بنات حجي عمران الفصول الاربعة

البارت 13

#بنات_حجي_عمران
#الفصول_الاربعة
#للكاتب _ محمد_ ابو جود
#البارت_الثالث_عشر 

ليش ضيّـعت التريدة ؟
شبيك تايه مدري وين
شبيك شارد من قصيدة
وترجع اطيح بقصيدة
وين سارح ؟
چنك مضيع العمر
گاعد انت وحزنك الما ينتهي
بگهوة بعيدة
⁩

عايدة : جنت حيل فرحانة لكن فرحتي ما استمرت للأسف

بعد عرس ورد من رجعنا بليل بدت تظهر علية اعراض غريبة جنت واكفة بالغرفة اريد ابدل كل ما اريد انزع الفستان احس اكو احد بالغرفة

الباب مقفول دورت الغرفة ورة البردة جوة الجرباية فتحت الكنتور ماكو اي شي اخذت ملابسي و طبيت للحمام بدلت ما بقيت بالغرفة

و اني بالحمام اندكت علية الباب صحت منووو

نور : اني اطلعي بسرعة اريد احجي وياج و اخذج منا

عايدة : وين تاخذيني .... نوووور ...... وينج يمعودة

طلعت بسرعة ماكو نور شو نزلت لكيتها دا ياكلن هي و جوري كلتلها ها شتردين

نور : شنو شريد

عايدة : انتي دكيتي علية باب الحمام كلتيلي اطلعي بسرعة حتى اخذج

نور : باوعت لجوري مستغربة و حتى جوري باوعتلي رجعت باوعت لعايدة كلتلها  يمعودة والله ما صاعدة اصلاً متعاجزة اصعد رجلي توجعني

عايدة : اكلكم ترى بعدني صاحية ما اتخبلت والله انتي دكيتي الباب حتى كلتيلي اريد احجي وياج ما ادري شنو ما افتهمت بالبداية بس بعدين كلتي اخذج منا

جوري : ترى والله صدك نور ما صعدت باقية هنا شوفي خاف سمر لو سحر

عايدة : هوا شنو ما اعرف صوت نور غير هي حجت وياي

نور : الصبر يا صاحب الصبر اكلج والله مو اني شبيج

عايدة : ضليت مستغربة نور مو من طبعها يعني تحلف لو تتشاقة هيج بس اني متأكدة هاي نور الي دكت الباب يعني اني و اخواتي كل وحده صوتها شكل من تحجي وحدة بينا من الصوت تنعرف

ما اهتميت للموضوع و صعدت نمت نص الليل فزيت بدون سبب حسيت اكو شي غريب ما اعرف احس احد بالغرفة فريت راسي اريد اشرب مي جان بطل المي يم راسي

صح جانت الغرفة ظلمة بس انتبهت اكو واحد واكف يم الكنتور صرخت حيل البنات كعدن نور كامت بسرعة شغلت الكلوب ضليت اتلفت ماكو احد شو

سحر : شكو شبيج

عايدة : ولكم احد جان واكف هنا يم راسي بصف الكنتور

نور : اسم الله ماكو شي جنتي تحلمين

عايدة : اكلها والله شفت احد هنا

سمر : اكلج اني من كاعي مخلوسة لا تخلسيني زايد

عايدة : جوري و سمر حيل خوافات فسكتت و رجعت اتمددت على فراشي و سحر ادنت نامت يمي و نور رجعت لجربايتها بس خلن الضوء مشتغل بالكوة رجعت نمت كل شوية ارجع اتلفت