو ممدوح يسولف مع ابو نهيان اللي قال : وتعرف يا اخوي زواج بنتي بالكويت لازم ارد مبكر
ابو ممدوح: ماشاء الله ومن زوجت من بناتك!؟ لصق خلف في مكانه ما قدر يقدم رجله او يوخرها ينتظر الرد اللي بيقطع الشك باليقين
ابو نهيان: بنتي الكبيره شيخه
ابو ممدوح : الله يبارك لها
تشقق قلب خلف من الفرح وهو يقول بصوت شبه عالي : لله يبارك لها ويستر عليها
لكن تدارك نفسه وصد قبل احد يسمعه ويشوفه ورجع للمكانهم يطير من الوناسه
_______________________.
وفي بيت النوخذه .
تركت ليلى امها وشيخه اللي يخططون لزواج وطلعت لسطح ونزلت عودها وبدت تغني وهي شاردة بتفكيرها ونزلت العود اول ماحست انها ماعاد تعرف تغني من الارتباك اللي تحسه واللي خلف اشغلها به ما تدري وش بيقول لجابر وتنتظر دخلت جابر عليها وقفت وهي تناظر من فوق السطح وشهقت وهي تشوف خلف جاي لبيتهم : يمممه يمهه شيبي هذا؟! حسبي لله عليه بيخلي فضيحتي في كل البيت
ركضت للباب قبل يدقه وحصلت عباية امها قريب الباب لبستها وتلثمت بالطرحه وركضت وهي تدري امها وشيخه في غرفتهم فوق
وقبل يدق خلف الباب اللي جاء وهو وده يسلم على جابر ويرد له العزيمه وياخذه معه للمكان اللي يجتمعون فيه لكن انفتح الباب بسرعه وطلت ليلى: انت شتبي هنيه!؟ مجنون قاضي!؟ ماتستحي ما تنتخي
تفاجئ خلف بس ضحك : وانتي دايم طايره كذا !؟ ليلى: وانت شكووو!؟ اسمعني ياولد الناس ابعد عنا احسن لك ! انا مدري شنو تبي هاه شنو تبي فيني !تبي الفضايح !
ابتسم خلف بخفه وهو مجذوب لعيونها: ماجيت ابيك ابي اخوك جابر
ليلى طاح قلبها: شتبي فيه هاه !؟ وشتبي تقوله حسبي الله عليك
ضحك خلف: لاتدعين علي اخاف تندمين
ليلى: اندم على شنو ياحظي ، بالعكس بفتك منك ، واسمعني ادحر ابليس وروح منيه!؟ قلت لك لا تثق في صداقتك لجابر
خلف : بالعكس انا واثق !
ليلى : بالله!؟ شنو اللي يخليك واثق ! ملك ولا نبي ؟
ثبت خلف عيونه في عيونها وتجرأ وابتسم: لا ملك ولا نبي!؟ لكن يمكن اكون نسيب وحزتها ما ودك ان جابر يضرني! ليلى دق قلبها وهي ماهي فاهمه وش قصده بنسيب! ومالها معنى الا معنى واحد خافت منه ليلى
ورجع خلف يقول بكل جديه : اذا شفتي جابر قولي له خلف سبقني قبل اشكي لك منه ويقولك يا ولد النوخذه ! لو اخطب منك ترضى!
اكتفى بهالللي طلع من قلبه ورجع مع طريقه قبل يجي احد يدفنه وهو واثق انه فعلاً وده يتزوج ليلى وماكان كلامه موجهه لجابر كان موجهه ليلى يبي يفهمها اول شي ان كلامه اللي قاله يقصد انه بيسبقها وبيخطبها من جابر ! ويبي يوضح لها انه مايلعب وانه جاد جداً في موضوعهم لانه كل مايذكر تفاصيل ليلى ينشلع قلبه
_______________________.
وفي بيت نادر
اللي من اول ما صحى طلع لمكانهم وشاف عقاب هناك وهو مسترخي تماماً بهدوووء وهو يراقب ابريق الشاهي قدامه يفور وكان متأكد ان قلب وعد يفور مثله واكثر
فز على صوت نادر: وييين وصلت يالحبيب!
عقاب : قريب ! غريبه جاي توقعتك بالحفر !
نادر:رحت وجيت
عقاب : وش صار معك طيب .
نادر: ابد اخذت الموافقه وبتكمل شوق الدراسه هنا لكن مدري لاي مدرسه بوديها
عقاب : مدرسه شهد ووجدان؟ هي معهم بنفس الصف صح!
نادر: ايه
عقاب: محلوله اجل تدخل مدرستهم وتصير معهم
نادر: اي والله ماودي ادخلها لحالها ابد ، ولازم ندبر لها كتب بعد
عقاب: لا تشيل هم اكلم شهد بكره تنتظرها في المدرسه ويرتبون امورها من هناك
ابتسم نادر: والله انك راعي فزعه ياعقاب
ابتسم عقاب : افا بس ياما فزعت لي انت
نادر : واجبنا ! وين خلف
عقاب: مدري والله
لف على جيت خلف المبتسم الرايق اللي جوه فوووق فوووق فوق من بعيد قال : مسسسساكم الله بالخير والرضا والسلام
لفوا يضحكون : لله يمسيك بالخير
نادر: والله يا خليف انا احب إيجابيتك فالحياه ياخي متفائل رغم تسفييل الدنيا فينا
ضحك خلف : وش اسوي انا لو استسلم لها بمووت
عقاب :اسمعوا اسمعوا ترا صدق مليت من وضعنا هذا دوروا لنا شي نسويه ! ما تلاحظون من مده هاجدين وما نجتمع الا نتشكوى
نادر: ملاحظيييين بس وش في يدينا
خلف : ليه ما نروح لاصحاب ضاري غنى وطرب وسعة صدر
عقاب : لا مانبي ضاري ياخي ترا مليييينا
نادر : تعاااال هذاك ذكرتيني عقاب!؟ خييير انهبلت وش سوى فيك الرجال حاط حيلك فيه ترا للحين ما بلعت حركاتك امس
عقاب : لا يطق لك عرق! كل هالزعل عشان واحد من شهر عرفتوه
خلف: ياعقاب ياحبيبي السالفه ماهي سالفة عرف وجهل لكن ما معك حق تأذي ضاري حاول تتفاهم معه والله انه ابن حلال
عقاب : زين زين المهم شوفوا لنا حل
وقف نادر ومعاه حجر وعود وقف يرسم مربعات على الارض ورفع ثوبه وهو يرمي الحجر في احد المربعات ورفع رجله وهو يضحك ويقول : من يتحداني !
وقف عقاب ببتسامه: افااا هاذي لعبتي انا
خلف : رجعنا على البربر !
نادر: والله اليوم بلعب كل لعبه تطري علي
وقف خلف معهم وهم يمشون بالدور في اللعبه لكن وقف بتعب وهو يقول : انا بروح اجيب اغراض من البقاله
ماردوا وهم مندمجيييين في اللعبه
_______________________.
في بيت النوخذه
طلعت ليلى تمشي وهي كأنها مسحوووره رجعت لمكانها بالسطح وجلست بذهول جلست تعيييييد كلام خلف مليون مره احيان تقول انه فعلاً يمكن يكون يحبها واحيان يرفض عقلها ويذكرها بسحر واللي كان يسويه خلف وترجع تقول ( خلف ماله أمان ، ترك بنت عمه ولا فكر اكيد في راسه شي)
حطت يدها على عيونها تبي تتناسى اللي صار لكن مازال وجهه وابتسامته في عيونها وكيف وااااثق من نفسه
رجعت لغرفتها بحيييره وجلست جنب الشباك المردود لكن سكتت على صوت ترحيب
قربت تطل وشافت ضاري اللي يرحب في شخص جاي من بعيد لكن اول ما قرب عرفت انه خلف
ضاري : اشوف وجهك مسفهل
خلف ابتسم: اول شي كيفك وكيف امك ان شاء الله بخير!
ضاري: بخييير الحمدلله وتسلم عليكم
خلف : الله يسلمها
ضاري : انجز وش بلاك من سبعين كيلو تنشاف صفة اللولو
خلف: اسكت ياضاري شفت الموت بعيوني
ضاري: بسم لله عليك مريض اجل!
خلف : مريض المحبه والله
دفه ضاري بضحك :يعني الوضع صار رسميييي
خلف : شوف انا من الساعه الاولى عرفت اني طبيت على وجهي بس توني عرفت اني غرقاااان
ضاري : والله ماينعرف لك يوم صاكه فيك الدنيا ويوم ضحكتك معبيه وجهك
خلف : والله هالايام المشاكل تحذف علينا مع كل صوب
ضاري : ليش!
خلف اللي كان مستأمن لضاري كثيير وبدا يقوله عن مسألة وعد وعقاب
ضاري: لا تقول عشان كذا عقاب متضايق
خلف : لا تسألني عن عقاب لاني مدري وش يدور براسه
ضاري سكت شوي وقال: لا يكون الموضوع كله ردة فعل لمسألة رفض سحر لك
خلف : لاااا يا رجال ماهي ذي السالفه وعد تدري بكل السالفه وعقاب مستحيل يحط هالموضوع بينا لكن الموضوع انقضى ووعد بتزوج مبارك
ضاري: لا تجزع ياخي دامها راضيه مالك الا تدعي لها بالخير وان شاء الله مافيه شي تخاف منه
خلف: يارب ياضاري
ضاري : زييين خلصنا من هالسالفه!؟ انت وش جديدك مع هاللي اخذه عقلك
ضحك خلف : اه يا ضاري انا والله حالتي حاله من امس وانا قلبي يرقع عجزت انام وعجزت اتحرك وعجزت حتى افكر
ضاري : وش صار؟
خلف : صادفت اخوها طال عمره وبزعمه انه يبشرني يقول ان زواج اخته قريب وقف قلبي بغيت اموت اظلمت الدنيا بعيوني
ضاري بذهول : تزوجت !
خلف : هذا اللي كنت اظنه لكن سمعت ابوها يقىل انه زواج اختها الكبيره والله اني ارتحت راحه ما تخيلها
ضاري : ماشاء الله عليك يعني ضامن انت ووجهك ووش دراك ما تتزوج
خلف : قول خير يارجال
ضاري: هذا اللي بيصير اذا جلست شاق الابتسامه وتخيل وتأمل ومجمد الموضوع
خلف : ماني مجمده وحتى اني قلت لها بخطبها بس انتظر سالفة وعد تخلص
ضاري : زيين اجل دام هاذي نيتك شد حيلك
خلف : اسمع قم قم نبي نرجع للشباب قبل يفقدونا
ضاري: يلا
رجعوا لكن ليلى جمدت على الشباك مذهوله مصدومه ماهي مستوعبه واول شي ما استوعبته ان سحر رافضه خلف!!؟ وهي ظلمته ، وثاني شي ان خلف يحبها لهدرجه! واعترف بنفسه وقال لضاري وأكد لها اول ماقال لضاري انه خطبها استوعبت كلامه الحين استوعبت كل شي ولا شعورياً دق قلبها بشعور غريب وضحكت وغمضت بكل قوتها وفزت وهي تناظر الخلخال وابتسمت وحاولت توقف هالشعور وهالابتسامه بس قلبها ما سمح لها
_______________________.
وفي بيت ابو خلف
الكل فرحان لوعد والكل مبسوط ووعد جامده بدون اي ردة فعل الا الثبات والقوه
وقفت بتعب وهي تبعد عن جلسة البنات
حنان: وين رايحه!؟ وعد : بنام
ضحكت سحر: بدري على الاحلام الورديه
ناظرتها وعد بهدوء وابتسمت: ماعليك اعرف اخلي كل شي بوقته
ضحكت عهد: صادقه تعرفين تديرين الامور
قاطعتهم ام وعد تنادي البنات يساعدون فيصل وطلعوا هيا وعهد وسحر وشهدد لبيتهم
وقفت مضاوي تناظر عقاب اللي توه رجع كانت ساكته وهي تناظره بهدوء
عقاب : وين عزوز!
شهد: عند فيصل
عقاب : زين شهد اسمعي بكره اذا رحتي المدرسه خليك قريب الباب وبتجي شوق زوجة نادر معكم بنفس الصف خذيها وعرفيها على المدرسه والاداره عشان ترتب امورها وتستعد للاختبارت
ابتسمت سحر: ماشاء الله وافقوا على دراستها
عقاب : ايه
شهد: حلو يعني بتصير صديقتنا
عقاب : ايه وانتبهي لها
هيا : زين الله يوفق نادر جبر بخاطرها
ام ناصر: اهلها وشلون زوجوها وهي هالكبر!
عقاب : والله مدري يا جده لا تسأليني
ام ناصر: وش اسالك عنه عن النوم!؟
ضحك عقاب : وش عندي غير النوم خليني انام لين اشبع
سحر: ماعندك دوام بكره؟؟
عقاب : لا
التفت على مضاوي اللي ساكته : خييير من البقره اللي حجت على قرونها اشوفك طاخه وساكته
ابتسمت مضاوي وهي تناظره بضيق ماتدري توقف بصفه او صف وعد : ولا شي اتأمل حسنك الباهر
ضحك عقاب : ايه تأملي وادعي ان الله يرزقك رجال مثلي
مضاوي: بايعه عمري!؟
قال عقاب متعود على المزح بهالطريقه: لييه ما اشرف!
مضاوي دق قلبها بتأنيب وفزت بسرعه وجلست جنبه: لا والله ماهو قصدي بس امزح معك
استغرب عقاب انها اخذت الموقف جدي وهي دايماً ترد عليه بأبشع من هالرد وضحك: ماصار شي امزح
مضاوي : افا بس انت عين السيح
عقاب : كثري منها
شهد: شكلها وراها مصلحه
هيا: ايه تعرفين حركاتها دامك مثلها
مضاوي : مابي شي والله بس امدح ولد اخوي حرام يعني !
عقاب: ماهو حرام الحرام اللي تسوينه فيني دايم لكن ارحميني بنام تعبان
دقت مضاوي صدرها : افا عليك في وجهي رح وانام وارتاح وانا اسهر لراحتك وما اخلي حتى الذبانه تطير عندك
شهقوا كلهم مصدومين والكل متوقعه تبي شي لكنها راحمه عقاب متوقعته يحب وعد المتغطرسه عشان كذا متضايق .
ضحك عقاب : يوم الرضا يارب
طلع والكل يناظر مضاوي اللي فعلاً تحاول توفر لعقاب وسائل الراحه
_______________________.
وعند نادر
اللي رجع للبيت ودخل وهو يدور شوق وشاف الملابس طايحه بطرف وواضح انها مغسوله استغرب ودخل الغرفه شافها جالسه بالغرفه وكأنها بتنام ومتجمعه باللحاف وهي مغمضه بقوه
نادر: شوق
فزت شوق بخوف وصرخت
ركض نادر بسرعه يبعد اللحاف : شوق بسم لله عليك وش فيك !
شوق بخوف وهي تناظر حولها: خايفه خايفه
نادر قرب بخوف : بسم لله عليك وش فيك !وش صار
ناظرت شوق الحوش البعيد : كنت انشر الملابس هناك
نادر: ايه!؟ شوق : وانا انشر حسيت احد وراي ولفيت
اتسعت عيون نادر بخوف : ايييه!؟
شوق ببكى ورجفه : شفت ظل كبييييييييير وهريض اسود واقف كنت احس بأنفاس حاره حولي عجزت استوعب وماكان له ملامح ابداً كان له ظل بس معه وطلع صوووت غريب ويخوف يناديني رميت كل شي معي وجيت هنا ماقدرت اطلع
اخذ نادر نفس بخوف مستغرب اللي صار لكن توقع هالشي بما انه ورا هالحوش بيت مهجور مسح عليها بهدوء : لا تخافين سمي بالله واقري الاذكار وان شاء الله مافيه شي
وقف وفزت شوق: وين رايح!؟ نادر: بشوف الحوش وارجع
طلع وهو يدور حوله ماشاف شي لكن رجع وهو يشغل الراديو على القران و يجمع الملابس ورجع لشوق اللي عيونها على الباب بخوف
نادر: لا تخافين ما فيه شي ولا تبكين خلاص قومي بدلي عشان تنامين ولا تفكرين بشي القران شغال ما فيه شي يقدر يجي
شوق مسحت دموعها بخوف : زين بس لا تروح بعيد
نادر: زين
سكر نادر كل شي ورجع بتعب وجلس ينتظر شوق اللي طلعت بهدوء وجلست على الطرف الثاني من السرير وهو خايفه
وقال نادر يبي ينسيها اللي صار
نادر: تأخرت عليك!
شوق : شوي
نادر: والله خذاني الوقت لكن جيت ببشاره
شوق : وشو!؟ نادر: كلمت عقاب وبكره بنروح لمدرسة خواتهم شهد ووجدان عشان تسجلين فيها وتختبرين معهم ويساعدونك في اي شي فاتك
ابتسمت شوق بفرح: وللله
نادر: ايييه وان شاء الله كل شي يتسهل
بدون سابق انذار فزت شوق وهي تحضن نادر اللي انحبست انفاسه كانت ردة فعل سريعه وبريئه تمثل إمتنان شوق وشكرها لنادر اللي ماكان بيده الا يبتسم ويبادر بعد بحضنه لها
تفشلت شوق اول ما استوعبت اللي سوته وتحركت بتبعد لكن ما ابعد نادر اللي كان مبتسم ولا حب ينهي هالحضن ابد يحتاجه مثل ما شوق تحتاجه
ارتخى بهدوء لين ما اعتدل بجسمه على مكانه وهو يقول بهدوء : لا تبعدين نامي هنا الليله ( يقصد بحضنه)
جمدت شوق بهدوء وهو تحس ان قلبها بيفجر صدرها ويطلع .
ماقدرت تنطق الا بعد فتره وقالت : مشكور يانادر سويت لي شي ما سووه امي وابوي
شد نادر عليها اكثر وابتسم : وانا مابي شكر ابد ولا سويت شي اشكر عليه لكن ابي اشوفك بحلمك واقفه ورافعه راسي وراسك
ابتسمت شوق : ان شاء للله
سكتوا وعم الهدوء لكن ماعم على قلوبهم اللي تدق بكل قوتها لكن في طمأنينه عجيبه
_______________________.
ومن هالليله
انطلقت الأماني والاحلام والكوابيس بعد وعدا شهر
بالنسبه لخلف كان اخر يوم يلتقي بليلى هو اول ماعرض عليها خطبته وبعدها ما شافها ولا حتى بالصدفه لكن مرتاح في قلبه شعور حلو صار ينعكس على ملامحه ولو ان ليلى كثير احيان تصده
لكن ليلى اللي من هالليله وعصافير الفرح والحب تطير بقلبها فجأه تحرك الاعجاب المخبى تحرك الذهول اللي تحسه اتجاه خلف صحت وصارت تشوفه فارس الاحلام المنتظر او بالأصح قيس ليلى المنتظر وصارت تحاول ان الصدف تجمعهم من جديد لكن سفرهم للكويت وقف جيمع السُبل ... واذا على عقاب كان يعيش على اعلى مستويات الرضا وهو يشوف تجهيزات زواج وعد قايمه من جهتهم فرح لكن مبارك كان يجهز لطغيان وجبروت ينميه عقاب فيه بشويش بدون ما احد يحس ...
ووعد للي كل يوم يعدي ويقرب زواج كانت تحس انها بتنهار لكن مجرد ما تلمح عقاب ترجع لقوتها وكانت تسمع اعتراضات كثيره عنها وليش تروح تجهز لزواجها! وهاذي مو من عاداتهم وهذا عيب ومنقود ويفسر ان البنت ما تستحي ومع ذلك سوتها وعد وتعدت الكل وفرضت رايها وكملت وهي تدري ان عقاب غضبان من هالعصيان ويمنع البنات يروحون معها لسوق لكن كانت تثبت شخصيتها على الكل وغصب بعد وهي تجهز لمبارك انواع واشكال من العصيان والقوه
... اما نادر
فهو في نعيييييم ورضا تام بما انه متفاهم مع شوق ويشوفها في احسن حال وبدا الوضع بينهم يتطور ويصير في قمة اللطافه والاحترام والحنيه
اما شوق كانت من كثر ماهي سعيده صارت تشوف ان نادر ملاك وخصوصاً بعد ما ساعدها باختباراتها ويذاكر لها رغم انه مايفهم في هالامور ودراسه فاشله لكن اللي مايعرفه يروح لخلف يشرح ويرجع لها ويساعدها لين اخذت اعلى الدرجات
هذا غير تعامله معها اللي كان قاسم الحياه بينهم وجاب شغاله تساعدها فالبيت ....
اما عند ضاري كان ملتزم بحبه لامه كالعاده لكن الوقت قدامه بدا يضيق وامه كل يوم تعرض له بنت ولا يرتاح ويرفض وهذا شي ضغطه وبدا يتوتر منه.
في الكويت شيخه تزوجت من يومين وزفوها لبيتها بالفرح والدعاوي السعيده ومع روحة شيخه ودع الهدوء والسلام والركاده بيت النوخذه
وبقى الهواش والعناد والصراخ مع ليلى وجابر اللي بقوا واللي من اهم اهتماماتهم رجوعهم لسعوديه وماصدقوا خلص زواج شيخه ورجعوا السعوديه
_______________________.
في بيت ابو خلف
في اليوم المنشود رغم ازدحام الاشغال فيه والحوسه كان الفرح يعم على الكل وبما ان زواج الحريم في بيت ابو خلف كان خلف يعلق العقود هو وفيصل وسالم وعزوز وغيث يفرشون ويساعدون
والبنات في الغرفه يجهزون لكن وعد وندى كانوا مع ماجد في الصالون
وكان ماجد مصدوم من موافقة وعد على مبارك حاول كثير يغير رايها لكن رفضت وعد واصرت لذلك الكل سحب يده وبقت وعد
دخل عقاب بيت ابو خلف مبتسم : سلام
الكل : عليكم السلام
عقاب : مساعده شي؟؟ خلف : لا خلاص قضينا
عقاب : اجل انا طالع لزواج الرجال
خلف : زين
طلع عقاب بإنتصار ووصل زواج الرجال اللي في نفس الحاره وبعيد شوي شاف مبارك مجهز كل شي وخالص لكن باقي ما جهز هو
تقدم له مبتسم : ياعريييس وين الكشخه ووين البشت
مبارك: والله توني قضيت وبروح اكشخ
عقاب : ايييه شد حيلك واكشخ الليله ليلتك
ابتسم مبارك: لا توصيني على ليالي العمر
ضحك عقاب وهو متكتف يناظر حوله ويشوف الناس مجتمعين ويساعدون
_______________________.
في بيت النوخذه
كانوا معزومين على الزواج وليلى تكشخ بكل ما أوتيت من قوه ومتحمسه ومبسووووطه وهي رافعه صوت عبد الحلييييم وتغني معه
لفت على صوت جابر اللي يهاوش على صوت الاغاني العالي ونزلت وهي مبتسمه: شنو فيك ! صراخك معبي الفريچ
جابر: ليلووووه قصري الصوت فشلتينا
ليلى: ماكو احد يسمع
جابر : مابي اعيد الكلام
ليلى: زيييين
ام نهيان: يلا يا ليلى مابقى على المغرب شي يلا زتچ
ليلى: زين يمه زييين
ابو نهيان: جابر ساعدت جيرانك يبه!
جابر : ايه يبه توني واصل
ابو نهيان: بارك الله فيك
كان ابو نهيان حريص على جيرانه والجيره الطيبه
_______________________.
وفي بيت نادر
كانت شوق تجهز وهي متحمسسسسه لزواج وعد من كثر ماتحبها تحسها اختها وطلعت مستعجله : هاه نادر كيف شكلي
لف نادر اللي من العصر يحوس ويساعد في زواج الرجال وابتسم: اووووه ملكه مللكه
ضحكت شوق : لا تبالغ
نادر : من وجهة نظري اللي ماشافت الا انتي انا اعطيك هاللقب مع سابق الاصرار والترصد
ابتسمت شوق: طيب يلا عشان تجهز
نادر: يلا يلا .
شوق : طيب اسمع باخذ الشغاله معنا تساعدهم
نادر: اكيد اكيد خذيها
شوق : طيب
راحت شوق تقولها تجهز وبعد شوي طلع نادر وشوق متجهين لبيت ابو خلف
_______________________.
وعند ضاري
من يوم وصلت لهم العزيمه ووصلت لامه وهو يبيها تحضر وتغير جو وتنبسط ومن الصبح وهو يغسل ملابسها ويبخرها ويجهزها عشان تحضر
جلس ببتسامه ينتظر امه اللي تمشط شعرها وهي تجدله مثل طريقة كل العجايز للكبار
ووقف ضاري يعطيها طرحتها ببتسامه ولبستها ولفتها على طريقة لثام وعلى فمها ومبينه خشمها اللي يلمع فيه زمامها الازرق القديم
وقرب ضاري معاه العود ودهن العود يبخرها ويعطرها ويلبسها العبايه وابتسمت ام ضاري : تسلم يمه تسلم
ضاري : الله الله وش ذا الزين ياخوفي يلخبطون بينك وبين العروس
ضحكت ام ضاري : ياحبك للعياره
ضاري قرب يبوس راسها: والله يا يمه انك في عيوني اجمل الحريم كلهم
ام ضاري : نشوف اذا كلامك بيثبت اذا تزوجت
صد ضاري بنفي وغضب:الله يأخذ نفسي اذا ببدي عليك احد
ام ضاري : بسم لله عليك لكن يايمه القلب اذا حب يحتم مصيرك
ضاري : انتي الحب الاول وبعد يصير خير
ام ضاري : يالله يارب ترزقك باللي تسر قلبك وخاطرك
ضاري : امين
مشى معها يلبسها عبايتها وطلعوا للعرس
_______________________.
بالصالون البسيط
كانت هناك وعد اللي انتهت ووقفت تناظر نفسها من وإلى وضحكت بإستهزاء ! مقهوره على نفسها اللي المفروض تكون مبسوطه وفرحانه لكن قلبها فااااااارغ ما تحس بأي شعور ما تحس انها عروس تحس انها مجنده عشان تحارب أشباه الرجال من عقاب وغيره
ايتسمت اول ماجت ندى وهي تصفر: الللللللله يا وعد الله وش هالزييييييين
ابتسمت وعد : شفتي كيف !
ندى:اموووت على الغرور والكبرياء
ضحكت وعد : يلا يلا شوفي وين ماجد تعبت خلاص
ضحكت ندى: بدررري على التعب بدري
صدت وعد بهدوء وطلعوا لماجد اللي ينتظر وركبوا ولف ماجد مبتسم : لله يحيها عروستنا
ندى: ياليتك تشوووف الزييين ياخالي بس
ضحك ماجد: وعد مزيونه من سنين ما وقفت على الحين
وعد : تسلم ياخالي
ماجد : يلا يادوب نلحق
تحركوا متجهين للبيت وكل مايقرربون تختنق وعد اكثر واول ما وصلت شافت عقاب وخلف وعزوز وسالم وغيث وفيصل وابو خلف ومحمد وابو ناصر كلهم على الباب في قمة كشختهم وهيبتهم ملفتيييين وينعشون الواحد بمنظرهم لكن كانت ودها تمشي من بينهم لين توصل عقاب وتضربه كف يبرد قلبها
في المقابل تركزت عيوون عقاب على السيارة ونزلت وعد بكامل ثباتها وخطواتها وهيبتها اللي تستفز عقاب بها خاطره يشوفها منزله راسها لكن هذا مستحيل
تقدم خلف بكل حب يحاوط كتف وعد مبتسم وابعدوا عزوز وعقاب وطلعوا ودخلوا اخوان وعد ومحارمها
وطلعوا البنات اللي كشخوا واستعدوا يركضون لوعد
وركضت حنان تاخذ عبايتها واغراضها ولفت وعد ببتسامه تناظرهم وقرب خلف بحب : ماشاء الله ماشاء الله الله يحفظك وانا اخوك ويسعدك ويملى حياتك رغد ووسعاده
قرب فيصل يصفر ويصفق : وعييييد الله يسامحك كنتي مخفيه هالزين كله بالهواش
ناظرته وعد بضحك :لا ابشرك بترتاح
قرب فيصل يحضنها بعبره: لا والله ماني مرتاح ولا للبيت طعم بغيابك ياعمود هالبيت
تزعزع ثبات الكل بعد كلام فيصل والكل فرحان لكن حزينين على روحة وعد
تعلق فيها غيث اللي يصيح وسالم وبالقوه ابعدوهم لكن خلف كان ابعدهم كلهم مايبي ينكد عليها ومايبي ينهار
ابو خلف : يلا يا عيال يلا وش ذا
قربت هيا: خلاص لا تخربون مكياجها
وعد اللي ما تحركت فيها دمعه كانت شاده ذراعها بقوه ماتبي تبكي ابداً
اماني : تعالي للغرفة الناس بيوصلون
دخلوا وعد الغرفه عشان تلبس فستانها وتستعد والكل طلع واخيراً بدو الحضور يجتمعون
والرجال يتجهون لزواج الرجال
_______________________.
في زواج الرجال
كان الحضور من جماعة مبارك قليل نوعاً ما لكن عقاب كان واقف معه وخلف واخوانه واقفين بالزواج بعد والحضور كبير وجابر نادر وضاري يساعدون
لكن خلف عيونه كانت على مبارك وده يتفحصه لاخر لحظه مايدري ليه خايف على وعد مايدري ليه قلبه ماهو مرتاح مايدري ليييييه شعور في صدره موجعه حييل كان مستغرب العلاقه القويه بين عقاب ومبارك لكن توقعها علاقة عمل
ما طول تفكيره فالموضوع لان بدا دخان النار والبرد والبخور والعود والعطورات اللي بالجو تكتم انفاسه وزود على ضيقة صدره وعبرته اللي خانقته عجز يتحمل
وطلع من الزواج يبي يرجع ياخذ دواه ويبي يشوف وعد يحس وده يحضنها ماهو مستوعب انها بتروح وتخليهم ومايدري وش مصير هالزواج
ركض وراه نادر وضاري : خلف خلف وين رايح ؟
خلف : بروح اخذ ادويتي واجي
نادر : اروح معك
خلف : لا لا بروح بسرعه وارجع
نادر: زييين
طلع خلف مستعجل لبيت قبل يطيح
_______________________.
وفي زواج الحريم
كل البنات كانوا مجتمعين ومبسوطين وكان الحفل في الحوش تحت والكل مبسوط
لكن فالسطح كانوا كل البنات مجتمعين ينتظرون وعد تجهز عشان يدخلون يسلمون عليها
كانت شوق وليلى وسحر ينتظرون فالسطح والباقين مع وعد واغلبهم تحت بالضيافه .
كانت ليلى تراقب سحر بذهول ماهي مصدقه شلون ترفض خلف !؟ وكان ودها تسألها لكن سكتت وهي تسمع سحر تقول : بنزل اساعدهم
شوق : بنزل اجيب لنا شي نشربه عن البرد
ليلى: زين
جلست ليلى تنتظر وهي تمشي بالسطح ببتسامه لكن فزت على الباب اللي بالنص لللي انفتح
وكان خلف اللي جاء من بيت جده عشان يدخل من فوق وينادي البنات لان تحت مايسمعون لكن تجمد يناظر ليلى وابتسم اول ماشهقت ليلى بخوف: انت شنو تسوي هنييييه!؟ ضحك خلف : حتى في بيتنا بتسألين هالسؤال !
اختبصت ليلى: شنو يعني بيتكم!؟ ماتعرف ان فيه زواج وفي حريم
خلف تكتف ببتسامه وهو يدقق فيها : ايه اعرف لكن اعرف ان محد يجي السطح الا اهل البيت
تفشلت ليلى منه ومن نظراته ولفت تدور اي شي حولها وسحبت الثوب اللي على الحبل تحطه حاجز بينها وبينه عشان مايشوفها وقالت بسرعه : شنو عرفني انك بتدرعم ! وان لازم محد يكون هنيه الا اهل البيت
ابتسم خلف بدقه خفيفه : لا ماعليك انتي تعتبرين من اهل البيت
تصلبت ليلى لكن ابتسمت اول مادق قلبها بفرح وحب وسكتت لكن لف خلف ببتسامه: روحي نادي وحده من خواتي قولي لهم خلف تعبان يبي دواه
لفت ليلى برعب : تعبان!؟ ضحك خلف : ايه اذا ودك جيبيه انتي ، اظنك تعرفين وينه
تفشلت ليلى وطلع بسرعه من السطح وتركته لكن خلف ابتسم وهو يمسح صدره بألم : ااااه ياربي وش ذا اللي اشوفه واعيشه
نزلت ليلى تركض وقابلتها حنان: وش فيك!
ليلى: فيه صوت رجال ينادي فوق
حنان: غريبه مين ؟
طلعت بسرعه وشافت خلف : خلف وش فيك !
خاب ظن خلف اللي توقع ليلى تجيبه : ابي دواي
حنان: يوووه الحييين اجيبه دقيقه
وطلعت تركض وجابته ورجعت وطلع خلف ونسى انه بيسلم على وعد ونسى كل شي وبعيونه ليلى ااااه يا ليلى كل ما يتذكرها يطير بين الغيوم
_______________________.
ومشى الزواج زي ما الكل يحب والكل مبسوط ومستانسين واخيراً جت نهاية الليله بالنسبه لوعد اللي طلعت لها امها وعمتها ام خلف والكل يجهزها استعداد لجيت مبارك اللي سمعون زفة الرجال فالحاره
غمضت وعد ووقفت وقلبها يرقع من التوتر وسمعت صوت ابوها يقول : حياك الله يا مبارك ادخل
وسمعت صوت خطواتهم جايه وصوت رجال غريب صوت مبحوح بشكل مرعب يقول : سلام عليكم
ماقدرت ترد لكن حست بأمان اول ما ألتفو حولها ابوها واخوانها وجدها وعمها محمد وماجد
بدول يسلمون عليها ويدعون لها ويودعونها ويحصرون على مبارك ويوصونه عليها وكانت كل ما تسمعهم يعيدون على مبارك(وعد امانه الله ثم امانتك) تحس بغصه لكن كان خلف لهجته شديده وهو يحرص على مبارك لو ضيق صدرها بيصير شي ماحصل
مبارك: لا تخافون أمانتكم بالحفظ والصون
ابو ناصر: الله يوفقكم ويستر عليكم ويوفقكم
الكل :امين
التفت مبارك لابو خلف : حنا نستاذن ياعم طالعين
مسكت وعد يد خلف بكل قوتها ولف خلف عليها بخوف وهو يحضنها وهمس : فيك شي!؟ هزت وعد راسها بضيق : لا
خلف : لا تخافين انا معك واذا هالمبارك سوا اي شي يزعلك اتصلي علي وانا اجي ادفنه
وعد: ادري لكن كل ما اتذكر اني بروح عنكم انخنق
خلف : هاذي سنة الحياة ياحبيبتي وبتجين لنا ان شاء الله
وعد بهمس: طيب بسلم على امي وخواتي
خلف : ابشري
لف على مبارك بحده: مبارك لاهنت انتظر شوي برا
لف مبارك على خلف وهو ماهو بالع خلف اللي يحسه بياكله :ابشر
طلع وطلعوا كل الرجال ودخلوا البنات وام وعد ام خلف وام ناصر وتعبت الغرفه بكي واحضان وانهيااارات كبييره
لكن صار وقت ان وعد تطلع وودعتهم بقلب باكي وطلعت وهي ماكانت تمنى تشوف عقاب واقف بكل هيبه قريب السياره ومبتسم
لكن كيف يفوت عقاب هالفرصه كيف يفوت لقطة الختام كيف رفع صوته لعانه وقال: بالرفاهه والبنين يا ياعرسان
ورفع رشاشه يرمي بالهوى ولفت وعد تناظره بقهر وركبت سيارة مبارك وهي ماهي حاسه بيدين خلف اللي تساعدها كانت عيونها على عقاب وهي تحلف لتندمه
تسكر الباب وتحرك مبارك وعقاب يرمي وراهم والباقين واقفين
_______________________.
وعند الحريم
رجعوا لزواج والبنات واضح البكى في عيونهم ووقفت مضاوي تصب القهوه بعد العشاء لكن وقفت عن الباب اول ماسمعت خلف ينادي : هلا !
خلف : نادي ام ضاري بيسرون
مضاوي :طيب
رجعت تدورها وهي ماتشوفها زين من دموعها لكن عرفتها وراحت لها وجلست قدامها: خالتي ام ضاري !؟ ام ضاري:سمي يا امي
ابتسمت مضاوي : ولدك يبيك عند الباب
ابتسمت ام ضاري وهي تمسح على مضاوي بحب :زين
ساعدتها مضاوي توقف ولفت ام ضاري عليها بحب وهي تمسح وجهها : لا يضيق صدرك يابنيتي افرحي لاخيتك وادعي لها بالتوفيق
ابتسمت مضاوي وهي تبوس راسها: ابشري
ساعدتها تطلع وهي تبتسم لهالعجوز اللي كلها رضا وسماحه
_______________________.
وانتهى الزواج
والكل صار قدام الباب عشان ياخذون اهلهم وبدا يفضى البيت لكن اخر الناس كانوا بيت النوخذه ينتظرون جابر يجي وطلعت اماني وهي شايله صحن في رز لاحد بيوت الجيران وتنادي : سالم ، غييييييث وجع وييينكم
جاء سالم يركض :اماني وش مطلعك .
اماني: جدتي تقول وده لبيت ام محيميد لايبرد بسرعه
مسكه سالم وطالح الصحن وشهقت اماني : الله لا يعطي العدو عافيه
ونست نفسها ورفعت غطاها: ياخبببببل
سالم شهق : غطي وجهك الرجال حولنا
لفت اماني بخوف وهي تسحب غطاها: كله منك يا ثور جمعه كله وتعال قول لجدتي انك كبيته
دخلت بخوف لا يكون احد شافها بس ماشافت جابر اللي واقف بطرف كان يبي سالم ينادي اهله لكن تفاجئ باللي صار وصد
وجاء خلف : جابر وش فيك!؟
جابر: ناد لي الاهل لا هنت
خلف ابتسم : زين
دخل خلف وهو يدق الباب الداخلي وينادي : ياااولد بيت النوخذه يطلعون لجابر
فزت ليلى على صوته وابتسمت : يمه يلا
ام نهيان وقفت وهي تغطي وجهها: يلا ياجماعه الله يوفق وعد ويكتب لها الخير
الكل : امييين
ام ناصر : لا تقطعين يا ام نهيان
ام نهيان:ان شاء الله
لفت ليلى ببتسامه: مع السلامه بنات ولا تزعلون على وعد بالعكس استانسوا لها واحمدوا ربكم انتم واجد انا وحده بس وراحت اختي والحمدلله ما زعلت
ضحكت هيا: ماعليك إحنا خواتك بعد
ضحكت ليلى: ياحلاتكم
طلعت مع امها وهي صارت تحب البيت واهل البيت شافت خلف جالس مع سالم يجمعون الرز وواضح على ملامحه الغضب لكن اول ماسمع صوت الباب لف ببتسامه وصد بسرعه وهو يسمع صوت خلخال ليلى اول ما مرت وقال: كمل نظفه وناد غيث معك
سالم: زين
طلعوا اهل النوخذه وهم كلهم تاركين في بيت ابو خلف مواقف مذهله لكن خلت بقلوبهم رجفه
_______________________.
وفي بيت نادر
اللي وصلوا وجلس نادر يسمع لشوق تشرح له الزواج واللي صار ولف على صوت الباب
شوق : من بيجي هالوقت!؟ نادر: يمكن العيال انتظري
طلع وفتح الباب لكن شاف ابوه وامه واقفين فرح نادر لكن جانب من قلبه اظلم اول ما تذكر ان ممكن يتسببون لشوق بظلم
ودخل ابو نادر: ما تبي تسلم!؟ تحرك نادر: العذر والسموحه تفاجأت
ام نادر: لايكون ماتبي جيتنا
نادر: وش ذا الحكي يمه الله يهديك
ام نادر: حمدلله اجل .
