صُدْفَة | Serendipity

١٣

مرت الايام بطيئه و كل يوم كنت ارجع اراقب ثامر و تصرفاته اللي كل مالها تصير اسوء ، ما نتكلم كثير الا على الاكل ومرات الصباح اذا رحنا المدرسة.
كنت قاعده بالفصل يوم جتني منال تركض وقعدت جنبي.
"سمعتي الخبر؟!"
"وشو بسم الله"
"يقولون الشرطه جاهم مخبر وقالهم ان احتمال فيه ناس تبيع في حارتنا بيحطون عند كل مكان سياره شرطه"
"تكذبين!"
"وقسم بالله!"
سكتنا شوي وتكلمت منال
"عندك رقمه صح؟"
هزيت راسي ب ايه
"كلميه وقولي له"
"تستهبلين لو كشفوني طيب"
"يا بنت الحلال ما بيدخلون بيتكم و يفتشون جوالاتكم ، كلميه وقولي له يمكن كذا يصير يثق فيك وبرضو عشان لو مسكوه بعدين ما يبلغ عليك ويجرك معاه-"
دخلت الاستاذه و رجعنا قعدنا في اماكننا.
مر اليوم الدراسي كالعاده ورجعت البيت مع ابوي هالمره.
"غريبه طلعت بدري اليوم؟"
"ما تشوفين سيارات الشرطة في كل مكان خفت يصير لكم شيء"
لكم؟ يعني لو معاي منال ما جيت خذيتني؟ ، كنت ابغا ارد عليه واقوله هالكلام لكن سكتت زي العاده.
وصلنا البيت نزلني وقال انه بيرجع للدوام.
رحت ركض لغرفتي و فتحت جوالي لقيت مليون رساله من مصلح ، فتحت محادثتنا وكتبت له.
ليان | مصللح!!
موجود؟
مصلح | ايه اكيد موجود وش سالفه ام الشرطه اللي عندكم خرشوا اهلي!
ليان | ليه وينك انت؟ لا تقولي عند بيتنا بذبحك والله!
مصلح | لا يبنت الحلال انا في بيتنا واذا الوضع كذا بخلي احد ثاني ياخذ منك الاوراق ما بقدر اخاطر اجي انا.
ليان | وانت وش دراك ان هالشخص ما بيفتشونه الشرطه حرفياً بكل مكان
مصلح | معليك انا ادبرها ، قلتي لي مناسبة بنت عمتك متى؟
ليان | نهاية هالاسبوع ان شاء الله ليه؟
مصلح | لا اسأل بس
ليان | والله انك غريب
Read 1:20pm
قفلت جوالي و رحت اخلص اشغال اليوم.
نزلت تحت ادور لي شويه سناكس و لقيت خالتي و خواتها وثامر جالسين بالصاله ، لاحظت ثامر رفع عيونه عن جواله شوي طالعني و رجع يطالع بالجوال.
اكره هذا الشعور ، شعور اللي مو عارفه ايش سويت غلط بس بنفس الوقت تحس بالذنب ، كذا احس تجاه ثامر ، افتقدت ثامر القديم.
يوم قرب اذان المغرب صوت سمعت الباب اللي تحت ، غريبه ابوي توه يجي؟
قعدت بغرفتي اغلب الوقت الين ما جاني النعاس. ونمت.
مضت الايام و جاء وقت ملكه ملاك البسيطة جداً.
مع ان منال قالت لي اكشخ قد ما اقدر لانها برضو بتكشخ قد ما تقدر ، مع اني برضو مع ملاك في هالنقطة احب الاشياء البسيطة اكثر.
تكشخت في بيتنا و تجهزنا كلنا -معنا خالتي- و رحنا لبيت عمتي ، شيكت على جوالي واحنا في السياره وشفت مصلح مرسل.
مصلح | اليوم المناسبة؟
ليان | بسم الله وش دراك؟
مصلح | منال :)
ليان | اولاً هذي منال يبيلها شطرطون على فمها ثانياً مو قام يستخدم :) انت الظاهر للحين عايش في ٢٠٠٧
مصلح | وين المشكله؟ احلى ايام ٢٠٠٧
ليان | خلاص كل تبن وراي ملكه احضرها 😌
مصلح | يله يله بالتوفيق :))
Read 9:10pm
مصلح :
سكرت جوالي و رميت السجاره اللي في يدي ، دخلت داخل و دخلت المطبخ خذيت لي شوي حلا و شوكلاطه ورحت غرفتي ، كنت افكر كيف بشوف ليان بدون لا امر على الشرطة ، مع ان ما ظنتي انهم يعرفون وجهي ، جلست اتابع التلفزيون لين ما دخل اخوي.
"السلام عليكم"
"عليكم السلام"
قلت بصوت واطي
"امي وينها؟"
"والله مدري يمكن عند الجيران"
"لما اكلمك تطالع فيني"
رفعت راسي و طالعت فيه
"سم طال عمرك وش بغيت؟"
طالعني و قعد يتكلم يتكلم و انا اذني كأن انعدم السمع فيها ، يليل ما اطولك ، يوم شفته خلص من كلامه قمت و رحت غرفتي اخذ قطره الاذن و قطرت في اذني.
من يوم كنت صغير كانت تجيني هالحاله و كأني اصير اصم ، تقول امي اني طحت على اذني وانا صغير و فقعت طبلة الاذن بس مهي متأكده ميه بالميه.
رن جوالي و طلعته شفت انه سلطان.
"ارحب"
"لا ارحب ولا شيء الشرطه طبوا على عمر و مهل"
"وشو؟ متى!"
"مدري يخوي انا متخبي ورا جدار وهذول هم قدامي"
"خلك مكانك بجيك"
"وين تجي انت بعد انا اللي بجيك لا يمسكوننا كلنا نروح فيها"
قعدت افكر شوي وجت في بالي فكره ، اكيد علي الكلب بلغ عن اسمائنا بعد ما مسكوه.
خذيت اغراضي و مفتاح البيت و رحت ركض لبيت قحص ، طقيت الباب عليه ولا فيه رد ، يوم جيت اطق مره ثانيه فتح الباب و شفت وراه شرطيين واقفين و وراهم قحص ، حسيت روحي طلعت من مكانها ، خذيت جوالي و رميته في الارض و يوم تأكدت انه انكسر لفيت وراي و قعدت اركض ، سمعتهم يدخلون قحص السياره و يركبونها و يلحقوني ، انا على رجولي وهم على السياره مدري مين بيعيش اليوم.
قعدت ادخل بين الحواري و احاول اضيعهم ولا فاد الين ما شفت سله زباله كبيره جنب سطح بيت متهالك ، نطيت فوقها و نطيت على جدار البيت و بعدها على السطح ، تخبيت ورا جدار كبير الين ما شفت اني ضيعت الشرطة من مكاني ، دخلت يدي في جيبي و استوعبت اني كسرت جوالي ، يليل الورطه.
يوم تأكدت ان الوضع تمام وامان رجعت بيتنا ركض و حصلت سلطان واقف ويسولف مع امي.
"هلا يمه عسى ماشر صاير شيء؟"
"لا يا يمه بس بغيت اسلم على سلطان من زمان ما شفته"
"اييه ، انا وسلطان عندنا شغله سريعه في الورشه ولازم نروح اللحين ، اعذرينا يا يمه"
"انتم دايماً في هالورشه ما تفضون ادخلوا بس هالمره تقهوو وبعدها اطلعوا"
"والله يا خاله مستعجلين ما عندنا وقت"
"الله يسهل دربكم و يبعد عنكم كل شر ، انتبه لنفسك يا وليدي انت واللي معك"
"ابشري يمه"
حبيت راس امي و يوم تأكدت انها دخلت قلت لسلطان يحرك من هنا.
"قحص انمسك ، و مهل انمسك و حتى عمر الحذر انمسك ، الله يستر بس"
بعد فتره سكوت بيني وبين سلطان سألته
"رشاش وش صار عليه؟"
"هذاني باخذك له يقول عنده خطه"
فجاءه طرت في بالي ليان مدري ليش.
"بالله عطني جوالك شوي"
"وش تبي فيه؟"
"بكلم ليان"