اختطاف ابنة السفير

الفصل الرابع عشر

بدر ف أوضته بيغير ع جرحه قدام المراية ، وبعدين دخلت رونزي وكان خلص وبيلبس قميصه ، حرك راسه ناحيتها
بدر: مش في باب تخبطي عليه قبل ما تدخلي
رونزي قعدت ع السرير بلا مبالاة: بس ياض
بدر بتذمر: مش هتبطلي قلة أدب
رونزي: أهو انت
اتأفف منها واتحرك شوية: عايزة ايه انتي دلوقتي !!
رونزي بزمجرة: يعني هعوز منك انت ايه يا حرامي
بدر بضيق: امال داخلة عندي ليه
رونزي: ع أساس داخلة الجنة يعني !
بدر بخبث: لأ بس احتمال تبقى النار لو زودتي ف الكلام
بلعت ريقها بتوتر: أصلاً انا خارجة

وهمت بالخروج لكن وقفت والتفتت له بعيون بريئة
رونزي بزمجرة: انت حيوان وسا.فل
قالت كلمتها وجريت من قدامه بسرعة لما شافت نظرة الغضب ف عينيه
######

ف جريدة النور ..
رئيس التحرير: صدر أمر بوقفك عن العمل يا جميلة
جميلة بصدمة: ايه ؟!! ليه يا ريس
الرئيس: بعد آخر مقال كتبتيه الحكومة ف حالة ذعر مستمر ، وكمان سببتي هيجان ف كل المجلات والصحف ، والرأي العام بدأ يتفاعل مع اللي بيحصل
جميلة: بسبب اللي كتبته ولا عشان الجرايم اللي مش عارفين يوقفوها !!!
الرئيس: أياً كان اللي حصل للأسف مش بإيدي حاجة أعملها
جميلة: أيوة يا فندم بس انا معملتش حاجة خارجة عن القانون ، انا بنقل الصورة زي مهي واضحة
الرئيس: جميلة انتي اتهمتي الحكومة بالتقصير ومش بس كده اتهامك زاد لما قولتي أنهم متعاونين مع المجرمين ، ودة ف حد ذاته غلط
جميلة: يا ريس دة مجرد طرح سؤال للناس مش اتهام
الرئيس: انتي خليكي ف البيت لغاية ما تشوفيلك حل ، واحمدي ربنا أنها جات ع وقفك ومطلبوكيش للتحقيق ، ومعلش يا جميلة مش هقدر اقف معاكي المرة دي ف مسؤولين كبار اتدخلوا ولو مكنتش سمعت ليهم كانوا هيقفلوا الجريدة !.
جميلة: تمام يا ريس انا متفهمة الموضوع .. عن اذنك
#######

ف مبني رئاسة الوزراء ..
رئيس الوزراء: معالي السفير احنا كلنا مقدرين اللي حصل لبنتك ، والحكومة مش ساكتة ، وكل الأجهزة الحكومية والخاصة شغالة ف الموضوع ف أرجوك حاول انت كمان تقدر جهودنا
يونس: يا ريس انا من يوم ما بنتي غابت وانا ساكت ومستحمل كل اللي بيحصل ، معاليك لو بنتي هتكون فدا الوطن عشان تعرفوا المجرمين والخو.نة هقْدُم ع التضحية دي ، لكن البلد ف حالة عدم الاستقرار وكل يوم بنسمع عن جرايم وعمليات اغتيال ومحدش قايلنا مين دول
رئيس الوزراء: كلها متعلقة ببعض يا يونس سواء خطف بنتك أو اي جريمة حصلت بعدها
يونس بضيق: امال ليه بيكدبوا عليا ويقولولي أنها عمليات عادية وملهاش اي صلة ببنتي
رئيس الوزراء: الأمن العام بيتطلب مننا نخفي بعض الأسرار ، وصدقني دة ف مصلحة بنتك قبل البلد .. أنا مش عايز الموضوع يوصل لرئيس الجمـ.هورية ، وان شاء الله ف خلال فترة وجيزة كل حاجة هتتصلح ، واللي اتكتب ف الصحف انا أخدت الإجراءات اللازمة عنه وخليك واثق فينا

يونس اتنهد بشك ، هو بيطمنه عشان يثبت ان البلد مستقرة ، وبعتله عشان يعرفه أنهم متابعين كل حاجة من بعيد ، وعشان ميطلعش يتكلم عن اختطاف بنته خصوصاً بعد اللي اتكتب ف الجرايد ، كلهم ميهمهش غير منظرهم قدام الناس والرئيس ، لكن هو مش هامه غير بنته ..
######