Kasikas: Mga Balak Gikan sa Kasing-kasing

Balik Ta's Kinaraan

Balik ta's kinaraan
kanang imo kong
haranahan,
mubisita ka's balay
kay imong panguyaban
apil akong ginikanan.

Balik ta's kinaraan
kanang imo kong
kalosan,
imong ipakita
sa among angkan
ang tinud-anay nimong
paghigugma kanako.

Balik ta's kinaraan
kanang palayo kita
sa tsansing,
ayha na'g sugton na tika
magbantay gayud ka
kay ipalakag tika's
sundang ni papa.

Balik ta's kinaraan
kanang bisan imo ra
gani kong masanghiran,
imo na dayon kong pakaslan
kay ginahigugma usab tika
ipakita lang nga
seryoso ka's akoa.