كابوس اليقظة

السلام عليكم احبتي..

اعود الكم من جديد وقصة جديدة حقيقية تحمل في طياتها الكثير
ان شاء الله قريباً يكون التنزيل ..متشوقة حيل لجمعتي وياكم وتوقعاتكم
التشاركوني بيها وحماسكم ..
هذا الي نزلته الكم مقتطف ..وان شاء الله بعد فترة
قليلة نبلش بالتنزيل..محبتي الكم

         ***********************

كابوس اليقظة

كابوس اليقظة

الدنيا ليل عبرت الساعة بالوحدة ..والجو بااارد
ورغم فاتحة هيتر ومتغطية ببطانية بس احس البرد
متعمق بيه..متوغل مو لجسمي لا ..متوغل لأحساسي
لروحي..احس ..شعوري ..مو بارد لا عمره شعوري مابرد
بس احس شعوري بردان..محتاج للدفو والاحتضان..

متمددة بالصالة ومطفية الاضوية ..الشاشة طفيتها
لان مالي خلك اباوع شي او بالاحرى مليت ..
صافنة ع شمعات الهيتر شلون متوهجة..حسيت
بفوني يهتز وصوته مخفي..كعدت بخوف وانفاسي
تتسابق..هالرنة بهذا الوقت اكرهها ..هي..هي سبب
كل مأساتي..

دورت ع الفون تتبعت صوت الرنة..لكيته طايح ورا القنفة..
اول ماشلته من الارض فصل الخط..
رجع دك فزيت وطاح من ايدي..
شلته من الارض بأيد ترجف ..باوعت للاتصال
وغمضت بغصة..فصلته وذبيته بالارض
وكعدت منتجية ع القنفة..

اجاني مسج..مديت ايدي رفعت الفون ..فتحته
بتردد..
جان اشعار من الفايبر ..
وصارت الاشعارات مثل المطر وحدة ورا الثانية
بس جانن صور!؟!!
فتحته بسرعة لان داخلي يخاف من هالانسان..
المثله كلشي يسوي ومايهمه شي..

فتحت الفايبر..وانتظرت الصور تحمل..
بس ياريتها ماتحملت..كمت اتصفح ..اكثر من تسع
صور ..اشوفه كاعد بمكان فخم ..مادري بيت
قصر بس امبين من شكله مو مكان عادي..وكدامه
ميز دائري..عليه مشروبات ويمه ثلث شباب
وثلث بنات..
جانن شبه مصلخات..
الصورة مصورها شخص كاعد مقابيلهم
لان كلشي واضح بيها..

وبقية الصور بين رافع كاسه يشرب... بين
كاعدة بحضنه بنية..وبين نازع قميصه !!
والاخيرة..صورة اسياد..مبتسم نص ابتسامة
ورافع حاجب ..!!؟

لا لا لا مستحيل..كلشي توقعت!توقعت بس ذول الاثنين
ينجمعون!!
شنو الجمعهم وشلون انجمعو!زين ..زين
انا شبيه..ليش اطرافي خدرت..ليش لساني صار
خشبه..
راسي صارت بي حرارة..تماماً مثل الفحمة من
تبدي النار تسري بيها..
طحت بمكاني وفقدت ..ابد ماحسيت شصار
بعد..

ورا وقت هواي مر فزيت..وعرفت صاير
الصبح من الضوا الداخل من البردة..بس انا مو بالبيت..
ركزت عدل..يمي مرة يطلع عمرها بالاربعين..
مخلية كرسي قريب سريري ونايمة..
غمضت عيني حيل احاول اركز..رجعت فتحت
وفزيت من شفت اسياد واكف كدامي..

حجيت بعيطة ..ماكفاك السويته!!جاي تريد
تخلص عليه..
حط اصبعه ع حلكه بمعنى سكتي..وحجه بهدوء
وهو يتقرب..لا تصيحين مو زين عليج..
ونده المرة النايمة..ام سلام كعدي روحي لبيتج..