မာယာသီချင်းသည် (Sakura Dancing in the Rain)

Part.23:နိုးထလာပါ ကျွန်တော့်ရဲ့ဆာကူရာ

မယုံနိုင်ဖွယ်ရာသတင်းတစ်ပုဒ်သည် နှင်းဝေတဲ့မြို့ကလေးဝယ်ပျံ့နှံ့လာခဲ့သည်..။

ကင်ဒိုစံအိမ်တော်မှ သခင် ဟာနာဇဝါရှင်းသည် သူ့ဓားကိုစွန့်လွှတ်ခဲ့လေပြီ..။
သခင်မရိုကိုစံသည် သူ့သားအား သူမအသက်နှင့်ပါအလဲအထပ်လုပ်အကျပ်ကိုင်ခဲ့ပါသော်လည်း ထည်ဝါသောနဂါးနက်ပိုးဝတ်ရုံကိုခွာ၍ ဓားရှည်ကိုချန်ရစ်ခဲ့လေပြီ..။

အကြောင်းရင်းကိုမည်သူမျှမသိကြသော်လည်းစေ့စပ်ပွဲတွင်ပျောက်သွားခဲ့သည့် မွေးစားသားအငယ်နှင့်ဆက်စပ်နေမည်ဟူ၍ တွေးမိကြသည်..။

တစ်ဦးတည်းသော ဆက်ခံသူအရှင်မရှိလျှင်ကင်ဒိုအိမ်တော်၏အရေးမှာစိုးရိမ်စရာကောင်းလွန်းလှပေသည်..။

မျိုးရိုးဂုဏ်ကိုမက်မောလွန်းလှသောသခင်မကြီးရိုကိုစံသည် ရင်ကွဲလုမျှမတတ်ဖြစ်နေခဲ့ပြီ..။

ခွမ်း!!

ကွဲကျခြေမွထားခြင်းခံရသော မှန်စများ၊ လက်ရာမြောက်ပန်းအိုးများကို နှမြောခြင်းကြီးစွာဖြင့်အစေခံတို့သည်ကောက်ယူသိမ်းနေကြရသည်..။

သူတို့လေးငါး​နှစ်မျှရမည့်ဝင်ငွေလောက်ရှိသည့်ကြွေအိုးတွေလေ..။

သို့သော်မျက်ဝန်းများရဲရဲနီလျက်ရှိသည့်သခင်မရိုကိုစံကိုမတားရဲကြပါ..။မဟုတ်လျှင်ကြွေအိုးတွေနေရာမှာသူတို့ရဲ့ကိုယ်ခန္ဓာတွေဖြစ်ကုန်လိမ့်မည်..။

အနီရဲရဲပိုးဝတ်ရုံကိုလွှမ်းလျက် သခင်မရိုကိုစံလက်ထဲတွင် ရှင်း..ချန်ရစ်ခဲ့သောဓားရှည်ကိုဆုပ်ကိုင်ထားခဲ့သည်..။

''အမျိုးယုတ်ရဲ့သားက ငါ့သားကိုဖျက်ဆီးသွားခဲ့ပြီ တွေ့လား!! ဟာနာဇဝါရှုရာ!! ရှင့်သားကရှင့်အကျင့်နဲ့တစ်ထပ်တည်းပဲ အဲကောင်နောက်ကိုလိုက်ပြီး ထားသွားခဲ့ပြီ
ရှင့်လိုပဲလေ ''

သခင်မရဲ့ဒေါသဟိန်းဟောက်သံအောက်မှာ ကြေကွဲဖွယ်ရာဆို့နင့်သံသည်စူးရှရှကပ်ပါလာခဲ့လေရဲ့..။

''ဘာကြောင့်များ ကျွန်မကိုပဲထားရက်နိုင်ခဲ့ရတာလဲ ကျွန်မမှာဘာမရှိလို့လဲ
အလှလား အာဏာလား အချစ်ဆိုတာလား ကျွန်မမှာဘာမရှိလို့လဲ ​ပြောကြစမ်းပါ ရှင့်သားကပါစွန့်ပစ်သွားပြီ ရှင့်ကြောင့်ပဲ''