الكاتبه والمبدعه / أديم الراشد.
.
_________________________.
عهد : ايييه مالهم امان الرجال
سحر: قهر على خالاتي
هيا: والله ضاق صدري عليهم حتى العيال مقهورين وخلف اول مره اشوفه متضايق كذا
شهد: طبيعي بينقهر هاذي هي من يوم طبت البيت انطردوا من غرفتهم
مضاوي: وششششو وطردهم بعد
سحر: ايييه بيجهز الغرفه لعييين السيح
مضاوي : هذا يبيني ارووح اطربق البيت على راسه وراسها
هيا: اهجدي بس
اخذت مضاوي اغراضها ونزلت تركض لكن وقفها صوت محمد: مضاوي تعالي وين رايحه
مضاوي: بشوف وش مهبب ابو جهل
ضحك محمد : تعالي خلييه وش تبين فالمشاكل
ام ناصر: احكي بأدب عن اخوك
مضاوي : للله يسلمك يمه اخوي ما خلا ادب واحترام
عقاب: اص اص وش دخلك انتي يتزوج يطلقق رجال عاقل وعقله براسه امشي
محمد وقف وسحبها وهو يجلسها: خليينا منه علمينا عنك
انمغصت مضاوي : وش اعلمك !؟ ابو ناصر : ننتظر ردك ولا نسيتي
مضاوي توترت وتفشلت ونست اصلا سالفة ضاري مع هالكارثه لكن اول ماشافت الكل يناظرها لفت تناظر عقاب اللي يناظرها بتركيز وقالت في لحظة توتر وخوف : موافقه دامكم موافقين
ابعد محمد وهو يضحك: ايييه قولي كذا
ابو ناصر: الله يبارك لك
ابتسم لها عقاب اللي كان في قرارة نفسه يشوف ضاري رجال كويس لكن المكابر عنده اخذ دور
وتبدلت السالفه لخطبة مضاوي وكيف بيبلغون ضاري بالموافقه
_______________________.
في بيت النوخذه
نزلت ليلى وهي في قمة روقانها والفضل يرجع لخلف اللي ما تقرا كلامه يرفرف قلبها
شافتهم على الفطور وركضت وهي تبوس راس ابوها وامها
ام نهيان: لا عاد تأخرين على الريوق
ليلى: من عيوني
جلسوا بصمت وجابر ساكت وابوه بعد لكن فجأه لف ابو جابر وقال: كلم خلف ياجابر
لف جابر ونزل الشاهي : اكلمه بشنو !؟ ابو نهيان: ما تقول لقيت العروس كلم خلف يكلم ابوه ان اليوم بنزوره
استبشر جابر ولف بفرح: صچ يبه
ليلى صفقت بضحك : اللللله الللله اللله
ام نهيان ابتسمت بفرح: مابغينا نشوف هاليوم
فز جابر يبوس راسهم بوناسه: مشكور يبه والحين اكلم خلف
ابو نهيان: اركد اركد
جابر: ابشششر
ترك كل شي وركض وهو فرحان لانه من ايام يطري له طيف اماني وبدا فعلاً يحطها براسه زوجه وعروس
ولفت ليلى ببتسامه: يارب يصير نصيب
ابو نهيان: استانستي واجد!؟ ام نهيان: ايييه مو رفيچاتها وماي عيونها
ابتسمت ليلى وهي في نفسها تقول ( كل شي قريب من خلف بيصير ماي عيوني ) : بعد عمري والله
ابو نهيان: انا رايح البحر بشوف السفن والبضايع
ليلى بود : تاخذني وياك يبه .
ام نهيان: بنت انتي شنو!؟ صبي انتي صبي شنو يوديچ للسفن قعدي اشوف
ليلى: يببببببه
ابو نهيان: قومي قومي وياي
ام نهيان: وي ياحسرتي ما ادري شلون بربيها وانت مدلعها چذيه
ركضت ليلى تضم ابوها بفرح: لله يخلييييه لي طول العمر
ابو نهيان: يلا زتچ
ركضت ليلى تلبس وهي فرحانه وام نهيان بدورها فرحانه ومبسوطه
_______________________.
وفي السوق
طلع خلف من بيتهم ضايق صدره مافي يده شي يسويه لكن اقل شي لازم يبعد عشان مايطق من القهر جلس بالمحل بغضب وهو متكتف ويفكر بس في حل يتفادى فيها هالبلوه للي في بيتهم
وفي عز اندماجه بهمه صحى على صوت دق على باب المحل ووقف ببتسامه: حياك الله
جابر: الله يحيك شلونك خليف
خلف:حمدلله انت شلونك
جابر: زييييين
خلف ابتسم: المزاج اليوم رايق
ابتسم جابر: اي والله وصراحه جاي لك بتكلم معك بموضوع
خلف : وشو تأمرني
جابر بتردد : ما يأمر عليك عدو وظالم لكن.. خلف : لا تستحي يا جابر
جابر بحرج: الحقيقه يا خلف انا ناوي ازوركم انا والوالد اليوم
ضحك خلف: وكل هالحيا عشان بتزورنا حياك الله في اي وقت البيت بيتك
جابر : لا مو هذا قصدي
خلف : وشو !؟ جابر : بنزوركم خطاب
لف خلف بكل قوته لدرجة ان كاس الشاهي اللي قدامه طاح وانكب
وقف بسرعه يتدارك الوضع وارتبك جابر من موقف خلف اللي ابد ما توقعه كذا
اما خلف اللي كان كأن احد ضربه كف بكل قوته ما استوعب وهو يقلب في راسه السالفه وقال بذهول : مييين اللي بيخطب!؟ جابر ارتبك: انا يشرفني اطلب وحده من خواتك شافتها امي وقلت اتكلم وياك قبل
انقطع نفس خلف مايدري الموضوع صدفه او وشو وش جاب جابر لخواته!؟ وهو كان يفكر كيف بيخطب ليلى وهل بيقبلون فيه او لا !؟ لكن اللي صار في صفه ولو تزوج جابر وحده من خواته زواجه من ليلى مضمون
جابر اللي حس ان خلف انخبص وارتبك قال بحرج: قلت شي غلط ياخوي !؟ خلف بسرعه : لا لا شدعوه لكن انصدمت يعني تعرف انه موضوع مايطري لا على البال ولا على الخاطر
جابر بحرج: انا صراحه لما قالت لي امي ان عندك خوات ما رفضت ابد وانا يشرفني انك ياخلف تصير خال لعيالي
بردت اطراف خلف وابتسم: الله يسلمك يا جابر وانت والله انك رجال كفو وتستاهل كل خير
جابر: تسلم
خلف : والله مدري وش اقولك بس حياكم الله والوالد يستقبلكم ان شاء الله
جابر : زييين يلا فمان الله.
خلف : فمان الله .
راح جابر وتجمد خلف على طاولته يقلب الموضوع اللي طير عقله ونساه سالفة ابوه وزواجه !؟ هاذي فرصة عمره ولا بتكرر وماهي بس فرصه هي قنبله بتنفجر بين يديه لو رفض ابوه وبتطير ليلى من يده
ماكان خلف ناقص حرب نفسي وجلس بضيق وهو شبه متاكد ان ابوه بيرفض لان ابوه مستحيل يقبل بزواج بعيييد مثل كذا
_______________________.
وعند ليلى
كانت مبسوطه لكن صدمها ابوها اللي اخذ طريق السوق يقول ان فيه اوراق بالمحل لازم ياخذها بس اخذتها حجه تشوف خلف
كانت تدوره بعيونها لكن شافته كالعاده طاولته عند الباب لكن مايشتغل هالمره سرحان وفي عالم ثاني
حاولت تلفت انتباهه لكن ماهو معها والضيق على ملامحه بينه لكن صحت على صوت ممدوح اللي يرحب في ابوها بصوت عالي: حياك الله يالنوخذه
وهنا لف خلف يناظر النوخذه لكن انصدم اول ماشاف خلف من معه وتناظره وقف بسرعه مايدري كيف جت له الجرأه ووقف واتجهه للبقاله
وكان ابو نهيان واقف يجمع له كم غرض من البقاله ودخل ليلى معه ودخل خلف بعدهم وهو يحوس حولهم واول ماشاف ابو نهيان مشغول اسرع وهو يهمس لليلى: ليه ماقلتي لي عن موضوع جابر
تجمدت ليلى بخوف ماتدري وش موضوع جابر هل يقصد خطبته او السالفه كلها مع اماني
ولفت تناظر ابوها اللي مشغول وهمست بخوف وارتباك: ما ادري عن شي
خلف بنفس الهمس : تدرين انه من صالحنا لو حصل نصيب
ولفت ليلى بهدوء وهي تناظر عيون خلف: واذا ما حصل!؟ شنو بتسوي !
خلف اول ما تمكنت نظرتها من قلبه ماعاد عرف وش يقول كان لها نظره جباره تهزه هز
لكن ابعد اول ما سمع صوت خطوات وترك ليلى اللي لفت لابوها اللي يناديها وطلعت وهي ماتدري وش نية خلف! ( وهي تدري لو ماصار بين اماني وجابر نصيب بيخرب كل شي وهنا اللي لازم خلف يثبت موقفه فيه)
طلعت وهي تدري انه واقف وراها ويراقبها
اما خلف ترك كل شي ورجع لدكانه وهو لازم يضبط وضعه سواء صار نصيب او لا ومستحيل يسمح ان شي بسيط يطير ليلى منه
_______________________.
وعند نادر
اللي من بعد اخر الكلام بين امه وابوه ركدت الامور ومبدئياً محد مزعجه ابداً او مزعج شوق
طلع بعد ما لبس وهو يسلم عليهم ولف يناظر شوق : طالع لخلف شوي وارجع
شوق : الله يستر عليك
ابو نادر: انا بروح معك اجيب اغراض البيت
نادر: زيين
طلع بعد ما ودع شوق واخذ طلباتها كالعاده ماكان ابوه يسولف معه او بينهم موضوع لكن سمع ابوه يقول : اللي انت تسويه غلط!؟ والدلع ماينفع ! بتخليها كذا بكره ماتقدر تسيطر عليها.
ناظره نادر بضيق: وش لازم اسوي يعني!؟
ابو نادر: تعرف اللي لازم تسويه زيين وعمرك يمشي يانادر وانا ابي حفيييد
اول ماوصلت المعلومه لنادر انحرف عن الطريق واتجهه لمحل خلف بضيق ومارد وهو رافض هالفكره كلها ومايدري متى بيتركونه بحاله وصل وشاف خلف مكتف بحيره
ضربه بخفه على كتفه: خليييف وش فيك يا سمح الخاطر ضايقٍ خاطرك
ابتسم خلف وهو يقول : اول شي بارك لي صرت خطابه كل من نوى يخطب جاء وكلمني
ضحك نادر: من خطب !؟ خلف: اول شي ضاري خطب عمتي !؟وثاني شي تخيل ان جابر ولد النوخذه جاي يقولي بنزوركم نخطب
اتسعت عيون نادر بصدمه: لحظه لحظه قبلل جابر !؟ ضاري متى خطب
خلف : عاد ضاري سالفته سالفه
نادر: سمعني ؟
خلف بدا يقوله سالفة ضاري وهنا انهبل نادر ووقف : خلف انت متأكد هالكلام!؟ خلف : ايييه
نادر: وشلون!؟ وماحسينا!؟ ولا احد جاب طاري!
خلف : هذا اللي صاير
نادر: طيييب! وش قالوا جدك وعقاب والكل !؟ اكيد رفضوا واكيد عقاب هالشين قلب الدنيا لقى له عذر الحين
ابتسم خلف : ماتصدق لو قلت لك عقاب ماعنده مانع
نادر: لا لا كذا كثيييييييير
خلف : لا وللله هذا اللي صار ! ترا سالفة عقاب سالفة مكابر وغرور لكن في نفسه يعرف ان ضاري رجال
نادر : يابعد عيني يا ضاري والله انه اجودي وطيب ومايستاهل الا كل خير
خلف: صدقت
نادر: و وش سالفة ولد النوخذه ؟! خلف : ابد يقول امه قالت له ان شافت خواتي وبتخطب له ووافق وجاي يقولي عشان يكون عندي خبر
ضحك نادر: بشره ان ابك بيقول اقضب الباب
ضاق صدر خلف وصد بضيييق:ااااه من ابوي الله يصلح ابوي
نادر : وش فيه بعد !؟ تنهد خلف بضيق: بارك لي ابوي عريس
نادر: وشووووو!؟
سحب خلف الكرسي وبدا يشرح البلاوي للي صايره لنادر
_______________________.
وفي مكة
كانت وعد تتمشى ومبسوطه وهي ملاحظه ان مبارك بالسياسه يجي وبكم كلمه حلوه ينسحب على وجهه
وهي الحييين صارت تفكر بماجد وسحر وكيف بتحل القضيه
لكن ما اهتمت لذا كلها وكرست كل جهدها ان تعتمر وتدعي ان الله يقويها على عقاب وعلى مبارك وعلى هالظروف الشيييينه
بعد ما خلصت طلعت لحالها للفندق بدون ما تنتظر مبارك
جلست وهي تتصل على بيت ابوها لكن محد يرد ورجعت تتصل وورد سالم: الوو
وعد : سالم كيفك ياحبيبي
سالم بفرح: وعدد انا بخير انتي كيفك
وعد : بخييير وين الناس ليش محد يرد
سالم بضيق: محد فاضي
وعد: ليش!؟ سالم بهمس ضايق: الكل متضايق ابوي تزوج وحده والكل زعلان
وعد وقفت بصدمه: نععععععم .
سالم بخوف : والله
وعد : متى صار هالكلام !؟ سالم : الصبح
وعد : رووووح ناد لي ندى بسسسرعه بسرعه
ركض سالم لندى وهو يسحبها: تعاااالي تعاااالي
ندى: وش فيييييييك
سالم : وعد تبي تكلمك
ندى شهقت: وشووو لايكون قلت لها شي
سالم: اي قلت لها
ضربت وعد رجلها بغضب: اللللللله يهديك يا سالم الله يهدييييك
ركضت وهي ترفع السماعه: وعد
وعد بغضب: وش ذا اللي يقوله سالم وش قصة زواج ابوي !؟ ندى بضيق : مثل ما سمعتي والله
وعد : شللوووون ابوي ماسواها وهو صغير بيسويها الحين!؟؟
ندى:هذا اللي صار دخل علينا الصبح وهي معه ولا احم ولا دستور قال هاذي عمتكم وسلموا عليها ومحد طبعاً راح لها وعصب وزود على كذا طلع اخواني من غرفتهم يجهزها لها
وعد : وششششششو ليه وين يبيهم ينامون
ندى: يقول بالمجلس
وعد : ماشاء الله هاذي بدايتها اجل
ندى: الا لا يوريك اياها يا وعد جايه والشر بعيونها والله مدري وش نيتها
وعد : تخسي هي ونيتها وان شفتوا منها شي لا تسكتون لها
ندى: امي وعمتي ضايقات مررره وابوي صارخ عليهم قدامها والوضع مكهرب
وعد : ماعليه يومين وبجي والله والله لحوس هالزواج انتظري بس
ندى: لا تقطعين سفرك عشان سالفة تافه خلاص شي وصار وش في يدينا
وعد : اذا جيت اعلمك وش في يديني
لفت على صوت مبارك: خلاص اكلمكم بكره
ندى : زين
سكرت وعد ولفت تناظره وقال مبارك بغضب: وشوووووله طلعتي من الحرم ماقلتي لي!؟ خليتيني افره عشرين مره ادور عليك
وعد بلا مبالاة: تعرف اني مقدر اجلس فالمسجد زياده وماحبيت اخرب عليك صلاتك عشان كذا طلعت وهذاني هنا ماطرت
مبارك: عدلي اسلوبك يا وعد
وعد بضيق: زييين متى بنطلع من مكه
مبارك بشك: مطولين ليه!؟ وعد: مابي اجلس زياده بنرجع للخفجي
مبارك: وانا هنا رجل كرسي!؟ مالي راي
وعد : قلت تبي تعتمر وتصلي وهذاك اعتمرت وصليت خلاص
مبارك : بجلس بعد ماشبعت
صدت وعد بكرهه وجلست وهي ماهي معه ابد تفكيرها باللي صاير في بيت اهلها
ولا اخذ مبارك ولا عطى لانه انهد حيله وتعب وهو يدور جميلته الفاتنه اللي صار فعلاً يحب يجلس يناظرها وبس مايبي اي شي ثاني
_______________________.
وفي السوق
كان نادر متكتف يناظر خلف وهو مايدري من وين يبدا ووين ينتهي
ابتسم خلف بضيق : يعني ضاري وقضينا منه وضعه مافيه نقاش
خلف : لا ياحبيبي الكارثه لو رفضوه حزتها كيف بتناقش مع ضاري وكيف بشرح له .
نادر: هذا شي ماهو بيدك اذا ماله نصيب انت ماتقدر تسوي شي
خلف : وجابر بعد
نادر: وش فيه جابر ! ضاري وقلنا معك حق توتر اما جابر ما انت مجبور تشيل همه !؟ اذا وافقوا تمام ما وافقوا الله يستر عليه
تنهد خلف وهي مايدري كيف بيقول لنادر سالفة ليلى لكن مارح يقول اكيييد وبيسكت
وكمل نادر: وابوك عاد الله يعينكم تشوفون حل
قبل يرد خلف لف على جية عقاب وعمه محمد
محمد: سلام عليكم
الكل : عليكم السلام
محمد :نادر وشلونك من بعد العرس ماشفناك
ابتسم نادر: تعرف المسؤوليه والاشغال
ضحك محمد : لا والله ما اعرفها انا بذات لا تقولي مسؤوليه
عقاب : اييي والله
خلف : عمي وش صار مع ابوي
محمد : ابد على خبرك الا اني اسمعه يحوس بالبيت والله العالم وشهو ناوي
عقاب : اقول شد حزامك يا خلف الظاهر الحرب قايمه اسمع جدتي ماهي راضيه وامك وعمتك زعلانين
خلف وقف : استعنا على الشقاء بالله
محمد: قبل تروح خلني اخفف عليك وابشرك وافقنا على ضاري
لف خلف بكل قوته : وولله
محمد : اي والله وجيت اقولك انت تروح له و.. وضحك نادر: مايحتاج تروحون شرف الملح والقبله
عقاب : جاء حبيبكم
دخل ضاري مبتسم: مسهم بالخييير
اقبل عليه خلف ببتسامه: مساك الله بالرضا والسرور والتباشير
ابتسم ضاري وهو يناظرهم باستغراب وهم يناظرونه مبتسمين!
خلف ابتسم وهو يخبط على كتفه بقوته : مبرووك يا ضاري وابشرك جتك الموافقه
اتسعت ابتسامة ضاري بفرح: لله يبشرك بالخير
ابتسم محمد : مبروك ياضاري تستاهل كل خير وجهز نفسك وتعال ملك
اقبل ضاري يسلم عليه بفرح: الله يبارك فيك وان شاء لله جاي قريب
وقف نادر : واضح انك غيران مني ولا وش هالخطبه اللي مادرينا عنها
اتجهه له ضاري وهو يحضنه: ايييه شفتك مبسوط قلت ألحقك
ابعد نادر بضحك: خبيييييييث
كان عقاب متكتف يناظره بهدوء وقال: يلا بالمبارك والله يطرح فيك البركه
ابتسم ضاري بمكر واتجهه له ورفع عقاب يده اول ماعرف نيته: وخر عني
ضاري : لا لا كيييييف ما احضنك كييف هاذي بشاره بشاره
عقاب ابعد وهو يدفه يحاول يتخلص من ضاري اللي حاضنه غصب
وضحك خلف : لا تزعل عمك ياعقاب هذا بيصير زوج عمتك
دفه عقاب : يخسي ماهو عمي
محمد: عمك وانت ماترضى يلا يلا انا رايح وانت لا تزعل عمك
الكل:هههههههههههههههههههههههههههههههههههههههههههههههههههههههه
عقاب بقهر: ضحكتوا من غير ضروس يخسي ضويري يصير عمي .
رفع ضاري حواجبه يقهر بها عقاب اللي سحب العقال ناوي عليه بس انحاش ضاري وهو يضحك: بروح ابشر امي ان عمتك وافقت علي
عقاب : فكوووووني عليه
نادر: اجلس يا ابن الحلال
خلف : ضاااااري توكل على الله احسن لك
راح ضاري وهو يضحك ومبسووووط وقلبه بيتقطع من الوناسه كان يحس انه بيطير مايدري ليه وقع هالخبر في نص قلبه مايدري ليه هالفرحه كلها
ولف عقاب بغضب وهو يجللس: عز لله بلشنا به
نادر : اقول اركد والله انكم كسبتوا رجال
عقاب : اسكت تكفى اسكت
خلف : اقول لا خلصت انت وياه قفل المحل وجيب المفتاح بروح اشوف بلاوي بيتنا
عقاب: زين
طلع خلف يخف رجله للبيت يبي يشوف وشلون يتصرف
_______________________.
وفي بيت ابو خلف
الكل في غرفة ام خلف ومحد طلع برا لابو خلف ولحوريه
فييصل : ااااه يالقهر اااه اخر عمري انطرد عشان هالسلقه
او وعد : ااااه ياقلبي شلون ما فطنا له من فتره متزوج
ام خلف : وش نسوي حنا يا غافلين لكم الله
ندى : اقص يدي اذا ماهي جايه وراها نوايا
اماني : واضح ابوي صاف معها من البدايه
ابعدت وجدان عن الشباك : خلف جاء
عند خلف اللي دخل وهو يشوف البيت فاضي ولف يناظر اغراضهم اللي بزاويه وحوريه اللي واقفه على باب غرفتها تنتظر رجعت ابو خلف ناظرها بهدوء وهي تناظره بكل جرأه
صد ودخل غرفة امه : وش فيكم جالسين هنا!؟ فيصل: وين نروح ؟! خلف : وش اللي وين نروح ترا هالبيت بيتكم من اولها بتوزوون في غرفه وتجلسون
ام وعد :وابوك خلا فيها بيت وحشمه
خلف: اسمعوني عاد انتم اهل البيت وغيركم الطالع وانتم الداخلين تطلعون الحين وتجلسون كأن مافي البيت احد
سالم: وغرفتنا !؟ خلف : ماهي مشكله ننام يومين فالمجلس لين نشوف حل
اماني: ماهقيت فيه حل وهذا هي واقفه مثل العقرب
خلف : هذا هو اللي اقوله شافت انها من البدايه سكتتهم وحشرتكم
وجدان: فكوني عليها امعط شوشتها
ام خلف : اجلسي انتي فكينا من الهواش
خلف : لا احد يغلط دامها ما غلطت واهدو بتنحل ان شاء الله
حنان : هونوها
ام وعد : ياااااخسارة العشره بس
خلف: ابوي وين
فيصل: يجهز لشينة الحلايا غرفتها
خلف : بس خلاص اركدوا ويلا اطلعوا ، اماني سوي قهوه شي يوخر الصداع
فزت ام خلف : بسم لله عليك يوجعك شي!؟ خلف : صداع بس
ندى: تعال اعطيك مسكن
طلع خلف معها وهم يناظرون حوريه اللي تناظرهم بطرف عين سحبته ندى بهدوء: وعد درت
لف خلف بقوه: وشووو! من قال لها!
ندى :اتصلت ورد سالم وقال لها وهي تحلف والله يستر
خلف : اييييه ابلشي فيها اذا جت وتلاقطت مع ابوي
ندى: يارب تجي وتحوسهم .
خلف : وقتها والله لكن اسمعي نظفي هالحوسه ورتبي المجلس بيجي رجال المغرب
ندى: يالله ماهو وقتهم!
خلف : وش رايك اطردهم
ندى: لا خلاص برتب
لفوا على دخول ابوهم ومعه عمال ودخلت ندى ووقف خلف متكتف
ابو خلف : ابعد عن طريق العمال
خلف : يبببه للحين مصر !
ابو خلف : اذا ماتبيني اغلط عليك سكر الموضوع
خلف : اييييه بسكره لكن وش بتسوي بأمي وعمتي
ابو خلف : كل وحده في غرفتها مع عيالها وحقها بيجيها وافي واللي ماهي راضيه ارض الله وسيعه
خلف : زيين زيين لكن اسمع
ابو خلف : وشوووو !؟ خلف : النوخذه اليوم بيزورنا
ابو خلف : وش يبي
خلف :يخطب
ابو خلف : وش تخربط انت ماعاد وراك الا تزوج هذا وتخطب لهذا
خلف: وش اسوي يعني جاني الرجال يقول بنزوركم اقول لا مانبي
ابو خلف : وش اللي جاب الخطبه على باله من قاله بنزوجه !وهو من غير ديرتنا
خلف : و ليه ما تزوجه!؟ يهودي
ابو خلف: خلييييف تأدب
اخذ خلف نفس بتعب : يبه الله يرضى عليك لا توقف بنصيب احد والرسول صلى الله عليه وسلم يقول (إذا خطب إليكم من ترضون دينه وخلقه فزوجوه؛ إلا تفعلوا تكن فتنة في الأرض، وفساد عريض)
ابو خلف : ما قلنا شي بس ماله نصيب عندنا
شد خلف على اسنانه بضيق : اذا جو وكلمتهم وسمعت منهم وقتها رد يبه الله يخليك لا ترفض من دون حجه وسبب
ابو خلف : زين نشوف روح ناد جدك وعمك وقولهم
خلف : طيب
اتجهه لبيت جده وهو صار هالايام رايح بخبر وجاي بخبر
_______________________.
وفي بيت ضاري
دخل وهو ينادي امه بفرح : يمممه ألحقي ألحقي وبشري واستبشري
فزت ام ضاري بفرح: بشرني وانا امك
ضاري : ابشرك وافقوا
انتشر صوت ام ضاري تزغرط وتحضن ضاري بفرح وتلمه وشد عليها بحب وهو يحس ان بيطير من الفرحه
ام ضاري : حمدلله وانا امك ومبروووك
ضاري : الله يبارك فيك وقال محمد مالك الا تجيب الشيخ وتجي وتملك
ام ضاري : ياربي لك الحمد والشكر وابشر يممممه بكل خير وتبشر مضاوي بكل خيييير
ابتسم ضاري : عاد استانسي يمممه وسوي اللي تبين
ام ضاري : افا علييييك نروح الحييين السوق واخذ لها هدايا واهلها كلهم كم ضاري عندي انا
رجع ضاري يحضنها وهو فرحااان من فرحة امه اللي واضح حبت مضاوي
_______________________.
وفي بيت النوخذه
كانوا الرجال يستعدون لخطبة الرجال وجابر كان حماسه بيفضحه وركضت ليلى وهي تقول : شفييييك ياحظي فشلتنا
جابر بهمس : مستانس ان شاء الله يوافقون .
ليلى: يارب ان شاء الله لكن اثقل ابوي شاك فيك
جابر: زين زين وخري بروح
نزلوا وليلى مبتسمه ام نهيان: شهالعبووو كل هالكشخه عشان خطبه ويمكن يوافقون ويمكن لا لو كان عرس شبتسوي
جابر ببتسامه: ان شاء اللله يوافقون شفيچ الله يهداچ
ابو نهيان: يلا يلا مانبي نتأخر
جابر: يلا ادعوا لنا
ليلى : الله يفتح بوجهكم يالله
طلعوا والتفت ابو نهيان: انت شحقه طاير چذيه! جابرووه لا يكون مخربط ولا مسوي شي
جابر بخوف: لا والله يبه لا والله خطبه شريفه وربي
ابو نهيان: لله يستر منك بس ولا خليتنا ننتظر اخوك ولا ننتظر احد
جابر: انا وانت نكفي يبه
ابو نهيان: الله يعين
طلعوا متجهين بيت ابو خلف
_______________________.
وفي بيت الجد قايد
كانوا كلهم يناظرون خلف بهدوء
عقاب : خلف!؟ شفيك صاير خطابه
ضحك خلف: مع الاسف هذا اللي صاير
عزوز : شكله شافها شغله مربحه
فيصل: خلف الكويتي ما لقى الا يخطب من عندنا
خلف : مادريت ولله كان عطيته لسته بحريم الحاره يشوف ويتنقى
ابو ناصر: والله غرييبه لكن الله يحيهم
محمد : ان كان فيه خييير بيكتب الله له نصيب
ابو ناصر: اقول ماودك تخطب لنفسك وتخلي الناس
تجمد خلف ولف بهدوء: ان شاء للله اذا صار وقته
محمد : تزوج انت وعقاب
ضحك عقاب : شكلي اتزوج بنت النوخذه
التفت خلف بكل قوته عليه وقبل يعترض او يبان له ردة فعل دخل سالم يركض :وصل النوخذه
فزوا كلهم وخلف اللي اشتعل بقلبه جمر واسرع يستقبل النوخذه وعينه على عقاب اللي ماتكلم الا وراه شي
_______________________.
وفي بيت نادر
دخل بهدوء يبي يشوف البيت بغيابه وكان هدووء والكل ساكن وهنا تطمن نادر ودخل وهو مبتسم: سلام
الكل : وعليكم السلام
ام نادر: ادخل ألحق القهوه
نادر: لا والله مابي تقهويت مع خلف
شوق : طيب اكلت شي!؟ نادر: اييه اييه
ام نادر: وش عندك شاق الكشره ومبسوط
شوق ابتسمت: الله يديمها
ابتسم لها نادر وجلس جنبها: ابد مبسوط ضاري خطب وان شاء الله قريب بيتزوج
شوق: ماشاء للله
ام نادر: ضاري وشو بعد غير خلف وعقاب !
نادر: اييه
شوق: للله يوفقه
لف نادر عليها وهو كل ماناظرها لا شعورياً يبتسم : وعاد حزري من خطب
شوق : مدري ما اعرف الحاره
نادر: عمة خلف
شهقت شوق بفرح: اي وحده !؟
نادر: مضاوي يقولون
ام نادر: ماشاء لله علييييك ماعاد الا تعرف اسامي الحريم
نادر: يسولفون فيهم العيال .
ام نادر: الله اكبر ماعاد الواحد يستحي ويحشم عرضه
نادر بغضب: ليييه وش سووو لايكون مكشفينهم قدامي
وقفت ام نادر بغضب: وللله ماعاد فيك رجا لكن هاذي تاليتك سوالف حريم
راحت وتركته ولف نادر بضيق وابتسمت شوق بضيق: ماعليك ماتعودوا يسمعون اسامي البنات من الرجال
نادر: اه ياربي ترحمني
شوق : لا يضيق صدرك وكمل سوالفك
نادر : قومي قومي الغرفه احسن
دخل وهو يلف عليها :لا واصبري واسمعي الاخبار الثانيه
جلست شوق جنبه وهي تتكي : وشو
أول ما دقق نادر في عيونها لا شعورياً داخله اهتز وارتاب كان طول هالفتره يتحاشى انه يناظر عيونها كانت رموشها مثل السيف اللي ينغرس بقلب نادر
وصحى من سرحانه على يدها اللي حطتها على كفه بحنيه: وييين وصلت!؟ نادر: هاه ! ايه وش كنت بقول
شوق ضحكت: وش فيك نسييت
كان نادر وده يقول ( لا تكفيين لا تضحكين كفايه عيونك ) لكن تدارك نفسه وابتسم : اييه من كثرها
ورجع يسولف لها عن باقي الاخبار وهو ردات فعلها مسيطره عليه اذا ضحكت ضحك واذا شهقت سمى عليها
_______________________.
وفي بيت ابو خلف
كانوا كل البنات طالعين عند بين الجد قايد ولا باقي الا ندى وأماني ومضاوي يجهزون قهوة الرجال
ندى: غريبه وش عنده الچويتي جاي على قولكم
ضحكت اماني: شكله حس بخيانة مضاوي وجاي ينتقم
فزت مضاوي بضحك: لاااا تكفون خلاص هونت مابي ضاري ابيييي الچويتي
ضحكت ندى: خلاص راحت عليك
اماني بمزح وضحك : باقي فرصتي انا
مضاوي: لا تغرك الدنيا مثلي وافطني
ندى: الله يخلف بس
مضاوي : ماعلينا وينها شينة الحلايا
اماني : في غرفتها من يوم دخلت ماطلعت
ندى : ان شاء الله تفطس في غرفتها
مضاوي : انا مصدومه من ابوكم للحين
اماني : وش نسوي
ندى: انتظروا ووعد وحزتها بتكسر راسها
مضاوي: الله يقويها
_______________________.
في مجلس ابو خلف
كانت عيون خلف على عقاب خايف منه وخايف من طواريه لكن التفت لابو نهيان للي تنحنح وهو يقول
ابو نهيان: يا ابو خلف موضوعنا اللي جينا عشانه واضح واظن ولدك خلف قالك خلفيه عن الموضوع
ابو خلف : صحيح تكلم معي .
ابو نهيان: وجاء دورنا إحنا ننتكلم وياك عن الموضوع وهو ان من فتره ندور لولدي جابر عروس وأمه شافت ان كريمتكم المصون تناسب له وعلى هالاساس اقول إنه يشرفنا ويسعدنا نخطب كريمتكم أماني لولدكم جابر
الكل لف صار يناظر ابو خلف اللي اخذ نفس وهو يناظر خلف اللي من ملامحه واضح الغضب وواضح رايه فالموضوع وقال: والله تشرفونا يا ابو نهيان ومثلكم ماينرد لكن عطنا وقتنا نفكر ونسأل مهما كان الموضوع زواج
ابو نهيان: حقك حقك وانت صادق
ابو ناصر: عاد انت يا ابو نهيان والنعم فيك لكن ان كان لجابر نصيب بياخذه
ابو نهيان: هذا الكلام اللي بقوله
ابتسم جابر لخلف ورد له خلف اللي خلاص يبيهم يطلعون لان عقاب وتره
ابو نهيان: إحنا ترخص يا جماعه وباقي الموضوع عندكم
ابو خلف : الله معكم وان شاء للله خير
طلع جابر وابوه وهو يدعي بنفسه انهم يوافقون ولف ابو ناصر يقول: الحين ماخطبوا الا اصغر البنات وندى وحنان وين يروحون
ابو خلف : ماهقيت اني بعطيهم
خلف : وليه ما تعطيهم! يبه حنان وندى بيجي لهم نصيبهم لكن لا توقف في نصيب اماني اذا هي موافقه
ابو خلف : والله ياخليف ما باقي الا تحكمني!؟ خلف : هذا الحق
محمد : خلف صادق اللي يجيها النصيب زوجها مايصير تردع وحده عشان نصيب وحده ماجاء
ابو خلف : ماني مزوج بنتي واحد في ديرة في ديرتنا
ابو ناصر: ولييييه!
خلف : يبه اصبر وفكر وأسال وجابر انا اعرفه رجال والنعم
محمد : انا اقول استهدي بالله واصبر شوي
عقاب :وانا وخلف نسأل زياده ونقولك وش يطلع معنا
ابو خلف : خير ان شاء الله خير
ابو ناصر: جهز نفسك احتمال ضاري يجي ويملك في اي وقت لا تروح بعيد
ابو خلف: وضاري زوجتوه
ضحك فيصل: خلف بيثبت اصحابه عندنا بس مازبطت معه بعقاب
لفوا كلهم على فيصل بغضب ووقف عقاب وهو يناظره بهدوء
محمد : يلا يلا بنرجع بيتنا
طلعوا والتفت خلف على فيصل: انت ورا ما تسد فمك
فيصل: وش قلت
خلف : فيصل ترا ماهي ناقصتك مشاكلي ليييين فوق راسي
فيصل: طيب طيب
طلع وترك خلف اللي وقف متكتف وهو خايف من رفض ابوه لجابر لكن اول شي لازم يشوف اماني ورايها
دخل وشافهم جالسين بهدوء والكل يناظر جهة غرفة حوريه والكل شاي هم بسبب وجودها
خلف : اماني تعالي
وقفت اماني وهي جاهله الاسباب راحت ورا خلف اللي واقف عند المجلس : تبي شي
خلف ابتسم وحب يلطف الموضوع ويجيها من باب مزحها بالعاده: وللله ياهو حظك قوي جبتي الچويتي على خشمه .
ناظرته اماني باستغراب ماهي فاهمه وتعرف ان خلف عادي ويمديهم يطقطقون ويمزحون معه بدون حدود لكن كلمته واضحه ماهي مزح وهنا خافت قالت: هاه مافهمت
خلف : اسمعي وانا اخوك النوخذه وولده جايين يخطبون وقالوا نبي بنتكم اماني لولدنا جابر وانتي تدرين قبل كللللل شي القرار الاول والاخيير لك
للحظه حست اماني انها داخت ماعاد تسمع شي ولا تفهم ولا تستوعب عمرها ما توقعت المزح في يوم يصير جد ووش جاب الكويتي لها ووش جابها للكويتي ماقدرت تستوعب لكن صحت على صوت خلف يناديها: وييييين رحتي بدري تونا
اماني : هاه معك معك
خلف : انتي فكري وردي علي عشان اعرف اتكلم مع ابوي طيب
اماني : ا ا زين
خلف : وانا اعرف جابر رجال طيب لكن بنزل وبسأل عنه من جديد ويمكن اروح الكويت واسال مليون مره لعيونك
ابتسمت اماني بتوتر: زين
اختفت من قدام خلف اللي صار قلبه على نار والاوضاع حوله صعبه
_______________________.
في مكه
كان مبارك يحاول يلفت انتباهه وعد بتصرفاته لكن ماكانت معطيته اهميه وهي تفكر في زواج ابوها وفي خالها ماجد اللي ولاها مهمه صعبه
لفت اول ما حست بثقل مبارك اللي جلس جنبها وقال بهدوء : وش صاير!!من الصبح تفكرين وحالتك حاله!
وعد : مافيني شي
مبارك: وش مضيق صدرك
لفت وعد بهدوء وابتسمت اول ما انتبهت لعيونه اللي ذايبه وهي تناظرها بود وقررت تستغل هاللحظه وقالت بضيق: وان قلت لك وش بتسوي!؟ مبارك بإندفاع : امحي اللي مضيق صدرك من الارض
ابتسمت وعد : ما ابيك تمحي شي ابيك ترجعني للخفجي
رجع مبارك شوي وهو بدا يقتنع تماماً ان وعد فيها مس وهالضيقه الغريبه فيها تأكد هذا الشي : ابششري نرجع الحين نضف اغراضنا ونرجع
ابتسمت وعد : مشكور يا مبارك
مبارك: مابي شكر
فهمت وعد عليه وقررت تتهرب وتروح تجمع الاغراض لانها تشوف ان رجعتها للخفجي ضروريه
اما مبارك بما انه صدق المشكله قرر يدور حل للعلاج لكن فالخفجي
ولا هي الا ساعه جهزت وعد كل شي في لمح البصر ووجب على مبارك يوفي بوعده ويرجع للخفجي
_______________________.
وفي السوق
كان ضاري مع امه وهي تحوس وتلف وتدور وماخلت شي ولا بقت شي الا وجابته هديه لمضاوي
ضاري : يمه ياحبيبتي خلاص لا تخلصين فلوسك كذا كثير ويكفي
ام ضاري : لا لا ماهو كثييير على مضاوي اللي ان شاء الله بتصير زوجة وليدي وحيدي
ضاري ابتسم: يا يمه هذا انتي قلتيها لا صارت زوجتي جيبي كل شي لكن الحين هذا يكفي .
ام ضاري لفت تناظر الاكياس اللي فاضت حولها : اجل زين
ابتسم ضاري بحب :والله يا يمه انا خايف من هالدلال والدلع المفرط شكله بيروح علي
ام ضاري : لا يمه انت الاول والمبدى لكن انا نذرت اذا زوجتك لسوي لك زواج يحكون في الناس واعطي عروسك شي يتناقلونه الناس لو اني بعدها اجلس على بساط الفقر
ابتسم ضاري : افا والله يايمه انتي محلك بين ضلوعي
ام ضاري : يابعد عيني والله يلا يمه يلا خلصنا من هنا نبي نروح الذهب قبل يقفلون يلا
ضاري: يلا يلا
ام ضاري : وكلم الشيخ يايمه واخذ معه موعد بعد بكره وبلغ اهل خلف بعد عشان يستعدون
ضاري : ابشري ابشري
كان ضاري سعيد وهو يراقب امه اللي كل شي تسوي وهي تبي تثبت لناس والعالم ان ضاري وراه سند ووراه ام عن مليون واحد ومايحتاج يكون له عايله دامها معه
وماكان وقتها يفكر بشي غير انه يدعي ان الله يخليها له ولا يذوقه حزنها
_______________________.
وفي بيت الجد قايد
كانوا جالسين بهدوء بعد ماهدت الاجواء وتسكر الباب الفاصل بينهم وبين بيت ابو خلف اللي متكركب بعد جيت حوريه ابو ناصر : انا بقوم نام ولا ابي ازعاج
شهد : ابشر جدي بحرس غرفتك ما اخلي احد يزعجني
عزوز: انت اساس الازعاج كله
عهد : بس انتم عاد
محمد : بندخل جوا ما بنزعجك
هيا : يمه ودك تنامين !؟
ام ناصر: وين يجيني النوم وهالجنيه اللي جابها ناصر فيه
محمد : يايمه وش نسوي عاد تزوج وش بيدينا نسوي
مضاوي جلست باعتدال وابتسامه:ولا يضيق صدرك يمه ولا تشيلين هم وعد هذا هي جايه بالطريق بتوريك فيها واعرف خبصت هالزواج
سحر: والله مامعها حق وعد تقطع سفرتها عشانها المفروض تنبسط بعدين تجي
التفت عقاب بكل قوته يسمع الكلام وهو مصدوم ان جهوده راحت على الفاضي وكيف وعد تسافر
مضاوي: ماعليك يا حبيبتي تقطع سفرتها تضبط الامور هنا وبعدين تسافر ماهي مشكله عند وعد
عهد : ايييه واضح
محمد : والله يا ان ما احد مسنع بيت ناصر الا وعد
ام ناصر: لها فقده لكن الله يقويها على هاللي ماني مرتاحه لها
هيا: الله يهدي ناصر بس
عقاب اللي وقف بهدوء وطلع وانتبهت له مضاوي وصدت بضيق لكن عقاب ماهو راضي يرتاح طالما ان وعد مسيطره على الكل والكل مقتنع بافكار وعد المسمومه وواضح انها جايبه راس مبارك
_______________________.
في بيت النوخذه
كانوا كلهم حول التليفون يكلمون شيخه ونهيان ويعطونهم المتسجدات ويطلبونهم يجون .
نهيان: جابرووه شحقه ما نطرت لين نجي شهالسرعه
جابر: ماعليه ماراح عليك شي هاذي بس خطبه لكن ان شاء الله اذا وافقوا تجون حق الملچه
ليلى: يممممه شهالثقه من قالك بيوافقون
ام نهيان: ان شاء الله يوافقون وليدي ماكو مثله
ليلى: ااااه يا قلبي اااه وييين يمه الله يهداچ وليدچ ما يتحملونه الجن والعفاريت
رفسها جابر بشويش: ليلوووه خلينا اصحاب احسن لچ
نهيان: بس انت وياها نبي نسمع
ابو نهيان: شنو تسمع يا يبه كل شي قلناه
نهيان: طيب عطوكم الوقت اللي بيردون فيه!
جابر: لا
ابو نهيان: انا مو متفائل بأبو خلف
ليلى بخوف : لا يبه تفائل خييير
نهيان: الله يسهل عاد لو يدرون عماتي بيشيلون الارض شيل ويزعلون
ابو نهيان: كل شط قسمه ونصيب
صد جابر بضيق: يلا مع السلامه
سكر قبل يسمع رد نهيان لانه كان يفكر في عماته اللي بيشوشون ويزعلون ليه متزوج غريبه ماتزوج من بناتهم وكان خايف ابوه يتراجع بهالسبب ولاقوى خايف من ابو خلف اللي ماكان باين عليه القبول
اول ما حست ليلى بتوتر الجو قررت تبعد لانها هي بعد خايفه ان يصير شي يقطع أملها في خلف اللي كان واضح من صوته انه متخوف بعد
_______________________.
في بيت ابو خلف
كان الكل هادي والكل في مجلس ما عدا ابو خلف المختفي من المغرب عند حوريه
كلهم تقريباً صايبهم يأس من البدايه الغير مبشره
كانوا ساكتين وعيونهم على الباب
خلف اللي كان منسدح على رجل امه اللي كالعاده تمسح على صدره وتقرا عليه وكل فتره طالعه بعلاج جديد سمعت انه يفيد بالربو لكن كان تفكيره مشغول
اما اماني ساكته وهي ماهي مستوعبه اللي صار كانت دايماً تحلم انها تتزوج شخص ماله صله فيهم ولا يربطه معهم احد مابي تكون اطباعه قريبه من عاداتهم وتقاليدهم لكن ماتوقعت انه بيكون صدق وكانت نوعاً ما مستبشره خييير
اما البقيه عيونهم على غرفة حوريه لف فيصل بغضب: ابوي من المغرب ماشفناه
حنان: حتى عشا ماتعشى معنا
ام وعد : شتبون فيه يتعشى ولا ما يتعشى
ندى: لا تخافون عليييه جت هالشينه واخذت عشا
وجدان: عساه ماينزل ان شاء الله
لفت عليها حنان بغضب: ما ينزل لابوي
وجدان: لا هالشينه
ام خلف صدت وهو تعوذ من ابليس وتكمل قرايتها على خلف
وانسدح غيث على ذراع خلف ببتسامه وهو يقول: عمتي سوي لي مثل خلف
حضنه خلف ببتسامه: انا اقرا عليييك انا
ام وعد : خلف وش يبي النوخذه
خلف ناظرهم بهدوء واعتدل : يخطب
الكل لف عليه: وشو
فيصل بضحك وهو يضرب اماني : لا ويوم نوى يخطب ما خطب الا هالمفهيه .
كلهم صاروا يناظرون اماني اللي ابعدت فيصل بغضب
ام وعد : صادق؟؟ خلف ابتسم: اي والله يلا جاك يامهنا ما تمنى
شهقوا ندى وحنان ووجدان: اماااا عاد
صدت اماني بفشله ولفت ام وعد: ماكنها غريبه!؟
خلف: ماغريب الا الشيطان لكن النصيب يجيب وان كتب لهم الله نصيب بياخذونه
ام خلف : وابوك وش قال
خلف : ما قال شي
ام وعد : وش معنى يخطبون الصغيره والكبار وين
خلف : ياعمه الله يرضى عليك هالفكره بذات شيليها من راسك الله يكتب النصيب مافيه كبير ولا صغير
ندى: يمه شفيك الله يخليك عادي الله يوفق اماني اذا لها نصيب
ام خلف: اي والله هذا الكلام
خلف : القرار كله راجع لاماني
ام وعد : وبعدين الرجال بعيد عنا ومن غير ديرتنا وجماعتنا وصعبه
صد خلف بغضب: وش اللي صعبه ؟ علميني وش الصعب ياناس استعبوا شوي مافيها شي اذا توزجوا من غير ديرتهم ماتدرين لو هو احسن من جماعتك وعيال ديرتك
فيصل : طيب اصبروا لين يرد ابوي لا تعصب بدري
حنان : وش فيك يا خليف هالايام صاير عصبي
ام خلف : يايمه ماهو زين لك العصبيه
قبل يرد خلف لفوا على باب غرفة حوريه اللي طلعت وهو بكامل زينتها وفاتحه شعرها وصوت الخلخال بكل مكان وصوت ضحكها بكل مكان وواضح ينقال شي ولفت تناظر بطرف عين وهي تشد عليها جلالها يسترها لكن منظرها كان صدمه لهم كلهم واللي ماعمرهم توقعوا ينشاف هالمنظر في بيتهم ومرت متجهه للمطبخ ورجعت تغني وتغنج لكن فز خلف وهو يصفق باب المجلس بينهم يمنع اخوانه يشوفون هالفضيحه بحق ابوهم ولف بغضب : كل واحد على فراشه يلا
وقفت ام وعد بغضب وام خلف والبنات وطلعوا لغرفتهم وكلهم مصدومين
والكل يدعي على حوريه اللي واضح شرها
_______________________.
ومن بكره
في بيت وعد اللي رغم انهم وصلوا متاخرين الا انها عجزت تنام اوترتاح وهي تنتظر بس الصبح عشان تروح بيت اهلها
وجهزت الفطور واتجهت لمبارك تصحيه وفز يناظرها باستغراب : وعد وش فيك ؟
وعد : قوم افطر عشان توصلني بيت اهلي
مبارك: هالحزه بيت اهلك! صاير شي
وعد : لا بشوفهم بس
مبارك: خليييه شوي
وعد :مبارك الحييين انا اشتقت لهم ابي اشوفهم
صد مبارك بضيق: زين زيين .
طلع مع وعد اللي كعادتها كاشخه وبعد ما افطر وقف : بتجلسين عندهم!؟ وعد : ايه لين الليل
مبارك: زين لان عندي شغل بسويه
وعد : طيب
كان مبارك يخطط يجيب شيخ يقرا فالبيت ويجلس لين تجي وعد ويقرا عليها عشان كذا راضي
طلعت وعد تخف خطواتها مستعجله بتشوف وش صاير
_______________________.
وفي السوق
هالمره طلع خلف وهو مافكر يجلسس ويفطر كفايه على اللي شافه واللي سمعه امس واللي هز صورة ابوه في عينه جلس مع جده وهو يدور حل يطلع حوريه من البيت قبل يصير شي اعظم واكبر
ابو ناصر : ماكإن هالمقبل علينا ضاري!؟ لف خلف : الا هو ضاري
دخل ضاري مبتسم :سلام عليكم
الكل : عليكم السلام
خلف : حياك اجلس
ضاري جلس بهدوء ولف يناظر ابو ناصر ببتسامه وضحك خلف : انطق ياضاري
ابتسم ابو ناصر: سم ياولدي
ضاري : سم الله عدوك لكن ياعمي انا جيت بقولك ان ان شاء الله بكره بجيب الشيخ ونجي نملك اذا الوقت يناسبكم
ابتسم ابو ناصر: حياك الله ياولدي والله يتمم على خير
ابتسم ضاري ووقف خلف وهو يخبط على كتفه: حياك الله ياعمي
ضحك ضاري وهو يتلفت: ويييينه عقاب؟؟ خلف : مداوم احمد ربك لا يسمعني ويذبحني ويذبحك
ضحك ضاري : اصبر علي بس
ابو ناصر : يا ضاري ياولدي ترا الملكه عندنا عايليه
ضاري: ابشر يا عمي
ابو ناصر: اجل انا بترخص واخليكم
خلف : فمان الله وانتبه لنفسك ياجدي
ابو ناصر: زين
طلع ولف ضاري ببتسامه: بعيداً على فرحتي وش علتك انت اشوفك ضايق صدرك
خلف: وش اقول وش اخلي
ضاري : قل قل اللي تقوله قبل يجي احد
خلف : بقولك بس تحكم في اعصابك لاني مقدر اقول الا لك ودامني بقولك ما يحتاج اخذ وعد انك تحفظ السر
ضاري : افا يا خليف سرك في بير
خلف : اول شي طال عمرك تخيل ان جابر خطب وحده من خواتي
ضاري بتدقيق: جابر ماغيره ولد النوخذه !؟
خلف :ايييه
ضاري : وش جاب جابر لكم !؟ غريبه اصلا خطبته
خلف: مدري عنه كل للي قالوه انه يبي من السعوديه وان امه شافت ان اختي مناسبه على قولهم
ضاري : طيب انت وش موترك بالسالفه
ناظره خلف بهدوء وقال: لان ابوي ٩٠٪ ماهو راضي
ضاري: واذا مارضى الزواج قسمه ونصيب واذا شايل هم جابر عشانه خويك تراه بيتفهم
خلف : لا ياحبيبي السالفه اصعبب
ضاري :وشو؟
خلف تردد كثير بس ماله الا ضاري وقال: اذا رفض ابوي او ماصار نصيب هاذي كارثه لان البنت اللي ابيها اخت جابر
لف ضاري بكل قوته ومن اثرها طاح من الكرسي ووقف وهو يعدل شماغه بصدمه : وشوووو وشوووو وشوووو
مسكه خلف يجلسه: اقصر صوتك الناس تناظر
ضاري: انهبلت انت خبل ياقوووووة وجهك يا خلف
خلف: ياخي فضحتنا اسكت وبعدين ما سويت شي والبنت مابيني وبينها شي من بعيد اعرفها ومره وحده بس شفتها بالبقاله بس
ضاري : وانت الحين وش تخطط عليه!؟ خلف: ما اخطط على شي بس عندي قنبله الحين لها حليييين مالهم ثالث! يا ان اختي توافق على جابر وتمشي امورنا ويصير فرصتي كبيره اني اتزوجها يا انهم يرفضون وتقبع السالفه في راسي واكل هوا
ضاري : والله انت سالفتك صعبه
خلف : لو ما جابر دخل هالدخله كان ممكن اضبط اموري لكن الحين انا على طرف هوايه
ضاري : وخلنا نقول تزوج جابر اختك !؟ اهلك بيرضون يزوجونك وحده من غير ديرتك
خلف : ياخي انا زواجي امره سهل جدي معي عمي محمد كثير بصفي لو عارض ابوي
ضاري : انا راسي عورني صراحه ماني مستوعب هالمخاطره
خلف : وش اسوي عاد هذا اللي صار
ضاري : ماعندك حل الا تنتظر رد اهلك عليهم
خلف : اييه وغير هذا بروح الكويت اسأل عن جابر
ضاري : ليه مايكفي تسأل هنا
خلف : لا اكيد بسأل جماعته وديرته وناسه ومهما كان ودي اوثق هالزواج هذا مايعني اني ارمي اختي على جي الله عشان بس اتزوج اللي ابيها
ضاري : وللله انك كفو ! ومتى بتروح
خلف : نخلص منك ونروح وتراك بتخاويني انت وعقاب ونادر
ضاري : الله يعين دامنا بناخذ عقاب
ضحك خلف : لازم تسوون هدنه لاني ما اتحمل اي ضغط زياده
ضاري : ايه زين يجيب الله مطر هدنه!؟؟ انا وعقاب ! معصي
خلف : قم قم خلني اخلص شغلي
ضاري: يلا
طلع ضاري مصدوم لكن من كل قلبه يدعي ان الله يكملها مع خلف
_______________________.
وفي بيت ابو خلف
صباحهم كان شيييين نظراً لوجود حوريه اللي طلعت مع ابو خلف بعد ما نادوهم للمره المليون والكل صاد ماله نفس يفطر معها
وفي ظرف ثواني فضت السفره وهي للحين جالسه مرت من جنبها ندى بطرف عين وعدت بكرهه
ودق الباب وركض سالم يفتح وابتسم بفرح: وعععععد
ابتسمت وعد وهي تنزل تسلم عليه: هلا سلوووم
سالم: اشتقنا لك
وعد : وانا اكثر
دخلت وعد لكن سكتت اول ماشافت السفره ماعليها الا ابوها وحوريه عرفتها على طول وقفت تناظر بنظره ناريه فهمها ابو خلف ووقف يتدارك الوضع يعرف ان وعد ما رح تتقبل السالفه وبتسوي كارثه: وعد حياك وينه مبارك
وعد بغضب: راح مبارك والظاهر انك رحت قبله يبه
ابو خلف : وشو!
وعد حاولت تكتم غضبها لكن واضح ناظرت حوريه بحده ولفت: من هاذي!؟ ابو خلف : جايه تدورين مشاكل
الكل طلع على صوت وعد اللي قالت: ابد والله المشاكل هي اللي جت بيتنا
ابو خلف :وعد
وعد : وشوله تزوجت يبه!؟ وش كان ناقصك
ابو خلف : مو شغلك
وعد: الا شغلي !؟ كيف تزوج ماتقول لاحد ولا قدرت امي وعمتي صبروا كل هالسنين معك اخو شي مالهم حشمه
ابو خلف : وعععععععد لو ما قصرتي صوتك والله ليصير شي ماشفتيه
سكتت وعد وهي في نفسها تتحلف وصدت وهي تدور على امها واتجهت لهم وهي تسلم عليهم وقهرها واضح
ودخلوها جوى وهي مقهوره
ام خلف : وعد اذكري الله يايمه لا تزعلين ابوك
وعد : انتم شلون راضين وساكتين اذا هذا منظرها وشكلها
ندى: هذا رحمه بجنب اللي امس
ام خلف : خلاص يا بنات
ام وعد : فكونا منهم ترا ضغطي ماهو ناقص
وعد : وخلف وينه عن هالمهزله
حنان: خلف مشغول بسالفه ثانيه
وعد : وش صااااير بعد
ضحكت ندى: هالمره خير لا تخافين بس مدري ابوي بيخليه خير او شر
حنان: اماني انخطبت
لفت وعد بذهول : اماني
ندى بضحك: وتخيلي بس من !
وعد : اصدموني بعد
ندى : الچويتي اللي ازعجتنا فيه هي ومضاوي
صرخت اماني بضحك: واماني انخطبت بعد من ضاري صديق خلف
جلست وعد بذهول: انا ماغبت عنكم الا ايام وكل ذا صار
ام خلف : مقدر ومكتوب
ام وعد : الله يستر من الجاي
حنان : غيبي يومين ويتزوجون كلهم
وعد: عطوني التفاصيل
ندى: مافيه تفاصيل الا كل شي في لحظه حتى زواج ابوي
وعد : خلوووا هالزواج الله لا يخليني اذا خليته يمشي وانا متاكده ان وراه بلوه بس اصبروا
وجدان جت بضيق ووقفت
حنان: وش فيك!؟ وجدان: شينة الحلايا هاذي بشيل السفره وانظف وهي رافضه تقوم
وقفت وعد : انا اسنعها
طلعت وعد وووقفت وهي تكتف : انتي هيي جايه من مجاعه ولا وشو!؟ ساعه على السفره
لفت حوريه ببتسامه بارده: اقول قصري صوتك ازعجتيني وهذا بيت زوجي اجلس بالمكان اللي يعجبني والوقت اللي يعجبني
ندى: عشتوووا
وعد ضحكت باستهزاء: عاد كلٍ ينبلع منه هاللقب الا انتي لكن بقولك لا تعودين عليها كثير لانه ايام وتذلفين من هالبيت مثل مادخلتيه
حوريه : والله!؟ جلست وعد قدامها بحده وقالت: انصحك تاخذين كلامي بعين الاعتبار واعرفي تلعبين مع مين زين وسألي عني ويوصلك الخبر
وقفت وهي تقول : وجدان شيلي كل شي ونظفي الزباله اللي بالحوش كلها
ام وعد : يلا يلا خالتي ام ناصر تعزم للقهوه
ام خلف : يلا .
طلعوا كلهم وتركوا حوريه بقهرها ونظفت وجدان الاغراض بسرعه وطلعت
وحوريه واقفه بحقد واتجهت لغرفتها بقهر وهي تناظر المرايه وتناظر بطنها اللي بدا يبان ويضمن مستقبلها
_______________________.
في بيت الجد قايد
دخلت وعد وفزوا كلهم بفرح وركضت مضاوي تحضنها وسحر وهيا ووشهد وعهد واقفه بهدوء
سلمت عليها وعد بنفس الجمود وابعدت وراحت لام ناصر تسلم عليها
مضاوي : قبل كل شي بشري شفتي شينة الحلايا
وعد : شفتها عساها ما تشوف الخير
مضاوي : شدي حيلك فيها
وعد : ماعليك ادبرها
وابتسمت وهي تناظر مضاوي : هااااه وش سمعنا
ضحكت مضاوي بمزح : كفيييل جديد شييل
الكل :هههههههههههههههههههههههههههههههههههههههههههههههههههههههه
وعد : ماشاء الله عاد حظك حلو ضاري يمدحه خلف
مضاوي وهي تتذكر اللي قاله خلف وعقاب وان ضاري لقيط: ان شاء الله قد المدح
وقفت اماني وهي تضحك: مضاووي ابشرك الخيانه صارت صدق تخيلي الچويتي يخطب اماني
صرخووا كل البنات جمله وحده وفزت اماني بخوف وهي تخبى ورا وعد
وشهقت مضاوي ووقفت وهي تضرب صدرها: افااا يالخاااينه اعترفي وش مسويه اعترفي
اماني: ماسويت شي والله وبعدين انتي اللي خنتي وسحبتي عليهم
سحر: اي والله انتي خنتي
مضاوي بضحك : متاكده انك ساحرته يالمجرمه ولا وش عرفه انك انتي من بد البنات كلهم ودك بچويتي
ضحككت أماني: والله مدري لكن شكل الحاره لها اذان
ضحكت حنان: لا والله نداء روحي شكله
مضاوي بضحك: يالمشعوذه
اماني :هههههههههههههههههههههههههههههههههههههههههههههههههههههههه
وعد : والله حظك ماشاء الله
ندى: الله يرزقنا
ابتدت الطقطقه على اماني اللي ٩٠٪ تحس انها موافقه
_______________________.
وفي بيت نادر
اللي هالمره جلس قدام المرايه بالساعات يراقب نفسه وهو يحاول يقنع نفسه و يهدي من اندفاع مشاعره اتجاه شوق وهالاندفاع مخيييف بالنسبه له
وقف وقرر انه يطلع ولا يناظر عيونها ولا يشوف ابتسامتها اقل شي لين يقدر يتحكم في مشاعره اللي بتفضحه قريب وهو ماوده يخسر نظرة شوق الطيبه له
اخذ اغراضه وطلع سييييده متجاهل نداء شوق اللي وقفت مستغربه من روحته بدون ما يودعها.!؟
