اختطاف ابنة السفير

الفصل السادس عشر

بدر سايق العربية وع وشه ابتسامة لما افتكر الأيام اللي قضاها مع رونزي وهي تعبانة
Flash Back..

بعد ما شربت الحاجة السخنة كان الألم لسة مخفش
بدر: لسة تعبانة ؟
هزت راسها بتعب
بدر نيمها ع ضهرها وغطاها: هتبقي كويسة حاولي تنامي
رونزي: مش هعرف أنام ، مامي كانت تنيمي ف حضنها
حط ايده ع شعرها: اعتبريني أمك
رونزي بصتله: مامي معندهاش دقن وشنب

ابتسم غصب عنه ، ورونزي غمضت عيونها بعد ما قطبت جبينها من الوجع اللي بيروح ويرجع .. وبدر من غير ما يحس حط ايده ع بطنها بتلقائية وفضل يحركها عليها لعلها تخف شوية ، وبالفعل الحركة دي عملت كمهدأ ليها وبدأت تريح جبينها من تاني

رونزي بضعف لأنها بتروح ف النوم: مامي
فهم بدر أن الحركة دي كانت تعملهالها أمها ، وبترتاح ليها...
Back..

رجع بدر من بحر أفكاره ولسة الابتسامة ع وشه ، هو مش عارف ليه حاسس بالانبساط وشعور الراحة الغريب اللي بيحسه معاها واللي اول مرة يشعر به ، معداش دقايق وقضب جبينه بضيق بعد ما انتبه لنفسه .. اتنهد وبيدور ع الفون ملقيهوش ، نفخ عشان شكله نسيه ، لف بسرعة بالعربية عشان يرجع يجيبه
______

عند رونزي
لسة بتجري ف الغابة ، وقفت شوية عشان تعبت ، انحنت وهي ساندة ع ركبتها وبتاخد نفسها من كتر الجري ، وبعد ما ارتاح نفسها استقامت بضهرها وبصت حواليها لقيت نفسها ف وسط أشجار كتير تايهة مش عارفة هي جات من أنهو طريق ، بتبص ف المكان بعينيها وتقريباً كل حتة شبه بعضها ومش عارفه تحدد الاتجاهات...
مشيت شوية وهي بتبص بتوهان ، مفيش طريق تخرج منه
_______

بدر رجع بعد تلت ساعة أو أكتر شوية لأنه مكانش بعد كتير ، نزل من عربيته وفتح الباب ودخل ، دلف لأوضته وخد التليفون وخرج من غير ما ينتبه لرونزي إذا موجودة ولا لأ ، لسة هيفتح الباب وقف وراح ناحية باب اوضتها وخبط عليها بس مفيش رد كان هيسيبها ويمشي...

لكن ميعرفش ايه اللي خلاه يخبط تاني ، قال يسألها إذا كانت محتاجة حاجة يجبهالها مع أنه سألها قبل كدة !! لكن هو أقنع نفسه بكدة .. المهم لما مجالوش رد فتح الباب ، وملقهاش قطب جبينه بضيق...

دخل جوة وخبط ع باب الحمام ومردتش فتحه وبرضو مش موجودة قلبه ابتدى يحس بالخوف..

خرج بسرعة وراح المطبخ ، لقي الشباك مفتوح والكرسي تحته ، بصله بذعر وذهول وخرج بسرعة زي المجنون ، وبص حواليه مفيش ليها أثر ، ركب عربيته وساقها بسرعة عشان يلحقها ، بيلعنها ويلعن نفسه أنه سابلها وسيلة للهرب من غير ما ينتبه له
########

ف بيت السفير
سارة: ممكن اعرف ايه اللي ضايقك؟
زينة: بقولك طلب مني رقم تليفوني!!
سارة: وفيها ايه يعني ، الولد حابب يتعرف عليكي أكتر
زينة: ويتعرف عليا ليه ، هو دلوقتي صاحب سيف اخويا ولو عرف ممكن تحصل مشاكل واحنا مش ناقصين
سارة: ولا مشاكل ولا حاجة ، انتي اللي مكبرة الحكاية مش يمكن غرضه شريف
زينة عقدت حواجبها بضيق: بصي انا ماليش ف كدة ، ومش معنى أننا متربيين برة يبقى مسموح نتعرف ع الشباب ، وانا جيت معاكي عشان أخرج من الزهق مش اكتر
سارة: طب خلاص متضايقيش ، وهو بعت معايا اعتذار ليكي ، وبيقولك اعتبري اللي حصل كإنه محصلش
زينة هزت راسها بمعنى تمام
#######