اسكربتات إيمان أحمد

105

- عايز أخرج
" لاء "
- نص ساعة بس
" لاء "
- إنتي مفترية ليه!؟
" معلش "
- إيمان أنا بتكلم جد!
" .....
- كل ده عشان مبنخرجش سوا، طب أنا ذنبي ايه إنك واحدة بيتوتية بتحبي قعدة البيت و بتطلعي روحي لحد ما نخ...
" هو ده الكلام اللي بتقنع بيه ضميرك؟ "
- ضميري! هو الموضوع كبر كدة أمتى!؟
" ما هي دي المشكلة إنك بتتعامل مع مشاكلي و الحاجات اللي بضايقني على إنها تافهة "
- عشان هى كدة فعلًا
" ولله! "
- لا، أنا قصدي يعني إني م...
" أحمد، ممكن تسبني أركز مع المسلسل "
بصيت للتيلفزيون و سيبته واقف ينفخ، أنا اللي تساهلت معاه من البداية بس خلاص الحياة دي مش هينفع تستمر بالشكل ده، قعد يلف في الشقة يجي ربع ساعة، شوية يدور على المفتاح و شوية رايح جاي بلا هدف و أنا قدام التيلفزيون جمبي كوباية الشاي و قدامي اللب بتاعي و بتفرج بمزاج
قعد جمبي و هو بيقول: ممكن نتكلم؟
" في ايه؟ "
جزعلى سنانه و قال: نتفاهم طيب
" إزاي؟"
- يعني تسبيني أخرج النهاردة و مش هتأخر ولله و مش هروح القهوة و لا هقعد مع صحابي الصيع و من بكره هعملك اللي إنتي عايزاه
كان ممكن أوافق بس هل أنا هبلة! لما هو مش هيقعد على القهوة و لا هيخرج مع صحابه الصيع يبقى هيخرج ليه!؟
بصيتله و ابتسمت، فابتسم
" أحمد "
- عيونه
ابتسمت أكتر: مفيش خروج يا حبيبي
قام وقف بعصبية و فضل باصصلي شوية و بعدين ابتسم، فحسيت إن الوضع بقى مريب، اتحرك شوية و ابتسم أكتر و  قالي: يبقى مفيش مسلسل يا حبيبتي
و شد فيشة التيلفزيون، قلبي بيقولي إن الليلة دي مش هتعدي على خير
- يعني اتخانقتوا؟
" و ايه الجديد "
- بس إنتي زودتيها فعلًا
" ولله! "
- كنتي سبيه يخرج، الرجالة كلها ك...
" ما هو كل يوم بيخرج و يرجع متأخر و لما أقوله عايزة أخرج، حاضر، بعدين، معلش عندي شغل، مش فاضي و في الأخر يرمي الذنب عليا، أنا اللي مش فاضية و بتأخر في اللبس، أنا اللي قاعدة طول اليوم وشي في وش الحيطة معنديش وقت، تخيلي!"
بصتلي بحيرة و معرفتش تقولي حاجة، أصلًا هى اتعودت على مغامرات توم و جيري اللي مبتنتهيش دي و المشكلة بقى إن احنا التلاتة صحاب، هى صاحبة أحمد كمان، فمش عارفة تقول حاجة عليه
" أقولك على حاجة، خليكي إنتي و محمد مخطوبين بلاش تتجوزوا "
- ايه! حرام عليكي، لقد هرمنا ولله، ده إنتي و أحمد اتخطبتوا بعدنا و اتجوزتوا قبلنا
" متفكرنيش "
- لا افكرك، مش ده أحمد اللي كنتي هتموتي عليه
" أنا! "
- أيوة و السطح ده يشهد، العشروميت بت اللي عرفهم و طفشتيهم، مش ده اللي كنتي هتسافري و تسيبي البلد كلها عشانه
" كنت مغفلة "
= بس أنا لاء
اتخضيت بس متفاجئتش، بصيت لمريم و قولتلها: نفسي مرة نتكلم في حتة من غير ما تقوليله إحنا فين
ابتسمت و قالتلي: اتمنى تتصالحوا بقى و تبطلوا هبل عشان مبتشوفوش شكلكم لما تبقوا متخانقين و كل واحد فيكم هيموت على التاني
" أنا مبموتش على حد "
وقف جمبي و قال: بس أنا بموت فيكي
طول عمري مبعرفش أخد حقي منه بسبب لسانه ده، معرفش بيعرف يهدى و يقول كلام حلو كدة إزاي!
- و بعدين حتى لو مريم مقالتليش إنتوا فين، هعرف بردو، ما إنتي يا إما على السطح يا أما في الكافيه
بصتله بعصبية: و كان في احتمال تالت بس مبقاش بسببك
- احتمال ايه؟
" في الشغل "
- تاني، هنرجع للموضوع ده تاني، هو إحنا مش اتفقنا؟
" ايوة بس متفقناش تسبني لوحدي طول اليوم "
- عشان ببقى في الشغل، لازم اشتغل يا حبيبتي
" يبقى أنا كمان أرجع لشغلي "
- لاء
" ليه بقى؟ "
- عشان مش لازم
" ليه تاني "
- عشان أنا مراتي ملكة، في ملكة بتشتغل؟
" و في ملكة بتقعد طول اليوم في الب...
ايه النيلة دي، ما هى بتقعد فعلًا، ضحك و قالي: شوفتي بقى
" بردو مقتنعتش "
ابتسم و قال: بس رضيتي و أنا يهمني راضكي أكتر
كان فاضلي كلمة و افرقع، هو إزاي كدة، مش عارفة أخد منه لا حق و لا باطل و لا عارفة حتى ا...
ضحك و حضني و هو بيقول: مهما قولت و مهما رضيتي، إيمان المعترضة اللي جواكي مش هترضى
بصتله، فقال: طب ينفع أخرج يوم و أقعد معاكي يوم؟
" و هتتفرج معايا على المسلسل؟ "
ابتسم: هتفرج
ضحكتله و أنا لسة في حضنه، فقال: أقولك على حاجة حلوة؟
" قول "
حضني أكتر و هو بيبص لعنيا و بيقول:
يا غَزالاً أَصارَني ... موثَقاً في يَدِ المِحَن
إِنَّني مُذ هَجَرتَني  ...  لَم أَذُق لَذَّةَ الوَسَن