မောင်စေလိုရာ (OC) [Complete]

Part-12(Zawgyi & Unicode)

(Unicode)

Special class တက်နေရသည့်အချိန်ပိုအချိန်တွင်ဖြစ်သည်။ Special class ကို
15 ယောက်တစ်ခန်းဆီသပ်သပ်ခွဲထားသည်။မေမီဟာရှေ့ခန်းမှာဖြစ်ပြီး ခန့်ညီသော်ဟာ နောက်ကစာသင်ခန်းတွင်ဖြစ်သည်။သို့သော်
ထိုနှစ်ခန်းကို မှန်တစ်ချပ်ဖြင့်သာခြားထား၍ အခန်းနှစ်ခန်းမှ အသံများကိုသာမက တစ် ဖက်အခန်းကကလေးတွေ ဘာလုပ်နေလည်းဆိုတာကို နောက်တစ်ခန်းကပါ အတိုင်းသားမြင်ရနိုင်သည်။

မေမီ သူရှိသည့်ဟိုဖက်ခန်းကိုလှမ်းကြည့်မိလိုက်သည်။ သူကဘေးကကောင်မလေးနဲ့ခေါင်းချင်းဆိုင်ကာပြုံးဖီးလို့ တီတီတာတာတွေပြောဆိုနေကြဟန်ရှိသည်။ အရင်ကသူနဲ့မေမီဟာ အခန်း 3ခန်းလောက်ခြားသော ကြောင့် သူ သူ့အခန်းထဲမှာဘယ်လိုရှိတယ်ဆိုတာမသိ‌ခဲ့ပေမယ့်အခုတော့တွေဝေလာရသည်။

ဒါနဲ့များဘာကြောင့် *တွဲရအောင်လို့*သူပြောခဲ့လဲ။ ထိုစကားလေးကသူ့အတွက်အဓိပ္ပါယ်
မရှိနိုင်ပေမယ့် မေမီ့အတွက်တော့အဓိပ္ပါယ်ရှိခဲ့သည်။မေမီ သူ့အကြောင်းကိုမေ့ထားလိုက် ကာ စာကိုသာပြန်အာရုံစိုက်နေလိုက်သည်။အချိန်တစ်ခဏကြာ၌ ဆရာမရဲ့ "ခဏနားကြစို့" ဟူသည့်အသံကြားမှသာမေမီ‌ခေါင်းမော့မိတော့သည်။

သူတို့လည်း ခဏနားရသည်နဲ့တူပါသည်။
မေမီတို့အခန်းဘက်သို့ သူလျှောက်လာနေတာကိုမေမီ သတိထားမိလိုက်သည်။ လက်တစ်ဖက်က နို့အေးဘူးကိုကိုင်ကာပိုက်နဲ့စုပ်သောက်နေပုံက ဆေးလိပ်သောက်နေကျသူ့ပုံစံနဲ့မတူဘဲ တမူချစ်ဖို့ကောင်းနေပြန်သည်။

"ဒီအခန်းထဲ ခဏလောက်နေခွင့်ရှိမလားဗျ"

သူပြောလိုက်သည့်ပုံ မသိရင်သူဟာ လူယဉ်ကျေးလေးတစ်ယောက်ပါပေါ့။ အမှန်တော့ခန့်ညီသော်ဆိုသည့်သူက ဒီအခန်းထဲက မည်သူ့ကိုမျှဂရုစိုက်မည့်ပုံမပေါ်ပါ။ တမင်ရှိုးလုပ်နေပုံရသည်။

"ထိုင်ပြီနော်။"

မေမီဘေးကခုံကိုဆွဲယူကာ သူ၀င်ထိုင်လာသည်။ထိုနေရာမှာ တစ်စုံ‌တစ်ယောက်ထိုင်သည်ကိုခန့်ညီသိပုံမရပါ။သူ သိချင်လောက်အောင်လည်း သူဟာမေမီ့အားစိတ် ၀င်စား‌နေဟန်မရှိပါ။