صُدْفَة | Serendipity

١١

ليان
قلت لمنال عن اللي صار مع ثامر و انصدمت هي برضو ، كنت بتكلم معاه لما نروح للمدرسة بس ما كنا رايحين مع ابوي و خالتي ، اقترحت منال اني اقعد معاه و بهدوء واقوله بصراحه عن كل اللي اعرفه واني شفته مع اصحابه لكن تذكرت كلام مصلح و ترددت شوي ، حسيت مخي انقسم نصين ما عرفت وش اسوي ، نزلت تحت و شفت خالتي قاعده لحالها في الصاله ، تشجعت ورحت عندها.
"السلام عليكم"
رفعت راسها و شافتني ثم رجعت تناظر في الجوال.
وقفت مكاني ، ليكون مالها خلق تتكلم.
"خالتي مشغوله؟"
"همم وش تبين؟"
رفعت راسها بتعب و نزلت الجوال جنبها ، جلست جنبها و ابتسمت وانا مكتفه يديني.
"خالتي بقولك شيء وابي نصيحتك وش اسوي"
"قولي"
"الموضوع انه....وحده اعرفها..ايه قصدي وحده يعني من مدرستنا"
"شفيك وحده وحده وحده انطقي"
سكتت و حسيت لساني وقف يتحرك مو قادره اتكلم.
"ايه بقول بس عطيني فرصه...وحده معنا في المدرسة وصاحبتنا هي واحبها واعزها كثير بس قبل كم يوم شفتها تدخن—"
"متى شفتيها! رحتي عندها!"
"لا لا شفتها في المدرسة و كنت ابي اكلمها واقولها ان هذا الشيء خطأ و خطير لها ، وهي اصلاً عندها مشكله في التنفس ف هذا بيزيده بس مو عارفه كيف اواجهها"
"وش هالمشكله العويصه ، بس ترا النصيحه مره مهم تعرفين كيف توصلينها للشخص لان اي حركه خطأ احتمال تخليها تكرهك او تنفر منك"
يوم قالت هالكلام حسيت بغصه.
"بس انا مره احبها و هي زي قرب منال مني واكثر بعد—"
"ادري ادري ، بس مرات هالموضوع يعتمد على شخصية المتلقي برضو ، يعني لما تجين تقولين لشخص هادئ ومنطقي وماسك اعصابه غير لما تجين لشخص مرجوج و يصرخ كثير و مزعج فاهمه علي؟"
"طيب يعني اسكت وما افاتحها بالموضوع ولا وش اسوي"
تنهدت شوي ثم عدلت جلستها وبدت تتكلم مره ثانيه.
"الموضوع حساس ، ف انتي اللي عليك انك تجينها من ناحيه انك تحبينها وتعزينها وتبين لها الخير ، وبرضو بما انها عندها مشكله في التنفس ف هذا ايضاً دافع اكبر انها تتركه بيكون صعب عليها اكيد بس في النهاية الصحة ما تقدر بثمن"
واحنا نتكلم دخل ثامر و جلس عندنا ، وقفت اتكلم عن الموضوع و قمت ورحت لغرفتي ، جلست و قعدت اخلص الواجبات اللي عندي و اجهز حق بكرا و سمعت طق على الباب وثم دخل ثامر.
"وش كنتي تتكلمين فيه انتي و امي؟"
"بسم الله مافيه سلام عليكم"
كنت اكلمه وانا اناظر في الكتاب ، حسيته قرب مني لفيت و لقيته واقف قريب من عندي و وجهه احمر و كان يتكلم وهو راص على اسنانه.
"بتعلمين امي عن اللي شفتيه وربي لا اعلم ابوي عن الولد اللي معاك ونشوف مين اللي بيتضرر"
"وش فيك انت بسم الله اول شيء وخر عني—"
قمت و دفيته بشويش.
"ثانياً شفيك تتكلم كذا وش اللي شفته مريض انت!"
فجاءه طلع جواله بسرعه و وراني صوره في جواله كانت لي انا ومصلح لما كنا في السياره ، اتسعت عيوني و قمت اتوتر.
"وش ذا متى اخذتها! من وين لك الجوال!"
"مالك شغل من وين جبته انتي انطمي ولا اسمعك تقولين لأمي ولا شيء"
"ثامر اسمعني انا ما كنت بتكلم—"
"انطمي خلاص مالك دخل فيني!"
وقفت اطالع فيه وانا مصدومه ، ليش ثامر تغير وفجاءه صار كذا يكلمني ، فتحت فمي بتكلم لكن دخلت خالتي وكان احد يلحقها.
"شفيكم اصواتكم واصله لاخر الشارع شصاير"
دخلت غرفتي وسكرت الشباك ولفت علي انا وثامر.
"مافينا شيء بس انا عصبت من ليان شوي اسف والله"
"تمام يا ماما بس لا ترفع صوتك"
"وانتي بعد يا يمه لا تكلميني كذا ماني بزر ترا"
سكتت خالتي ونزلت راسها وهي تتمتم كلمه 'ابشر'.
طلعوا من غرفتي و علطول اتصلت على منال وقلت لها كل شيء.
"يا شيخه ياكل تبن صار مراهق وابثرنا ذا"
"تكفين انا مصدومه كيف يكلمني زي كذا ما عمره رفع صوته علي"
"ترا النيكوتين يزيد العصبية وربي تذكرين احمد كان كله معصب و من اي شيء يتنرفز معليك يارب ابوك يكشفه و يوقفه عند حده بس هدّي انتي"
"والله ابوي زين منه يعرف اسمائنا كل همه شغله و الدنيا اللي برا لو على كيفه ما رجع للبيت حتى"
"لااا لا تقولين كذا عن خالي حرام عليك"
سكتت ، اكيد منال بتقول كذا مو هو الطف شخص معها ، ركزوا على كلمه 'معها'.
قفلت من منال و جهزت اغراضي و كل شيء وشفت اوراق مصلح الجديدة فتحتها وقلت اخلص بعضها عشان افتك ، شيكت على بعضها و عدلت وزينت فيها و حطيتها في الدرج و قفلت عليها.
قعدت على سريري افكر ايش اسوي مع ثامر ، اكلم مصلح؟ ولا اعطي ابوي تلميحات عن الموضوع؟ اكلم خالتي مره ثانيه؟ ولا ارجع احاول اتكلم مع ثامر وابين له انه خطر عليه؟ حسيت مخي مليان مشاكل وافكار ومافيه حلول ، شفت شاشة جوالي نورت و اخذته لقيت مصلح مرسل.
ليان | هلا؟
مصلح | ها وش صار مع اخوك؟
ليان | تخيل قبل شوي جاء عندي و قام يصرخ و يتكلم علي قهرني
مصلح | هذي هي بداياته اذكر بدايتي انا كنت حتى نفسي مو طايقها خليه مع الوقت بيهدا و يمديك تكلمينه
ليان | المشكلة تخيل قاعد يهددني بصورة لي انا وياك صورها يوم رحنا عندهم امس.
مصلح | ما عليك تراه ضعيف لو وراها ابوك انكري كل شيء وقولي هو مسويها فوتوشوب او اي شيء
ليان | وش فوتوشوب انت بعد اقولك انا بس بقعد اهديه عشان ما يقول لأبوي ، ابوي اصلاً ما يصدق على الله يلقى علي زله
مصلح | خلينا من هالموضوع ، تذكرين موضوع منال وسلطان صدق منال انخطبت؟
ليان | بسم الله وش انخطبت لا يبوي شكلها كذبت عليه
مصلح | مدري عنه سلطان منهار عندي يقول تأكد لي بالله
ليان | مدري من وين عرف هو بس يمكن يقصد اختها ، هي إللي انخطبت وملكتها نهاية هالشهر.
ليان | اسمع قاعده اسمع صوت ابوي مضطره اروح ، اكلمك بعدين يله مع السلامه
مصلح | 👋🏻
ضحكت على الايموجي اللي استخدمه و نزلت جوالي و رحت تحت ، نزلت المطبخ و شفت ابوي مبتسم و مروق ، زين الحمدالله ان شاء الله دوم.
"سلام"
"ايه هلا ليان"
وكمل يسولف مع خالتي ، شفتها ابتسمت لي ابتسامه على جنب و هزيت براسي لها انو عادي ومتعوده ترا ، لو اتكلم من اليوم لبكرا ما راح يكفي.
طلعت غرفتي و قعدت اتابع مسلسل الين ما حسيت بالنعاس ، طفيت اللابتوب و حطيته على المكتب و نمت.
صحيت اليوم الثاني و تجهزت و رحت للمدرسة مع ملاك ومنال ، كان ملاك نادراً ما تودينا بسبب الخطوبة و التجهيز للملكه و الزواج ف كنت مرات اروح مع ابوي ومرات مع منال والسواق.
الحمدالله ان سواقهم ساكت للحين و ما علم احد على روحاتي السرية عند مصلح.
خلص اليوم الدراسي ككل يوم ، رجعت البيت وما شفت ثامر ابد ، صدق مالي خلق اتكلم معاه اليوم ابداً بعد اللي سواه امس ، وانا انزل شنطتي واغراضي سمعت احد فتح الباب وراي لفيت ولقيت انه خالتي ، كان على وجهها ملامح شوي خوف شوي تساؤل ما عرفت اقراها.
"دخلتي غرفة ثامر اليوم؟"
"لا ليه؟"
يارب انها ما عرفت.
"ما ادري بس ريحة مقرفه وغريبه اول مره اشمها ، ليكون مـا نظفتها الخدامة زين"
"ريحة ايش يعني؟"
"وش دراني انا بس ريحة غريبة الصراحه مو قادره اتحملها طلعت للسيب كله بقول الخدامه تنظفها"
راحت خالتي وسكرت الباب وراها ، صراحه ودي و ما ودي يعرفون ابوي و خالتي ، لو عرفوا احتمال يحسب ثامر ان انا اللي قلت لهم و بيعلمهم على سالفة مصلح ، الا اذا قدرت اخذ جواله واحذف الصور و كل شيء يثبت ، اي والله فكرة بس كيف.
خليت الموضوع يعدي لين جاء المغرب ارسلت حق منال خطتي وانتظرتها ترد.
اتصلت علي منال و رديت عليها وشبكت سماعاتي.
"يويلي يا ليان انا بس بعرف من وين جاب الجوال ، تهقين واحد من اصحابه اعطاه اياه؟"
"يمكن هذا احتمال ، واحتمال هو شراه"
"من وين عنده بطاقه هو؟"
"لا برضو"
"الزبدة ان خطتك اعجبتني والله فكره ذكيه بس التنفيذ كيف؟"
"انا قلت لو راح للمدرسة اخذه بس لو طلع فيه رقم سري هنا الورطه"
"صح صح ، بس ترا اعرف وحده من صديقاتي تقدر تفك الرقم السري باللاب تبين اكلمها تساعدنا؟"
"لا غريب ندخلها في الموضوع"
"يبوي عادي اذكر فكت الرقم السري حق حسابي"
"طيب يا ذكيه حساب غير عن رقم جوال!"
"معليك تقدر لها تبين ولا نهوّن خلاص؟"
"زين زين بس انتي كلميها"
"لازم تجي بيتك ترا"
"تمام اجل بشوف لنا يوم و نسويها"
"حمااسس كننا في فلم"
ضحكت على كلامها ثم نزلت راسي وقعدت اكتب.