ஈரம் மிஞ்சும் கண்ணின் ஓரம் ✔️

ஈரம்-25

அரை மணி நேரம் கடந்திருந்தது.

முருகேஷின் பிணத்தை அப்புறப்படுத்தியதும் தேவையான பரிசோதனைக்குப் பின் அவன் உடல் அருகிலிருந்த மருத்துவமனைக்கு எடுத்துச் செல்லபட்டது. இன்னும் அபிமன்யு அந்த இடத்திலே இருக்க ஸ்டீஃபன் கூட விஷயமறிந்ததும் தனியாகவே இங்கு வந்திருந்தான்.

ஹரீஷ் மருத்துவரை அனுப்பி விட்டு வந்ததும் ஒரு இடத்தை கவனித்தான். அங்கு மட்டும் இரத்தம் கொட்டிக் கிடந்தது. ஆனால் அதற்கும் முருகேஷ் பிணம் இருந்த இடத்திற்கும் சம்பந்தமே இல்லையே என குழப்பத்திலே தடயவியல் துறையினர் ஒருவரிடம் கூறி அதை பார்க்கக் கூறினான்.

அதே நேரம் வேறொரு நபர் " இந்த சங்கிலி மட்டும் தான் பாடில கெடச்சிது. ஆனா இதுல ஏதோ சிப் இருக்கு " என அபிமன்யுவிடம் ஒரு சங்கிலியை கொடுத்து விட்டுச் சென்றார். புரியாமல் அதை வாங்கிப் பார்த்த அபிமன்யு வேகமாய் தன் வண்டியிலிருந்த மடிக்கணினியில் அந்த சிப்பை செலுத்தி எதையோ தேடத் தொடங்கினான்.

ஸ்டீஃபனும் ஹரீஷும் நாயகனின் செயல்கள் புரியாமல் அவனை பார்த்து கொண்டிருந்தனர். " இது ஏதோ ரெக்கார்டிங் டிவைஸ். இதுல கமெரா இருக்கு " என அபிமன்யு தெரிவித்ததும் அவர்களுக்கும் பதட்டம் தொற்றிக்கொள்ள பொருமையாய் அதை உபயோகித்து ஒரு காணொளியை தட்டினான் அபிமன்யு.

கிட்டத்தட்ட அந்த ஒரு காணொளி மட்டுமே நான்கறை நாளிற்கு ஒடியிருக்க அதில் முதல் பாதி அனைத்தும் இருளிலே நிறம்பியிருந்தாலும் முருகேஷின் சத்தமற்ற கதறலும் சதக் சதக்கென இறங்கும் கத்தியின் குத்துக்களும் அவ்வப்போது பேசிய உருவத்தின் குரல் பதிவும் இருந்தது.

அதை மிகவும் உன்னிப்பாய் பார்த்தவர்கள் இறுதியாய் " கதைய முடிச்சிடளாமா?? " என யாரோ கேட்ட அரை நிமிடத்தில் ஒரு கத்தி இறங்கும் சத்தம் கேட்டதும் கூர்ந்து நோக்கினர். எதுவும் தெரியப் போவதில்லை போல என அபிமன்யு நினைத்து அந்த காணொளியை விட்டு வெளியேறும் முன் ஒரு செயல் நடந்தது. கமெரா மெதுவாய் அங்குமிங்கும் ஆட நேற்று முருகேஷை கட்டி வைத்திருந்த சங்கிலிகளை உருவம் அவிழ்க்க முயன்றபோது அவனை தாண்டி சென்றமையால் இரு நொடிக்கும் குறைவான நேரத்தில் அவ்வுருவத்தின் கழுத்தும் நெற்றியும் மட்டும் தெரிந்தது.