You can see her in your dream

2.

Unicode

နေ့လည်ကအိပ်ထားတာကြောင့်လင်းရာတစ်ယောက်အိပ်ချင်စိတ်မရှိ။ အောက်ထပ်မှာဘဲဆက်ထိုင်နေကာ ဧည့်ခန်းရှိ တီဗီဖွင့်ထားသည်ကို အဝေးကပင်ငေးကြည့်နေမိသည်။ ဦးလေးဆန်းပြောထားသဖြင့် ထိုကောင်လေး ၃ ယောက်ဟာ ဖေဖေမွေးစားထားမှန်းသိလိုက်ရသည်။

ဖေဖေ.... လင်းရာအတွက်လဲ ထိုပုဂ္ဂိုလ်ဟာ အမည်ခံအဖေတစ်ယောက်ထက်မပိုခဲ့ပါ။ တီဗီမှာတော့ ရုပ်ရှင်ကားတစ်ခုပြသနေပြီး ထိုကောင်လေးထဲကနှစ်ယောက်က စိတ်ဝင်တစားကြည့်ရှုနေသည်။

" ဘေးက စာအုပ်ဖတ်နေတဲ့တစ်ယောက်က ဝဏ္ဏ။ သူကအခြားစိတ်မဝင်စားဘူး။ စာအုပ်ဘဲ။ ဒီလာတာ စာအုပ်ချည်းတစ်အိတ်ပါလာတယ် "

ဦးလေးဆန်းက ပန်းကန်တွေကိုအဝတ်နှင့်ခြောက်အောင်သုတ်နေရင်းမှ လင်းရာကိုလှမ်းပြောသည်။

" ဘာသောက်ချင်သေးလဲ ။ ဦးလေး တစ်ခုခုဖျော်ပေးရမလား "

လင်းရာခေါင်းခါလိုက်သည်။ ယခင်ထဲကလဲ ဂျီးများတဲ့သူတစ်ယောက်မဟုတ်သလို ကိန်းကြီးခန်းကြီးနေတတ်သူတစ်ယောက်လဲမဟုတ်ခဲ့။ အရင်နှစ်တွေက လင်းရာတစ်ယောက်ထဲရှိနေခဲ့ပြီး ဒီနှစ်မှာလူများလာခြင်းကိုမကြိုက်ပေမဲ့ တားမြစ်ခွင့်ရှိသူလဲမဟုတ်နေတာမို့။

" ဦးလေး...ကျန်တာအဆင်ပြေပါတယ်။ တစ်ခုဘဲ.... အပေါ်ထပ်ကို သူတို့ကိုမလာစေချင်ဘူး။ ဒါလေးတစ်ခုဘဲ ပြောပေးထားပါနော်"

" ကောင်းပါပြီ "

ညမွှေးပန်းရဲ့ရနံ့ဟာ ခြံထဲကနေတဆင့်အိမ်ထဲထိ ပျံ့လွင့်လာသည်။ အကျင့်ပါနေကျခြေလှမ်းများဟာ ခြံထဲကို လျှောက်လှမ်းသွားမိသည်။ မီးရောင်ဝါဝါတွေဖြာကျနေတဲ့ လမ်းတွေအဆုံးမှာတော့ အမှောင်ထုဟာ ကြီးစိုးနေသည်။ ဖြည်းဖြည်းချင်း ကျင့်သားရသွားတဲ့မျက်စိကြောင့် မိုင်ပေါင်းများစွာအကွာမှ ကြယ်လေးတွေဆီက အလင်းဓာတ် ရရှိလာသလို အမှောင်ထုထဲမှာ အရာရာဟာ ထင်ရှားပြတ်သားလာသည်။

ဖြည်းဖြည်းချင်းလျှောက်လှမ်းလာရင်းမှ
ခပ်တိုးတိုးသီချင်းသံဟာ နားထဲကိုပျံ့လွင့်လာသည်။ ပန်းတွေရဲ့ရနံ့ဟာ ထုံမွှမ်းလာပြီး ရှည်လျားလှတဲ့ဆံနွယ်လေးတွေဟာ လင်းရာရဲ့မျက်ဝန်းထဲဝင်ရောက်လာသည်။