كابوس اليقظة

17

مساء الخير

كابوس اليقظة
الجزء السابع عشر

طاحت الجنطة وتطشرت هن شافن الفلوس والذهب وصارن
مثل الزومبي يتطافرن ويريد يلمن..وانا ذبيت نفسي
بالكاع ونمت فوك الذهب وهن يجرن بيه وانا ارافس..استعزيت
بذهب بيبي البقى كلت لو يكتلني مااخليهن ياخذنه..لميته وحطيته
بصدري وهن يتمالخن وياي وطلعن باقي الذهب مالتي من جواي
وامهن اخذت الفلوس وتدعي عليه وعلى مناضل وتغلط..

لميت كم قطعة من ذهبي الكدرت المهم ومن ضمنهم العقد
الاسترا الي ابوي..حطيتهن بصدري وهن يعاركني بقيت
اصرخ بلا وعي..اول مرة هيجي صوتي يطلع..يمكن انصدمن
من صوتي مامتوقعات..
اخذن الاخذنه وطلعن يركضن..جريت الجنطة وانا مستمرة
ابجي وانحب..طلعت الذهب من صدري وحطيته بيها ورحعت
الاوراق نصها طاحت وتأكدت منها..

لفيت شالي وحطيت الجنطة جوا جبتي وطلعت اتلفت..
اسمع هوستهم جوا..نزلت اركض واشوفهن ملتمات ومناضل
وسالم يتناقشون شي اقرب للعركة..باوعلي مناضل وباوع لاهله..
امشي اصايل يلا..
تقربت يمه وشادة ايديه ع الجنطة..الفلووس ونص ذهبي
اخذنه..حجيت بصوت ناصي خفت يسمعني و يهجمن وياخذن الباقي..
جاوبني بهمس..امشي هسه خل نطلع وبعدين حسابي
وياهم..

حط ايده ورا ظهري واندار بلا مايحجي وياهم شي واخذني
وطلع..
اول ماكعدت بالسيارة طلعت الجنطة حطيتها بحضني..مسحت
دموعي وعدلت نفسي وهو كاعد صافن..
مناضل اخذو نص الذهب والفلوس كلها راحت..
ارجعهن ارجعهن..جبتي اوراقنا مو؟
اي موجودة..
خل نشوفلنا فندق هسه على ماارتب وضعنا..

فندق ليش هم راح نصرف فلوس حرامات خلي الفلس يفيدنا..
وديني اليوم يم رشا وانت ارجع للبيت جمع اغراضنا وملابسنا
النحتاجها خو مانطلع بطرك هدمتنا..
هم صح..يلا انطي رشا خبر..
اخذت الفون اتصلت بيها جاوبت..كتلها رح اجي يمج اريد
ابات ومن صوتي وبحته عرفت شبيه..سألت بس لا هالمرة
هم كتلنج كولي خل البس واجيج..
كتلها لا بس مشكلة صارت وسكتت..فهمتني من سكوتي كالت
تعالي انتظرج..

سديت الفون منها ومناضل لازم ايدي ويتحسر..ماحجه
اي شي لحد ماوصلنا لبيت رشا..جانت تنتظرني بس نزلت
من السيارة طلعتلي..
باوعتلي وعيونها مدمعة..سلم عليها مناضل وهو مدنك
وراح..
جرتني جوا وسدت الباب..شبكتها وانهاريت..بقيت ابجي
واشهك واحس ذل وقهر مابنوصف..وهي على بجيي تبجي
وتهدأ بيه..

اخذتني لغرفتها دخلت وراحت جابتلي ماي غسلت وجهي
وشربتني وكعدت..
كافي موتي روحج طززز بيهم كليلي شصاير سولفي حتى
ترتاحين..
بقيت احجيلها وابجي وهي فاتحة عيونها مصفنة..صدك
عود !!من اكلج ذولا عصابة تكليلي حرااام عليج..خرررب
انوب اخوي السليمة صاحب مناضل شبي مايدري بصخامهم
وتقفيصهم..

خية قابل مناضل يسولف لاخوج يكله اهلي قفاصة يعني!شبيج هم حتى
بالمنطقة سمعتهم زينة بس نسوانهم شرانيات هيجي سمعت..
هزت راسها مقهورة..ذني استغلنج لان فقيرة وماطلعتي لسانج
عليهن..ولج شبيج كتلج من الاول تشيخي عليهم وهن يخافن
منج..ذيج سمر مو صاكرتهن ومحد داسلها طرف..