أميرة الفهد

البارت الخامس عشر

رجع مالك البيت والكل لاحظ شكلو وحزنوا واستغرابوا .

ياسر : ماااالك
مالك وقف ولف بصلوا بهدوء .
مالك : نعم
ياسر : كنت فين كل ده
مالك : كنت مع حازم

ياسر استغرب لأنو اول مره مايزعقش لما أبوه يسألوا كنت فين ، ديما لما ياسر كان بيسالو كان بيزعق معاه .

ياسر بجمود : وعامل كده ليه
مالك : كده ازاي يعني
ياسر : انت مش شايف نفسك ولا ايه
مالك : لا شايف نفسي ، مفيش فيا حاجه
ياسر : صاحبك رجع ولا لسه
مالك : وانت عرفت منين
ياسر : السوشيال ميديا كلها مقلوبه ، مفيش حد مابيتكلمش علي اختفاء فهد السيوفي
مالك وهو داخل اوضتوا : ربنا يرجعوا بالسلامه

الكل استغرب هدوئه جدا ، وبدأو يبصوا لبعض باستغراب وعلامات الاستفهام علي وشهم ، اول مره مايتعصبش لما حد فيهم يتكلم معاه .

في اوضه مالك ، الباب خبط .

مالك بزهق : اووووف ، ادخل
حنين بتردد : م..م..ممكن ادخل
مالك : ادخلي
حنين : ممكن اتكلم معاك شويه
مالك باستغراب : عاوزه ايه
حنين بحنيه : مالك يا أبيه
مالك : مالي ؟! ، ما أنا كويس اهو
حنين بحنيه : فين ده الي كويس ، شكلك غريب ومش متعوده عليك كده
مالك بتركيز في عينيها : هو انتي متعوده عليا اصلا
حنين بصت في الأرض وسكتت .

مالك بزهق : ممكن تقولي عاوزه ايه علشان تعبان وعاوز انام
حنين بدموع : عاوزاك تسامحني ، والنبي سامحني علي الي عملتوا وانا والله هتغير وهتشوف مني معامله تانيه خالص
مالك بضحكه سخريه : هههه ، حاضر هسامحك
حنين : بص انا عارفه اني غلطانه ، وان معاملتي معاك زي الزفت ، وعارفه أن دي مش معامله اخت لاخوها الكبير ، بس والله بوعدك من دلوقت هتغير وهتشوف معامله تانيه خالص
مالك : واشمعنا دلوقت يعني
حنين بدموع : علشان عاوزه اقرب منك ومش عارفه ، بقالك اسبوع متغير ومش تمام ومش عارفه مالك ولما سألت عرفت أن فهد مخطوف ، ساعتها كان نفسي اقرب منك واهون عليك وابقي جمبك زي ما اي اخت بتعمل مع اخوها ، بس كنت بتردد علشان عارفه أن أنا ماستهلش انك تسامحني ، بس والنبي سامحني زي ما سامحت محمد
مالك : وانتي جايه تكتشفي كده دلوقت ، بعد 20 سنه
حنين بدموع : مكنتش عارفه قيمتك ، عرفت قيمة الاخ الكبير لما وقفت مع محمد وحليتلو مشكلتو ، وعرفت قيمتك وانك ممكن تروح مني في ثانيه لما شوفتك كده ، حزين ومحدش جمبك ، ابوك وامك هما السبب
مالك بزعيق وعصبيه : هو كل ما حد فيكو يجيلي يقولي ابوك وامك هما السبب ، ليه هو انتو صغيرين ، طب زمان وكنتو عيال ومش فاهمين إنما دلوقت انتو عيال؟!!! ، انتي 20 سنه ومحمد 22 سنه وامل 19 سنه ، يعني مش عيال ، يعني محدش يقدر يغصبكوا علي حاجه ، بلاش تحطوا غلطاتكوا علي شماعه ابوكو وامكوا
حنين بدموع : وانا معترفه اني غلطانه وانك حقك تزعق زي ما انت عاوز واكتر من كده كمان ، بس انا زهقت من البعد عنك ، انت اخويا وابويا ماينفعش ابعد عنك اكتر من كده ، عاوزه اقرب منك ، ابقي اختك وبنتك ، اجي أجري في حضنك لما اضايق ، اجي اشتكيلك لما حد يزعلني ، والنبي يا مالك سامحني
مالك بتنهيده : ماشي يا حنين
حنين بفرحه : بجد
مالك بابتسامه : ايوه بجد
حنين بفرحه : طب خدني في حضنك بقي يا أبيه
مالك وهو بياخد اختو في حضنه : تعالي في حضني يا قلب أبيه
حنين : ممكن بقي تقولي مالك
مالك بتنهيده : مفيش حاجه ، أزمه وهتعدي انشاء الله
حنين : ربنا يفرحك ويبعد عنك الحزن يارب
مالك بابتسامه : يارب يا حبيبتي
حنين : أنا هخرج بقي ولو عوزت حاجه اندهلي ماشي ، هأكلك النهارده من ايدي علشان تقولي بقي انا ست بيت شاطره ولا لا
مالك بابتسامه : انتي اشطر ست في الدنيا
حنين بابتسامه : حبيبي يا ناااس ، هروح اعملك الاكل بقي
مالك بابتسامه : ماشي
فرح مالك جدا أن اخواتو بدأو يحسوا بغلطتهم وبدأو يقربوا منو بس كان زعلان من أبوه وأموه علشان عمرهم ما هيحسوا بغلطتهم ورجع الباب خبط تاني .
مالك وهو مرجع راسو لورا ومغمض عينوا : ادخل
محمد : نمت ولا لسه
مالك وهو مازال مغمض عينوا : لا لسه تعالي
محمد وهو بيقعد علي السرير قدام مالك : ايه يا بني فيك ايه
مالك : مفيش حاجه ، مضايق بس شويه
محمد : ده منظر واحد مضايق بس ، كل ده عشان خاطر فهد
مالك : واكتر من كده كمان ، انت ماتعرفش فهد ده بالنسبالي ايه
محمد : لا عارف صاحبك
مالك بسخرية : ههه ، صاحبي ؟! ، لا مش صاحبي ، ده اخويا الكبير وابويا ، هو الي معوضني عن قسوه ابويا وأمي عليا ، بيقف معايا واقفه الاخ الكبير والصاحب ، كان معوضني عنكوا كلكوا ، يوم ما دخلت المستشفي هو الي كان قلقان هو الي فضل جمبي ، محدش فيكوا يومها عبرني ولا فكر يطمن عليا ، فهد ده مفيش زيو ، لو جرالو حاجه انا ممكن اموت فيها
محمد : ربنا يرجعوا بالسلامه ، انا مكنتش اعرف انو غالي عندك كده
مالك بتنهيده : ماعلينا ، المهم قولي مين الي قال لحنين تدخلي
محمد : هي الي دخلت من نفسها ، حتي ابوك زعقلها بس هي مادتوش اهتمام ودخلت
مالك : ربنا يهديها ، امال أمل فين
محمد : في الكليه
مالك : ماشي ، أخرج انت بقي شوف الي بيزعق بره ده
محمد : مش فاهم أنا فيها ايه لما ادخل اقعد معاك
مالك : اصلي عدوه مش ابنو أخرج يا بني
محمد : ماشي يا مالك ، تصبح على خير
مالك : وانت من اهلو
وخرج محمد وفضل مالك صاحي طول الليل كالعاده .
""""""""""""""""""""""""""""""""""""★
ولا من أيامك يوم مابيوحشنيش ❤🌎
في بيت مليكه السيوفي .
مليكه بعياط شديد وهي باصه لصوره فهد وهو بيضحك : أنا عارفه اني حبيتك وحبيتك اوي كمان وقولت خلاص هو ده الي هكمل معاه حياتي ، بس مكنتش متخيله إن حبي ليك هيوصل للدرجه دي ، انا عشقتك ، وممكن اموت لو جرالك حاجه ، حياتي ضلمه من يوم ما بعدت عني ، أنا واثقه في ربنا انو مش هيبعدك عني اكتر من كده وهترجعلي قريب انشاء الله ، يارب ترجعلي بالسلامه يا حبيبي ، انت وحشتني اوي
""""""""""""""""""""""""""""""""""""""""★
في بيت حازم .
قاعد علي السرير ومرجع راسو لورا ومغمض عينوا وبيتكلم في التليفون .
حازم : وحشتيني
شهد : مالك يا حازم
حازم بتنهيده : حازم تعب ومابقاش قادر يستحمل
شهد : معليش يا حبيبي أزمه وهتعدي انشاء الله
حازم : انشاء الله ، المهم عاوزك في موضوع كده
شهد : موضوع ايه
حازم : اهلي عاوزين يشوفوكي
شهد : ليه
حازم : أنا قولتلهم اني هتجوز فعاوزين يتعرفوا عليكي
شهد : طب هيشوفوني ازاي
حازم : انا بطلب منك تجيلنا البيت شويه علشان يشوفوكي ويتعرفوا عليكي
شهد بتوتر : بس انت كنت قايلي قبل كده أن....
حازم بمقاطعة : كنت قايلك أن في مشاكل بيني وبينهم ، بس هما طلبوا كده وانا مش هقدر ارفض ، وانتي حره عاوزه تيجي براحتك مش عاوزه خلاص ماتجيش دي حاجه تخصك
شهد : حاضر يا حبيبي هاجي
حازم : بس بعد موضوع فهد
شهد : اكيد طبعا
حازم : ومليكه عامله ايه
شهد : مليكه ربنا يصبرها علي الي هي فيه
حازم : ويصبرنا احنا كمان ، احنا عاملين زي التايهين مش عارفين نوصل لحاجه بنحاول كتير بس مش مفيش فايده
شهد : انشاء الله خير قول يارب
حازم بتنهيده : ياااارب
""""""""""""""""""""""""""""""""""""""""★
في المكان الي فهد موجود فيه .
شال مجهول 1 الشريطه من علي عين فهد ، فتح فهد عينو لقي شخص قدامو ، كلمة صدمه أقل حاجه تتقال علي الي فهد كان فيه ، دماغوا وقفت ، مستحيل مش ممكن مش معقول ازاي ، عدم استيعاب وعدم فهم كانو مسيطرين علي فهد .
فهد بذهول وعدم استيعاب وصدمه : ب..ب...ب....بابا
سليم بغضب شديد : لو سمعتها منك تاني هموتك ، بقالك 20 سنه بتقولها وانا مستحملك خلاص كفايا تمثيل بقي لحد كده ولازم تعرف الحقيقه
فهد بعدم استيعاب للموقف : ا..ا..انت بتعمل ايه هنا ، ت..ت..تمثيل ايه ، ا..ا..ا..أنا مش فاهم حاجه ، و..و..وبعدين لما انت عارف اني هنا م..ماجتش تنقذني منهم ليه يا بابا
سليم وهو بيحط رجل علي رجل : أنا الي جايبك هنا يا ابن سليم