صُدْفَة | Serendipity

٠٦

رجعنا للبيت يمكن الساعة ١١ بالليل ، تاخرت بالنوم و شكلي يا اني اسهر الين بكرا او اني انام ويروح علي دوام بكرا ، اخذت لي موز وحليب لعل وعسى انام ، والحمدالله نمت لكن قمت مره متاخر ، كلمت منال وشفت انها قربت عند بيتنا ، قلت لها تروح للمدرسة مالي خلق اروح اليوم ، دخلت علي خالتي.
"ليان! صاحيه ورا ما تقومين تغسلين و تتجهزين للمدرسة"
"ما راح اروح اليوم"
"وليه ان شاء الله؟ ابوك بيعصب—"
"خلاص انتي وابوي تعبانه مره! ايش يعني ما اتعب"
"خلاص لا تصارخين بسم الله نامي عساك ما تقومين"
تفلت عليها يوم سكرت الباب وراحت ، الله ياخذها ويفكنا منها يارب.
قمت و واضح من بداية اليوم انه خايس ، تروشت و توضيت ورحت اصلي لعل الصداع اللي براسي يخف ، لكنه ما خف ، اخذت لي حبتين بندول و انسدحت بسريري ، فتحت محادثه مصلح و ارسلت له.
ليان
متى بتجيب العقد اليوم؟
مصلح
متى تبين؟ اللحين؟
ليان
لاااا مو اللحين بس اسأل متى يناسبك؟
مصلح
العقد طلعته من امس ف انا اي وقت عندي تمام انتي متى تبينه؟
ليان
خلاص تعال الساعة ١١ اليوم ، بيكون ابوي وخالتي نايمين و البيت هادي
مصلح
ابشري 💋
ليان
يع لا تستخدم هالايموجي عند اي احد فشلتنا
مصلح
💋💋💋💋💋💋💋
ليان
تموت بالعناد صح؟
مصلح
هوايتي المفضلة
ليان
جاني النوم مع السلامة
Seen 7:02
ليان
يا ورع مفروض انا اسويها فيك!
Seen 7:03
قفلت جوالي وانا مروقه ، على انه يستفزني و قهرني قهر الاسبوع اللي فات ، بس السوالف معاه تونس ، تغير جوي.
نمت و ما صحيت الا على المغرب ، نزلت تحت ولقيت ابوي قاعد في الصاله هو وخالتي و يتقهوون ، رحت للمطبخ علطول وسويت لي قهوه وطلعت لغرفتي ، محد درا ولا شاف.
دخلت غرفتي وانا مروقه و شغلت لابتوبي و قعدت اتفرج مسلسلي.
رن جوالي وشفت اتصال من مصلح ، رديت عليه.
"لبيه؟"
سكوت ، هذا شفيه!
"الو؟"
"هلا هلا ، هاه لا زلنا على وعدنا اليوم؟"
"ايه"
"زين لا جيت بدق عليك قبلها عشان ما تصيحين علينا"
"اص بس ، انتظرك"
رفعت راسي وشفت ابوي واقف عند الباب ، توترت ، يارب انه ما سمع مصلح ، نزلت القهوة على الطاولة و وقفت المسلسل.
"من تكلمين؟ جاينا احد؟"
"لا محد جاي بس اكلم منال انتظرها ترسل دروس اليوم ، ما ادري قالت لك—"
"ايه قالت لي ، لا تنسين تعطينهم عذر مانبيك تنقصين على درجات غياب ، انتي خريجه خلاص"
"ابشر"
"يله تبين شيء؟ انا بنام"
"لا سلامتك"
طلع و ارتحت انه ما سمع صوت مصلح من التلفون ، ماشاء الله مصلح صوته يا يالله ينسمع او يصارخ مافيه حل وسط.
تأكدت الكل نايم و ارسلت لمصلح انه يجي.
'انا تحت اصلاً'
قريت و طليت مع الشباك لقيته يلوح لي من تحت ، فتحت الشباك ودخل.
"سلام عليكم"
"عليكم السلام ، وينه؟"
"شكلك تبين تخلصين بسرعه دقيقه اقريه اول"
"هاته"
اعطاني العقد وقريته زين و طالعت فيه رحت جبت جوالي وصورته ، تسند هو على الشباك و قعد يبتسم.
"صوريه عادي"
"غصباً عنك عادي اصلاً"
"غصباً عني"
قالها وابتسم ، طالعت فيه وابتسمت ورجعت له العقد.
قام و شاف قهوتي على جنب الطاولة.
"اسبريسو؟"
"لا ما احبه ، تقريباً تقدر تقول لاتيه"
"عندك اله قهوه؟"
قال وهو يطالع في غرفتي.
"لا وين ، لو عندي ما عرفت لها ، بس فيه وحده عند منال ، بنت عمتي"
"جربي قهوة —فكروا في اي كوفي تحبونه— بتعجبك"
نزل العقد على الكرسي جنبه.
"اول شيء تطحنين القهوة ثم تحطينها في—"
طالعني ثم تنح ، طالعت فيه باستغراب.
"احطها في؟"
"تصدقين.....لو تروحين لمنال تشرح لك افضل"
"لو على منال بطلع ما استفدت شيء"
شفته ضحك و حسيت بنفس الشعور لما شفت الصوره من جوال منال ، هالشعور يدمر الواحد صدق ، ما تدري ايش هو بالضبط لكنه شعور حلو.
"زين ، انا بروح اللحين ، اذا احتجتك في شيء بكلمك تمام؟"
"تمام ، الله يستر عليك"
لوح لي بيده ثم طلع من الشباك ، ابتسمت لا ارادياً يوم شفته طلع و قفل الشباك وراه ، سكرت الستاير و رجعت على لابتوبي ، يوم قربت الساعة ٢ حسيت بنوم ف قلت اريح قبل الدوام شوي.
قمت على صوت المنبة الساعة ٥ ، رحت توضيت و صليت و جهزت فطوري ، ناظرت في شنطه ثامر ، كنت بجهز له فطوره لكن كنسلت بعد اخر مره ، عفن اكله و رميناه حرام.
جهزت فطوري و كلمت منال قلت لها نمر ستاربكس اليوم.
ارسلت لها و قفلت جوالي ورحت اجهز كتبي و اغراضي ، غيرت ملابسي وسرحت شعري و نزلت تحت لقيت خالتي صاحيه و قاعده تجهز فطور ثامر ، طلعت للحوش و قعدت اطقطق بجوالي ، شفت ابوي طلع وناظرني مستغرب.
"صبحهم بالخير وش مقعدك هنا يا بابا في البرد"
"لا عادي لابسه جاكيت مو برد"
"اييه......زين انا بروح للدوام تبين شيء"
قالها و طلع علطول ما انتظر ارد حتى ، ضحكت على حركته ، متوقع يعني اني برد وانا ادري انه بيسحب ولا كأني موجوده واتكلم ، قعدت اطقطق على الجوال لين دقت علي ملاك.
"يله انزلي لا تفوتك منال منفسه عشانها بتدفع لنا قهوتنا اليوم"
"حلووو اجل برجع محفظتي"
"لا جيبيها مانيب دافعه شيء يالسرابيت"
سمعت منال من ورا تصارخ.
ضحكت و رحت لبست عبايتي و طلعت ، مرينا ستاربكس واخذنا مشروباتنا ورحنا المدرسة.
وصلنا في نص الطابور و خفت ياخذون مشروباتنا مننا ، قلت لمنال نحطهم عند ام احمد الحارسه و نجيهم بعد الطابور محد بيدري ، خليناهم عندها و شكرناها ورحنا ، يوم خلص الطابور رجعنا و اخذناهم وطلعنا للصف.
مر اليوم ككل يوم دراسي ، بس الغريب ان المدرسة سوو لنا تكريم و منال كانت منهم ، منال مو اشطر وحده دراسياً بس ما قد غابت ولا يوم في حياتها.
"اخاف يصير حدث بالمدرسة ويفوتني"
هذي منال يوم سألناها ليه ما قد غابت ولا يوم.
طلعنا من المدرسة و تأخرت ملاك اليوم ، قعدنا عند درج المدرسة لين قالنا الحارس انه خلاص بيقفل المدرسة يا نطلع يا نروح بيتنا مشي ، قررنا نطلع ونقعد في نفس مكاننا ، يوم قابلنا علي ومصلح.
قعدنا و ما مر شوي و شفنا ملاك ركبنا معها و رجعنا للبيت ، واحنا في الطريق دق جوال منال و كان قدام عند ملاك ، طلت ملاك في الاسم و ضحكت.
"مين سلطان؟ تكلمين شباب من ورانا؟"
"لا يا بنت الحلال قاعده اطقطق عليه"
"اقول بس احذفيه تراهم لعابين وحقيرين وامي لو تشوفه بالغلط بتذبحك وانتي حيه ، لا اجيب طاري احمد بعد ما يحتاج اقولك وش بيسوي"
"بيقعد يبثرنا بنفس الكلام ، شرفي وشرفي الله ياخذه يارب ، ادري وش بيسوي ، بس معليك مو دايم اكلمه بس اذا طفشت"
"وربي انك غريبه"
"غريبه بشكل ايجابي طبعاً"
قالت منال وهي تغمز لملاك ، ما حسيت بالوقت من السوالف الا وصلنا للبيت ودعتهم و نزلت ودخلت البيت.
رحت لغرفتي علطول كالعاده ، غيرت ملابسي ، كنت بنام خلاص لما دخل ابوي علي فجاءه.
"ليونه؟ نمتي؟"
"لا يبه صاحيه"
"بسألك ، انتي تدرين ملاك مين جاي يخطبها الاسبوع الجاي؟ تعرفينهم؟"
انصدمت من كلامه وعدلت جلستي.
"ملاك خاطبها احد! توي ادري منك"
"شدعوه عمتك ما جابت الطاري يوم تقعدون عندها؟"
"لا والله ما قالت شيء ، مين قالك؟"
"عمتك توها كلمتني و قالت لي ، تبيني اكون موجود وقتها ، وتبيك تجين"
"غريبه توني كنت معاهم ما قالوا شيء ، بس تمام بكلم منال واسألك اذا تبي"
"لا لا خلاص"
كان بيسكر الباب وشفت خالتي وراه واقفه ويوم طلع قامت تسأله.
كنت متأكده ابوي ما يقعد يسأل زي كذا الا من ورا راسها ، ابوي ما كان يهتم انه يعرف كل شيء ، متى ما جاء احد و علمه ، لكن اللحين صار يحبث وينشّد و يعرف منها ومن اطباعها الخايسة اللي صارت تنتقل لأبوي.
كلمت منال و اعطيتها احلى تهزيء انها ما قالت لي.
"اسفه والله امي قالت ما اعلمك عشان الحيه خالتك ما تسمع بالغلط"
"ما الومها معليك ، شريتي فستان ولا باقي؟"
"ايه شريت بس اذا تبين نروح مع بعض نشتري؟"
"لا لا عندي واحد حلو ، شريته و ما لقيت مناسبه البسه فيه بلبسه وقتها"
"زين خلاص ، لا تنسين تجين نتجهز مع بعض"
"اكيد!، متحمسه اشوف ملاك ياروحي هي الله يوفقها"
"امين يارب"
-
هالبارت قصير وغبي ادري ومره اسفه سحبت هالايام بس كنت مشغوله كثير ، و @ayras_savage ما كتبنا ٩١ بارت بس هه هذي اعتبروها كأنها ٩١ بارت بمناسبه اليوم الوطني.
احبكم كثير و ان شاء الله يارب بكرا افضى وانزل لو نص بارت لكم 🤍
انتبهوا لأنفسكم ، اشوفكم في البارت الجاي 🤍