.
الكاتبه والمبدعه / أديم الراشد .
.
_______________________.
ومن بكره
في بيت ابو نادر صحى نادر على دق الباب ولف وشاف شوق في نومها اللي تعود عليه من فتره
اعتدل وهو يبعد الكتب اللي نام وهو يقراها ووقف يفتح الباب وشاف امه واقفه ببتسامه : نايمين يمه !؟
نادر: اي خذتنا النومه
ام نادر: زين يمه يلا اصحوا ترا الفطور جاهز وننتظركم
نادر: ابشري
راحت وسكر الباب وهو للحين ماهو مصدق ان امه تغيرت اتجهه لشوق يصحيها وصحت وهي تسحب نفسها سحب كان وقع الوحم ماهو سهل عليها
طلعوا للفطور واستقبلتهم ام نادر بالترحيب وقال ابو نادر: تعالي يا شوق جنبي تعالي
كانت شوق فيها تردد وخوف من معاملتهم الطيبه وجلست جنبه وهي تشوفه يقرب لها كل شي
ام نادر: ايه كلي لازم تنتبهين على نفسك وصحتك انتي تاكلين عن روحين
شوق : ابشري
نادر: لا بسم لله عليها شوق اكلها حلو لكن مشكلتها بهالنوم
ام نادر: ايه ماعليه كل الحريم يكثر نومهم بالوحم
شوق : والله غصب تنام عيني ما احس
ضحك نادر: عساه نووم عافيه
ابو نادر: ماعليه كله يهون اذا جاء حفيدي ونور الدنيا
ام نادر: اي والله
نادر : على خير يارب
كان نادر فرحان انهم يدارون شوق ومعاد يخاف عليها استأذن وطلع بيروح لدوامه وودع شوق اللي لازم تكلفه بطلبات كثيره اشتهتها فجأه
_______________________.
وفي بيت ابو خلف
صحى خلف على صوت فيصل يناديه بتكرار: خلف خلف خلف خليف خلف
غمض بغضب وهو يصرخ: وجع وش فيك
فيصل: يقول ابوي قم عشان تلحق الدكان وتلحق تخلص شغلك
خلف: سمعت خلاص روح
صحى خلف وهو يسحب نفسه اليوم حيله مهدود ما قدر ينام امس وهو شايل هم وعد ووتدخل احلامه بليلى بهمومه ويبتسم
بدل ونزل وهو واضح عليه التعب
ام خلف : تعال يا خليف افطر
خلف : مالي نفس يمه بطلع مستعجل
ام وعد : وش فيك ! تعبان
خلف : لا لا بس مانمت زين
حنان: طيب ارجع نام
خلف : ليتها بيدي المهم عطيني بس كوب شاهي يصحصحني
ام خلف : انتبه لنفسك يا حبيبي
خلف: ابشري
طلع واتجهه لسوق وفتح الدكان كالعاده وطلع طاولته وجلس برا يحاول يشتغل بس ابد مافيه حيل
ارتخى بجسمع على الكرسي وهو يمسح عيونه وقرر يروح للبقاله يمكن يشرب شي يصحصح
دخل وهو يقول : صبحك بالخير يا ممدوح
ممدوح : صباح النور والسرور
خلف : تكفى جب لي شي ينفضني ويصحصحني
ممدوح: ابشر .
التفت خلف لكن فز من مكانه ووقف اول ماشاف الزول والشخص اللي سلب عقله وتفكيره ونساه طعم الراحه من سنه شاف ليلى اللي يتشفق على شوفتها كل يوم اللي ياما دعاء انه يشوفها صح كانت متغطيه مايبان منها شي لكن يكفي يشوفها من بعيد اخذ نفس يرد الهوى لصدره كان يجاهد نفسه لا يركض ويلحقها التفت للممدوح اللي يعطيه علبة عصير اخذها يناظرها للحظه وهو ماعاد يحتاجها ليلى طيرت قلبه من صدره ماهو بس النوم والتعب
اخذ العلبه وطلع يمشي لدكانهم و جلس وهو عيونه تتبع ليلى وين ما راحت ماكان قادر يهدى وليلى حوله وحواليه
حط راسه على الطاوله بتعب وهو يغمض بقوه وتنهد بقلة حيله وهو يقول : ياربي متى ينقضي هالشهر
فز على صوت نادر اللي قال : هانت ياخلف
رفع راسه يناظر نادر اللي سحب الكرسي وجلس قدام خلف وقال : تدري من متى وإحنا نعرف بعض!؟ من متى وحنا اصحاب !؟ مارد خلف وهو ينتظر يكمل وقال نادر بعتاب :من اكثر من ٢٠ سنه واحنا نجتمع بسراء والضراء ! ولا عمرنا خبينا على بعض وكنت ادري وحافظك ياخلف مثل كفي وادري ان فيه شي بينك وبين النوخذه وتأكدت من فتره انك تحب بنت النوخذه ومو بس تحبها الا غرقان ومنتهي انا ادري لك الحق تسكت وما تقول لاحد بس حنا اصحاب يا خلف
تقطع قلب خلف وتمنى انه ما انحط في هالموقف والتفت وهو يقول : ابد والله ماقصدت اخفي عليك لكن الوضع ماهو زي ما انت فاهم
نادر: اجل وشو!؟ احتار خلف وواضح ان قصته عمرها ما بتكون سر كان مضطر يشرحها وقال بهدوء : انا كنت شايل هم عقاب وانا ادري انك مستحيل تخبي عنه شي واذا قلت يمكن يوصل الخبر لعقاب وتعرف عقاب جني بيربط الموضوع بأخته ويعتبرني تركت اخته عشان بنت النوخذه
نادر : وليه هاذي ماهي الحقيقه ؟!
خلف :اكيد لا صح كنا مسميين لبعض لكن محد منا يبي الثاني وبعد ماحلينا هالمشكله صادفت بنت النوخذه صدفه وتعلق قلبي فيها من بعيد
نادر: قبل يطلق جابر اختك !؟
خلف : قبل كل شي لكن صار اللي صار وحصل الطلاق اللي ماكان برضا جابر وهذا هي الامور تعدلت
نادر: وش يخليك واثق ان جابر ماكان راضي بالطلاق !؟ يمكن راضي لكن بعد ما صار له فالحرب شاف ان مستحيل احد يزوجه وقرر يرجع
ضحك خلف:لا يا نادر لا تظلمه عرفت بكل شي قبل تصير الحرب وقبل يصير في جابر هاللي صار وانا لو ماني واثق فيه ما زوجه اختي
نادر : ما ادري وش اقول لكن الله يوفقك وتراه واضح عليك ياخلف
ابتسم خلف : بالحيل!؟ نادر: وضوح الشمس وانت ياخلف يليق لك الحب قلبك رقيق وروحك صافيه
ضحك خلف وهو يمسح جبينه : خلنا مني قلي انت وش صار معك
نادر: ابد انا اعيش في مرحلة صدمه
خلف : لييييه !؟ نادر : من بعد خبر حمل شوق وامي وابوي متغيرين ١٨٠ درجة ما تصدق لو اقولك انهم شايلين شوق من الازض شيل بس امري وتدللي وابشري امي تداري شوق مدارة وابوي مستعد يصف لها كل شي تبيه في ثواني قدامها تخيل انهم يهاوشوني اذا نسيت شي تبيه بالغلط
ضحك خلف : حمدلله وش تبي احسن من كذا
لفوا على صوت ضاري اللي جاي من بعيد وهو يضحك ويسلم على اهل السوق واحد واحد
واول مادخل قال: صبحهم وربحهم
خلف ونادر: صباح النور
نادر بمزح: سؤال بس! انت ما تتعب من الضحك؟!
ضربه ضاري بضحك: اذكر الله وش يضرك بضحكي
نادر: ابد سمع ضحكتك عن سبعين متر
ضاري : اذكر الله بعد ماورانا شي
نادر : اي والله وانت الصادق
ضاري : وين عقاب ولا معرس يعني وشايف نفسه
خلف : القط مايحب الا خناقه
نادر : صدقت والله
ضاري : اقولكم وش رايكم تغدون عندي!؟؟
خلف: لا والله بقفل الدكان واروح لبيتي وراي شغل ماقضيت للحين
نادر: نروح معك ونشوف البيت ونتغدا هناك
خلف: اي والله
ضاري : تم
خلف : يلا اجل قوموا
اتجهوا لبيت خلف اللي يجهزه
_______________________.
وفي بيت عقاب
اللي من يوم صحى وهو ساكت وجات وجد وهي تنزل الفطور : يلا سم بالله ومد يدك
التفت عقاب لغرفة وعد: ناديها للفطور
وجد : لا والله اناديها ولا اروح لها ! اخر عمري اناديها
عقاب : تحلفين علي ياوجد
وجد : محشوم بس مقدر انا مقدر
في عز هواشهم لفوا على صوت باب غرفة وعد اللي طلعت وفي يدها صحن فيه فطورها اللي صحت من بدري وجهزته وجهزت وطلعت ومرت تناظرهم بظرف عين ودخلت وجمدت عين وجد عليها وهي تشوفها بكامل كشختها مافيها شي يتعذرب
نشف ريق عقاب اللي اخذ المويه يشربها بهدوء وناظرته وجد وشافته هادي
وطلعت وعد بعد ما نظفت اغراضها والتفت اول ماقالت وجد بصراخ : انتي هي ما تشوفين احد قدامك!ماتعرفين تردين السلام وتقولين كلمه حلوه
لفت وعد وابتسمت وقالت بصوت هادي : لا لا لا وجد للله يهديك وش هالصوت!؟ هذا ماهو صوت الاوادم عامه والانثى خاصه ! وطي صوتك شوي فيه طفل نايم
والعبره يا.... وجد ماهي بالكلمه الحلوه بالعكس فالحضور الحلو وبس وماله داعي يطق فيك عرق من صراخك
رمت عليهم هالكلام وراحت بهدوئها وكبريائها وتركت وجد بتموت وناظر عقاب بوجد وقال: ياما علمتك ما تطيعين لكن تستاهلين .
وجد: شمتان فيني ياعقاب .
عقاب : قلت لك مالك شغل فيها وما تطيعين
قامت وجد وراحت بغضب وصد عقاب وهو يمسح وجهه كان وده يروح وياخذ خليفه بس يدري ماهي معطيته اياه لو يموت
دق الباب وطلع يفتحه وشاف ام ناصر وام وعد ام خلف جايين ومعهم فطورهم : هلا هلا هلا
ام ناصر: ازعجناك يالمعرس
ضحك عقاب : ابد والله منور بيت المعرس اقلطوا حياكم
دخلهم وهو يقول : استريحوا استريحوا
ام وعد : وينها وعد ياعقاب
عقاب : بناديها الحين
راح لوعد وفتح الباب كعادته ودرعم ووقف وهو يشوفها جالسه تبدل لخليفه اللي كان صوت سوالفه بالغرفه كلها ووعد تغني له وتسولف معه قرب وهو يناظر خليفه اللي بدون ملابس مجرد الحفاضه جذبه منظره لكن انتفض من شعوره على صوت وعد : نعم وش فيك جاي ؟! عقاب : جدي وامك وعمتك برا يبونك وعجلي اطلعي واقصري لسانك احسن لك
طنشت وعد وهي تلبس خليفه وعقاب للحين وراها يناظر خليفه لكن انسحب بهدوء وراح ينادي وجد: سوي قهوه
وجد : لمن!؟ عقاب : جدتي وحريم عمي فيه
وجد: غريبه وش جابهم
عقاب : جايين لوعد
وجد : الله اكبر جو لوعد وانا من شهور هنا محد جاني
عقاب : وجد فكيني من المشاكل وخلصيني يلا
رجع للمجلس ونزلت وجد وهي تدعي عليهم كلهم
وطلعت وجد وخليفه ودخلت المجلس واستقبلها ترحيب جدتها وامها وام خلف
وهنا استغل عقاب الفرصه ووقف وهو ياخذ خليفه من وعد اللي ماقدرت ترفض ابد قدامهم واعطته وهي ضايقه
واخذه عقاب اخيراً وحضنه وهو متشفق عليه من مده
الكل انتبه لعقاب اللي طول حضنه لخليفه
وجلست وعد معها امها وام ناصر وام خلف وهي عينها على خليفه
ام وعد :اليوم البيت كلهم ضايقه صدورهم من دون خليفه
ام خلف : حتى خلف طلع ما فطر بالعاده يحوم ويدور على خليفه
ضحكت وعد : والله حتى احنا ما تعودنا على بعدهم للحين جات وجد معها القهوه وردت السلام وجلست وهي تصب لهم القهوه ماعدا وعد
ام ناصر: وش بلاك ما تصبين لوعد
ردت وعد قبل ترد وجد : ما اشربها الصبح ياجدتي ولا نسيتي
ام ناصر: اشوى ازين لك والله
ناظر عقاب في وجد بهدوء وصد وهو يلعب مع خليفه يستغل وجودهم
وطولت السوالف وعقاب ماهو معهم لكن وقفت وعد وهي تتجه له : عطني اياه هاذي حزة نومه من الصبح صاحي
ناظرها عقاب بهدوء وعطاها اياه واخذته وعد وطلعت وهي ما تحمل عقاب يمسك ولدها
ولفت ام ناصر وقالت: عقاب
عقاب : سمي
ام ناصر: اسمعني زين انا عمري ما تدخلت بحياتك لكن الحين بقولك شي وهاللي جالسين شهود علي .
عقاب : خير ياجده .
ام ناصر: ترا وعد غاليةٍ عندي بالحيل ولا ارضى احد يزعلها وان دريت انك زعلتها ولا زعلتها مرتك هاللي حتى القهوه ما تصبها لها والله والله مايصير خير وهي ماجت تدور انت اللي خطبت وتزوجت
ام وعد : ماقصرت خالتي لكن انتبه وعد ياعقاب
صد عقاب بضيق وقال: قلت لكم وعد بنت عمي وفي عيوني ولا بيضيق صدرها ابد
ام خلف : هذا العشم فيك ياعقاب
ام ناصر: اي والله والله يرزقك الذريه الصالحه يارب
عقاب : امين
ام وعد : يلا حنا نستاذن
عقاب :تغدوا عندنا
ام وعد :دايمه وانا خالتك
طلعوا وتركوا عقاب محتار كيف بتصرف ما توقع الوضع بهالصعوبه ابداً كان لازم يجلس ويعرف كيف يتصرف زين
_______________________.
وفي السوق
ليلى هي بعد شافت خلف كانت بتطير من الفرح وهي تدور مع امها وتقضي وبيدها اكياس وودها تركض بها لخلف وتوريه وش جهزت له وش كثر تنتظر اليوم اللي يجمعهم ابتسمت وهي تشوف يدور وبعدها جو نادر وضاري وطلع معهم بعد فتره
وهم راجعين كانت تسمع اهل السوق وهم يوصفون لأي احد واول مايذكرون يقولون( مند عند بيت خلف اللي شراه ، او خل بيت خلف على يمينك! ولا تدل بيت خلف تراه قريب منه )
بعيد ان اي شي يوصفونه ماهو مهم كثر ما اسم البيت يعنيها بيت خلف يعني بيتها هذا البيت اللي بيلمهم وكان على طريقهم ومرت وهي تسمع امها تقول : هذا هو بيت خلف يعني بيتچ يمه
ضحكت ليلى بفرح: اشوفه يمه
ام نهيان: عساه الله يوفقچ ويكتب الخير في طريقچ
ليلى: اميييين
اخذت نفس ولفت وشافتهم جالسين بحوش البيت بس هالمره ما انتبه لها خلف اللي متكتف وهو يفرج العيال على البيت
ولعلها رحمه من ربي انه ماشافها لو شافها مستحيل يقدر يصبر وبيركض ويشوفها _______________________.
وفي بيت ابو خلف
كانوا البنات يرتبون مع اماني اغراضها اللي خلصت ولفت ندى: اقول اماني على قولة مضاوي كيف بتصرفين مع هالچويتي
اماني: كيف بتصرف يعني!؟ ندى: مدري بس اطباعهم غير وكلامهم غير وكل شي غير
حنان: ما ظنتي صعب
اماني : اممم مدري لكن ادعي ربي الخيره
ضحكت ندى وهي تقلد ام نهيان اول ماشافوها بعرس هيا ( والله يا اخيتي ام وعد ان هالطلاق ما بغيناه وان جابر خنت حيلي انهد حيله وهو يحاول يحل المشكله عشان يرد يخطب اماني يقول تعلق نصيبي في اماني وابد مايقدر يتزوج غيرها)
ضحكت حنان:اظن انه يحبك
اماني: خير يحبني وين!؟ ماشافني ولا شفته .
ندى: عادي الاذن تعشق قبل العين احياناً يمكن ليلى مسولفه له شي .
حنان: يمكن .
اماني : جايز لكن خلوني وتخيلوا معي ليلى مع خلف .
ندى: قضينا منهم حلوين وتزوجوا بعض وش تتوقعين يعني
حنان: بموت ويجي هاليوم واشوف خلف كيف يكون مع زوجته احس ماني مستوعبه
ندى : بيكون آيه فالحب والعشق واقص يدي
امانيي : اكيد خصوصاً ان خليف قلبه رهيف وحنين مع الناس كلها كيف عاد مع زوجته وخصوصاً اذا زوجته ليلى ابصم بالعشره انه بينصهر من الحب
ضحكت حنان : سبحان الله ماكانت اتوقع ان خلف بيتزوج احد غير سحر
ندى: يكتب الله النصيب هذا هي سحر تجهز لخالك واخوك يجهز لبنت النوخذه
اماني : وانتي الصادقه
رمت ندى اللي بيدها ووقفت: بروح اسوي قهوه خلاص بموت من التعب
اماني : اي والله يلا قوموا
_______________________.
وعند عقاب
قرر يطلع من البيت ويفتك من ازعاج وجد اخذ شماغه ولف : انا طالع اذا تبين شي اكتبي
وجد : مابي شي
طلع وتركها واتجهه للباب لكن رجع لغرفة وعد ودخل كعادته ولا لفت وعد ولا ناظرته
عقاب : انا طالع اذا خليفه محتاج شي اكتبيه في ورقه
وعد : ولدي اذا احتاج شي عنده خواله يلبون له اللي يبي عنده جده وعنده فلوس ابووه ماهو محتاجك انت وفلوسك
عقاب : لااااا الظاهر اني سكت لين صرتي ماعاد يفرق معك شي
ضحكت وعد بإستهزاء : والله !؟ وش بتسوي يعني !؟ ولا تدري انا اقولك وش بتسوي حركاتك معروفه بتوزى كالعاده وتدس سمك
اتجهه لها عقاب بغضب وهو يصرخ: وععععد اقصري شرك يا وعد وانتي تدرين اذا نفذ صبري وش بسوي فيك
وعد : لو تموت ما تقدر تسوي فيني شي
سحبها عقاب بكل قوته وهو يلوي ذراعها : لاااا عاد انتي الظاهر ماعرفتيني زين يا وعد
حاولت وعد تسحب يدها لكن ثبتها عقاب وهو يصرخ بكل صوته:وش تحسبيني !؟ لعبه في يديك لا يا هانم مب انا اللي تطولين لسانك عليه
وعد : اذا كنت رجال قل لابوي واخواني ما مديت يدي عليها
عقاب : تحسبين ان بتهديدك وعقليتك البزر ذي بتوقفين بوجهي احلمي وانا اذا بغيت اربيك اعرف كيف اربيك بدون ما امد يدي ولا ابوك ولا اخوانك ولا العالم كله بيقول لي ليه يا عقاب
فهمت وعد وسحبت يدها بقوه وهي ترفع يدها بوجهه تهدده: تخسي ويخسي مليون واحد من اشكالك انك تلمسني والله لو اذبحك بيدي ما تلمسني يا نجس.
عقاب : لو بغيت صدقيني لا انتي ولا اكبر راس يردني لكن مثلك ما هم من مستواي .
ضحكت وعد بإستهزاء : ايه لان مستواك وجد واشكالها .
جنت وعد على نفسها بلسانها وايقنت بهالشي اول ما تبدل وجهه عقاب الاحمر وغمره السواد واتسعت عيونه الحمراء واتجهه لها بغضب وهو مايشوف من عصبيته .
حط يده على كتوفها وهو يهزها بصراخه اللي يسمع كل اللي حوله : طفح الكيييييييل يا وعد جنيتي على نفسك يا وعد رماها بكل قوته على السرير واستوى وهو يثبت يدينها تحت رجوله وطاح قلب وعد وهي تحاول تفك منه بس للحظه صار بثقل الجبل ماقدرت تبعده ابد
وفي عز هالصراعات انفتح الباب والتفت عقاب بحده وشاف وجد اللي واقفه وشهقت وهي تناظره وعيونه طايره وصرخ عليها: انتي وش جاااااايبك هنا
فز وجد وهي تناظره مصدومه جت على صوت صراخه وكانت متوقعه انه في اسوء الظروف على الاقل سنه مايفكر عقاب يقرب لوعد ماكانت متوقعه ان الموضوع سريع لهدرجه ولا توقعت تشوف عقاب في هالمنظر
اعتلى صوت بكى خلليفه اللي صحى على الصراخ
وابعد عقاب وفزت وعد وهي تركض لسرير خليفه ماصدقت بالخلاّص من عقاب
واتجهه عقاب لوجد وهو يسحبها بغضب وطلعها من الغرفه : انتي بتجننيني وش جايبك هنا ماقلت مالك شغل بهالغرفه واللي فيها
وجد ماقدرت تكلم ودموعها في عيونها لكن قالت بعد فتره : بس انت قلت انك متزوجها عشان ولدها
عقاب : مالك شغل ولا بتحكميني يا وجد وش اسوي وش ما اسوي واقسم بجلال الله لو ينعاد هاللي تقولينه وتسوينه لدفنك بأرضك
دفها وطلع من البيت بغضب يفور من القهر ماكان له نيه يتهجم على وعد ابد بس قهرته ورفعت ضغطه
اما وعد اللي ضمت خليفه برعب وهي تحلف تندم عقاب على هاللي سواه
_______________________.
وفي بيت خلف
للحين موجودين الشباب وسوالف وشاهي وجوهم عليل
لين دخل عقاب اللي دخل بشره
ضاري : سلام قولٍ من رب رحيم
عقاب : ضاري أبلع لسانك احسن لك
نادر: خييير وش بلاك
خلف خاف ان وعد في القصه ووقف : اذكر الله وش فيك
عقاب ناظر خلف لمده ولف : مافيني شي لكن تناشبت مع واحد اهبل
ضاري : ايييه قلي متلقف على الناس
اتجهه له عقاب بغضب بس وقفه خلف: اقعد يا ابن الحلال وش بلاه دمك فاير دايم واذا يعني خلاص روق واقعد
جلس عقاب وقال نادر: وانا ضروري ترد على كل واحد طنش ياخي
عقاب : اااخ بس لو مسكته وفرمته ما تحسفت
ضاري : انا والله ادري انك متحسف انه رفع ضغطك وماكفخته تدور الشر
عقاب: شف لو قمت رثعت بك هنا بتعرف وشهو الشر
ضحك خلف : والله ان شر البلية ما يضحك صدق
نادر: اقول زواج ماجد متى
عقاب: بعد اسبوعين
ضاري :عطونا فرصه نتنفس درعمتوا زواجات كلكم . ضحك خلف : صارت عاد .
لفوا على الصوت اللي عند الباب: قوه خلف
فز خلف متجهه لجابر اللي واقف معه عصاه يستند عليها : يا هلا حياك الله ياجابر اقلط ابتسم جابر: لا لا مستعجل مريت وشفتك قلت اسلم خلف : لا والله الا تدخل وتجلس وش وراك يارجال جابر كان محرج من الموجودين لكن اصر عليه خلف ودخله ووقفوا يسلمون عليه لكن عقاب واضح كارهه ضاري : هاه ياجابر وشلونك !؟ عساك زهبت للعرس ابتسم جابر: والله احاول نادر: ماعليه يا رجال تلقائياً تتعود خلف : وهو صادق ، قم اوريك البيت
لف جابر وهو مبتسم : ايييه بشوفه عدل لانه بخيس عندكم بعدين خلف : اعز واغلى من يخيس
وقف خلف يدور فيه ويوريه وجابر مبتسم وفرحان لليلى انها بتاخذ واحد مثل خلف وبعدها رجعوا وكملوا جلستهم للمغرب وبعدها افترقوا
_______________________.
وفي الليل
في بيت ام ضاري رجع ضاري وشاف البيت هادي والكل نايم استغرب وهو يناظر ساعته كان توه الوقت بدري الساعه٩ ودخل لأمه وشافها منسدحه وتسبح ضاري : يمه ام ضاري : هاه يمه شفيك ضاري : ابد ما لقيتكم استغربت صاير شي ام ضاري : لا يمه بس بننام بدري ضاري : اكيد! وجهك ماهو بخير ترددت ام ضاري : والله مدري وش اقولك ضاري بخوف : يمه وش صار لا تخوفيني ام ضاري : مضاوي
ضاري: وش فيها ! ام ضاري : اليووم رقت السطح وهي نازله طاحت من الدرج ضاري : وشو!؟؟
ام ضاري : وهي قامت لكن ماهي طيبه مدري وش فيها قلت لها بكلمك تجي ورفضت تقول انها بخير بس انا ما اشوفها بخير وراحت تقول بتنام
انقطع نفس ضاري وفز واتجهه لغرفته وفتح الباب وشافها نايمه واتجهه لها وجلس قدامها بخوف : مضاوي مضاوي فتحتت عيونها مضاوي بشويش: نعم ضاري : قومي اجلسي وش فيك !؟ يوجعك شي وش صار معك ناظرته مضاوي : لا مافيني شي ضاري : شلون طحتي ليه ماقلتي لي! قومي اوديك المستشفى مضاوي : لا انا بخير وعادي طحت مافيه شي ضاري : لا ياشيخه ناظري وجهك مصفر ولسانك ثقيل قومي مضاوي : مابي اروح مكان وانت مصحيني من النوم تبي لساني يتعدل مافيني شي
استغرب ضاري وحاول انها تروح بس رفضت ووقف وراح لامه: يمه هي صار لها شي بعد ما طاحت
ام ضاري : لاهي قامت ورتبت ونظفت بس احسها ماهي طيبه وهي تقول بخير ضاري: مدري تقول مافيها شي
ام ضاري : لو فيها شي بتقول رجع لغرفته وبدل وجلس جنبها لكن مستغرب نومها العجيب قرب وبدا يتحسس راسها يبي يشوف فيه اثر ضربه بس عادي
اعتدل لكن للحظه غفى وفجأه فتح عيونه وارتعب من المنظر اللي قدامه وقف مرعوب يناظر مضاوي اللي طايحه قدامه وغرقانه بدمها قبل لا يسوي اي شي صرخ بكل صوته: يممممممه
مايدري ليه يستنجد في امه رغم انه كبر ويقدر يواجهه كل شي بس للحين يناديها كل ما خاف وضاقت الدنيا عليه
وفي ثواني جت ام ضاري تركض بدون عكازها اللي تعودت تمشي عليه تركض ما تحس بنفسها من خوفها على ضاري ومضاوي
دخلت بخوف: ضاري وش فيك
ضاري : مضاوي يمه مضاوي
لفت ام ضاري وانفجعت وركضت وهي ترفع مضاوي وصرخت: شغل سيارتك بنوديها المستشفى بسرعه
ضاري : وش فيها يمه؟
ام ضاري: مدري مدري عطني عباتها وهالبطانيه بسرعه
ركض ضاري يساعد امه ولفوا مضاوي ببالبطانيه وشالوها وضاري مايدري كيف بيمسك الديركسسون يده ترجف وهو ينادي مضاوي ماترد
_______________________.
وفي بيت عقاب
رجع بعد فتره طويله ودخل واتجهه لغرفته لكن وقفه صوت خليفه وراح للغرفه وطول ينتظره يسكت بس مافيه فايده اتجه للغرفه ودخل بشويش وشاف وعد نايمه وخليفه يتحرك بعصبيه ويبكي كانت وعد مهلوكه طول الوقت تسكته وسكته ونامت وماحست فيه من التعب اول ما صحى
استغرب عقاب لكن تقدم وهو يشيله بهدوء ولا طول وهو يهزه الا سكت لكن واضح جوعان شاف وعد مجهزه له رضعته واخذها وهو يدور فيه بهدوء كان مستمتع بشكل مو طبيعي كان قادر يسمع دقات قلبه شده له بحب مايدري كيف دخل قلبه هالولد مد يده بشويش يمسح على شعره الناعم وريحته الحلوه وملمس يدينه اللي يشبهه القطيفه
وفجأه فزت وعد وانصدمت وهي تشوف عقاب جالس على الارض على ركبه وحاضن خليفه ويهز فيه ويمسح على راسه
وقفت هي تقول : من سمح لك تاخذ ولدي
رفع عقاب يسكتها : اششش
سكتت وعد وبعد دقايق وقف عقاب وهو ينزله في سريره بهدوء ولف وهو يناظر وعد بنظره قويه عرفت وعد انه بدا حربه عليها فعلاً وكان طول هالوقت صابر وساكت اتجهه لها وقال بهدوء: ما انتظرك تسمحين لي اخذه او وماخذه وقبل تتكلمين انتبهي لولدك لللي له ساعه يصيح وانتي نايمه بالعسل وارجع اقول لا تختبرين صبري لان طفح الكيل منك وانتظر زله بس عشان اقضي عليك
راح وتركها وبقت وعد واقفه لكن صدت :نشوف ياعقاب نشوف
رجعت تنام وهي تراقب خليفه
_______________________.
وفي المستشفى
وصل ضاري وهو متأكد ان سلامته بالطريق توفيق من الله لانه ابد ماكان مركز ولا يدري كيف يسوق دخل مضاوي الطواري ووقف مع امه ينتظرون .
ام ضاري : سم بالله ياضاري يمه لايوقف قلبك ان شاء الله انها بخير
ضاري : ادعي لها يمه تكفين ادعي
ام ضاري :الله يكون معها يارب
مر الوقت وهو متصلب عند الباب ينتظرهم يردون واخيراً طلعت الممرضه : مين مرافق المريضه مضاوي ال قايد
ضاري : انا انا زوجها
الممرضه: تفضل معي
دخل ضاري وامه وجلس عند الدكتور وهو ينتظر : دكتور وش فيها مضاوي
الدكتور: زوجتك تعرضت للنزيف حاد وهذا خطر عليها
لف ضاري لامه ورجع يناظره: نزيف!؟ الدكتور: ايه وحمدلله انه ماضر الطفل وقدرنا نتدخل بالوقت المناسب
ضاري : طفل !؟ سكت الدكتور وقال: ايه ماعندك خبر
ضاري: لا
الدكتور: على العموم زوجتك حامل في الاسبوع الاول لكن بعد النزيف لازم تجلس عندنا فتره لين يصير وضع حملها مستقر
مارد ضاري عليه ابد وهو في صمت مريب وعينه ثابته في عين الدكتور اللي يتكلم
وقفت ام ضاري ببتسامه : حمدلله ياربي حمدلله الله يبشرك بالخير يادكتور الله يبشرك بالخير ماتحرك ضاري لين قالت له امه : ضاري يمه وش فيك ليه ما انت فرحان يمه
كان ضاري ينتظر هالخبر بس مايدري ليه دق قلبه بخوف للحظه بس طغت فرحته على خوفه ووقف وهو يضحك بفرح وهو يبوس راس امه اللي تبارك له والتفت لدكتور وهو يشكره
وبدا الدكتور يقوله التفاصيل عن حالة مضاوي وبعدها سمح لهم يدخلون لها
دخلوا لمضاوي اللي كانت نايمه بتعب وتقدم لها ضاري وهو فرحان فرحه تنطق من عيونه جلس قدامها وهو يناديها بصوت مليان فرحه : مضاوي مضاوي
ام ضاري : خلها تنام يمه
التفت ضاري ببتسامه: بتطمن عليها يمه
رجع يناديها وفتحت مضاوي عيونها وهي تناظره وحاولت تقوم ورجعها ضاري: لا لا لاتقومين
مضاوي بتعب : ويني فيه !؟ وش جابني هنا وش فييني
ام ضاري ببتسامه: مافيك الا كل خير ان شاء للله
ابتسم ضاري لها : انتي بخير الحمدلله وولدنا بخير بعد
ما استوعبت مضاوي كلامه ولفت تناظر ام ضاري اللي قالت بفرح: ايه ابشرك انك حامل وحمدلله والولد بخير
كانت مضاوي مصدومه وتحاول تستوعب بس تأكدت من ضحكة ضاري ضحكت وهي تناظر بطنها ورجعت تناظره: صدق والله
ضاري : اي وربك صدق تو الدكتور قالنا وقال بعد انك صار معك نزيف عشان طحتي لكن انتي بخير الحين ولازم تجلسين عندهم لين يستقر وضعك
سكتت مضاوي وبعدها قالت: عشان كذا بطني وظهري يوجعوني
ضاري : ليه ما قلتي لي ليه سكتي
مضاوي : توقعته عشان الطيحه وبصير بخير
ام ضاري : حمدلله حمدلله الله حفظه وحفظك لنا .
ابتسمت مضاوي وهي تناظر في بطنها وفجأه ضحكت بكل صوتها وهي تناظر ضاري :في ذمتك انت مستوعب اني بصير أم هههههههههههههههههههههههههههههههههههههههههههههههههههههههه
بدا ضاري يضحك معها بصوت عالي :لاااا وانا بصير ابو
هههههههههههههههههههههههههههههههههههههههههههههههههههههههه
ناظرتهم ام ضاري وهي تضحك : الله يمن عليكم بعقل قبل يجي هالولد وتجننونه معكم
جات الممرضه: لو سمحتوا الصوت عالي وانتهى وقتكم ومن المرافق هنا
وقف ضارق وهو يحاول يسكت
ام ضاري : انا يمه انا
ضاري : ليه يمه انا برافق
الممرضه: ممنوع ترافق في قسم النساء تفضل لو سمحت كمل البيانات والزياره بكره لانك سببت ازعاج اطلع
مضاوي : وش بلاك تنافخين عليه
ام ضاري: خلاص يامضاوي
ضاري : اشتغل عندك انا
ام ضاري :خلااااص انت وياها
لف ضاري : اذا احتجتوا شي دقوا علي وانتبهوا لانفسكم
مضاوي: زين
طلع ضاري وجلست ام ضاري ببتسامه وهي تحمد ربها ان ربي رزق ضاري وبتشوف عياله
اما مضاوي ماهي مصدقه بتموت من فرحتها شعورها غريب مثل شعور ضاري
_______________________.
ومن بكره
كل واحد بدا يومه بروتينه المعتاد كل واحد يشتغل في همه
بداية من خلف اللي صار كل همه بيته وتجهيزات زواجه كان طالع مع امه من بدري تقضي معه كماليات البيت
وام وعد وام ناصر اللي اخذوا اماني وسحر عشان يكملون لهم جاهزهم
اما فيصل وعزوز للي صاروا ماسكين الدكان هالفتره مع جدهم
ومحمد كان من دواعي سروره انه يشارك الكل في تجهيزاتهم
وعند عقاب ماصدق ان دوامه يرجع عشان يفتك من الحرب في بيته
اما وعد كانت تفنن في استفزاز عقاب ووجد
ونادر مشغول في شوق وحملها وشوق اللي صار كل حلمها في هالحمل ان الله يتمم عليها
ومضاوي في المستشفى كانت تفكر كيف بتستوعب هالحمل وكيف بتكون امومتها
بالضبط مثل ضاري اللي عجز ينام وهو يفكر هل هو بيكون أب صالح وقد المسؤوليه والا بتسيطر عليه مخاوفه
من طرف النوخذه كان مكرس جهده كله انه يوفر لجابر كل شي يساعده في زواجه ويوفر له عيشه كريمه ومكسب رزق طالما انه في حالته هاذي صعب يلقى وظيفه
اما جابر كان حاط كل حيله على نفسه يبي يتخلص من العكاز وصعوبة المشي قبل يتزوج يبي يتخلص من اغلب اضرار الحرب عليه قبل يتزوج اماني
اما ليلى كانت مشغوله بتجهيزها وتحاول تخمد شوقها لخلف وتلهي نفسها بأي شي ما يخليها تفكر تشوفه او تكلمه قبل الزواج
_______________________.
ومر اليوم هادي واليوم الثاني
في بيت الجد قايد .
سكرت ام ناصر التيلفون وهي تقول : محمد يامحمد تعال تعال
محمد : وش فيك يمه
ام ناصر: مضاوي فالمستشفى مضاوي
فز ابو ناصر: وش فيها وش فيها
محمد : يمه لا تخوفينا
ام ناصر : اتصلت بي ام ضاري تقول انها طاحت وهي حامل مادرت وتعبت شي لكن تقول بخير
في عز خوفهم على مضاوي لكن فرحوا لها فرح كبير
ضحك محمد بفرح: والله ماشاء الله ماشاء الله
ابو ناصر: ياحليلها مضاوي تبي تصير ام
ام ناصر: ايييه وش ناقصها المهم يلا ودوني
محمد: يلا يلا
ام ناصر: صبر انادي ام خلف وام وعد
محمد : يلا
راحت ام ناصر لبيت ابو خلف وهي تنادي : وينكم
ندى: هنا ياجده وش فيك
ام ناصر: وين امك وعمتك
اماني : في غرفة عمتي
ام ناصر: ناديهم قولي لهم يلبسون عشان يروحون معي للمستشفى
حنان: بسم لله عليك ياجدتي وش فيك
ام ناصر: بنروح لمضاوي بالمستشفى طاحت عليهم امس وودها المستشفى
ندى: بسم لله وش فيها !؟ ام ناصر بفرح: حامل حامل وتعبت شوي
تركوا كل شي في يدينهم وتجمعوا يضحكون ماهم مصدقين وركضت ااماني تنادي امها وام خلف اللي جو ماهم مصدقين وراحوا مع ام ناصر للمستشفى
_______________________.
وفي المستشفى
كان ضاري هناك مسنتر من صبح الله جالس عندهم
مضاوي: ماقلتوا لامي
ضاري : لا والله مارحت مكان صحيت وجيت بسرعه
ام ضاري: انا كلمتها وقلت لها وتقول جايه
مضاوي : زين
سكتوا على دخولهم وتغطت ام ضاري ودخل ابو ناصر ومحمد
ام ناصر: بسم لله عليك يا بنيتي بسم لله عليك
مضاوي: لا تخافين يايمه انا بخير
ابو ناصر: مبروك يا بنتي مبروك الله يتمم لك ويفرحك ومبروك ياضاري
محمد: مبروك مبروك
ام خلف وام وعد: مبروك
ضاري ومضاوي : الله يبارك فيكم
محمد: مدري وشلون بتضبط معكم وتيجبون هالولد لكن الله يكون في عونه
ضحك ضاري :الله يربط على قلبه
جلسوا حولها يسولفون ويضحكون ومضاوي مبسوطه
_______________________.
وفي بيت عقاب
من يوم طلع من دوامه وهو طاير للبيت واول ما دخل اتجهه لغرفة وعد لكن وقفه صوت وجد: عقاب
التفت وشاف عهد وسحر فيه
عقاب : ماشاء الله اليوم منورين بييتي
عهد : ايه بس شكلك ماشفت النور الا بعد ما ناديناك
سحر : معذور اكيد تعبان
عقاب : اي والله .! بس وينها شهد
سحر: عند وعد
لفوا على صوت شهد اللي طلعت وهي معها خليفه: الله عقاب مابغيت تجي
ابتسم عقاب: هذاني جيت تعالي وجيبي هالحلو معك
قربت شهد تسلم عليه واعطته خليفه وقالت: للحين ماسويتوا قهوه!؟
عقاب : افا للحين ما تقهويتي؟
شهد: لا والله
عقاب : وجد وين قهوتك
سحر: كانت بتسوي بس قلنا لا تسوين
عقاب : لا لا قومي سوي لشهد
عهد : وش تقوم تسوي لها!! لا ترتاح وشهد تسويها
عقاب : والله!!! وجد قومي
شهد :بروح انادي وعد تقهوى معي دام محد يبي يتقهوى
راحت وعقاب يلعب مع خليفه ورجعت ومعها وعد اللي كعادتها كاشخه وسلاحها موجود اكيد
التفت عقاب يناظرها وهو متعجب من سر حبها لروج الاحمر لكن في نفسه قال( يحق لها تحبه ماهقيت ان هالروج حلو الا عليها الكلبه )
رجعت ووجد بعد فتره بالقهوه وصبت لشهد وعقاب وتركت وعد
لكن قال عقاب : صبي القهوه ياوجد
وجد: مايبون
عقاب: ماني عايد كلامي
عرفت وجد تهديده وصبت لوعد لكن قالت وعد : لا تعبين روحك ما ابيها
شهد: افا انا اصب لك وتقهوين معي
صبت شهد من جديد لوعد واخذتهها وهي مبتسمه وماتت وجد من القهر
اما وعد مطنشتهم وهي تضحك مع شهد ولفت بهدوء: سحر هاه كيف تجهيزاتك!
سحر:حمدلله خلصنا تقريباً
عقاب :اذا تحتاجين شي علميني
سحر: ماقصرت
وعد: الله يوفقك ويرزقك كل خير ويسخر لك اخيار الناس ويبعد عنك كل من فيه شر
سحر: امين وياك يارب
وعد: امين
لفت وعد تناظر خليفه وابتسمت له وهو في حضن عقاب اللي رفع عينه وطاحت عينه بعين وعد اللي مبتسمه استغرب ابتسامتها له لكن وعد ماكشرت بالعكس بقت مبتسمه وهي تدري ان وجد وعهد بيموتون
لا شعوريا ابتسم عقاب ماحس بنفسه عجز يكشر بوجهها لكن لف على صوت وجد اللي قالت : تقهوو يا عقاب
مد فنجاله بهدوء وصد يلعب مع خليفه ويحاول يتجاهل حركات وعد اللي تربكه
_______________________.
وفي السوق كان خلف توه يجي الدكان ودخل وهويقول : سلام
عزوز وفيصل: وعليكم السلام
فيصل ؛وينك ابطيت
خلف : عندي شغل ليه!؟
عزوز : جاء جابر من شوي وعطاني هالراديو يقول ( اذا وصل خلف يصلحه )
خلف : ايه هاته
جلس وهو يحطه قدامه وراح فيصل وعزوز عند الباب وبدا خلف يقلب بالراديو لكن اول ماطلع البطاريات طاحت ورقه ورفع راسه خلف يناظر شاف محد يناظره وفتح الورقه وهو مبتسم كأنه يدري بأنها بلسم جروح الفراق .
وكان مكتوب ( خلف.. صچ مادري شنو اكتب وليه بخاطري اكتب لك هالرساله حاولت امنع روحي وما اتسبب في مشكله بعد لكن مو قادره فاض صبري مو قادره كل يوم اسمع عنك واشوفك ولا اقدر اقولك شنو بقلبي ادري لقانا قريب بس مو قادره انطر .. واجد حكي ودي اقوله لكن مستحيل هالسطور تكفيه لكن كل اللي ودي اقوله بهالوقت أن(هذا المكان وهذي الزاويا وهذي الضلوع والأيام والنسايم كلها كانت شاهده على أنك تسللت لقلبي ، أنشهد انك ضيعت صواب غروٍ مدلل( أسلوب تدليل! ) " أحبّك كثر ما حنّ لك قلبي السّـالي".) تعبت حيل ياخلف وانا احاول اوصلك هالكلماات بتعبير يناسبك وتفهمه ) ... دير بالك على روحك )
سكر خلف الورقه وهو يسند راسه على الطاوله ضم الورقه وهو مايدري كيف يبي يعبر ويرد عليها مسحت على قلبه بكلامها العذب ماكان يدري كيف بيرد هالطمأنينه الي يحس بها من كلامها
سكر الورقه وهو يحطها بجيبه وسحب ورقه وبدا يكتب هو بعد رده ( مثل حيرتك حيرتي توهتني ..مدري وش اقول وهذا مايعني قلة المحبه لا والله ولكن .. مدري كيف بلقى كلام يوصلك اللي بصدري لكن خليني أبدا من هالموقف ... جلست بين الشباب وكلهم اتفقوا يغنون "أحسّك الليلة في صدري" ألا انا اختلفت معهم لأني أحسك كل يوم بصدري كل يوم وكأنك ضلع ثابت مستحيل استغني عنه وياما مرت الايام وانتي بعيده عني بالمكان لكن قريبه بصدري متوسطه قلبي... ومافيه اكثر من هالشعور أمان .. وانا الحين ماعندي شي اقوله الا .. عرفت إنك زهر عمري عرفت إنك بساتيني و أحبك كثر أخطائي و أدري إنك تحبيني .) سكرها ودخلها تحت البطاريات وسكرها ووقف واخذها لدكان النوخذه وشاف جابر جالس وابتسم واتجهه له : جابر صبحك بالخير
جابر: ياهلا والله ياخلف حياك دش
خلف : لا والله مستعجل بس لقيتك جايب هالراديو وصلحته وقلت اجيبه
جابر: الله يعطيك العافيه تعبناك
خلف: ابد تعبكم راحه
جابر: اجلس نشرب چاي
خلف : بالعافيه المره الجايه
جابر: الله وياك
نزله جابر جنبه وهو مايدري عن اللي يصير اللهم ان ليلى اعطته هالراديو وقالت له خربان وجابه جابر لخلف وبيرجعه لليلى الحين
_______________________.!
وفي بيت عقاب
وقفوا خوات عقاب : يلا احنا بنروح
عقاب : اجلسوا وين رايحين
سحر: مانبي نخلي جدتي لحالها
شهد: ايه وانا وعدت وجدان ارجع عندنا شغله بنسويها
عقاب : زين اجل .
وقفت وعد وهي تاخذ خليفه: انا رايحه معهم بتغدى عند اهلي
ناظرها عقاب بهدوء وخطر له يرفض لكن ماعطته وعد فرصه وهي تاخذ عبايتها وطلعت ولفت وجد بصدمه: راحت ما انتظرتك توافق !؟؟ وساكت لها
عقاب : ابعدي عني ياوجد
وجد : لا ماني مبعده !؟؟ الشروط اللي تمشي علي تمشي عليها بعد
ناظرها عقاب بهدوء وقال: زين دام هذا كلامك معناته كل شي يصير عندك يصير عندها وتصير زوجتي رسمي مثل ما انتي زوجتي
تجمدت ملامح وجد ما توقعت هذا رد عقاب وقالت : كنك تبيها من الله
عقاب : اللي ابيه انك تريحيني وتفكيني شر هالمشاكل ووعد انا اعرف اتصرف معها انتي اطلعي منها
تركها ودخل وهو مقهور من وعد ايه لكن مايبي وجد تدخل فالسالفه
_______________________.
وفي السوق
كان خلف جالس وهو يفكر بليلى وكلام ليلى لكن رفع راسه على صوت ضاري اللي جاي من بعيد وهو يقول بروقان: ما تقول لنا صاحب .. فينو زمان غايب
نسأل عليه واجب ..كان العشم اكبر
الا كان العشم اكبر .. ضحك خلف : الا والله لكن انشغلت وينك غاط صدق
جلس ضاري بضحك: فالنعييييييم
خلف :ايوووه ! لاابشرك نادر وصل بعد
جاء نادر: سلام ياهوه يعني نغيب ونختفي محد يسأل
ضاري :توني قلته له بس انا اذرب
ضحك خلف : لحظه ياخي انت وياه ترا ماغبتوا الا يوم وهاليوم كله ما جلست دقيقه ادور من مكان لمكان
ضاري: ايييه هاذي ضرايب الزواج
نادر: جاكم ابو الضرايب كلها
دخل عقاب :سلام عليكم
الكل: عليكم السلام
عقاب : انتم ماعندكم شغل!؟ دايم مسنترين هنا ونفس الجلسه ونفس الوجيه
ضاري : مبليين وش نسوي
نادر: يعنني تزوجت ثنتين وصرت ما اقدر اجي من الشغل
عقاب : محد ناحسني الا عيونكم
خلف : صدق وينكم من امس
عقاب : كنت مداوم ورجعت البيت من شوي وهجيت على طول
ضاري:هههههههههههههههههه بدري على الهجه
خلف : الله يعينك بس
نادر: ولله انا ابد من الدوام للبيت وجالس اتأمل في عجايب الله شلون غير امي وابوي
عقاب: حمدلله يانادر هاذي نعمه من ربي ادع بس ان الله يتمم عليهم
نادر:امين يارب
التفت عقاب: وانت يا ابو دم شرّبات
التفت ضاري بضحك: تدري ماني راد عليك ليييه لاني رااايق ومابي احوس جوي
خلف : روق بنا بعد
ضاري اعتدل : ابششششركم اني بصير ابو مع قليل من الاضرار
لفوا عليه بصدمه كلهم خلف :وشوو!؟
ضاري : ابد طال عمرك عمتكم الله يكملها بعقلها رقت السطح وطاحت ورجعت البيت الا اشوفها هاديه ولو ما قالت لي امي ما دريت وتطيح علينا وتفجعني واطير بها المستشفى المهم وتطلع حامل وبغت تسقط بس حمدلله
عقاب : ياحبك لتفاصيل لكن مبروك مبروك الله يتمم لكم
ضاري : الله يبارك فيك وعقبالك
عقاب: يارب
خلف : مبروك ياضاري مبروك الله يتمم افراحك
نادر: حاس بشعورك والله وعساك دايم فرحان ومبسوط
ضاري: اميييين وياكم اجمعين
خلف : اجلسو نتقهوى
جلسوا يكملون سوالفهم
_______________________.
وفي بيت ابو خلف
دخلت وعد وصادفها فيصل : الللللله خلييييفه جانا
وعد: ايييه جاء ولو ما اجي محد يجيني
فيصل : لا والله ما نسيتك لكن كارفني خلف معه
وعد : ايه ماعليه وين خلف؟؟ فيصل: بالدكان يجي بعد شوي
وعد: زين
جو البنات يركضون واتجهوا لخليفه يتهاوشون عليه ووعد واقفه بذهول : لا ياقليلين الخاتمه وبنت البطه السوداء اللي واقفه مالها سلام
ندى: ههههههههههه والله مشتاقين له الكلب
راحوا يسلمون عليها ودق الباب وكانت ام خلف وام وعد
وعد : خير من وين جايين
ام وعد : رحنا لمضاوي بالمستشفى
وعد : ليييه!؟
ام خلف : حامل وتعبت شوي
وعد : والله ماشاء الله تبارك الله
فيصل: تكفوووون قولوا صادقين
ندى: وش فيك انت خبل ! ايه صادقين
سالم: فيصل ابي خليفه
فيصل : خذ خذ
وعد : سالم انتبه
غيث: انا بعد بشيله
وعد:وجدان خليك معهم
فيصل: فاتحين الزياره الحين!؟ ام وعد: لا بكره
فيصل: اللله يالضحك مضاوي بتصير ام بروح اقول لعزوز ونضحك
وعد : الله يخلف عليك
ندى: تعالي للقهوه قبل ينادون للغداء
وعد : يلا
_______________________.
وفي بيت النوخذه
رجع جابر ومعاه الراديوا واتجهه للمطبخ يقول: ليلى تعالي خذي هالردايو صلحوه
ركضت ليلى وهي تاخذه : زين بصعده فوق وارجع
ام نهيان: تعال يمه غسل ابوك شوي ويرد وننچب الغداء
جابر :طيب
اما ليلى دخلت الغرفه بفرح ونزلت الراديو وهي تقلبه وطلعت البطاريات وابتسمت اول ماشافت الورقه وفتحتها وهي تقراها بحب وسكرتها بفرح وهي تخبيها ورجعت كل شي طبيعي ونزلت من جديد وهي تسمع صوت ابوها يسولف مع جابر
وابتسمت ان هالمخاطره عدت على خير وانها تطمنت على خلف وما لحقهم ضرر
_______________________.
وفي بيت نادر
رجع وهو هالايام مرتاح ومبسوط ودخل وهو يقول : سلام عليكم
الكل : وعليكم السلام
ام نادر : زين انك وصلت بننزل الغداء
ابو نادر: ياولدي لا عاد تتاخر لا تنسى وراك زوجه ما تقدر على الجوع وهي تجلس تحتريك
التفت نادر مبتسم لشوق:ابشر ، شوق كيفك اليوم .
شوق : احسن الحمدلله
نادر: حمدلله
ام نادر: بخير بخير واذا جابت الولد بتصير بخير
انخطف لون شوق ولف نادر: اللي من الله حيّاه الله بنت ولا ولد المهم طيب وبخير
ابو نادر: ايه لكن نبي حفيدنا الاول ولد
نادر: لو هو امرٍ بيدها ماحنا مقصرين الامور بيد الله
ناظرته شوق بضيق وهي خايفه من يوم صاروا يلمحون للولد تخاف تجيب بنت يرجعون ينكدون عليهم
وهذا خوف وصل لقلب نادر بعد اللي ماكان معترض بنت اول ولد عاد المهم يكون بخير لكن الواضح ان امه وابوه عندهم رأي ثاني
_______________________.
وعند ضاري
حلف عليه خلف الا يروح معه للبيت ويتغداء عندهم وينام عندهم لين يطلعون اهله
ومارده ضاري ابد وراح معه كان جالس بينهم وهو معتاد عليهم لكن شعوره غريب وهو يشوفهم مزدحمين على سفره ومجتمعين ويسولفون ويضحكون وجمعتهم على الشاهي بعد الغداء
والعصريه ومن في الليل بعد ما الكل هدا وصار بينام
كان منسدح بجنب خلف اللي على وشك النوم وفيصل اللي في سابع نومه
لف على دخول سالم وغيث اللي واضح معصبين ورفع راسه خلف : وش فيكم
سالم : ندى ما تخلينا نجلس
خلف : الساعه كم بتجلس انت وياه!؟ تأخر الوقت يلا
غيث: هم جالسين كلهم بالسطح وعمي معطيهم فيلم يتابعونه
سالم: فيلم يخرع بعد
خلف : واضحه اجل طردوكم عشان ما تخافون
سالم: حنا كبار ما نخاف
فز ضاري وهو يقول : انتبه جااااك
صرخوا سالم وغيث وركضوا لخلف وضحك ضاري : اييييه صح كبار ما تخافون
ضحك خلف : خرعتهم يارجال
ضاري : احسن عشان ينامون
غيث : ياويلك من ربي
ضحك ضاري وهو يناظره بضحك: افاااا روعتك الرجال مايتروع
خلف : ياويييييله ولدك ياويله
انسدح ضاري وهو يضحك وثواني وصاروا سالم وغيث يسحبون فراشهم لين صار بين خلف وضاري وانسدح سالم ودخل غيث مع خلف وهو يحضنه
ولف ضاري وهو يسحب سالم: ما عليك منهم انا احضنك
ضحك خلف وهو يشوف سالم يتهرب لكن استسلم لضاري وهو يضحك اما ضاري كان يمزح ولكن استغرب هدوء سالم اللي باين انه خايف ويكابر لكن بقى حاضنه وشوي وناموا وهو يراقبهم ماهو مستوعب المنظر طول عمره تعود ينام لحاله لا اخوان ولا ضحك الاخوان ولا حتى هواشهم كان يتمنى ان عنده اخوان لكن ربي ماكتب ونام وهو يدعي ربي انه يقدر يجيب عيال وبنات يعبي البيت عشان ينسى وحدته المره ويعوض فقده وفقد امه
_______________________.
وفي بيت عقاب
تعشى وجلس ينتظر جيت وعد اللي طولت واول مادخلت وقف وهو متكتف : اخيراً شرفتي يا هانم
لفت وعد تناظره بإنزعاج: وش فيك تصارخ!؟ عقاب : ودك اصفق لك!؟ ما تشوفين الساعه كم ؟ اخر الليل وانتي مابعد شرفتي
وعد : انا عند اهلي والباب في الباب
عقاب : اسمعيني زين طلعه من هالباب انسيها وانا ما وافقت
وعد : بأي صفه ان شاء الله
عقاب : جربي وعيديها وشوفي بعدها بأي صفه وصدقيني ياوعد مارح اثني كلامي وحطي كلامي حلقه في اذنك
دخلت وهي تفكر هل فعلاً يتجرأ عليها ! ما استغربت عقاب متوقع منه كل شي بس البلا انها في هالوضع ماا تقدر تواجهه
نزلت خليفه وهو تفكر كيف بتقدر وتواجهه
اما عقاب يدري ان هذا اول طريقه مع وعد وياما يتاهوشون ويااما بتصير بلاوي لكن كيف يكسر كلمة وعد بدون اضرار مايدري
_______________________.
وعلى هالموااااال مشت حياتهم
وعد تستفز عقاب لكن فيه حد تعرف توقف عنده وتعرف انها اذا تعدته بتصير كارثه
وعقاب على نفس النمط ماشي رغم استفزاز وعد ورغم انه متسلط عليها الا انه يوقف في مرحله معينه *** خلف انتهى رسمياً من تجهيزات زواجه وينتظر هاليوم بفارغ الصبر ينتظر اللحظه اللي ياخذ ليلى بيدها عروس ينتظر اللحظه اللي بيتسكر عليهم الباب ويكونون حبايب واجتمعوا
وليلى نفس شعور خلف انتهت من تجهيزها وصفت كل شي قدامها وهي كل يوم تفكر وش بتلبس وكيف بتكون مع خلف وكيف بتكشخ له قلبها كان مثل القنبله ينتظر وقت وينفجر حبه *** اما ضاري ومضاوي الدنيا ماهي شايلتههم من فرحتهم ومن يوم اللي طلعت مضاوي من المستشفى وضاري يحلف ما تسوي شي وام ضاري تزيد الحلف حلفين
ومضاوي في قمة سعادتها وكثير احيان تعاتب نفسها وشلون كانت بتطير هالقلوب الطيبه من يدها
وضاري اللي كل ليله يكتب وعد وعهد على نفسه يكون اب بكل ما تحمله الكلمه ويكون سند ويكون ذخر لولده او بنته ***
وانتهت دوامت مشاكل نادر السابقه وبدت دوامت مشكله جنس الطفل ولكن يكرر نادر ويعيد ويزيد ويقول كل شي بيد الله وكل شي مكتوب ومقدر بس محد يسمع
اما شوق بدت توصل لمرحلة اليأس من ان مشاكلها بتنتهي وتعيش بسلام صارت تهج عند ام ضاري ومضاوي تبي الراحه *** جابر كان بعد مستعد كان يعد الليالي والايام كان الشهر بسيط لكن مايدري كيف ينتهي ومايدري ليه طول هالمره تقطعت روحه ماعاد فيه صبر وصار قادر يمشي بدون عكاز وقدر يتجاوز كثيييير من مشاكل الحرب .
واماني رغم انها جهزت الا انها في توتر فضيع ماتدري كيف بتقابل جابر وماتدري وش ينتظرها وهل فعلاً جابر يحبها او عشان خلف صديقه رجع الخطبه كثير امور تدور براسها ما لقت لها حل ***
وماجد رسمياً انتهى وصار جاهز لزواجه اللي يعتبره نقطة تحول بحياته
ومثله سحر اللي هالزواج عمره ماكان شي طبيعي في
حياتها بالعكس تحس انه فاصل قوي لروحها ****
والباقي من اهل القصه عايشين على ماعهدناهم
_______________________.
وفي يوم زواج سحر وماجد
اللي يفرق عن زواج خلف وجابر ٤ايام فقط
الكلٍ جاهز والكلٍ مستعد والكل صار حاضر بالزواج والكل مبسوط وسعيد
في بيت الجد قايد كانت هناك سحر اللي جهزت وجالسه وهي تتأمل ملامحها وتسأل نفسها سؤال ( ياربي ! ملامحي في هالزواج بينرسم عليها الفرح ولا الحزن )
قطع تفكيرها دخول عهد اللي كاشخه: هاه ياعروسه جاهزه
سحر: ايه لكن اجلسي بكلمك قبل احد يجي
جلست عهد : وش فيك
سحر : اسمعيني زين ياعهد انا بتزوج وبروح الدمام ويمكن ما اجي الا كل فتره وفتره لكن مابي اروح وبالي عندكم ياعهد اسمعي نصيحتي ومالك شغل بعقاب وحريمه بكيفهم انتي لاتكونين فتيلة شر بينهم خلي بالك من شهد وعزوز والباقين مالك شغل فيهم واتركي هالعداوه اللي شنيتيها على عمي وعياله ترا مالهم ذنب بأي شي ولاتنسين عمي ماقصر بعد ابوي
عهد : اللي ماقصر هو جدي وعمي محمد وبنات عمك اللي شايفه نفسك فيهم صدقيني بكره بيقلبون حياتك جحيم مع خالهم واذا انتي مصره ما تشوفين اغلاطهم لا تسحبيني معك ومستحيل اخلي وعدوه تنتصر بزواجها من عقاب
صدت سحر بقلة حيله وجات شهد تركض : عقاب وعزوز بيجون يسلمون قبل الزفه
عقاب : ندخل
شهد: ادخلوا
دخل عقاب مبتسم وهو لابس البشت وكاشخ: ماشاء الله ماشاء الله وش هالزين وش هالزين
عزوز: اشهد بالله اني اختي احلى عروس عرفها التاريخ
ابتسمت سحر : وقرب عقاب وهو يبوس راسها : مبروك مبروك الله يفتح طريقك بالخير
عزوز اللي حضن سحر: ياعله سعيد ومبارك يا اخيتي والله بنفقدك
سحر: الله يبارك فيكم
عقاب : وابد ياسحر ان ضقتي وان زعلتي تذكري ان وراك عزوه يكفيك اتصال وتلقينا عندك
غصة سحر بالعبره وهي تقول : الله يخليكم لي ذخر
قرب عقاب يحضنها : اششش لا تبكين افا بس
عزوز : لا تبكين سحووور
شهد: ماعليك يا سحر انا عندهم اعوضهم مكانك
عزوز : لا تكفيييين كل الناس عوض الا انتي
عقاب : بس بس شهد في كفه وسحر في كفه محد ينوب عنهم
عهد : وانا بنت البطه السوداء
عقاب: لا لكن لو تقصرين لسانك بيصير مافي مثلك .
.عهد : الله يسامحك .
عقاب : يلا يلا ترا المعرس بيجي
وقفوا يرتبون ويستعدون .
___________________________
.. .. ..
غراس الجنة /لا إلهَ إلا الله وحده لا شريك له،
له الملك وله الحمد و هو على كلّ شيءٍ قدير .
.
