يونس ف التراس مع عيلته
عرفان: ايه يا يونس ، مقولتناش يعني وصلت لأيه ف موضوع بنتك ، ولا خلاص معدتش فارقة
يونس بضيق: ايه اللي حضرتك بتقوله دة ، رونزي دي تبقى بنتي يعني مستحيل افرط فيها
عرفان قام بعصبية: أمال سايبها الأيام دي كلها ليه وانت راجل مسؤول كبير في الدولة معاك سلطة وناس يقدروا يفحتوا الأرض ويخرجوها ، بس انت معتمد ع جهاز ميهمهش غير صورتهم قدام رؤسائهم والله أعلم إذا كانت بنتك عايشة ولا ميتة
كاميليا باندفاع: لا والنبي يا عمي متقولش كدة ، انا حاسة أن بنتي بخير وهترجع قريب
يونس بضيق: أنا عارف انكم كلكم بتتهموني باين أوي ف نظراتكم ليا ، لكن اللي المفروض تكونوا متأكدين منه أن مهما كلف الأمر انا مستحيل أضحي بيها ، دي حتة مني
وع اثر كلامه تليفونه رن وكان رقم غريب ورد
يونس: ألو !!
رونزي: ألو أيوة يا بابي أنا رونزي
يونس بدهشه: رونزي!.
كلهم وقفوا بلهفة وقربوا منه حتى عدي اول ما سمع اسمها جاهم باندفاع
كاميليا: بنتي ، اديهالي يا يونس
يونس: استني يا كاميليا
وكمل بلهفة: انتي فين يا رونزي
رونزي: أنا كويسة يا بابي متقلقش عليا ، انتوا وحشتوني أوي ، اوعى يا بابي تديهم اللي عاوزينه محدش هيقدر يقربلي متخافش عليا وأنـ...
وقبل ما تكمل كلامها الخط قطع
يونس بذعر: ألو ألو ، رونزي الوووو
كاميليا بقلق: ف ايه يا يونس
يونس: السكة اتقفلت
عدي بسرعة: انا لازم أكلم القيادة بسرعة
وجري عدي يبلغ
زينة: قالتلك ايه يا بابي
يونس بشرود: مقالتش حاجة غير أنها كويسة
عرفان: روح بسرعة اعرف بنتك فين
سيف: يلا يا بابا خلينا نعرف المكان اللي اتصلت منه عشان نلحقها
مشي يونس مع سيف
######
رونزي بزمجرة: يوووه الشبكة فصلت
مسحت الرقم بسرعة وجريت قعدت مكانها ع الطربيزة بعد ما حطت الفون مكانه ف نفس الوقت اللي خرج فيه بدر ..
بدر: هديتي؟
رونزي بتوتر: أه .. بقولك ايه تعالى نتمشى شوية عشان مخنوقة
هاودها بدر وراحوا يتمشوا ف حتة قريبة
######
ف المخابرات ..
قدام الشاشة عليها خريطة
مالك شاور بعصا: هنا بالظبط المكان اللي اتكلمت منه رونزي
واحد من القيادة: والمكان ف أنهوا بلد
مالك: جزيرة صغيرة بتبعد عن موسكو حوالي 50 كيلو متر مربع
حمدي: ابعتوا طيارة بسرعة تدور عليها ف المكان ومترجعوش الا بيها
مالك: حصل سعادتك ، الناس اللي تبعنا هناك بدأت تتحرك
نايف: ف خلال كام ساعة هتكون قدام عنينا ، نتمنى ان متحصلش مقاومات مع اللي خاطفينها
_: جلال اعمل مسح ف كل المنطقة واعرف عددهم ، واهم حاجة خليك باقي ع حياة البنت
جلال بيفرك ف ايده بتوتر وتقريباً مش مركز مع الكلام ومسمعهوش
_ بصرامة: جلال!!
جلال انتبه ع صوته: ها نعم يا فندم
_: سرحان ف ايه نفذ اللي قولتلك عليه بسرعة
جلال: تحت أمر سعادتك
حمدي بص لجلال بشك وبعدين كلهم انسحبوا
######
أنت تقرأ
اختطاف ابنة السفير
Humorابنة سفير تختطف من أجل الحصول ع ميكروفيلم يهدد بعض الجواسيس ، ثم تختطف مرة أخرى من مقنع وتتوالى الأحداث الكوميدية والمغامرة الجميلة 💜
