الكاتبه والمبدعه / أديم الراشد .
.
خلف : تعال تعال ورا ما تجيبها عند البنات؟ تنسبط معهم شوي
نادر: ياخي ابوك قصه لحاله
خلف : مب شرط بيتنا تروح عند عماتي
عقاب : ايه بيت جدي مايقول شي
نادر : مامعنا وقت والله
خلف : معك وقت ارجع اخذها وانا بكلم البنات يلا بسرعه
ماعطاه خلف فرصه ورجع مسرع للبيت هو وعقاب وقالوا لهم بتجيهم ضيفه وفهموهم انها زوجة نادر ولازم ينتبهون زين
هيا: الله يصلحكم ليه ما قلتوا لنا على الاقل نجهز شي
مضاوي: وبعدين وش هالزياره بعد العشاء !
خلف: يا بنت الحلال لا تعتبرينها زياره اعتبريها جمعة بنات اسهروا واستانسوا لين نجي
هيا: خواتك يدرون
خلف: بقولهم الحين
رجع خلف ينادي البنات وبذات وعد ويقولهم عن شوق واستفروا البنات يجهزون
ونفس الاستنفار عند نادر اللي رجع لشوق اللي ارتبكت وانبسطت بنفس الوقت ولبست بسرعه وطلعت : نادر كذا تمام!؟ ناظرها نادر ببتسامه: تمام التمام
شوق: مدري احس فشله جايه هالوقت
نادر: ماعليه فالنهايه جمعة بنات وبتطمن اكثر
شوق : زين
نادر: زي ما اتفقنا لا تخلين احد يضايقك طيب
شوق : طيب
اخذها وطلع لبيت ابو ناصر وابتسم لخلف اللي ابعد وهو يقول : حياك الله وانا اخوك ادخلي
دخلت شوق وهي خايفه لكن استقبلتها مضاوي مبتسمه : حياك الله
دخلت معها شوق وشافت الكل مجتمعين ماعدا ام وعد اللي جالسه مع فيصل وتطمنت اول ماشافت وعد اللي قربت تحضنها ببتسامه
وتجمدوا كلهم اول ماشافوها صغيره ومنحرجه
_______________________.
عند العيال اتجهوا
لبيت ضاري على الوصف وهم ماعمرهم شافوه ولف نادر يناظر البيت الشعبي اللي نوعاً ما قديم : اذا هذا بيتكم ماني قايل الا حسبي عليك يا عقاب
عقاب : خير ان شااء الله!؟ وش دخلني!
خلف : وش اللي وش دخلك كفايه انك محرج الرجال ومجبره على العزيمه
عقاب بلا مباله: ماعليه نعلمه المرجله
نادر: اص يا ابو المرجله اص
دق الباب خلف وجاهم صوت ضاري من بعيد وفتح الباب مبتسم: حياكم الله
الكل: الله يحيك
ضاري: تفضلوا تفضلوا
دخلوا وهم ودهم يلفون على عقاب ويكفخونه وكان ضاري مرتبك شوي وواضح وراه شي شايل همه وجلسوا يتقهوون وضاري يروح ويجي للمطبخ باستمرار خايف ينحرق العشاء
عقاب : وش بلاك كأنك مقروص الظاهر ماتعودت تستقبل ضيوف
ابتسم ضاري بحده:لا والله متعود لكن مثلك عارف انا انسان ما اعرف اثني رجلي واجلس اهذر على الفاضي والمليان
لا والله احب اظهر بأفعال اكثر من كلام .
ناظره عقاب بحده وهو يوجهه له هالكلام للمره الثانيه اول مره وعد وهالمره ضاري وكلهم يصبون كلامهم في منبع ان عقاب صاحب كلام وبس لكن ضحك باستفزاز وقال: ايه صح تحب تظهر افعالك لكن بعد ما نمليها عليك بالكلام
احتدت النظرات واعتدلوا خلف ونادر تحسباً لأي مشكله بتصير : اذكروا الله كلكم ماعليكم قصور
ضحك ضاري وهو يصب القهوه: ارتاحوا يا شباب خلو عقاب على راحته
رجع ضاري يتجاهل عقاب وهو وده يتوطى بطنه وهالشعور مشترك من الكل لكن عقاب كان مبتسم بنفس الاستفزاز
_______________________.
في الكويت
كانت اجواء الفرح تعم المكان والحضور اكتمل وليلى مثل عادتها ماسكه الرقص وتصوير وماهي مقصره وفرحانه لشيخه وبتموت من فرحها
كانت تنتقل بين الحضور اللي كانوا من العايله والحفله عائليه بسعة صدر ووقفت وهي تثبت الكاميره وتنتظر دخول جاسم وهي لابسه عبايتها ومتحجبه ودخل معه جابر اللي التفت لليلى ببتسامه: صوريني وياهم
ليلى: زين روح
ودخل ابو نهيان ونهيان وبدت المراسم والكل مبسوط وليلى تسمع كل وحده تبارك تقول : عقبال ليلى
كانت بالارج بتقول : امين
لكن في نفسها شعور يخليها تخاف من هالدعوه دام نطاق تفكيرها صار محكور على خلف هالايام
ابتسم وهي تسمع صوت جابر يناديها عشان تكون بالصوره معهم وابتسمت ودخلت معهم
وبعد فتره طلع جاسم عشان يترك لهم الحريه
وقالت ام بدر عمتهم: عقبال ليلى
ورفع جابر يده بضحك : يارب يارب تسمع وتستجيب يالله
ضربته ليلى بقهر: خيييير شنو فيك حاط دوبك من دوبي
ام نهيان: يدعي لچ
ليلى: مابي هالدعوه
نهيان: لا والله ما نبيها الحين استغفر للله بس كفايه علينا شيوخ
مريم: لا تحسد اختك الخير
نهيان: مو حاسدها الله يبارك لها لكن زواج البنات صعب صعب
ضحكت ليلى: كفو اخوي اللي يقول الكلام السلام
ابو نهيان: ماعليه هاذي سنة الحياه
جابر: اوووه باعچ ابوي اخيراً
ليلى: افا يبه
ضحك ابو نهيان وهو يحضنها ولفت شيخه باحراج اول ماحضنها ابوها بعد
ام بدر : ابو نهيان يا اخوي متى بتردون السعوديه!؟
ابو نهيان: بكره ان شاء الله
ام بدر : مو چنه مبكر
ابو نهيان: عندي شغل بخلصه بدري و ارد
ام بدر: زين
ورجعوا يكملون الحفل والكل مبسوط وليلى ودها يجي بكره وترجع لسعوديه
_______________________.
وفي بيت الجد قايد
الكل جالس بصمت يناظرون شوق اللي ما تناظر احد ما ترد على احد
ام ناصر : حياك الله يا شوق
شوق : الله يحيك يا خاله
ام خلف كان مصدومه من شوق وضايق صدرها عليها لكن كانت تحاول تهون عليها: كيفك يابنتي كيف اهلك وكيف نادر
شوق : حمدلله كلنا بخير
وعد كانت مبسوطه ان شوق بخير زي ما تشوفها لكن ماكانت وعد تبين ضيقها وحزنها : شوق هذولا خواتي اللي قلت لك عنهم
بدت تعرفها بالكل وشوق مبتسمه بعد نص ساعه راحو الكبار وبقوا بس البنات
وقربت عهد : شوق كم عمرك! معليش على السؤال بس شكلك مايعطي انك انسانه متزوجه
ابتسمت شوق بخجل : انا عمري ١٥
قالت مضاوي تبي تغير جو الرسميه وتقلب الموضوع ضحك: عطيني السر اللي خلاك تزوجين بهالسرعه لان كل الشله اللي جالسين قدامك عوانس
ضحكوا البنات ولفت اماني بمزح: افا يا مضاري شصار على الچويتيين !
مضاوي: هنا مربط الفرس ابي حل سريع يجيبهم
هيا بفشله: ماعليك منهم ترا كل وحده اخبل من الثانيه وهذا سبب العنوسه
ضحكت شوق: لا عادي
وجدان: يعني انتي بعمرنا تقريباً
شوق: ايه
شهد: وخلصتي دراستك!؟ شوق ابتسمت : لا ماكملت بس نادر يقول بكره نروح ناخذ اوراقي واختبر
ابتسمت وعد بفرح: حلوووو يعني نادر ماعنده اعتراض
ابتسمت لها شوق بحب : لا بالعكس رافض اني اتركها
تطمنت وعد على شوق كثير وقالت سحر : ليت نادر يعطي عقاب شوي من تفكيره
عهد : عقاب تفكيره منطقي
طنشوها كلهم ورجعوا لشوق يسولفون معها ودخلت معهم ورغم انها شايفه شرود وعد الا ان وعد ثابته وما اهتزت رغم العواصف اللي داخلها
_______________________.
في بيت ضاري
الجو كان راكد وسوالف وبعد شوي جاء تركي اللي ابتسم اول ماشاف خلف وسلم عليهم
ضاري : هذا تركي هذا نسميه سلطااان المشاعر والفن
ضحك نادر: واااضح طال عمره وجهه سمح
تركي : الله يسلمك
خلف: خذوها مني شهاده يا عيال اللي ضايق صدره يجلس مع تركي يغني له
نادر: لا تجيبون لي طاري الضيقه والا بجلس عنده ١٠ سنين قدام يغني لي
تركي: افا بالخدمه يا معلم
ضاري : نادر صدقني بينفعك انت بذات
عقاب كان ساكت يناظر تركي وضاري وكارهه تركي من كرهه لضاري وماكان يرد ويناظر الساعه غالب الوقت وانتبه له ضاري وابتسم: اقول عقاب عسى ما أخرناك على شي!
عقاب : لا ابد انا فااااضي لك وقاعد على قلبك صدقني
دقه خلف بكوعه وهمس ( عقاب مصختها خلاص)
ضاري : لا ما عليك مصدقك دامك عازم نفسك اكيد فاضي .
حس تركي ان فيه شوشره بالجو وقطع السالفه وهو يقول: ضاري كيفها امك بعد ماكانت تعبانه
لفوا كلهم لضاري وهم مايدرون ان امه تعبانه ومع ذلك مستقبلهم وهم يعرفون انه وحيدها
ضاري : حمدلله احسن اليوم
خلف : ضاري شفيها امك!؟ نادر: ليه ما قلت انها تعبانه عشان نأجل العزيمه على الاقل
ضاري : ماله داعي هي بخير الحين بس تعب الكبر
بحسن نيه قال خلف : وانا قلت لك العشاء نبيه بالبيت وتعبناها الله يطول بعمرها
ضحك تركي : لا ماعليك يا خليف ضاري هو اللي يطبخ امه الله يسعدها ما يخليها تسوي شي
التفت له ضاري وهو يأشر له يسكت وقال تركي بسرعه: يعني ضاري يحب امور الطبخ
لف نادر يناظر خلف وتفشلوا من جيتهم وواضح حوسة ضاري اللي يغيب فترات ويرجع
هالمره بس اللي حس عقاب انه ماله داعي وتفشل وهو توه يحس انه ضغط على ضاري بهالعزيمه
بالقوه تحملوا لين نزل العشاء وكان بسيط وتعشوا وحلف ضاري مايرحون الا بعد الشاهي
كان تركي ينوب على ضاري في المجلس لين يرجع لكن رجع ضاري مبتسم ووقف على الباب : يا شباب امي ودها تسلم عليكم
لفوا كلهم على بعض منحرجين ايه يعرفون اطباع الناس قديمين والكبار بس مستكثرين انها تعبانه وجايه تسلم عليهم اما تركي متعود
وجات ام ضاري اللي لابسه جلالها الطويله غطاها وهي مستنده لضاري : سلام عليكم
فزوا كلهم واقفين : هلا والله
ام ضاري :وشلونكم ياعيالي
الكل: بخير حمدلله
خلف : العذر والسموحه ياخاله جينا في وقت ماهو مناسب لكن ضاري الله يهديه ماقال انك تعبانه والا كان نأجلها
ام ضاري : ابد والله جيتوا في وقتكم وحياكم الله في بيت اخوكم وانا بخييير دامني اشوف ضاري بخير معكم
ابتسم ضاري لها وقال نادر: الله يخليه لك ياخاله ونعم التربيه ونعم الرجال ضاري والله يمد بعمرك ويحفظك له
الكل: اميين
تركي بضحك: الله ياخاله سمعت انك بتزوجينه زوجيني معه تراني وليدك بعد
ضحك ضاري : قايلك لا تحسدني
ام ضاري : الله يرزقكم كلكم
ولفت تشوف عقاب المتكتف وبانت في ملامحه الضيق وصاد ولا يشاركهم كثير
والحال انه تضايق من نفسه وتضايق اكثر وهو يشوف حب ام ضاري له وضاري بعد وحن لامه ولابوه وحن لهالمشاعر الطيبه والحنينه
ام ضاري لعقاب: اقول ياوليدي عسى ما ضاري مضيق صدرك ولا ماعجبك عشانا
لفت عقاب بذهول لها ولحنية صوتها: لا والله ياخاله كثر خيركم
ضاري ببتسامه: والله لا تجيبين طاري الشكاوي له ترا قلبه مليان علي
عقاب: يعني ياخاله ولدك يبي له قرصة اذن تعدله شوي .
ضحكت ام ضاري : اعرفه اعرفه لكن انت ما انت بعيد عنه ( تقصد انه يشبهه ضاري في تصرفاته)
نادر: اي والله ياخاله ما نجلس معهم الا يتهاوشون كل واحد اردى من الثاني
ام ضاري ببتسامه: ايه ماعليه مهما تهاوشوا يبقى زعل اخوان
خلف : صدقتي لكن لا تعبين نفسك اكثر وارتاحي
ام ضاري : مرتاحه لكن قلت بشوف هاللي طاير فيهم ضاري تركي ونعرفه وهذا حنا عرفناكم وودعناكم الله
راحت وخلت وراها ابتسامه على وجيه الشباب لكن عقاب كان ممتلي حزن وحنين
اخذ اغراضه ولف بهدوء: كثر خيرك يا ضاري
ضاري : خير الله اجلس ساهرين
عقاب : اكتفيت من شوفة وجهك الرضي
نادر: وش ذا الخضوع
ضحك ضاري : لا يغرك لسانه الحلو هذا اسلوب تخفي
تركي : بالله تهاوشوا دايماً خلوني اوسع صدري شوي
خلف : فاضي ياتركي حنا يالله نركدهم
نادر: المهم ياضاري مشكور وتعبناك معنا وبعدين لا عاد تخبي شي
ضاري: ابشر
نادر: خلنا نشوفك تركي وانا بذات ابيك بكلمة راس
ضحك تركي: كلمة راس تحتاج العود!؟ نادر: عود ومناديل بعد
تركي: وضعك خطير
خلف: لا تعطيه وجهه تراه يحب الدراما، يلامع السلامه
طلعوا كلهم وتركوا ضاري اللي رجع منهد حيله نظف الحوسه وبعدها دخل في دوامة نوم
_______________________.
وفي بيت نادر
بعد ما اخذ شوق ورجعوا لبيتهم ارتمى بتعب وجلست شوق بجنبه بهدوء وهي مبتسمه : هاه انبسطت فالجلسه
تكى نادر على ذراعه: انبسطت لكن تفشلت اكثر
شوق: ليه !
نادر: سالفه طويله ودي اني مسكت عقاب قبل يروح وغسلت شراعه لكن اختفى قبل اصيده
شوق ضحكت: عقاب اخو البنات وواضح من كلامهم انه اقشر
نادر: الله يصلحه غربل نفسه والعالم معه
شوق: طيب وش صار!؟ نادر: عقاب مايطيق ضاري وفي كل فرصه يحاول يحرجه ويصغره قدام الكل وعاد عقاب حقده شييييين المهم انه طال عمره عزمنا عند الرجال بدون ما يستحي ووافق ضاري لكن المسكين طلعت امه مسكينه تعبانه وهو يكرف بالطبخ والبيت لحاله وحالته بالويل وعقاب مازال يشوف نفسه ماسوى شي الا انه يعلمه المرجله على قوله
شوق : ماله داعي عقاب مهما صار لا يحرج الرجال
نادر: هذا اللي مخليني ودي اكفخه
شوق : عاد خواته وعماته يجننون
بحركه غير متوقعه سند نادر راسه لحضن شوق للي ارتبكت وقال بدون ما ينتبهه: كيف شفتيهم سولفي لي يعني وش صار
تداركت شوق ارتباكها وهي تحاول تهدي خجلها وبدت تسولف له عن البنات وشخصياتهم وسوالفهم وكيف انبسطت ونادر مبسوط انها اخيراً حصلت احد تستانس معه
_______________________.
وفي مكان بعييد
على اطراف الشاطي البعيد كان هناك عقاب اللي من سنييييين جمد مشاعره ومايبي يشوف اي موقف يحركها كان يتعمد يبعد عن اي شي ممكن يجدد حنينه وشوقه لأمه وابوه كان يجاهد نفسه عشان ما ينهار وهو للحين في قلبه مرارة وحرارة الموقف اللي ودع فيه امه وابوه سوا يتذكر بروده اجسادهم اول ماقرب يحتضنهم ويبوس راسهم وينقلهم لمثواهم الاخير يتذكر ثقلهم على يدينه الصغيره
غمض بقووووه وخنقه كان يحاول ما يبكي لانه لو بكى بينهار ! بيموت ومايقدر يوقف نفسه زي ما وقفها طول هالسنين وهو يتجاهل كل شي ويحط حيله في اخوانه وتربيتهم وكيف لازم يكونون وكيف لازم يخاف عليهم وهو يتذكر! هل سوا شي لاخوانه!؟ ولا كل افعاله مجرد كلام زي مايقولون
شد على صدره بحرقه يحاول يهون على نفسه: خلاص يا عقاب خلاص وش الفايده من انهيارك الحين ! ياعقاب صبرت سنين لا تترك نفسك الحين !لا ضاري ولا حتى وعد يقدرون يهزونك خلك مثل ما انت خلك قوي خلك عقاب
قال كلامه الاخير وما كمل صوته انقطع وانثنى جسمه من ثقل حزنه وبكى .. بكى شوق لأمه وشوق لابوه كان وده لو امه عايشه وتحضنه ام خلف اذا حضنته وتدعي له مثل ام ضاري اذا دعت له
في اخر مراحل التعب بدا يستجمع نفسه عقاب ووقف وهو يمسح دموعها بطرف شماغه اخذ نفس ومشى وترك هالانهيار المتعب عند البحر اللي في كل فتره يحس عقاب انه انهلك يجي هنا ويطلع كل شي بقلبه ويرجع للبيت
_______________________.
ومن بكره
كان بكره منتظر للكل منهم اللي ينتظره بشوق ولهفه للاحداث الحلوه اللي ممكن تصير فيه
ومنهم اللي ينتظره عشان يرمي الثقل اللي على كتفه بكلمه
بداية اليوم كانت فالكويت ..
كان ابو نهيان واقف وهو ينادي : يلااا يلا وينكم
طلعت ام نهيان: خلاص جينا
طلعت ليلى تركض لحماسها المعتاد : انا خلصت يبه
ابو نهيان: وين اخوانچ
شيخه: انا هنيه يبه
ابو نهيان : ويييينك يا جابر
طلع جابر بتعب : يبببببه ليش مطلعنا من صباح الله خير
ابو نهيان: متى تبي تطلع ان شاء الله ،يلا بس يلا
ركبوا كلهم واغلبهم ناموا بما ان الوقت مبكر الا ابو نهيان اللي يسوق وليلى اللي في اخر مرتبه بالسياره كانت مرتخيه بهدوء بتنام لكن تذكرت رسالة خلف وكيف بترد عليه!؟ ترد ولا ما ترد !؟ كيف بتتصرف بس لازم ما تسكت على اللي سواه وعلى جرائته المرعبه دق قلبها بخوف اول ما تذكرت الموقف
ومن هالمنطلق بدت تدور رد قاسي يوقف خلف عند حده
_______________________.
في بيت ابو خلف
الكل مجتمعين على الفطور وهادين مافيه الا صوت ام وعد تجبر فيصل يفطر زين عشان تتشافى رجله بسرعه
وغيث يسولف لخلف لكن كسرت وعد الصمت وقالت: يبه
لف ابو خلف : نعم!
وعد بغصه : انا موافقه على مبارك
الكل رفع راسه يناظرها بذهول ولف ابو خلف بغضب: والله !؟ ترفضين عقاب وترضين بمبارك الغريب
وعد : اذا رفضت عقاب بتطيح الدنيا على راسنا
ام وعد :انهبلتي انتي عقاب اقرب لك
ابو خلف : وعييييد حطي عقلك براسك واعرفي وش النعمه اللي ترفسينها ولا بتسوين مثل سحر!؟ وعد : انا ماني سحر هذا واحد ! وانا مابي عقاب مو غصب
خلف : وعد وعد بس
ابو خلف : انتي مجنونه الظاهر اني عطيتك وجهه ليييييين طغيتي
خلف : يبه نرجع نقول السالفه ماهي غصب واللي ينطبق علي ينطبق على وعد وعقاب وبعدين كلنا نعرف لا عقاب يصلح لوعد ولا وعد تصلح له
ابو خلف : وانت صفيت معها
فيصل : انا صاف معهم بعد
وعد : اذا ودك تخسر عيال اخوانك وبنتك زوجني عقاب وانت تدري وش العواقب
ابو خلف : تهدديني انتي!؟ وعد : انا ما اهدد لا بالعكس مو اكلتوني ما تزوجتي وماتزوجتي هذاني اقولك موافقه على مبارك
ابو خلف بغضب: زيييين ياوعد زيييين لكن من الحين اقولك اذا حصل وتزوجتي مبارك وجاء يوم وشفتي منه الضيم لاتجيييين تقولين افزع يبه
ضحكت وعد : لا تشيل هم يا يبه انا ادبر نفسي
راحت ولف ابو خلف على خلف : انا ما اقولك عقلها!؟ والحين جاي تقول ماهو غصب
وعد : ولنفترض اني عقلتها مثل ما تقول افترض إنا اجبرناها على عقاب !؟ تخيل بس وش بيصير دام عقاب نار وشرار ووعد مثله!؟ كيف بيعيشون! تخيل المشاكل اللي بتصير يبه!؟ تخيل الكارثه اللي بتصير
انت تعرف وتعرف زيييين ان وعد ما تنجبر واذا انجبرت بتقوم الدنيا ولا تقعد
ابو خلف : هذا كلامك انت بعد ! زييييين يا خلف زييين خلك انت وياها على رايك بس من الحين اقولك انا مالي شغل فيها انت المسؤول عن اللي بيصير لها
ام خلف : يا ناصر اذكر الله ان شاء الله مايصير الا كل خير
طلع ابو خلف وتركهم ووقف خلف بضيق
ام وعد : الله يسامحك ياخلف كان ما طعت وعد وكلمتها وهي تسمع منك
خلف : ياعمه ياعمه الموضوع ماهو ميانه وتسمع مني الموضوع حيييييياه ومستقبل ومايصير اللي تقولينه
فيصل: خلف صادق لا عقاب يصير لوعد ولا وعد تصير له
خلف : هذا هو
ندى: بس مهما كان ما توافق على شايب !
خلف: هي تقرر وش تبي محد له شغل
اخذ اغراضه وطلع وهو محتاااس تفكيره بعد
_______________________.
وفي بيت الجد قايد .
كانوا مجتمعين على الفطور ودخل عقاب اللي توه يرجع وكان واضح عليه الزعل والضيق
ام ناصر: عقاااب وينك من اليوم اشغلتني افكر فيك
عقاب :كان عندي شغل
ابو ناصر: وش الشغل اللي من تالي الليل للحين
صد عقاب بضيق :مهمه في الدوام
سحر: عقاب تعال افطر
عقاب: ما ابي وابي انام ولا احد يزعجني
مضاوي : ماشاء الله جاي بشياطينك
مارد عقاب اللي طلع وتركها وهذا شي خطير بالنسبه لهم
ابو ناصر:سحر يا بنتي شوفيه لا يكون مريض او فيه شي
سحر: ابشر
مضاوي: لا لا انا بروح له اعرف له
طلعت تركض للغرفه ودخلت وهي تشوفه مرتمي على فراشه بكامل ملابسه وذراعه على عيونه وقال بصوت منزعج :وش قلت انا!
مضاوي :عقاب وش فيك ! صاير شي!؟ ليه متضايق هالكثر
عقاب : مافيه شي يا مضاوي تعبان وبنام
مضاوي : من قالك اني بزر ولا خبله تلعب علي بهالكلام
سكرت الباب وقربت وهي تسحب ذراعه بحذر: عقاب حلفتك بالله تقول وش فيك
ابعد عقاب يناظرها بضيق : مافيه شي ومتهاوش مع واحد من الشباب
مضاوي : من هو !؟ كلهم اثنين يا خلف او نادر
عقاب : لا لا واحد ثاني
مضاوي : الله اكبر يا عقاب من متى والناس يهزونك ويضيقون صدرك! ماخبرتك تزعل الا على الشديد القوي
عقاب تنهد بضيق وابعد : مالك فالخوافي داعي يا مضاوي
مضاوي: افا يا عقاب ! من متى صارت لك خوافي بعيد عني !
عقاب : والله مافيه شي بس تكفين ابي ارتاح
مضاوي : على راحتك
طلعت وهي متوقعه وش سبب ضيقه ممكن تكون لها علاقه بأمه وابوه
_______________________.
وعند
نادر من بدري طلع متجهه للحفر ووقف اخيراً عند مدرسة شوق اللي لفت تناظره بارتباك وهو للمره المليون يحفظها اللي بتقوله وترتبك وتنسى
نادر: شوق اسمعيني خلاص اطلعي لهم وقولي ان زوجي بيكلم المديره وانا اتفاهم معها
شوق : طيب
نزلت وهي خايفه يرفضونها دخلت بهدوء وهي تناظر المعلمات وصاحباتها قربت تسلم عليهم بفرح وبعدها اتجهت للمديره وطلبتها تكلم نادر اللي استعد وودخل بالموضوع بلباقه وفطنه ورسميه ما اعتادها من نفسه والنتيجه انه فعلاً قبلوا العذر وفعلا اعطوها الاوراق وطلعت شوق بتطير من الفرح وركضت لسياره وركبت
نادر:هاااه نقول مبروك
شوق : ابشررك وافقوا وافقوا
نادر ضحك: ماشاء الله حمدلله
شوق:بس ماعطوني كتب جديده
نادر:ليه وين كتبك انتي!
شوق : رمتها امي لانها متوقعه اني ماعاد بدرس
صد نادر بضيق: ماعليك اجيب ادبر لك كتب جديده
ابتسمت شوق ورجعت لمكانها ببتسامه ووهي تتخيل حلمها وكيف بتصير .
وكان نادر متطمن لاول مره يحس انه سحااابة خييييير ويالله يازين هالشعور اللي يحس فيه
رجع على طول للخفجي لانه مايبي يجلس بالحفر
_______________________.
وفي الدكان
كان هناك خلف اللي بعد ما تكسر يومه بموافقه وعد على مبارك صار وقت انه يلف ويسأل عن مبارك اخذ اغراضه وطلع متجهه لمقر عمله
لكن على مدخل الحاره وقف مبتسم اول ماشاف سيارة ابو نهيان توهم واصلين وجابر واقف ينزل الاغراض ابتسم وتقدم وهو يرحب فيه: حي الله جابر نورت الديره
ابتسم جابر وهو يسلم عليه: الله يحيك يا خلف شلونك عساك بخير
خلف: بخييير الحمدلله ، طمني عنك وعن الوالد واهل البيت
جابر: حمدلله كلنا بخييير
خلف يمازحه لكن طالع الكلام من قلبه : طولتوا علينا يا جابر
ضحك جابر: تعود يا رجال هالمره جايين اسبوع وبنرد الكويت
خلف : افا ، ليهه ماجازت لكم ديرتنا
جابر: لا والله ماكو احسن السعوديه لكن عرس اختي قريب وعقبال الافراح عندكم
نسى خلف كل شي وركز على اخته نسى انه ممكن يكون عنده اخت ثانيه يمكن ما تكون ليلى نسى كل الاعذار وضرب قلبه بقوه ونشف ريقه اخذ نفس بالقوووه طلعه من صدره قال بصوت هادي: والله !؟ ماشاء الله
جابر : اي والله عاد انت عارف الحوسه اللي بتصير ولازم نكون بالكويت الفتره الجايه
خلف لللي تمالك نفسه لا يقول اختك مييين لكن لف بهدوء: الله يهنيكم ويلا انا اترخص
راح ما سمع رد جابر ولا يهمه يسمعه كان تفكيره في ذهول !؟ كان ينتظر بحماس رد ليلى! لكن ما هقى ان الرد بيكون بهالقسوه كلها
رجع لدكان وهو تدور فيه الدنيا كل شي شين طرا له لكن صحى من غيبوبة الصدمه على صوت ممدوح: خلف خلف
لف يناظره بهدوء : نعم
ممدوح: تكفى بروح لمشوار ضروري والبقاله مافيها احد ابوي ماهو فيه ! تجلس فيها لين اجي!؟
خلف : ابشر
راح ممدوح واتجهه خلف للبقاله وهو متضايق وجلس بغضب: هذا اللي كان ناقصني يا ممدوح
_______________________.
وفي بيت النوخذه
طلع ابو نهيان بعد ماقال لهم يجهزون الغداء ودخل جابر ينام وشيخه بعد والكل تعبان لكن ليلى كانت جالسه بهدوء ومافيها نوم لفت على صوت امها:ليلى تروحين وياي
ليلى فزت: ايييه بس وين!
ام نهيان: البيت يصفر مافيه شي ينطبخ وبروح حق الدكان
ليلى: ابشري اللبس واجي
ركضت ولبست ونزلت وهي روح حياتها المشاوير وطلعوا متجهين للبقاله وليلى اللي اول مادخلوا مدخل السوق لفت تناظر محل جد خلف لكن شافته فاضي مافيه الا الجد وخلف ماهو فيه .
ارتاحت شوي انها مارح تقابله لكن كان ودها تشوفه
دخلت امها محل الخضار اللي جنب البقاله وقالت وهي تعطيها ورقه: ليلى روحي الدكان خذي هالاغراض بسرعه زتچ
ليلى:طيب
دخلت ليلى بدون ما تلتفت وعينها تدور الاغراض اللي بالورقه
كان خلف مستند على نهاية المكتب ضايق ويفكر ! وش بيسوي! وكيف بيعرف اذا ليلى فعلاً تزوجت
لكن لف على اللي نزل الاغراض على الطاوله وجمد وهو يناظرها يصدق يكذب !؟ ( لا لا! انا اتوهم وش يجيب ليلى هالحزه للبقاله )؟
فز اول ما تأكد فعلاً انها ليلى اول ماقالت: خلف!!؟ لا شعورياً وقف بذهول : ليلى!
لفت ليلى بصدمه: شجابك هنييييه شتسوي!؟ خلف : انتي اللي وش جابك!
ليلى: شنو هالسؤال ابي اغراض وجيت الدكان انت شتبي فيه!
خلف: جيت بدال ممدوح لانه مشغول شوي
ارتبكت ليلى اول ما استوعبت انهم فالبقاله لحالهم بدت تجمت الاغراض بارتباك : كم فلوسهم!
اخذها خلف وهو يعد مليون مره ولا يقدر يطلع معه ناتج ونزلها بغضب وتجرأ وقال: سمعت انكم راجعين للكويت ووراك زواج
رفعت ليلى راسهت بذهول : وانت شكو! لو سمحت ابعد عني وترا للحين مانسيت اللي سويته اخر مره ولاتثق واجد بصداقتك ويا جابر اخوي لو قلت له عن اللي تسويه راح يذبحك
اخذ خلف نفس : اعرفي اني ماني خايف من احد وانا واثق جداً اني اقدر اسبقك واكلم جابر
ليلى بردت اطرافها بذهول وقبل تسأله وش بيقول لجابر لفت على صوت امها: خلصتي يمه !
اخذ خلف الاغراض وهو يعطيها اياه وطلعت ليلى الفلوس ونزلت بخوف وطلعت مع امها وهي خايفه من كلامه ( هذا شنو دراه ان عندنا زواج ، ياحسرتي وش بيقول لجابر!؟ حسبي لله عليك يالعيار حسبي لله عليك )
رجعت للبيت وهي تحس انها بتطيح في اي لحظه من الخوف ان خلف يكذب على جابر او يقوله ان بينهم رسايل
_______________________.
اما خلف
ما بردت حرته وهو للحين مايدري اذا ليلى بتتزوج او لا هذا غير كلامها الحاد معه والاسوأ انه قال كلامه الاخير ما كمله وصار كأنه تهديد
طلع من الدكان وهو شبهه بمخنوق وجاء ممدوح ورجع خلف للبيت وهو يحس ان بدت معه مرحلة نوبة ربو
وصل البيت ودخل وهو ينادي وجدان اللي جت تركض:هلا
خلف وهو يتنفس بسرعه: جيبي دواي بسرعه
ركضت وجدان وجات حنان: خلف بسم لله عليك وش فيك!؟ طلعت ام خلف ورمت اللي بيدها اول ماشافت خلف مفتح ازاريره وجالس وهو انفاسه سريعه ويكح :خلف خلف وش فيك
جات وجدان وهي تعطي الدواء ام خلف اللي بدت تعطيه خلف وتهويه
والكل ابعد عنه لين اخذ نفسه وهدت النوبه وهو منسدح على رجل امه وهو منهد حيله .
