اختطاف ابنة السفير

الفصل التاسع

خرجت رونزي من اوضتها وكان بدر ممدد ع الكنبة ماسك سيجارة ، كان بيسحب نفس ويخرج دخان من أنفه وفمه وشكله بيفكر ف حاجة ، اتنحنحت ، اعتدل ف جلسته لما انتبه لوجودها .. قربت وقعدت ع الكرسي جنب الكنبة

رونزي: بقولك ايه يا بدر
بصلها من غير ما يرد وهو لسة بيسحب نفس من السيجارة ، كحت وهي بتحرك أيدها بعشوائية عشان تبعد الدخان من وشها
رونزي: ع فكرة السجاير غلط ف الأماكن المغلقة
بدر: هو انتي خايفة عليا
رونزي ببرود: لا طبعاً ، انا خايفة ع نفسي اطفي السيجارة عشان اقعد معاك
بدر بنفس طريقتها: ومين قالك عايزك تقعدي معايا ، روحي اوضتك واقفلي ع نفسك الباب ، وانتي مش هتشمي ريحة دخان وسيبني اشرب سيجارتي بمزاج
رونزي: انا زهقت من قعدتي ف الأوضة ، خرجني خليني اشم هوا نضيف بدل القرف دة
بدر: انتي فاكرة نفسك ف رحلة
رونزي: منا مش ف سجن
بدر: اعتبريه سجن لغاية ما المهمة دي تخلص ع خير
رونزي جزت ع أسنانها بحنق: وامتى تخلص عشان اخلص منك ومن الهم دة
بدر أثناء ضغطه ع السيجارة عشان يطفيها: هو مين المفروض يخلص من التاني ، عارفة انتي لو رجعتي لبيتك سليمة من غير ما اقتلك تحمدي ربنا وتصليله ركعتين شكر ، لكن بعمايلك دي معتقدش أنه هيحصل لأن صبري خلاص بدأ ينفد مني وانا لما بجيب آخري مبعرفش نفسي
رونزي: والله شكلك هتقل بيا وتعملها بجد ، مع اننا المفروض دلوقتي بقينا عشرة وأكلنا عيش وملح مع بعض يعني حتى لو طلبوا منك تقتلني تقف ف وشهم وتقولهم لاااا وتشوح بإيدك كدة هو قال يعني مش فارق معاك ، لكن انت حقودي من جواك
بدر: ليه ، واعمل كدة ليه دة أنا هشكرهم لو قالولي أعملها
رونزي فتحت حنجرتها وبتردحله: ليه يا روح النونة ، كنت كلت أكلتك ولا نمت ف فرشتك ولا دوقت عسل نحلتك ، دة انت حتى الأكل اللي بتجيبه بايت وعملي تلبك معوي
"مسكت بطنها وبتتأوه بألم مصطنع"
بدر بدهشه من أسلوبها: بقا في واحدة ابوها سفير تردح بالطريقة دي
رونزي: ملكش دعوة بيا ياض انت ، اسم الله ع ابوك تلاقيه حرامي غسيل
بدر اتنهد بحنق ومردش عليها
رونزي بتمثل البراءة: ممكن طلب صغنن قد كدة هو
بدر بسخرية: مش لايق عليكي خالص دور البريئة دة
رونزي بتكشيرة طفولية: ربنا يسامحك
بدر: قولي عايزة ايه
رونزي: عاوزة اكلم بابي ، والله دقيقة واحدة وهقفل ع طول ، أصل انا حلمت بيه امبارح فكنت عايزة اطمن عليه
بدر وقف وباصص بعيد ، وهي وقفت
رونزي: قولت ايه
بدر: لا مينفعش ، واطمني أهلك كلهم بخير
رونزي: طب انت ليه مش عايزني أكلمهم هم أكيد مش هيعرفوا مكاني خلي عند أهلك دم بقا  "قالتها بضيق"
لكن بسرعة لحقت نفسها لما بصلها بنظرته المعتادة: أقصد عند أهل حضرتك يعني
مشي كام خطوة للأمام: قولت لأ ، وبعدين مش معنى اني سمحتلك تتكلمي معايا يبقى تطلبي حاجة زي دي
رونزي بتذمر: هو انا يعني هموت واتكلم معاك دة انت عيل غلس أوي فاكر نفسك توم كروز وانت شبه مصاصين الدماء
لف لها باندفاع وهو يرمقها بازدراء
رونزي كشرت بخوف وبصوت باكي: انا مش هخاف منك بقا ها ، وكسر الحاجات مرة تانية بقا براحتك
حاول يكتم ضحكته ع طريقتها الطفولية ، أداها ضهره واتكلم وابتسامته ع وشه
بدر: شوفي انا خارج دلوقتي وهرجع متأخر ، والأكل ف التلاجة ، وسلي نفسك بأي حاجة لغاية لما أرجع
رونزي: لا طبعاً أنا مش هقعد كل دة لوحدي
بدر لفلها: أنا مش الدادة بتاعتك ع فكرة عشان مطلوب مني افضل معاكي
بصتله بغضب وسابته ودخلت اوضتها ، وهو خرج
######