اختطاف ابنة السفير

الفصل الخامس

بدر رجع بالليل ، خبط ع رونزي ف الأوضة براحة ومفيش رد ، فتح الباب بالراحة ولقاها نايمة كان هيخرج بس لاحظ أنها مكشوفه قرب منها عشان يغطيها ، مسك اللحاف ولسة هيغطيها فتحت عينيها واتفزعت

رونزي بصراخ: يا لااااااهوي ، الحقوني يا نااااس الراجل عايز يغتصبني .. يا خرااابي
بدر بعصبية مكتومة: اكتمي ، اغتصبك ايه
رونزي كمشت نفسها: امال داخل عندي تعمل ايه فـ وقت زي دة يا متحرش وانا اللي كنت فاكراك حرامي محترم
بدر بضيق: كنت داخل اطمن عليكي ، ولقيتك مكشوفة وكنت بغطيكي
رونزي: حجة دي مش كدة ، اهو انا دلوقتي عرفت انت مخليني معاك ليه يا مغتصب
جز ع أسنانه بحنق: وهو انا لو عاوز منك حاجة هستأذنك
وقفت ع ركبتها وبتبصله بملامح متأثرة: كماااان ، كمان عايز تسلب مني أعز ما أملك من غير استئذان!! دة انا كنت اقطعك بسناني
بدر: انتي بجد مش طبيعية

سابها وخرج قعد ع الكنبة وهي راحت وراه ..
رونزي: انت ايه اللي رجعك متأخر كدة ، ومخليني بين أربع حيطان لوحدي
بدر رفع وشه ليها: هو انتي متجوزاني !!
رونزي: وانا اتجوز خاطف ليه ، وبعدين مفيش لاب توب ولا تليفزيون اتسلى بيهم دي خطوفة مملة
بدر: يا بنتي انتي ف مصيبة
رونزي: ولو برضو مقعدش لوحدي ، هاتلي حد اتسلى معاه ، اخطفلي عدي عشان هو السبب ف اللي جرالي دة
بدر: مين عدي ؟
رونزي: دة الظابط اللي كان بيحرسني ، ولو عملت كدة وخطفته انا هخلي بابي يسامحك لما ترجعني ومش بعيد كمان يشغلك معاه ، بس هاتلي الأهبل اللي اتخطفت منه عشان اشفي غليلي
بدر نفخ بملل: روحي نامي
رونزي: مش عاوزة أنام ، أنا جعانة

بدر راح ناحية المطبخ وفتح التلاجة ، وبص ملقيش حاجة فيها واستغرب لأن التلاجة كانت مليانة ، بص ع المطبخ لقى اطباق كتيرة لكن فاضية مفيهاش أكل وواقف مذبهل من المنظر اللي قدامه .. جاتله رونزي

بدر: انتي كنتي عاملة حفلة هنا ولا ايه
رونزي: حفلة ايه
بدر: امال الأكل راح فين
رونزي: وهو انت بتسمي دة أكل أصلاً ، دة يدوب مسح زور
بدر وسع عينه بصدمه: مسح زور؟ ، يخربيت طفاستك انتي بتسمي الديك الرومي والفراخ والحمام والفواكه والبيبسي اللي كانوا ف التلاجة مسح زور؟
رونزي بزمجرة: اعملك ايه يعني ، منا لما بكون زهقانة بنسى نفسي ف الأكل ، وبعدين انت هتذلني لما ترجعني ابويا يديك الفلوس دي ع الجزمة
بدر: طيب لما ترجعي لأبوكي يا حلوة خليه يأكلك بقا ، حاولي تخزني الأكل اللي طفحتيه ف بطنك لغاية ما ترجعي
رونزي: هو انت فاكرني جمل أخزن الأكل !! ناقص تقوللي معملش بيبي عشان مستهلكش طاقة

بدر زم شفايفه بنفاذ صبر ، وطلع من المطبخ
رونزي: هتعمل ايه دلوقتي وأنا جعانة
بدر: مش هعمل الصبح وانا راجع هبقى اجيب أكل
رونزي: لا يا بابا انت تنزل دلوقتي ، انا مبعرفش انام وانا جعانة
بدر بعصبية: وانتي عاوزاني اخرج دلوقتي مسافة اكتر من ساعة عشان بس اطلع ع الطريق وارجع تاني ، عشان خاطر حضرتك!!
رونزي هزت كتفها بلا مبالاه: لو مش عاجبك رجعني