.
الكاتبه والمبدعه / أديم الراشد.
.
لكن ماذكر التفاصيل المبالغ فيها
خلف : بيني وبينك ابوها شيييين واضح من هيئته
نادر: اقولك من عصر الجاهلييييه انا مستعد اقولك انه ممكن يدفن شوق حيه في اي لحظه يحس ان وجودها عار
عقاب : مب لذا الدرجه عاد
ضاري : عاد انتبه لنفسك ترا كنك اياه
عقاب : ايه والله صادق خصوصاً اني احس اني لازم ادفنك ولا بتعم الجاهليه فالكون
خلف : وش بتسوي طيب! لا تقولي بتقطعهم!
عقاب :ايه يقطعهم ويقطع ابوهم وش يبي بهالناس
ضاري : فالنهايه الاوادم بايعين الدنيا بما فيها
خلف : اسمع مني لا تكثر روحات ولا تقطع يعني كل شي روح لهم نص ساعه وارجع بس لا تقطع الرحم
نادر:هذا اللي بيصير يعني عشان شوق بس
والتفت يضحك لضاري : عشان نديمتي
ضحك ضاري : يعني يناسبك الاسم ترا
عقاب : شف عاد بتقعدون تقولون أللغاز احسن لكم تقومون تطسون
شرح لهم ضاري المعنى وابتسم : عاد الظاهر بدور لي نديمه
نادر: ما تقول امك!
ضاري : ايه بس امي كبرت ومعاد لها حيل ومصره الا تبي تزوجني
عقاب: سلم عليها وقلها ترحم بنات الناس منك وانا متاكد انها هالمسكينه انها غلطت غلطة عمرها وجابتك
ابتسم ضاري ابتسامه خفيفه مكسوره ما احد انتبه لها متوقعين رد من ضاري لكن مارد وهو قلبه يوجعه كل مايتذكر انه ماهو من بطن هالمرأه العظيمه وانه لقيط ويمكن يكون فعلاً انها غلطت غلطة عمرها وتبنته
لاحظوا سكوت ضاري اللي وقف: ا انا عاد بروح
خلف باستغراب: جالسين!
ضاري :عندي شغل
نادر : زين لكن ارجع فالليل جالسين
عقاب استانس انه سكت ضاري متوقع انها شطاره منه وقرر يحرجه اكثر ويقول : لا لا دام صرت صديق وتمون ونمون طال عمرك الليله عشانا عندك
خلف كان منتبهه لضيق ضاري والتفت بغضب لعقاب : ومن سمح لك تعزم
عقاب : يقول صديقنا وهذا عشى صداقه الا اذا ما وده
نادر هنا بعد انتبه وقال يبي يبرر موقف عقاب الشين : لا ما نقدر اصل...
قاطعه لضاري للي مهما كان منحرج وضايق مستحيل يحرج نفسه اكثر ويرفض عزيمتهم ويخلي لعقاب حجه عليه : لا والله صادق عقاب ، من زمان كنت بعزمكم لكن سبقني عقاب وابيكم تشرفون البيت اليوم
خلف وقف : مايحتاج ياضاري مابي...
انهى النقاش ضاري بحده غير معتاده: افا بترد عزيمتي ؟
تفشل خلف ونادر ووافقوا لكن اصروا انه مايتكلف ويكون عشاء بيت وعادي وراح ضاري وهو ضايق صدره وانحط بموقف شين وهو كان يبي يعزمهم لكن مو بذا الوقت اللي حالته الماديه صعبه شوي وامه تعبانه ووضعه مكركب لكن عقاب اجبره
واول ماراح لف نادر على خلف: انت وبعدين معك!؟ لين متى وهذا اسلوبك!
عقاب : وش قلت ؟
خلف : ما تشوف انك قلت شي!؟عقاب وش فيك! ضيقت صدره بكلامك وثاني شي تجبره على عزيمه وهو واضح ماهو مستعد لها
عقاب : ياحبيبي يالحساس اللي ضاق صدره اسمعوني عاد تراني ساكت له وبالعه عشانكم بتجلسون تدارونه مثل البنات بعد كذا كثير وبعدين هو مايستحي على وجهه له فتره ناقع هنا ولا عمره عزم
خلف : من قالك نبيه يعزم
عقاب : اذا مايعرف الاصول نعلمه الاصول
خلف : عقاااب ترا كبرررت شوفة نفسك على الناس
عقاب : المختصر يا خليف! بتهاوش معي عشانه
نادر: قلنا لك ماتبيه لا تجلس معه لكن لا تجلس تحرجه
اخذ عقاب اغراضه وصد: ماهو كفو هالشين يبعدني عن مكاني واصحابي
راح وتركهم وصد خلف بضيق: انا اشق هدومي من ذا الرجال ولا وش اسوي
نادر: خله يارجال تربيه الايام ، المهم يلا روح لدكانك وبرجع لبيتي
خلف : الله معك
اخذ خلف طريقه وهو يناظر دكان النوخذه الخالي واضح ما رجعوا من الكويت لكن مازال في باله موقفه مع ليلى بالبقاله وابتسم وهو يتذكر رعب عيونها ودخل المحل بهدوء وجلس قدام اغراض وهو صار عنده ولاء لهالشغله اللي رمت في طريقه ليلى
_______________________.
في بيت ابو خلف
ما نزلت وعد اليوم للفطور ولا اشرفت على اي شي فالبيت وكانت مليانه زعل وقهر وتنتظر الوقت اللي يطلع فيه ابوها واول ماطلع نزلت والكل يناظرها
ام وعد : تعالي ياوعد تعالي افطري
وعد : مابي مالي نفس
ام خلف : يا وعد يا بنتي تعوذي من ابليس ومايصير اللي تسوينه
ندى : انا مدري وشوله رافضه عقاب !؟ ما اشوف فيه شي يخليك ترفضينه كذا
وعد بغضب : اذا تشوفينه ما ينرد خذيه انتي
ام وعد : وعد وش ذا الحكي !؟ استحي على وجهك وبعدين ندى صادقه عقاب ما ينرد ولا بتسوين مثل سحر
وعد : يمه تكفين سكري الموضوع لانه مايقبل النقاش ابداً
ام وعد بغضب : لييييه ولا معجبك انك جالسه للعمر هذا وانتي ترفضين كل واحد يخطب وش فيك انتي تبين توقفين نصيبك ونصيب خواتك معك
انصدمت وعد من كلام امها وقالت بقهر: انا ما اوقف نصيب احد اللي بيتزوج الله يستر عليه
حنان: يمه الله يهديك محد يوقف نصيب احد وعد معها حق تختار اللي تبي تعيش معه
ام وعد : لا ما معها حق لين متى واحنا نجاريها لين متى هالانانيه الناس تزوجت وعاشت والطيور طارت بأرزاقها وهي للحين تكابر
الحين فهمت وعد ان الكل متحامل عليها دام السالفه فيها عقاب طلعت وتركتهم وهي مصره على اللي براسها ام خلف : يا نوريه وش فيك على البنت مهما كان وعد عاقله وتعرف مصلحتها
اماني: يمه هاللي قلتيه ثقيل حيل ! ليه تحسسينا إنا جالسين على قلبكم
ام وعد :يابنتي ماهو ذا قصدي لكن ابي اتطمن عليكم ابي ازوجكم وافرح فيكم
الكل سكت محد رد وكلهم متضايقين
_______________________.
وفي بيت الجد قايد
كانوا سحر وعهد ومضاوي وهيا وشهد بالسطح جالسين ويتقهوون لكن لفوا على دق باب السطح
وفزت شهد تفتح: وعد حياك
وعد بغضب: وين عمي محمد !
مضاوي: بسم لله ردي السلام طيب
وعد : مضاوي مالي خلقك وين عمي
عهد : عشتوا ليه مالك خلق تردين السلام داخله على يهودين
مسكت نفسها وعد غصب لا تطلع حرت عقاب فيها: ابعدي عني يا عهد ترا كل شياطين الارض قدام عيوني لا تخليني اسوي شي اندم عليه
هيا: اذكري الله يا وعد ومحمد في غرفته
مرت وعد بغضب ولفت سحر بخوف: بسم لله وش فيها
عهد : فيها الطغيان اللي مالقت احد يكسر راسها عليه
مضاوي : انتي وش صاير لعقلك هاه انهبلتي وقعدتي؟؟ عهد امسكي لسانك لا اقول لعقاب
عهد صدت وسكتت
اما وعد طارت لغرفة محمد وهي مالها نصير الا محمد دقت الباب ودخلت : عمي فاضي
اعتدل محمد وهو يبعد الجريده: اي يا وحش تعالي
صدت وعد بضيق : الظاهر بتناهشني الوحوش يا عمي ويضيع هالاسم مني
فز محمد بخوف : وعد وش فيك!؟ وش صاير !
جلست وعد بضيق: عمي طلبتك مالي الا انت تفهمني
محمد : ابشري قولي وش فيك!
وعد قالت له عن خطبة مبارك وخطبة عقاب وقالت انها رافضه عقاب ولا تبيه وتكرهه ولا قالت كل التفاصيل وانصدم محمد: وش صاير لكم انتم! كل واحد عاف ولد عمه ولا يبيه!
وعد : ياعمي ادري ان عقاب ولد عمي واحسن من الغريب واعرف اني ما احصل احسن منه واعرف اني كل شي بينحاس برفضي له لكن ياعمي افهمني ما اطيق عقاب ما اواطنه وتعرف ان لا انا ولا عقاب شخصياتنا تتوافق وتعرف اني لو بتزوجه من ثاني يوم بيذبحني ولا بهج وتطلق انا وياه ما يصير نتزوج وانت بنفسك قلت الزواج ماهو غصب واجبار
محمد سكت بحيره وهو فعلاً يعرف انهم اكثر اثنين مايصلحون لبعض وعد قويه وعقاب طاغي : انا ادري يا وعد لكن كيف نقنع ابوك
وعد رغم مرارة القرار الا انها كابرت على نفسها وقالت بعد ما الكل ضغط عليها ووصفها بالانانيه وانها موقفه نصيبها ونصيب اخواتها : انا موافقه على مبارك لكن ابيك تفهم ابوي ان كل شي قسمه ونصيب ولا يجبرني على عقاب
انصعق محمد من قرارها ولف :يا وعد انتي متاكده !؟ انتي تقولين مبارك شايب
وعد بغصه: فرق العمر مو مهم
ابعد محمد ووقف يناظرها بحيره وقرب : وعد اذا ما تبين مبارك محد يقدر يجبرك ابد لا عليه ولا على عقاب .
ابعد محمد ووقف يناظرها بحيره وقرب : وعد اذا ما تبين مبارك محد يقدر يجبرك ابد لا عليه ولا على عقاب
وعد كانت متاكده ان مجرد ما ترفض مبارك بينجن ابوها ويجبرها على عقاب ويمكن الكل يأيده قالت بهدوء عكس البراكين في صدرها: لا ياعمي انا استخرت وارتحت لمبارك لكن ابيك تحاول تفهم من ابوي ولا تقوله اني قلت لك شي
محمد : زين
طلعت وعد وتركت محمد في صدمه مايدري وش صاير لعيال اخوانه كل واحد عايف الثاني وكل واحد يفضل الموت على الثاني وهو مذهول اصلا من عقاب شلون يخطب وعد وهو ما يواطنها ! لكن اصرار وعد على مبارك في ريبه ماكان يدري كيف بيحل القصه لكن فيه سر ورا كل هاللي يصير فيه سر بين عقاب ووعد
_______________________.
عند وعد طلعت وهي تحاول تتماسك وما تنهار هي ما تبي مبارك لكن عندها فرصه تتفتك فيها من عقاب ومن اللوم اللي يوجهه لها من اهلها كانت تفكر بأنها تتزوج مبارك فتره وترجع مطلقه او انها تشكل مبارك على ما تبي وتقلبه وسيله تحقق فيها امانيها
لكن قبل توصل لبيتهم لفت على صوت ضحك شامت فيها ولفت وهي لابسه جلالها ومتغطيه بس معروفه وعد وفارقه بين البنات بطولها وورزتها
ما توقعت يكون عقاب موجود وفالسطح وكل البنات في بيت ابو خلف ناظرته بحده
وضحك عقاب بشماته اول ماشافها تمشي بضيق وقهر واضحه عليها : قلت لك بتندمين وما طعتي لكن هاذي اول بشاير الخير واول خضوعك انك تمشين وعينك بالارض وان شاء الله الجاي اعظم وهذا انا اقولها لك وبخلي لكلامي من اسمك نصيب وعدٍ علي يا وعد لتشوفين على يدي اياام تساويك بالارض ولا ترفعين عينك ولا توقفين بكل هالطغى كله وخذي وعدي على محمل الجد
ضحكت وعد بإستهزاء وهي تناظره بنفس الحده والوقوف الشامخ : اعلى مافي خيلك اركبه وربك يا عقاب مثل ما يكون لاسمي نصيب في وعدك وربك لاكون اشد عليك من اسمك واكون انا عقابك من ربك وصدقني ليدفنونك تحت هالتراب ما تطول اللي تبيه وانا وعد وقلت لك قبل انت مافي يدك الا تكيد مثل الحريم لكن انا بتوصلك اخبار افعالي وهذا وعدي انا
تركته ومشت وهي قد تحدي عقاب ومستعده تدفع حياتها ثمن ولا تخلي لعقاب عليها سيطره
وقف عقاب بقهر وعلى قد ما انقهر من كلامها على قد ماهو واثق بتخطيطه
_______________________.
وعند ضاري
كان يمشي بالسوق ضايقٍ صدره مايدري كيف يتصرف في هالعزيمه اللي انبلا فيها اخذ بعض الاغراض اللي يحتاجها ورجع للبيت دخل بهدوء وهو يمشي على مهل يخاف امه نايمه ويصحيها بإزعاجه اول ما وصل المطبخ لف على صوت امه : ضاري يمه جيت!؟
اسرع لها وهو يمسك يدها: ايه يمه ليه قمتي وانتي تعبانه
ام ضاري : سمعتك ما دخلت زي العاده خفت ضايق صدرك
ابتسم ضاري بخفه: لا يالغاليه ما فيني شي بس ماحبيت ازعجك اخاف نايمه
ام ضاري : لا ياحبيبي ما تزعجني انت
ضاري : تعالي اجلسي اجلسي
جلست وهي تناظر الاغراض اللي على الباب: وش انت جايب !
ضاري : جبت اغراض بسوي لك شي دافي ينشطك وبعد جبت اغراض للعشاء
ام ضاري : الله يعطيك لين يرضيك يا يمه
ضاري : امين
سكت شوي مايدري كيف بيقول لها بيجي له ضيوف ولفت ام ضاري : يمه علامك قلي ! واضح عليك الضيق
ضاري : لا يمه بس تعرفين خلف ونادر وعقاب قلت لك عنهم
ام ضاري : ايه !
ضاري : ادري ماهو وقته بس انهم بيجون اليوم البيت وبيتعشون عندي
ابتسمت ام ضاري: وبس هذا اللي مضيق صدرك ! وانت ليه ما تبيهم يجون
ضاري : لا يمه ماقصدي اني ما ابيهم يجون بس مابي استقبل احد وانت تعبانه وبيزعجونك بالاصوات
ام ضاري : لا ماعليك رحب بضيوفك يمه واترك الباقي علي لا تشيل هم شي انا اسوي لك العشاء والقهوه و...
قاطعها ضاري: لا يمه والله ما تسوين شي وانتي مريضه ووقفتك صعبه والله ماتمدين يدك لشي ابد انا بس ابيك ترتاحين ومابي احد يزعجك والباقي اسويه انا
ام ضاري : ما يزعجوني ضيوفك يمه
ابتسم ضاري وهو يبوس راسها: الله يخليك لي ، يلا قومي ارتاحي لين اجهز لك شي تاكلينه
ام ضاري : الله يرضى لي عليك
دخلت ووقف ضاري يناظر البيت كانت حالته صعبه بدون حرمه تهتم فيه هو ماهو ذاك الزود في ترتيب امور البيت كل اللي قدر يسويه اكل خفيف لامه ويغسل كم صحن ويكنس اي كلام واللي يشوفه انه لازم ينظف البيت نظافه كامله هذا اول شي لازم يسويه ولازم يفكر بعشاء محترم يصلح لضيوف وهو مايعرف يطبخ شي كبير اخذ نفس بضيق وبعد ما جهز اكل امه رجع يحوس بالمجلس والبيت
_______________________.
وفي الكويت
جاء جابر وهو يعلن ان الليله ملكة شيخه واستعجلوها عشان ابوه عنده شغل لازم يطلع السعوديه وبدا الركض فالبيت والكل يساعد ويشتغل ومحتاس
وليلى تساعد امها ومريم لكن كل ما فكرت تركض او تحرك يوقفها صوت الخلخال ويذكرها بخلف لكن كانت تتجاهله وتكمل ووقفت عند الكاميره تجهزها عشان تصور الاحداث لكن دق قلبها اول ماشافت المقطع الاخير اللي كان فيه خلف وجابر وسوالفهم ومررت المقطع بتحذفه لكن ما قدرت وطنشت هي ترجع لشيخه وتصورها وتصور مريم وامها وكل شي قبل يجون الضيوف
وبعد ما انتهت جلست وهي ترجع تعيد الفيديو وابتسمت اول ما ظهر خلف بالمقطع وهو مذهول لكن مبتسم استغربت ابتسامه لكن اخذتها الذكرى لصوته ونظرته المتسعجله اللي يحاول يغضها ولا يناظر ليلى لكن واضح فيها لمعه غريبه
سكرتها وجلست وهو تسمع صوت الاغاني
_______________________.
في بيت الجد قايد
كان عقاب جالس بغرفته بهدوء يفكر وش بتسوي وعد ! دامها للحين تتحداه واعتدل اول ما فتح الباب محمد ودخل : عقاب
عقاب : هلا عمي
محمد : زين لقيتك صاحي
عقاب : امرني
محمد جلس وهو ملامحه جامده وسكت شوي وقال : بسألك سؤال واحد ياعقاب وبتجاوب جواب واحد وواضح وصريح
عقاب : ابشر
محمد : ليه خطبت وعد !
استعد عقاب انه يبرر له نفس تبرير خلف لكن قاطعه محمد بغضب: عقاب قلت لك جواب صادق! لا تقولين بنت عمي ولا تقولي هالخرابيط كلها انا ادري وانت تدري انك ما تواطن وعد ولا هي تواطنك
شد عقاب على اسنانه بغيض وابتسم مايبي يكشف نفسه: انا ما اكرهه وعد لكن ما احب تصرفاتها لكن التصرفات ممكن تتبدل وتتغيرر وانا ما عندي مشكله بعدها واشوف اني دامني نويت اتزوج بنت عمي اولى بي
محمد: بناتك عمك ٣ !؟ مالقيت الا وعد!
عقاب : لان عمي ما يرضى يزوج الصغار ويخلي الكبيره
محمد : ماهو عذر !
عقاب : انتم وش فيكم!؟ وش الذذنب اللي سويته عشان تجون كلكم تحققون ! لذا الدرجه ما تشوفوني مناسب لها ؟
محمد : محد قال ذا الكلام بس اللي صار غريب
عقاب : ليه غريب!؟ محمد : لان وعد ما تبيك وتفضل انها تاخذ الشايب ولا تاخذك ؟ هذا ماهو غريب
ضحك عقاب : ابد طال عمرها الله يهنيها ويوفقها انا اللي علي سويته وهي بكيفها تاخذ الشايب تاخذ الشباب بكيفها
طلع بسرعه وتركه بغضب وهو مبسوط ان وعد تمشي على خطته وبتزوج مباررك وبتمنى لو هي رضت فيه ولا اخذت مبارك بس مقهور انها تمشي وتنشر رفضها له في كل مكان
_______________________.
في بيت ابو خلف
الكل كالعاده مجتمعين للقهوه ومحد يدري عن خطبة عقاب الا بيت ابو خلف
ولفت ام ناصر: وش بلاها وعد يانوريه تمر مثل الخفاش رايحه جايه
ام وعد : مافيها شي تعبانه شوي
مضاوي : بالله علموني مواعيد روقانها مشتهيه كيكتها
ضحكت اماني : جربي وقومي طلبيها
مضاوي :مالي خلق اتكفخ الحين كفايه علي عقاب
سكتوا على صوت الباب وكان فيصل وعزوز وسالم وغيث ودخل غيث يركض :يمه ألحقي فيصل رجله تصب دم
فزوا كلهم برعب وركضت هيا: ليه لييه!؟
عزوز من برا : عمتي هيا خذو طريق بندخل فيصل
ابعدو كل البنات ودخلوا فيصل
وشهقت ام وعد : فيصل بسم لله عليك وش فيك !
ام خلف : عزوز وش فيه!؟
عزوز : كنا نلعب كوره وكلن بيشوت الكوره وشات الحديده بالغلط وشكلها كسرت رجله
هيا :لا حول روح ناد اي احد يوديه للمستشفى
مضاوي : بشوف محمد اذا فيه
تعبى البيت صراخ فيصل وسالم وعزوز يركضون يدورون احد يودي فيصل المستشفى
ونزلت وعد بصدمه: فيصل وش فيك !؟
فيصل : ألحقيني يا وعد بموووت بموت رجلي رجلي
وعد : وش فييييه!؟ سحر: كان بيشوت الكوره وضربت رجله الحديده بالغلط
وعد : عمي محمد وينه!؟ رجعت مضاوي تركض : مافيه احد
وعد : بروح انادي خلف
ام خلف: راحوا عزوز وسالم
الكل وقف يناظر فيصل اللي دايماً وابداً مايعرف يصبر
_______________________.
اما عند خلف
رغم مشكله وعد اللي تحوس براسه الا انه يراقب نقطه فارغه سرحان ومبتسم وهو ينتظر اللحظه اللي بترد ليلى على رسالته ووش بتقول !؟
وقف على صوت جده يناديه ياخذ الاغراض من الناس وشاف عمه محمد جاي واضح في وجهه الضيق
خلف: عمي حياك
محمد : هلا خلف وين ابوك!
خلف: مدري والله الظاهر مع ابو ممدوح
محمد : زين وابوي
خلف : توه راح لدوانية الشيبان محمد: زين اجلس ابيك بكلمه
خلف : امر
محمد : اكيد انك عارف عن خطبة مبارك وبعد عقاب
تنهد خلف بضيق: ايه ادري لكن الامور ماهي تمام
محمد : ايه جت وعد وقالت لي
خلف : دامها قالت لك اكيد قالت عن رفضها لعقاب
محمد : ايه
خلف : وانت وش تشوف!؟ محمد : كلنا متفقين الزواج مافيه غصب !وبيني وبينك ما اشوف انها هي وعقاب مناسبين لبعض نعرف عقاب نار وشرار ووعد قويه ولا تحب احد يحكمها والنتيجه بتكون وخيمه
خلف : انا معك لكن ابوي!
محمد : وعد تقول انها موافقه على مبارك وعقاب خطبته كانت في حال ان وعد رفضت مبارك تصير خطبته يعني عقاب معلق على رفض مبارك
خلف : عمي لا يكون بتأيدها على موافقتها لمبارك!
محمد : اذا هي راضيه مالنا شغل احنا.
قبل يرد خلف فز على صوت عزوز وسالم ينادونه : ألحق فيصل
خلف بخوف: وش فيه؟؟ عزوز: رجله انكسرت
طلعوا كلهم متجهين للبيت واخذوا فيصل للمستشفى وهم مختبصين
_______________________.!
المغرب في بيت نادر
جلس وهو يناظر وش مسويه شوق اليوم وش طابخه كان مصدوم انها تعرف تطبخ
ولف لها: شوق
شوق : سم
نادر : اليوم معزوم على العشاء وما ودي اخليك لحالك
ابتسمت شوق : طيب قول لخلف يجيب وعد
ابتسم نادر: الله الله يعني الحين بترسمين لي صداقه مع وعد
شوق : يعني ما اعرف الا هي
سكت نادر وهو يدري ابو خلف مايطيقه ولا يطيق اي شي من طرفه ومستحيل يخلي بناته يجون ولا شوق تروح لهم
وقربت شوق وهي تشد على ذراعه: وش فيك ضقت؟ اذا ما تبي خلاص
نادر اعتدل وهو يمسك يدها: لا مو هذا قصدي لكن بيني وبين ابو خلف مشكله وبالزوور لين اقابل خلف وعلى كذا مستحيل يرضى ان وعد تجي او انك تروحين لهم
ابتسمت شوق بهدوء: مو مشكله ابد اللي يزعلك ويضيق صدرك انا ما ابيه
ابتسم نادر بحب : وش رايك تجين معي لام ضاري!؟ شوق : فشله ما عزمتني اروح كذا
نادر سكت بضيق وقالت شوق : شوف ما عليك انا يخلص تنظيف البيت شوي شوي وناظرر التلفزيون شوي وبنام ماعليك انت
نادر: زين ما رح اطول انا برجع بدري
وقف نادر يجهز وشوق تساعده وتسولف معاه وهي تحس الحياه معاه اسهل من حياتها قبل
_______________________.
في بيت ابو خلف
الكل كان ينتظر فيصل ومتوترين واخيراً وصلوا
ووقف ابو خلف يناظرهم ودخلو فيصل وجلسوا
ام وعد: بسم لله عليك يمه ، وش فيه يا خلف وش قالوا له
جلس خلف بتعب: مافيه الا العافيه ، ضربت رجله بالحديده وانجرحت وصار فيها فك بسيط وان شاء الله ايام ايام ويطيب ماعليه شر
ابو خلف: فيصلوه كم مره اكلمت عند هالكوره ياولدي انت خبل!
فيصل: يا يبه وش نسوي ماعندنا شي الا الكوره
محمد : بسيطه يا رجال ماصار شي ، المهم انا بروح
ابو خلف : وين رايح اجلس للقهوه
محمد: لا لا بروح انام شي
طلع محمد ولفت حنان: خلف تبي شي قهوه شي!؟؟
خلف : لا بس ابس ملابس نظيفه معزوم على العشاء
ابو خلف : عند مين!
خلف: ضاري
ابو خلف : لا تتأخر
خلف : زين
ام خلف : خلف يا روحي اخذ معك الكمام احتياط اذا حصلت دخان نار ولا شي يضرك
خلف : ابشري يمه ابشري
طلع للغرفه وقبل يدخل راح لوعد اللي جالسه بهدوء وهو للحين في بالها ضحك عقاب
خلف :وعد وش تسوين بلحالك
وعد : ولا شي
خلف : وش تفكرين فيه
وعد وقفت وهي تطوي جلال الصلاة : كنت اصلي واستخرت .
تكتف خلف: وان شاء الله وصلتي لحل
وعد وهي تحاول ما تبين انهيارها : ايه ، وياليت تبارك لاختك
قطب خلف بغضب : مصره على مبارك
وعد : هذاك بعينك شفت فكرت واستخرت وشفت ان نصيبي مع مبارك
خلف : نصيبك ذا على قولك بنيتيه حاجز عشان ما تفكرين بعقاب !
وعد : ماودي اني اكلمك كذا ! لكن تصرفنا متشابهه ياخلف الحاجز اللي بنيته ببمبارك ضد عقاب على قولك مثل الحاجز اللي سويته انت بينك وبين سحر عشان ليلى
احتدت نظرة خلف وقرب بغضب: قلت لك هالموضوع لا تفتحينه يا وعد
وعد : اجل لا تفتح سالفة عقاب
خلف : زين يا وعد سوي اللي بتسوينه لكن ذنبك على جنبك
ابتسمت وعد : ماعليه اعرف متى اشيل ذنبي واعرف انه لاغلبني وطحت بتجي وتشيله عني
ضاق صدر خلف من كلامها واتجهه لها : وعد يا حبيبتي انا ما ابيك ترمين نفسك بمتاهه وكله عشان ما تبين عقاب
وعد : انا ماني راميه نفسي لكن اشوف نصيبي مع مبارك
ارتخى خلف بهدوء : قلت لك الشور شورك لكن انا ماني راضي
راح وتركها وهو مايبيها ترتكب جريمه في نفسها وتزوج مبارك عشان تكون في الحل الوسط وترضي كل الاطراف
وجلست وعد بضيقة صدري وهي تدري ان قبولها لزواج عقاب كارثه بتدمرها وتدمر اهلهم من بعدها لان مستحيل تسكت على ضيم عقاب وبعدها بتكبر المشاكل
ورفضها لعقاب يمكن يسبب زعل بسيط لكن تنحل القضيه بقول ان مبارك سبق وخطب ونصيب له حتى لو زواجها من مبارك سجن لكن افضل كثير
_______________________.
وفي بيت ضاري
انكسر ظهره ينظف ويعيد التنظيف مليون مره ويحوس ستين حوسه عشان يطلع المكان بأحسن وجهه وقف يناظر العشاء اللي بيسويه ولف على صوت امه: ياضاري خلني اسويه انا يا امي
ضاري: لا ووالله بسويه انا
ام ضاري : بس انت ما تعرف
ضاري: اتعلم ماهي مشكله
ام ضاري كانت بتعترض بس جلسها ضاري : انتي عطيني التعليمات وانا اطبق المهم خليك مرتاحه
ضحكت ام ضاري : يوم اقولك خلني ازوجك عشان هاليوم يمه
ضحك ضاري : خلينا ننهي هاليوم وبعدين نفكر في الزواج
ابتدت تعطيه التعليمات وهو يطبق وانتهى تماماً من كل شي وهو ميت تعب لكن راضي
وركض يبدل ملابسه عن الحوسه قبل يجون
_______________________.
عند نادر
كان واقف ينتظر خلف وعقاب اللي بعد ١٠ دقايق ووصلوا
خلف : يلا
نادر بقلق: ايه
عقاب : وش فيك!؟
نادر : اسمعوا ما بنطول ساعه ونرجع
خلف : ليه!؟ نادر : ياخي مقدر اتأخر على شوق في البيت لحالها
عقاب : ياشيخ وش بيصير لها
نادر: عقاب الله يرحم والدينك لا تغثني وانت ما تدري وش انا فيه
خلف : تعال تعال ورا ما تجيبها عند البنات؟ تنسبط معهم شوي .
