بنات حجي عمران الفصول الاربعة

البارت السابع

#بنات_حجي_عمران
#الفصول_الاربعة
#للكاتب _ محمد_ ابو جود
#البارت_السابع
#نار_الثار

*ملاحظة قبل ما نبدي البارت يمكن راح تشوفون اكو تقصير بالسرد بس حيل صعب لا البنات كدرن يوصلن فكرة عن حالهن و لا اني كدرت اوصف حالهن يعني قتل اهل كدامهن مو شي سهل و اشكد ما حاولت اوصللكم فكرة و حال الي صار و خطية حتى البنات البارحة كلهن تعبن من قرن البارت

عنچ امشي وگلبي واگف
وبس درت مجبور درتي
الجرح وحدة بوحدة صار
ثاري حتى الفرگة ثار.

فردوس : راح انقللكم الي صار اني لان البنات ما جانن واعيات على نفسهن مصيبة عظيمة و اني اشوف كدامي اخوية عمران لا لا مو اخوية ابوية هذا عمران ابوية بهية ام قيصر صارتلي اكثر من اخت بوقت الي اترملت ما انسى اشلون بفضلهة رجعت وكفت على حيلي جسمي صار ثلج و بقيت ارجف

نور اتقدمت خطوات و تتلفت و كأنها ما مصدكة نزلت يم ابوها و اتمددت بصفة و حظنتة و ضل تردد كوم بناتك ما الهن احد

سحر طلعت من الاستقبال و تعيط هذولي مو اهلي لا لا هذولي مو اهلي وينج يمةةةةة بابا وينك قيصررررر تعااااال يا بعد اختك وينك قيصر ولج يمة فدوة ردي وينج بابا يا بعد طولي تعااال

جوري راحت كمشت سحر و تصرخ وياها جوري حيل متعلقة بعمران

عايدة اتقربت من ابوها و كمشت ايدة باستهة و شمتهة حيل و كالت بابا اكعد عاجبني اكعد وياك و اشبع منك و دنكت خلت راسهة على بطنة و حظنتة

سمر وصلت يم امها و طاحت بالكاع و كالت يمة كومي ابوس ايدج كومي والله حتى لو ترزليني كل يوم عادي ما ازعل بعد و بعد ما اضوجج و لا اتعارك ويا عمران ابن قيصر و بعد ما اضوج من نصايحج الصبح قبل لا نطلع للدوام اذا ما تكومين نضيع بعد منو يذكرنة ننتبه على نفسنة و منو ينصحنة يلة كومي والله ما اسوي شي يضوجج و بعد ما احجي على احد و لا دوم متعاركة بعد ما احجي اي شي بس انتي كومي

حنين عاطت بصوت عالي و ذبت دم من حلكهة و طلعت ركض للشارع تعيط و تصيح راح ابو بيتي الحكولي

فردوس : شايفين الي ينهد و ينهدم حيلة بس يضطر يصير قوي لان يعرف وراه ناس محتاجتة هذا حالي صرت اجزاء مجزئة بموتت عمران صرت رماد بس لازم اقوي نفسي لخاطر بنات عمران

طلعت من الاستقبال ما اعرف اشلون امشي اجر برجلية جر لكيت سحر متخربطة و جوري تصحي بيها كمشت الموبايل و وكع من ايدي و خمس مرات اكمشة و يوكع اخر شي كمشتة بثنين ادية بالف يا ويل دخلت لرقم حازم دكيت عليه رد علية جعفر

جعفر : الوو هلا عمتي

فردوس : اسمع جعفر يكلي الو بس اني بغير عالم

جعفر : الو عمة تسمعيني عمة

فردوس : اسمع بس اني بغير عالم ما كدرت احجي اجت جوري سحبت الموبايل و حجت ويا جعفر و هي تبجي و كلتلة على كلشي