Kasikas: Mga Balak Gikan sa Kasing-kasing

Ug Sa Dihang

Wala ko gihandom nga ikaw makit-an ning mga mata
Wala ko usab gihandom nga ikaw higugmaon ko pa,
Kay ikaw wala ko nahigustuan niadtong mga panahona
Ug sa dihang naibog man nuon ko nimo karon sa pagsobra-sobra.

Bidli man paminawon, apan kini mao ang kamatuoran
Andam akong makasuhan, makawat lang ang imong dughan:
Ug karon ko lang nahibaw-an, nga ikaw gayud diay
Ang bugtong kalibutan ning mga tiil ko nga gibaklay.

Apan ikaw ang langit ug ako usab yuta;
Lisod gayud ikaw abton niining mga kamota
Gikinahanglan pa ba ang tanan nga isugal?
Kung wala man gani ako kabalo kung asa mulugar.

Gugma nga dili gayud unta mukalit lang nga muhapay;
Kung ikaw maako ug ako maimo, wala gayud pagmahay:
Pagahigugmaon tika hangtod sa walay kahangturan
Kay ikaw pud usa ka dyamante nga tunhay nga handumanan.

Ikaw ra ang naa niining akong utok ug dughan,
Ug bisan pa ug uklabon mo, walay lain, waly uban
Kay ikaw usa ka babaye nga lisod pangitaon ug ilisdan;
Ug sa dihang magpaabot na lang ako nga imo usab nga makit-an.