.
الكاتبه والمبدعه / أديم الراشد .
.
_______________________.
وفي بيت ابو خلف
بعد ما الكل نام كلهم مجتمعين بالسطح ويسولفون ومضاوي نايمه اليوم عند بيت اهلها وجايه تسهر معهم
ندى: غريبه نايمه هنا اليوم!؟ مضاوي : ابد طلبت ضاري طلبه اني اروح ويالله وافق لكن بعد دفتر توصيات
ضحكت حنان: ياحليله ضاري شكله مثل خلف حنين
مضاوي بمزح: وشهو خلف عنده!!! معليش لا تقارنين اخوكم في رجلي الذرب
وعد : عشتووااا خلف صار ماهو ذرب!!! وضاري اذرب منه وش صاير بالدنيا
ندى: اقول وخري بس لو يموت مايصير مثل خلف واذا صار خلف اللي معديه اكيد
مضاوي بضحك: بسم لله اكلتوني بقشوري
شهد: ايه خلف ممكن يصير بداله ضاري عند مضاوي بس عقاب انا متاكد لا ضاري ولا مليون واحد ياخذون مكانه
ضحكت مضاوي: مع الاسف حتى عقاب ماهو شي عند ضاري
حنان: وش عندها ليلى العامريه ذبحها الحب
مضاوي: ليلى العامريه عند اخوك ياحبيبتي انا مضاوي على سن ورمح
شهد : يعني اعلى عقاب !! مايفرق معك
مضاوي : علميه عقاب بعد صار ما يدورني من يوم خذا هالمزيونه اللي وراك شكلها كوشت عليه وسحبت علينا
ضحكت وعد : والله انك فاضيه
ندى: صدق وعد امانه بس قولي لي كيف قدرتوا تعيشون ماتصارخون!!! عاد عقاب و وعد لو مايصارخون تقوم الدنيا ماتقعد
وعد بضحك: هدانا الله
حنان : بعد انتي خبله ياندى صاروا متزوجين ومعروف بيصير بينهم موده ورحمه
مضاوي : مودة ورحمه!! ماهقيت الظاهر اختك جابت راس عقاب وخلته يتعدى مرحلة الموده والرحمه ويدخل في العشق والهُيام
ضحكوا لكن انقطع صوتهم على دق الباب وبعد شوي جاء سالم: وعد عقاب تحت يبيك
انفجروا البنات ضحك وفزت مضاوي : ابصم بالعشره انه وصلها وتعدى
طنشتهم وعد وقامت بضيق ماتدري وش جابه نزلت وهي تقول : عقاب خير ؟ وش جابك !؟
تكتف عقاب على الباب: وش رايك تطرديني
وعد : تقول عندك دوام!
عقاب : اقعد طول عمري فيه يعني!! مالي بيت ارجع له
وعد : اييه لك بيت لكن تدل طريقه انه ماهو هنا
عقاب بلهجه غريبه عليه :ادل بيتي لكن ابي زوجتي معي
تكهربت وعد من كلمته وصدت : زوجتك عند اهلها ولا ناسي انك موديها
عقاب : عن العبط ياوعد وألبسي وجيبي خليفه بنظلع البيت
قبل ترد وعد جت مضاوي : حي الله عقاب ولد اخوي اللي سحرته بنت اخوي ولا يسأل ولا يسلم
ضحك عقاب وهو يقرب : هلا هلا هلا يالله انك تحيها
قربت مضاوي تسلم : هلابك وينك غاط
عقاب : ابد في هالبيت والحوسه انتي وش اخبارك وش هالولد اللي لاعن خيرك اقشر مثل ابوه
مضاوي : لو سمحت لا تغلط على ضرضورة قلبي
عقاب : ييييع يييييع مالت عليك وعليه
ضحكت مضاوي : ادخل وينك رايح
عقاب : بروح البيت والله
مضاوي : وش وراك يارجال اقعد بالله انا بنام هنا اجلس بنسولف ونستانس زي زمان
عقاب : ويين يابنت صعبه والله
مضاوي : لا ماهي صعبه وبعدين حرام عليك البنات فرحانين ان خليفه بينام عندهم وتجي تاخذه ادخل خلنا نسولف ونام هنا وبكره نفطر واستانس
عقاب : يمكن اسهر لكن انام لا مستحيل
مضاوي: وش صاير بالدنيا ماعاد تعرف بيتنا ولا تعودت على جو ثاني وقالت بضحك: ماعليك يارجال وعد معك ماحنا اخذينها
صد عقاب يضحك: انتي غريبه جايه بتنامين وشلون تنازل السيد
ضحكت مضاوي: شملنا العفو ابشرك المهم تكفى نام
عجز عقاب يرفض ووافق وطارت مضاوي من الفرح لكن وعد ما استانست ابد وتدري ان عقاب بيستغلها بوجودهم
طلعوا لسطح تبع بيت الجد قايد وفرشت مضاوي وعقاب وفيصل وعزوز وسالم وغيث والكل واخذت وعد وجود عزوز حجه عشان ماتجي لكن عزوز اللي كان مواصل من الفجر قرر يروح ينام وبعد فيصل معه
ومضاوي وعقاب يسولفون ويضحكون ولف عقاب ينادي وعد اللي طنشت لين قالت شهد: عقاب يناديك
وقفت بغضب مكتوم واتجهت للحوش وشافت مافيه الا هو ومضاوي : وش فيك !
مضاوي: يابنت الحلال تعالي اجلسي جنبه لا يموت من اليوم يدورك
وعد : انتي بالنيابه بروح لخليفه
عقاب : هاتي خليفه
وعد : نايم
عقاب : زين دوري لي شي ابدل فيه عن لبس الدوام
وعد : من وين اجيب!!! روح البيت احسن
مضاوي : لا وين هاذي غرفة محمد وملابسه محمد توه مسافر يعني محد فيه حتى لو نمتوا هناك
تمنت وعد لو تقولها تسكت لكن فتحت عيون عقاب اللي قال: جبتيها ولله ، اجل يلا جيبي خليفه وألحقيني
وعد : بنام هنا عند البنات
مضاوي كانت تحسهم متهاوشين لكن توقعته مشكله عاديه لانها مقتنعه ان عقاب يحب وعد من زمان وكانت تحاول تحل مشكلتهم وتراضيهم وهي ماتدري وش صاير
مضاوي: افااا هو جاي يدورك وتروحين تنامين بعيد وتخلينه
عقاب وده يقوم يخم مضاوي اللي جت له على كيفه وكأنهم اتفقوا يضغطون وعد اللي حاولت تتهرب بس فشلت
والساعه ٣ اتجهوا لغرفة محمد ووعد معصبه لكن تحاول تهدا ولا تخرب خطتها
لف عقاب مبتسم وراضي انه شافها متورطه اخذ ملابس محمد يبدل ورجع وهو يشوفها منومه خليفه وكانت لابسه قميص بيت مرتب اشبهه للجلابيه الخفيفه ورافعه شعرها وتمنى عقاب لو تحرره وتفتحه لكن انسدحت وهي متجاهلته وتلحفت وبينهم خليفه .
كان عقاب متوقع انها ما تنام معه بنفس السرير وتعارض وتسوي مشكله وواحد منهم ينام بالارض لكن استغرب سكوتها وكانت وعد تسعى عشان تخيب ظنه وتخالف توقعاته وتخليه في حيره من اللي تسويه
انسدح عقاب بالطرف الثاني وتوتر هو اكثر منها وهو ماهو متطمن لكن كل ما التفت وشافها صاده عنه وشعرها المربوط ينرفزه تقلب طول ليله وهو يتأمل خليفه بحب يحضنه شوي ويمسح عليه شوي يحس انه فرحان فيه وماهو مصدق ان فيه طفل بحضنه لكن بعد ماتأكد ان وعد نايمه عجز يمسك نفسه لا يمد يده بخفه ويفتح شعرها من الربطه بخفه بدون ما تحس وانتثر شعرها على المخده حولها وابتسم عقاب يناظره بهدوء وعجزت يده تقصر ومدها يبي يلمسه واول ما اختلطت خصلات شعرها بأصابعه تكهرب قلبه لا شعورياً وشاف ان معه فرصه يشم عطره من قريب قبل تصحى وكان يناظرها بتأمل وهي نايمه ملاك لكن اذا صحت يصحى كرهه عقاب معها انسحب اول ماحسها تحركت ورجع مكانه بسرعه وهو كل محاول ينام يصحى خليفه يبكي ويصحو معه عقاب و وعد ورغم صحوته مالها فايده الا انه يجلس يناظر كيف وعد تتعامل مع خليفه لكن اخر صحوته انتهت بعد ما نام على صوت وعد تغني لخليفه عشان ينام ناظرته وعد بضيق وصدت وهي تنزل خليفه ونامت هي بعد
_______________________.
وفي عند جابر واماني
كانت اول سفرتهم للكويت قرر جابر يروح هناك اول شي يوري اماني ديرتهم واول ماوصل استقر بفندق
وكان اغلب وقته ساكت لكن اخيراً نطق وهو يقول : اماني
اعتدلت اماني: سم
جابر: سم الله عدوچ ، ا ا الحقيقه انا بكلمچ بموضوع لكن مدري كيف ابدأ ، لكن انا اسف اذا سببت لچ ازعاج البارحه لكن بعد اللي صار في الكويت انا مارديت طيب وهاذي اول مره اجي للكويت بعد الغزو ويمكن بالليل اضايقچ لكن مو بيدي ابداً القصه كانت صعبه
اماني :لا ياجابر لا تضايقني ولا هم يحزنون وبالعكس هذا شي مايضايق ازمه صعبه عليك وعدت حمدلله وهذاك بطل من ابطالها وكلٍ يفتخر فييك وقفت بوجهه عدوك وردت ديرتك
ابتسم جابر بهدوء: يعني مارح تتضايقين مني!؟
اماني : مستحيل اتضايق
وقف جابر وهو ينزل تيشيرته: ولا رح تتضايقين من هالمنظر
جمدت ملامح اماني خوف وخجل وهي مرعوبه من منظر ظهر جابر وصدره اللي باقي فيها اثر السلاسل الحاره اللي وسمت عليه اثر الزقاير واثر جروح الضرب
ماقدرت تكلم من الصدمه وفهم جابر صدمتها وقال: ما انتي مجبوره تجامليني
وقفت اماني لاشعورياً وهي تناظره بدموع وتقدمت
بحرج : ليش اجامل!! ولا ليش انت تتضايق منها هاذي ياجابر دروع بطوله ،هاذي علامه لرجولتك وشجاعتك ماهي علامة خجل او ضيق انت رجال وسبعين نعم وتستاهل كل خير في حياتك وانا مستحيل اتضايق وانا كيف اتضايق وانا قلبي معك وادعي لك في عز حربك وكيف اتضايق وانا ياما سهرت الليل ادعي انك توصل المستشفى بخير وتصحى على خير ولا يفجعني ويفجع اهلك فيك .. لا تقول لي هالكلام ياجابر انا لك ستر وغطاء وانا معك في كل اوقاتك وانا للي لو هالناس ابعدت عنك ببقى قريبه منك
انهبل جابر اللي عجز يستوعب كلامها ماكان متوقع انها بترد عليه هالرد وانا بتكون بكل هالمشاعر كان هذا شي كبييير عليه
لكن ماكان يقدر يعبر اكثر من انه يحتضنها بكل ما اوتي من حب ومن قوه
اماني اللي ماتدري كيف مشاعرها تفجرت كذا وكيف قالت هاللي قالته لكن هذا اقل شي تقدر تقدمه لجابر وتواسيه
_______________________.
ومن بكره الصبح
نادر اللي صار يرجع الليل ويحصل شوق نايمه ولا يلتقي فيها الا الصبح لكن هالصبح كانت ساكته لين ودعت اهلها وقرب نادر وهو يحاوط كتفها: شوق حبيبتي وش فيك ! يوجعك شي
شوق : لا انا بخير
نادر: احسك متضايقه !
شوق : لا بس زهقت وخاطري توديني بيت خالتي ام ضاري
نادر: ابشري يلا اجهزي على ما ابدل
شوق : طيب
راحت بسررعه تلبس تبي تطلع من هالبيت وترتاح وتنتظر متى ينتهي بيتهم ويرجعون له كان نادر متأكد ان فيها شي لكن مابغى يعلق وتصير مشكله
اخذها لبيت ام ضاري ودق الباب وطلع ضاري :حي الله نادر
نادر: حياك الله انت وينك غاط
ضاري : ابد موجود ادخل ادخل نتقهوى
نادر: لا تعال نطلع نروح لاي مكان
سكر ضاري الباب وطلع : خير وش فيك
نادر: يا ضاري خايف على شوق
ضاري : بسم لله الرحمن الرحيم وش فيها شوق !؟؟
نادر: مدري وش فيها فيها شي وساكته عليه ما تقولي واحسها متضايقه
ضاري :لا يا رجال لا توسوس هذا اكيد من الحمل ترا نفسيتهم تغير وتتعب يبيلها طولة بال
نادر: ادري والله ادري لكن ماني مرتاح
ضاري: اذكر الله ولا تكبر السالفه كلها يومين لين تعدي هالفتره وتشوفها رجعت مثل قبل واحسن
نادر: يا ليت يا ضاري يا ليت
_______________________.
في بيت الجد قايد
صحى عقاب على صوت وعد تناديه : عقاااااااب
عقاب : وش فيك !
وعد : قم يلا عشان جدي ينتظرك للفطور يلا
عقاب : كم الساعه
وعد : ١٠ يلا
اعتدل عقاب وطلع يغسل ورجع وهو يمسح وجهه لكن شاف وعد مرتبه كل شي كان فالغرفه وعطرتها ولفت وهي تقول : هاذي ملابس امس غسلتها وهاذي ملابس قديمه لك عندنا ألبسها وخل لي ملابس محمد اغلسها .
ناظرها عقاب ببتسامه وصد : مدري ليه تخربين نفسك بطولة لسانك هذاك وانتي مطيعه وش زينك
ناظرته وعد بطرف عين وضحكت بإستهزاء واخذت خليفه وطلعت
وطلع بعدها عقاب وهو يتجهه لرجال مجتمعين وجلس مبتسم
فيصل : اشهدوا يامسلمين
ابو ناصر: وش بلاك !؟
ابو خلف: وش نشهد عليه
ضحك عزوز: اشهدوا ان عقاب اول مره يقوم وهو يضحك
ناظره عقاب بطرف عين: ودك اقوم امحطك صح
فيصل :وحنا صادقين يارجال اضحك اضحك ترا الدنيا حلوه
ابو خلف بضحك: وهو صادق دايم تقول تسابق جنونك
عزوز: فاتت خلف اللحظه التاريخيه
مضاوي : لو درينا زوجناك وعد من زمان
عزوز: ايييه وانا اقول غريبه
فيصل بضحك: ماهي غريبة على وعد
عقاب : اقول على شحم انت وياه
ولف لمضاوي :وانتي قومي اذا تبين اوصلك بيتك
ابو خلف : ا قعد تونا نمدحك
عقاب : بفطر وبطلع وراي شغل
ماطولت ضحكة عقاب اللي فرحوا بها لانه زعل ان وعد صارت نقطة تحول في حياته وهذا حسب افكاره غلط لازم هو اللي يغيرها ماتغيره
وطلع بعد ما اخذ وعد للبيت ومضاويي لبيتها
_______________________.
وفي بيت ام ضاري
اللي استقبلت شوق بحب وهي تحضنها : ادخلي يابنتي وينك من زمان ماجيتي
شوق : اعذريني ياخالتي انشغلت شوي وتوي فضيت
ام ضاري : معذوره ياحبيبي ادخلي اجلسي بجيب القهوه
فزت شوق : حشى والله انا اجيبها
ام ضاريي: مابي اتعبك وانتي حامل
شوق : تعبك راحه
دخلت شوق وجابت القهوه : الا ياخالتي وين مضاوي مالها حس
ام ضاري : خذاها ضاري امس لبيت اهلها يبيها ترتاح عندهم شوي ومدري متى تجي
شوق : ياحليلها الله يسعدها
ام ضاري: امين ووياك
شوق : ا ا وش مستجدات حملها ان شاءلله كل شي زين
ام ضاري : حمدلله كل شي زين وضاري مايخليها تسوي شي بعد قلبي متعلق بهالولد قبل يجي
شوق: الله يفرحه ياربي بس كيف عرفتوا انه ولد
ام ضاري : ماعرفنا والله بس قلتها كذا
صدت شوق ببتسامه ضايقه: طيب انتي نفسك في ولد ولا بنت
ام ضاري بضحك: اللي من الله حياه الله يابنتي كلهم خير وبركه
شوق ببتسامه مليانه حسره: ياليت كل الناس مثل تفكيرك ياخالتي
ام ضاري : بسم لله عليك وش فيك علميني انا حاسه فيك شي من يوم مادخلتي
انهارت شوق تبكي : والله ياخالتي اني تعبت من خاالتي ام نادر
ام ضاري :لا اله الا الله وش فيها بنت الحلال ماتقولين صارت زينه
شوق: ايه لكن لها فتره تقول انها تبي ولد لنادر واذا ماكان ولد بتزوج نادر علي وانا وش في يديني كلها خلقة ربي وبإرادته .
ام ضاري : لا حول ولا قوة الا بالله مالها خاتمه هالحرمه ، مدري وش مصلحتها في خراب حياة ولدها
شوق : حتى عمي وامي بعد وحتى ابوي كلهم يبون ولد
ام ضاري : ونادر!؟
شوق: نادر راضي باللي ربي بيكتبه ما اعترض لكنهم جننوه وجننوني
ام ضاري: ماعليك من احد دام نادر راضي محد له كلام والولد ولا البنت هي لكم ماهي لاحد اسمعيني ياحبيبتي لا تخلين احد يعكر حياتك ويعكر اجمل ايامك انبسطي وعيشي وماعليك من احد ودام نادر يحبك وراضي بك مستحيل يفكر بغيرك ابداً ارتاحي
شوق : يارب ياكريم
حضنتها ام ضاري وهي تحاول تغير جوها وانهيارها وطبعاً جت مضاوي ولحقت على السالفه وبغت نىتنهار وهي تسب وتلعن لكن سكتت لاخر لحظه ماتبي تضيق صدر شوق اكثر
_______________________.
ومن هاللحظه .. إلى ٦ شهور
شالت شوق هم طفلها مثل ماشالت حملها وكل لحظه تدعي( يارب يكون ولد .. يارب ارحمني من هالمشاكل )
ولا يدري نادر بأي شي ينتظر شوق تقوله لكن مع مرور الوقت توقع انه من اثر الحمل وكان يساعدها بكل شي *** وضاري اللي ما قصر ابد مع مضاوي ويركض معها في كل شغله ولا يخليها تسوي شي وهو يعد الليالي والايام ينتظر متى تولد مضاوي
اما مضاوي كانت تحمد ربها ليل ونهار ان حظها رماها على ام ضاري وضاري اللي فعلاً مدللينها دلال وكل ماتشوف اهل نادر تحس انها في نعمه عظيمه ولا تقدرها *** اما خلف بدا رحلة شهر العسل ولا بقى مكان في باله ما راح له هو وليلى وكان فعلاً يرسم كل اللحظات السعيده معها كان ممتن وسعيد ويحس انه محظوظ فيها واخيراً قدر ينتمي لها ويستقر معها كان هذا اعذب انتصاراته
وليلى اللي كل يوم يكبر حب خلف اكثر كل يوم وهي تسجد شكر لوجوده في حياتها كل موقف بينهم يبين لها معدن خلف وحب خلف لها *** اما عقاب اللي صار بين حرب الكبرياء وحرب وجد وحرب وعد ماكان يدري على يد من هزيمه لكن يتمنى انها ماتكون على يد وعد رغم انه ماقصر بعد وكان يحاول يهزم وعد طول هالفتره لكن تحيره وتخليه واقف بمكانه مليان عجب وحيره وكان خايف من نفسه كثير خايف من انهزامه
اما وجد للي كانت مستغله هالفتره وتسحب عقاب لها وتشغله بحملها عن وعد وخليفه كانت تنهار من غيرتها ولا تدري وش تسوي غير انها تكيد لوعد لكن تنفضح بكيدها
اما وعد رغم ان عقاب و وجد ضغطوها بما فيه الكفايه كانت متمسكه بهدوء غريب كانت ماتهمها وجد قد مايهمها كسرة راس عقاب وهذا اللي قاعده تشتغل عليه وفي هالفتره بدا خليفه يكبر ويفهم ويتعلق وصار متعلق في عقاب كثيييير **** .
اما سحر وماجد
ما تدري سحر كيف دخل ماجد لقلبها واستقر فيه وصارت ماتشوف احد اغلى منه وخصوصاً بعد وا قدر يدخلها الجامعه وتدرس رغم رفض عقاب القطعي لكن اقنعه ماجد وحل الموضوع
وماجد كان ماعنده احد اغلى من سحر ومستعد يعطيها الغالي والنفيس ويوقف بوجهه اي احد يضيق صدرها
لدرجة انه استغنى عن مسألة العيال لييين تقدر سحر ترتب وقتها بين دراسه وبيت ***
وعند جابر واماني
جابر اللي بعد موقف اماني معه وبعد وقفتها معه وكيف اخذت بيده وطلعته من حرب الخوف اللي داخله صارت عنده بكل الدنيا عرف ان اختياره كان صايب وعمره ما رح ينخذل من اماني ابد
واماني اللي كانت بكل حيلها وحيلتها تحاول تساعد جابر وتسحبه من الرعب اللي محتويه وقدرت في فتره لكن ماهي بسيطه .. لكنها عرفت انها من زمان تعلق قلبها في جابر وتحمد لله اللي رجعهم لبعض **** اما في بيت الجد قايد
مرت عليهم هالشهور عاديه مافيه شي جديد محمد كل فتره يسافر ويستانس ويرجع عهد كل يوم تكبر حربها وحقدها على الكل وشهد اللي مابين دراسه وضحك وسوالف مع ابو ناصر وام ناصر
وهيا اللي كانت ساكنه بعيد وتجي كل فتره وهي الحين حامل في شهرها السادس **** وفي بيت ابو خلف
كان غياب خلف عن بيتهم مسبب ازمه وخصوصاً بين فيصل وابوه اللي يشوف ان فيصل مايعتمد عليه عكس خلف
لكن يقدر فيصل يتداركه ويمشي الموضوع بمساعده خلف ووعد
ام خلف اللي كانت في قمة سعادتها وهي تشوف خلف مبسوط وسعيد
وام وعد هالشعور بعد يسكن قلبها والجديد عندهم ان ممدوح خطب ندى ووافقوا وزواجهم صار قريب
_______________________.
وبعد هالشهور في بيت عقاب
اللي رجع من دوامه كعادته بلبسه الرسمي واستقبله خليفه اللي يركض بصعوبه له ونزل عقاب واستقبله يحضنه لكنه كشر اول ماشاف وجد اللي جت وهي تقول : اخذ قلبك هالولد الظاهررما بتحب ولدنا زيه
صد عقاب بضيق: اسمعيني عاد ترا مالي خلق لغيرتك الحين راسي مصدع وتعبان وجوعان وش سويتي غدا
ناظرت وجد في بطنها اللي صار في الشهر السابع : والله توني صحيت ماطبخت بس شفها هي يمكن طبخت
عقاب : من هي اللي اشوفها
وجد بتكشيره: وعد من غيرها
عقاب : اللهم صبرك ياروح
اخذ خليف واتجهه للمطبخ وهو يشوف القدور مرتبه كعادة وعد اللي اكتسحت البيت بجوها المرتب والنظيف والصحون جاهزه وكل شي جاهز لكن وعد ماهي فيه
لكن جت بعد مابدلت عن ريحة الطبخ واخذت لها دش وترتبت
واول ماسمعت صوت عقاب راحت للمطبخ : بدل عشان احط الغداء .
في هالفتره خفت حدة العلاقه بينهم وصار كلامهم طبيعي شوي وقرب عقاب : وش طابخه!؟ وعد : بيجيك الغداء وتشوف
اتجهه لها عقاب واول ماوقف جنبها فاحت ريحة العطر ولا كأنها طابخه ابد : انا أسال
فتحت وعد غطاء القدر : رز ابيض وملوخيه تقول سحر انك تحبها
ابتسم عقاب : ومن متى صار اللي احبه محط اهتمامك
لفت وعد وهي تكتفت : من اللحظه اللي صار كل شي يرجع زي ماهو وينحط للبهايم لان حضرتك ماتاكله وانا ماني مستعده اكسب ذنوب من وراك
عقاب : هه يا كثر حقدك علي
وعد : حقد!!! ههه لا لا حتى شعور الحقد حرام فيك انت حتى ذنبي استخسره فيك
احتدت ملامح عقاب ونزل خليفه بغضب وهو يسحب ذراعها بغضب: سكت لك كثير ياوعد
وعد : تردد هالكلمه من شهور ماشفنا لها فايده
فار دم عقاب اللي رفع يده وناوي يضربها وفعلاً ضربها كف للمره الثانيه
وهنا ثارت وعد بغضب وهي تقول : تمد يدك علي!! صدقني يا عقاب لتنكسر يدك للي مديتها
عقاب : اعلى مافي خيلك اركبيه
وعد : والله والله لهد دنياك على راسك ياعقاب وما اكون وعد
اتجهت لغرفتها بغضب وهي معها خليفه كانت بتموت من القهر والغضب ولمت كل اغراضها وركضت بتطلع بس شافت الباب مسكر واتجهت للتليفون وكان مفصول واتجهت له بغضب : اذا رجال هات المفتاح
عقاب : اقولك اذلفي لغرفتك وطلعه مافيه وترا النفس ماعادت تحملك ياوعد
اول ماحست وعد ان مواجهتها ضعيفه ولا تقدر تجبره يفتح الباب قالت بغضب: ولله والله والله وهذا هي ثلاث أيمان لتندم يا عقاب وللله لتبكي دم على هالكف والله لدفعك الثمن غالي وانا وعد
ودخلت لغرفتها وعقاب مقهور ومعصب والتفت على وجد بغضب وصرخ: وش تناظرين فيه انتي اذلفي لغرفتة احسن لك
ركضت وجد لغرفتها وهي مبسووووطه على اللي صار وتدري انها بتكبر
_______________________.
وفي بيت خلف
للي رجع من شغله ودخل مبتسم وهو ينادي: ليلى وينك يا روحي
لف خلف على صوت خلخالها اللي اللي يدل على مكانها وشافها نازله من السطح واتجهت له بخطوات سريعه وهي تحضنه كترحيب فيه : انا هنيه صعدت السطح انشر الغسيل
خلف : الله يعطيك العافيه
ليلى : لله يعافيك ، هاه شخبار شغلك ان شاء الله مافيه تعب اليوم
خلف: لا حمدلله
ليلى : جهزت لك ملابس نظيفه عشان تبدل وتقط هالدشداشه عنك على ما انچب الغداء
كان خلف مبتسم وهو كل مره يسمعها تكلم يسهى فيها وينجذب لكلامها
ضحكت ليلى: شنو فيك !
قرب خلف مبتسم وهو يبوس شامتها وقال: مغرم بالشامه وصاحبة الشامه وهيمان في اللهجه وصاحبتها
نزلت ليلى راسها بخجل وهي تبعده : مو وقت هالحچي الحلو .. ولا ناسي العصر بنروح عند امك وماباقي وقت
ضحك خلف وابتعد : ايه صح مافيه وقت
راحت ليلى تجهز له الغداء ورجع خلف بعد شوي لكن سبقته ليلى : خلف دواك
ابتسم خلف : هاتيه يلا
ليلى : عفيه خلف لا تنساه وانت برا البيت
خلف : ابشري في البيت بعتمد عليك وبراز بعتمد على نفسي
ليلى : ياحبيبي والله
ولفت ببتسامه وهي تناظره بحب وبعدها لفت
خلف: وشوله تناظريني!؟ ليلى: چذيه بتأمل نعمة ربي علي
ضحك خلف : حلوه لكن عطيني السبب
ليلى: عادي شنو فيك ، سم باللله وتغدا يلا
لف خلف ببتسامه وبعد الغداء راح يريح لين العصر والعصر صحته ليلى وهو مستغرب الابتسامه اللي على وجهها مريبه
ورجع يجلس : ليلى حبيبي عيوني تعالي
جات ليلى ببتسامه: سم يانور عيوني
خلف : اعترفي وش مسويه!!! وش مخبصه هالضحكه ماهي مريحتني
ضحكت ليلى :والله ما سويت شي بس چذيه ماتبيني ابتسم
خلف :ابتسمي لكن معدل هالرضا يربكني
ضحكت ليلى؛ والله ماكو شي قوم يلا تأخر الوقت
طلع خلف وهو متأكد ان فيه مقلب بتسويه قريب فيه وخصوصاً انه تعود عليها كذا لكن كيف بيكشفها مايدري
_______________________.
وفي بيت نادر
اللي نايم بتعب بعد ماكان سهران مع شوق اللي صارت بشهرها الثامن وصارت تتعب كثير ويروح اغلب الليل تبكي وهو يهديها
رغم لازعاج الللي برا ما صحى لكن صحى على صرخة قويه فجعته ونقزته من مكانه ركض على اتجاه الصوت وسمع امه تقول : ياويل بتولدين الحين بدري بدري
كان شوق واقفه وهي ماسكه الجدار وتصرخ: ألحقيني ياخالتي تكفين بموت
ركضت نادر يصرخ برعب : شوووق شووق وش فيك
مسكت يده بقوه وهي تصرخ: نااادر ألحقني يانادر بموت تكفى يانادر
انبهل نادر يركض يميين ويركض يسار وبالقوه لين استجمع عقله ولبس وركض بعبايه شوق واخذها وطلع لسياره بسرعه وكل ماصرخت فز برعب وهو خايف وفي هاللحظه المرعبه حتى امه ماهي معه جلست وتركته مع شوق جاهل اللي يصير وشوق بعد تجهله وصل المستشفى وهو يصرخ وينادي : ألحقوا ألحقوا
ركضوا ياخذون شوق اللي تصرخ بصوتها كلها وهي ماسكه يد نادر وتبكي : تكفى لا تخليني لحالي يانادر تكفى
نادر:ابشري ابشري اذكري الله انتي تكفين
سحبها لطواري ورفضوا نادر يدخل لكن شوق كانت تصرخ بأسمه وانهبل نادر برا لكن رجعت له الممرضه تقول : زوجتك عندها ولاده مبكره لازم توقع علو اوراقها عشان تدخل واذا تأخرها بنخسر واحد فيهم
للحظه حس انه داخ هاذي اللحظه اللي خايف منها شوق صغيره بعمرها وبنية جسمها ولا تقدر تحمل والكارثه انها ولاده مبكره وخبر انه بفقد واحد منهم جننه ورجع على صوت الممرضه: استعجل يا اخوي
وقع نادر برعب وراحت الممرضه وخلته واقف مرتعب مايدري لمن يروح ومن بيسنده
ركض لتليفون ودق على طول على ضاري اللي جاء يركض هو وامه ومن حسن حظ مضاوي كانت عند بيت ابوها
اول ماشاف ركض لهم ومسكه ضاري : نادر وش فيك
نادر: شوق عندها ولاده مبكره ومتعسره واخاف ويقولون احتمال اخسر واحد منهم
اتسعت عيون ضاري بذهول : وشووو
ام ضاري : اذكر الله يانادر يا ولدي ان شاء الله مافيها الا العافيه وربي بيسهل عليها بس انت لا توتر اذكر الله
نادر:ياخالتي ماهقيت انها بخيييير
ام ضاري : لا يا ولدي لا تفاول عليها بشر اذكر الله ورح غسل وجهك وصل ركعتين وادع لها وربي معها ان شاء الله
ضاري : تعال معي تعال
اخذه ضاري وهو متوتر ويحس ريقه ناشف من الفجعه ماكان ضاري اقل من خوف لانه فعلاً خاييف من هاللحظه
وقفت ام ضاري وهي تدعي لشوق من قلبها وكل شىي تسأل لكن مافيه خبر
لكن بعد شوي رجع نادر اللي ماقدر يقعد ويرتاح : خالتي طمنيني
ام ضاري : مافيه خبر
نادر: ياربي تلطف بها يارب
لفوا على صوت الممرضه تنادي وركض نادر لها : كيف شوق
ابتسمت الممرضه : شوق بخير حمدلله وأطفالها بخيير وبصحه كويسه
نادر ما انتبه ولف بفرح: حمدلله ياربي
ام ضاري : وش جابت!!
ضاري: اطفال ايش اللي تقولينهم
انشدوا لها كلهم وقالت الممرضه: جابت توأم عيال وكانت الولاده متعسره ومبكره لهذا السبب
طارت عيون نادر بصدمه: وشوووو توأم!! الممرضه ا: ايييه ليه ماعندك خبر
نادر للي جاه ضحك هستيري مختلط برعب : لا لا ماعندي خبر
ام ضاري: مبروووك مبرووك ياولدي
نادر: الله يبارك فيك
لف عليه ضاري يحضنه ويبارك له: يلا ربي رزقك توأم وفرحك بدال الفرحه فرحتين
نادر: حمدلله ، اقدر اشوف شوق
الممرضه: بعد ساعه بتكون بالافاقه وتشوفها
نادر:والاطفال
الممرضه: مسموح لك فقط تشوفهم
نادر راح ببتسامه وراها وضاري وامه واقفين مبتسمين وفرحانين
وضحكت ام ضاري: سبحان الله كانت هالمسيكينه شايله هم الولد وعطاها الله اثنين
ضاري : لطف لله كبيير ، لو تدري مضاوي بتنهبل عساها هي بعد حامل بتوأم .
ضحكت ام ضاري : غيره المووضوع امش امش
لف ضاري يضحك ماهو مصدق
اما نادر اللي كان واقف بهذول يناظر عياله مايدري كيف بيستوعب وكيف بيشيلهم وكيف بيسوي لكن فرحان فرحان بشكل مو طبيعي كان ينتظر شوق تصحى عشان يشوفها ويطمنها
_______________________.
وفي بيت النوخذه
كان جابر جالس مع اماني وهو يسولف معها وقال بعد فتره : رحت اليوم الطبيب
ناظرته اماني: بسم لله عليك فيك شي !؟ يوجعك شي
فزت تمسك جبينه لكن مسك جابر يدها وهو يجلسها: لا لا انا زين لكن حبيت اسوي فحوصات وتحاليل
اماني: لأيش!؟
جابر بتردد : بصراحه انا صار لي فتره افكر في موضوع العيال وواخاف هالحرب والكهرب اللي عرضوني له يأثر علي واصير ما اقدر اجيب عيال
انصدمت اماني اللي ماعمرها فكرت بهالموضوع وهي تنتظره يكمل
وقال جابر: احنا لنا ٦ شهور متزوجين وانتي للحين ماحملتي وانا خايف من هالنقطه قلت اسوي فحوصات عشان اتأكد واذا صچ انا متأثر راح اتعالج مبكر
ارتخت اماني بهدوء: ويمكن مافيك شي ، واكيد ربي ماكتب الحين اصلا حتى ليلى ماحملت وهي متزوجه معانا
جابر: خاطري اتطمن يا اماني ومارح نخسر شي
ابتسمت اماني بهدوء: زين اللي يريحك بس حط في بالك اني مارح اخليك لو ما ادري شيصير
ابتسم جابر : والله انچ عوض الايام الشينه يا اماني
ابتسمت اماني : اممم مارح يجي عمي وخالتي!؟ جابر: ما ادري والله ما قالو لي شي لكن اذا ودچ نروح لهم الكويت نروح
اماني : اخر مره رحنا لهم خلهم يجون يغيرون جو هنا
جابر:وانتي الصاچه
بدت اماني تسولف وجابر يسمع بحب
_______________________.
وفي بيت ماجد
كانت سحر نايمه بعد مارجعت من الدوام وهي مهلوكه لكن صحت على صوت ماجد يناديها بخفه: سحر يلا قومي
ناظرت سحر بهدوء: كم الساعه !
ماجد: قريب المغرب قومي يلا وتراني عازمك على قهوه في الصاله عشان نتقهوى ونروق وتذاكرين
فزت سحر : الله يعطيك العافيه وربي محتاجه هالقهوه
ماجد : قلت لك اعرف وش تبين قبل تتكلمين وابشري باللي تبين يلا قومي
فزت سحر تغسل وترتب وماجد ينتظر في الصاله وهو معاه مذاكراتها والقهوه
وكان يساعدها كثييييير وسحر تسهى عن الدروس تتأمل طيبة ماجد
ماجد : لا تناظريني ناظري هالمسأله ولا ترا اذا ماحليتي في الاختبار بكره مابنروح للخفجي
ضحكت سحر: يعني مفاوضه!!
ماجد: ايه نعم مابي اوقف في وجهه عقاب واقول تكملين وفالاخير تسقطين
ضحك سحر: وانت الصادق يلا يلا عيد من جديد
ماجد: يلا ركزي
بدا يشرح من جديد وهالمره ركزت معه
_______________________.
وفي بيت ابو خلف
وصلوا خلف وليلى اللي كانوا جالسين معهم وسوالف وضحك
فيصل : يارب ترسل لنا اثنين زياده واعيش بعدها بسلام
ام خلف : اثنين وش !؟
فيصل : معاريس لحنان ووجدان لان ندى وبفضل من الله راحت وبتزوج بعد فتره والحين ما باقي الا هالثنيتن
خلف : وش عليك فيهم جالسين على قلبك
وجدان: من الغيييييره اللي فيه
حنان : وش سوينا لك يا استاذ
فيصل: ابي استقر بدون ازعاج البنات
ام وعد : تبي تستقر تزوج بناتي مالك دخل فيهم
خلف : احسسسن تستاهل
ليلى اللي كانت متغطيه غطاء كامل وجالسه معهم وهي هالفتره صارت تمون على فيصل: وانت ليه متذمر المفروض تفرح ان عندك خوات باقيات
وتعرف قدرهم وتتعلم من الشاعر اللي يقول (إن البيوتَ إذا البناتُ نزلنها مثلُ السماءِ تزيّنت بنجومِها
هُنَّ الحياةُ إذا الشرورُ تلاطمت وإلى الفؤادِ تسلّلتْ بهمومِها)
فيصل : ماشاء لله تبارك الله ربي جمع ووفق عرف خلف يختار الانسانه اللي مثله مايعرفون يتكلمون زي الادام لازم حكم حكم
خلف : وياليتك تعلم ويثمر فيك
ضحكت ام خلف : انا مدري وينها اللي مثلك عشان نزوجك ونفتح
ضحكت وجدان بهبل : شهد مثله عله
لف فيصل : ولله!!! ااقول ماغيرك العله واللي بتزوجها ابيها ماتعرفك ولا تعرفينها
خلف : عاد الله يكون بعون الضعيفه اللي بتاخذها
ندى: بيشيب راسها وتخلعه هي حتى الطلاق ماهي طالبته
فيصل : ايييه تكاثروا علي
خلف : انت الغلطان وتستاهل
فيصل : الله كريم ، يلا بهج سلام عليكم
خلف: وينه ابوي ماجاء !؟ ام خلف : معزوم للعشاء عند صاحب له
خلف : زين اجل ، انا بطلع للعيال شوي
ندى: بتعشون هنا صح
خلف : ايه ايه
وقف بيطلع لكن وقفت معه ليلى وهي تهمس: لا تنسى دواك
خلف : ابشري ، تبين شي اجيبه من برا
ليلى: لا سلامتك
خلف : الله يسلمك
طلع ولفت ليلى وهي تنزل عبايتها وشافت الكل تفرق ماعدى ام خلف وراحت لام خلف وهي تجلس جنبها
ام خلف:الله يسعدك يابنتي ماقصرتي تذكرينه بدواه
ليلى : افا عليچ ياخالتي مستحيل انساه وخلف انتي امنتيني عليه
ام خلف : الله يسعدك
ليلى ببتسامه: خالتي بقولكرشي انا شكيت فيه
ام خلف: قولي ياحبيبتي
ليلى بحرج: صراحه ياخالتي انا شاكه اني حامل
فزت ام خلف بفرح: قولي والله
ليلى: والله بس للحين مدري كيف اتأكد
ام خلف : ماقلتي لخلف .
ليلى: لا قلت بقولچ قبل .
ام خلف : قولي لي وش تحسين فيه
بدت ليلى تسرد عليها اعراض الحمل الواضحه وهي مبتسمه وام خلف بتطير من الوناسه: اي والله هاذي اعراضه لكن خليني بكره بقول لخلف اني تعبانه بروح المستشفى واروح انا وانتي ونشوف ونحلل واذا طلع صدق بشرناهم
ليلى:زييين اجل شورچ وهداية الله
حضنتها ام خلف بفرح:يارب يكون صدق وافرح بعيال خلف زي ماني فرحانه بسعاده اللي اشوفها قدامي
ليلى ببتسامه: يارب
سكتوا ينتظرون رجوع خلف وهم كلهم فرحانين
_______________________.
ووفي بيت عقاب
اللي كان على نار طول يومه على نار مايدري كيف يحل هالبلوه اللي صارت
وكل ما مر الوقت يضيق صدره وكان البيت هادي هدوء مرعب وعقاب فالصاله يدور يبي حل ماقدر للحين يده تنبض من الكف اللي ضربه لوعد
لكن لف على صوت الباب اللي دق بخفه ودقه يعرفها عقاب زين دقة خلف لكن مافتح وسكت مايبي خلف يدخل الحين واذا عرف باللي صار بتقوم الدنيا ولا تقعد
انتظر لين راح خلف ولا طول
ورجع وهو يقول ( حسبي لله على ابليس شوفي وين وصلتينا ياوعد شوفي وش هببتي فينا)
اما وعد ما عرفت بجيت خلف وهي تدور وتلف كيف تطلع وكيف تاخذ حقها من عقاب اللي زانت له مدت اليد
_______________________.!
وفي المستشفى
عند نادر اللي ماصدق صحت شوق وركض لها ودخل مبتسم يناظر وجهها التعبان واسرع يجلس على طرف السرير: شوق ياعيوني حمدلله على سلامتك
شوق بهمس خايف : لله يسلمك ،وش صار يانادر
قرب نادر مبتسم : صار اللي ماهقيناه بصير تخيلي ياشوق انك جبتي توأم، كنتي حامل بتوأم ولا درينا!؟ وجبتي توأم عيال
شهقت شوق من الصدمه : كييف يعني
نادر : سمي بالله اول شي
شوق : بسم لله بس نادر ماني مصدقه
فزت بتحرك بس رجعت بألم: كيف جبت توأم وماحسيت
نادر: كتب لله لنا هالتوأم ولو تشوفين كيف صغار وحلوين ياخذون القلب
شوق : تكفى نادر كلمهم يجيبونهم
نادر: ابشري
راح نادر ورجع مع عياله اللي فرحان فيهم واول ماحطت الممرضه العيال في حضن شوق يمينها ويسارها وحجها الصغييير حولهم صار كبيير انهارت شوق تبكي وقرب ماجد :افا ياشوق تبكين وانتي المفروض تفرحين
شوق كانت شايله هم ما توقعت ترزق بأثنين عيال تسكت ام نادر وكل اهل الديره
حضنتهم ببكى ونادر يحاول يسكتها بس مافيه فايده واخذوهم منها وهي تناظر بنهيار ونادر يحاول يسكتها لكن عجز
واخيراً سكتت شوق وهي تقول : احد درا!؟
نادر : خالتي ام ضاري وضاري كانوا هنا وتوهم راحوا
شوق : الله يخليها يارب ويسعدها .
نادر: بقوم ابشر امي وابوي
شوق: ايه تكفى بشرهم
ضحك نادر بفرح: سبحان الله كانو يبون ولد ورزقنا وبي بأثنين
شوق : والله ماني مصدقه
نادر: صدقي صدقي لين اجي
راح يركض يكلم امه وابوه اللي ماصدقوا ابد وبسرعه طلعوا للمستشفى مذهولين
لكن اول مادخلوا وشافوا شوق وشافوا العيال صدقوا وشوق تناظرهم بفرح وانتصار على ام نادر اللي انقلبت معاملتها وانهلت على شوق بالحب والحضن كله عشان الولد وابو نادر مثلها
_______________________.
وفي بيت
الجد قايد جاء ضاري عشان يشوف مضاوي اللي صارت مثل التمساح ٢٤ ساعه منسدحه وتاكل وتحلطم
لكن اول ماقالوا ضاري برا فزت وهي تكشخ
شهد : عشتوا توك مالك نفس شي
ضحكت مضاوي : هذا المنظر لك لكن لضرضورة قلبي لاا
ندى: لله يخلف دام هذا دلعك له
ليلى بضحك: واااي مضاوي شفيچ عذبتي الدلع ضاقت الاسامي
مضاوي بضحك واستهزاء : واااي ليلوه شعرفچ انتي بالدلع يامعوده
ضحكت ليلى وطلعت مضاوي تتبختر والبنات يضحكون
ودخلت المجلس وهي تشوف ضاري وخلف يضحكون بفرح
خلف : ياربي لك الحمد وش ذا الاخبار الزينه ياارجال الف الف مبروك يارب
مضاوي بفضول: على وشو تبارك له
خلف بمزح: ضاري بيتزوج عليك
شهقت مضاوي:وشوووو
ضاري : وللله عاد انتي مافيك حيله هالفتره وانا رجال ما اقدر ارجع لمعمعة العزوبيه
طارت عيون مضاوي : نعم نعم
خلف: راحت عليك يالتمساح
فز ضاري يمسكها قبل تروح: نمزح نمزح والله افا اجل انا مجنون اتزوج غير عين السيح مضاوي
خلف : للله ييخلف عليك بعقلك اجل
مضاوي : خلييف خلك بنفسك لا تخرب رجلي
ضحك خلف : اقعدي انتي وياه بس
ضاري: ماعليك منه كان يبارك لان نادر زوجته ولدت
شهقت مضاوي: وشوووو شوق ولدت
خلف :ايه وبتولدين انتي معها الحين
ضاري : ياخلف فكني شرك
مضاوي: شلون ولدت توها بدري
ضاري : ولدت مبكر وابشرك جابت تووم عيال
انهارت مضاوي من الصدمه : لا ياربي ما اصدق ، والله انك تمزح
ضاري : والله ما امزح طلعت حامل بتوأم ومحد يدري وطللعوا كلهم عيال
فرحت لها مضاوي : ياربي لك الحمد نولها مرادها وعساها ما تعبت
ضاري : لا هي بخير بخير
خلف اللي يبي يوتر مضاوي :اقول انتي متى تولدين
خافت مضاوي: بدري علي
ضاري: خليييف ااص ، ان شاء لله تولدين بوقتك وانتي بخير وسلامه
مضاوي: يارب خلني بروح ابشر البنات
راحت وهي فرحانه وخايفه والتفت ضاري بغضب:خليف الله لا يسامح ابليسك ، انا يالله اهديها وانت تزودها
خلف يضحك:ماعليها خوف مضاوي ان شاء الله لكن بحرق دمها زي ماكانت تسوي فيني .
ضاري : ياخي انا اللي بيلعن خيري فكني .
ضحك خلف: ماعلينا نادر وعرفنا وينه عقاب وين !؟
ضاري : من متى تسألوني عن عقاب !! مدري عنه والله
خلف : غريبه ما لقيته في بيته ولا ادري وينه حتى وعد ماجت اليوم
ضاري: تلقاه يحوس في مصيبه مايختفي على خير ذا
ضحك خلف: لا يسمعك يدفنك
ضاري : المهم انت وش اخبارك
خلف : ابد انا مبسوووط ومستانس
ضاري : هاه عسى فيه شي بالطريق
خلف : بدري يارجال تونا معاريس
ضاري : يا ربي يالدلع اقول اخلص نبي نشوف عيالك
خلف : وانت وش عليك احد عينك مراقب علينا
ضحك ضاري : لا بس ابيك تكمل الرصه معنا لان فجأه كلنا صرنا ننتظر عيال عقاب وانا ونادر كمل انت
خلف بضحك :بدرس الموضوع
ضاري : يلا ادرس وانا بروح
خلف : الله معك
راح وطلع خلف للبيت اهله وهو تقريباً الرجال الوحيد فالبيت لان الكل معزوم وهو ماحضر هالعزيمه
دخل وهو يشوف مضاوي تبشر البنات وفرحانين واتجهه لليلى وجلس جنبها يمسع ردودهم عن ولادة شوق
لكنه مع الصوت غفى بجنب ليلى
واشرت حنان : اص اص اص
مضاوي: علامك
اشرت حنان على خلف : نايم
ليلى: خنت حييييلي تعب واايدد اليوم
مضاوي :صحيه ينام هناك
ليلى :لا لا اذا صحى مارح يرد ينام تعالوا نطلع
طلعوا البنات وراحت ليلى وهي تجيب له لحاف ولحفته وطلعت وعيون ام خلف عليها بحب
لكن في هاللحظه استغل الفرصه شخص ثاني شخص فاقد حضن خلف ودخل معه وهو متعلق فيه وطول هالشهور وهو متأزم
ورجعت ليلى لخلف تشوفه لكن ضحكت وهي تشوف غيث اللي دخل بحضنه ونام وهو من زمان فاقد خلف
ضحكت وهي تسكر الباب
_______________________.
وفي الليل في بيت عقاب
كان هادي محد له حس وجد بغرفتها ووعد في غرفتها ما طلعت بعد اللي صار
وعقاب بعد ما دار ولف لين افتر راسه وهو يدور حل يرضي الطرفين عجز وهو يدري وعد ما سكتت على خير وبتسوي شي وتنفذ تهديداتها لكن للحين مايدري وشهو وهدؤها مايطمن
قرر يروح ينام شوي ودخل عند وجد وانسدح بدون صوت وهو مقفل الباب وكل مخارج البيت عشان وعد ما تحصل فرصه تسوي شي
ومايدري عن وعد ولا وش صار فيها اللهم انه يسمع بكى خليفه كل فتره لكن سكت وهنا نام عقاب ولكن في مثل الحلم وفجأه فز على صوت ضرب باب الغرفه ووعد تصرخ عقاااااب عقااااااب ألحقني عقاااااب
فز عقاب من الفجعه مايدري كيف وقف وركض مايدري لوش يركض ولا وين رايح ولا وش ينتظره فتح للباب برعب ووجد واقفه وراه وكلهم يناظرون وعد اللي جت تصرخ وخليفه بين يدينها ورمته على عقاب وهي تبكي منهاره: ألحق خليفه ياعقاب تكفى
اخذه عقاب مفجوع يناظر فيه وهو يناظر وجهه اللي صاير ازرق وماله صوت
وصرخ برعب: وش اكل وش اكل!! وعد : ما اكل شي انا كنت عنده كان نايم وفجأه مدري وش صار له
قلبه عقاب وهو يحاول يفك اختناق خليفه بس مافيه فايده
وكانت وعد تبكي بأنهيار حوله وهي تقول : تكفى ياعقاب ولدي لا يموت تكفى يا عقاب
ركض به عقاب لسياره : ألبسي ولحقيني
طلع المفتاح من جيبه ووعد تبكي وهي تلبس ماتدري كيف لبست وركبت مع عقاب وهي منهاره وتحس انها هي المخنوقه وكانت ترجف ماهي قادره تمسك خليفه اللي كان شبهه ميت
لكن عقاب اللي كان يسوق بيد وحده ويد ماسك فيها خليفه يحاول يسوي شي يساعده لكن ماقدر وكل ماء طالت حالة خليفه ازداد خوف عقاب لللي لاول مره يخاف هالكثر
وصل المستشفى ونزل يركض بخليفه ووعد تركض معه وهي ماسكه ذراعه بخوف
اقتحم عقاب الطواري وهو يصرخ: اسعاف اسعاااااف اسعاف معي حاله حرجه
في ثواني تجمعوا حوله الممرضين واخذوا خليفه وهو يسألون عقاب وش جاه ولا يدري عقاب ويحاولون يسألون وعد اللي ترجف ماقدرت تكلم ومسكها عقاب بحنيه يبي يهديها كسرت خاطره وهي تبكي
عقاب : وعد تكفين قولي اذا فيه شي قولي عشانه عشانه
وعد و دموعها مغرقه وجهها :مدري ياعقاب من ايام كان يشرق ويصيح ويختنق لكن بعد فتره يهدا لكن اليوم ماقدرت اسكته واساعده
الدكتور: من كم يوم تقريباً
وعد : ١٠ ايام تقريبا
عقاب : وساكته
وعد : كان عادي عادي لو ادري بيصير له شي ماسكت
الدكتور: طيب اطلعوا برا عشان نعرف نشتغل
وعد : لا لا بجلس عند ولدي
الدكتور: لو سمحتوا اطلعوا
اخذها عقاب بهدوء: لا توترينهم خليهم يعرفون يتصرفون
جلست وعد ببكي وهي تدعي مايصير له شي وكان عقاب خايف اكثر منها لكن اوجعت قلبه وعد ببكاها
جلس جنبها وهو يحط يده على كتفها: اذكري الله ياوعد بأذن الله مافيه شي بأذن الله ربي بيقومه بالسلامه اذكري الله
ماردت وعد وهي تبكي وعقاب حولها وهي نست كل شي بعد تعب خليفه
جلسوا ينتظرون بالساعات وتدور وعد بألم ويدور عقاب معها تبكي ويحاول يهديها وتخاف ويحاول يطمنها وبعد انتظار ٤ ساعات موجعه طلع الدكتور يناديهم
وركضت وعد : وينه ولدي ؟
الدكتور: هدي ولدك بخير .
عقاب : حمدلله بس وش فيه وش صار له
الدكتور: هو كان معاه اختناق لكن ما حصلنا اي سبب اختناق مفاجئ سوينا فحوصات واشعه وتحاليل لكن ما فيه سبب واضح
عقاب : كيف يعني !!
الدكتور: يعني مافيه اي سبب نقدر نقول اختنق منه ممكن يكون اختناق عابر
وعد : واذا رجع اختنق
الدكتور: باذن الله مايصير له شي وبيجلس معانا لين بكره ونرجع نسوي فحوصات ونقرر من جديد
عقاب تذكر وقال: يادكتور خاله مريض بالربو المزمن وكثير احيان تجي له حالات ربو واختناق واغماء ..ممكن هذا السبب !
الدكتور: ممكن يكون المووضوع وراثه لكن بكره نتوسع بالفحوصات ونشوف لكن حالياً تطمن ولدك بخير
دقت هالكلمه بقلب عقاب اللي لف يناظر وعد اللي قالت
وعد : وينه طيب ابي اشوفه
الدكتور: هنا ، واتمنى منك تكمل اجراءات الاوراق
عقاب: زين
تحرك عقاب لكن وقفته وعد وهي تعطيه كرت: هذا كرت العايله عشان تقدر تعبي الاوراق
اخذه عقاب وراح وهو كل شوي يلتفت للغرفه وبعد ما انهى الاوراق رجع للغرفه ودخل وهو يشوف وعد جالسه قريب خليفه اللي بيده مغذي وعليه اكسجين ومنظره يقطع القلب وكانت في انهيار عظيم اول مره يشوفها عقاب بهالحاله وقرب يناظر خليفه النايم وحط يده على راسه وهو يتمتم ويدعي له بنفسه
وبعدها جلس جنب وعد : يا وعد خلاص اهدي مايصير تجلسين تبكين كذا بتعبينه وتعبين نفسك وهو حمدلله بخير وطيب
لفت وعد وهي تمسح دموعها: اخاف يصير له نفس خلف ويتعب كفايه علينا خوفنا على خلف مابيه يتعب وهو بهالسن والله صغير
عقاب : لا لا ان شاء الله انه مافيه شي وبخير وهذا انتي سمعتي الدكتور يقول كل شي عادي يمكن تأثر من الجو او اي شي وان شاء الله انه طيب وانتي لا توسوسين
سكتت وعد وهي تناظر خليفه بضيق ويناظرها عقاب اللي اول مادقق في ملامحها اللي منهاره من البكى شاف المنظر اللي تمنى انه ماشافه شاف اثر اصابعه على خد وعد وصد بقهر من نفسه لكن يكرر نفسه( اهي استفزتني هي جنت على نفسها) لكن تأنيب الضمير داخله حي وهو يشوف انها في اول مصيبه صارت رجعت له تركض ونست كل ذا عشان ولدها ووعد عمرها ماتنسى الضيم
قرب بضيق وقال الكلمه اللي عمره ماقالها لاحد ولا فكر يقولها لكن اجبره قلبه ولسانه وتعاطفه مع وعد انه يقولها : وعد
لفت وعد تناظره واعتدل عقاب وقال: ماكان ودي امد يدي عليك لكنك استفزيتيني واجبرتيني اسوي شي مايطلع من قلبي اني اسويه ولا ارضى اني امد يدي عليك واضرك
ناظرته وعد بهدوء وصدت وقالت : قلت ان مبارك أمنك على ولده وانا تزوجتك عشان خليفه وانا رميت هاللي سويته ووراي وركضت استفزع فيك عشان خليفه ولا تستغل وضع خليفه وتبين لي ضعفي وشفقتك علي في هاللحظه
عقاب : لا ولله ما ابين لك ضعف ولا شفقه وانا مثلك لو انحط بهالموقف بركض لاقرب شخص ينقذني لكن انا فعلاً اعتذر لان اخر شخص ابي امد يدي عليه هو انتي لكن مع ذلك انت تحرضيني في كل مره اني اسوي شي ما ابيه
رجعت وعد تناظره بعيون ذايبه وتعبانه : تروح وترجع وترمي الخطاء علي في كل مره وهذا انت يا عقاب اللي ماقدرت تسويه حرضت الغريب يسويه المهم تشوفني بهالحال
عقاب :تدرين انه لو تخطين ألف مرّة.. ماتركتك للغريب.. لكن انتي اللي فضلتي الغريب ياوعد
وعد بقوه وقهر: تدري ليه فضلت الغريب ... من سواد وجهه ولد عمي
احتدت نظرة عقاب للمره المليون وقال بغضب مكتوم : قلت لك لا تستفزيني ياوعد
صدت وعد وتركته وهي همها في هاللحظه ولدها ماهمها عقاب ومشاكل عقاب
اما عقاب طلع بغضب وهو مقهور من كلامها اللي مازال قوي حتى في هاللحظه
_______________________.
ومن الصباح بدري
رجع خلف لبيت امه ومعه ليلى للي قالت له انه بتروح مع ام خلف للمستشفى وماتقدر تخليها وحدها واستانس خلف لانه مبسوط على علاقة ليلى بأمه اللي فاقت علاقة البنت بأمها
نزلت ليلى وهي ترجع في المرتبه الثانيه من السياره وركبت ام خلف بمساعده خلف : سلام عليكم
قربت ليلى تبوس راسها: هلا خالتي ، قوه
ام خلف : الله يقويك ، كيفك اليوم
ليلى: حمدللله
خلف : يمه حبيبتي قولي لدكتوره كل شي يوجعك خليها تشوف مشكلة هالصداع
ضحكت ام خلف : ان شاء الله خير يمه لا تخاف انت
خلف : اذا ما خفت عليك اخاف على من !
ام خلف ببتسامه وضحك: خاف عليى ليلى حبيبة القلب الغاليه
ضحك خلف وهو يناظر عيون ليلى بالمرايه وهي تبتسم وقال وهو يبوس يد امه: ليلى غاليه لكن انتي اغلى
ليلى تسوي عيوني لكن انتي القلب يا ام خلف ومحد يحل محلك ابد
ليلى : ايه خالتي لا تقولين هالحچي مره ثانيه اانتي الكل بالكل والله يخليچ لنا
ضحكت ام خلف : امزح معكم ماعليكم
ضحك خلف وهو يرجع يسولف ولا يحس بشي من اللي حوله
_______________________.
..
..
..
..
..
