كابوس اليقظة

16

مساء الخير

كابوس اليقظة
الجزء السادي عشر

جرجرني ثنينهم ودفعني بالباب وانا ملابسة مشككة وبلا حجاب..
احتاريت ايد خليتها ع راسي اغطي شعري لو الزم صدر
الثوب ..
اكو مرة جيرانه جاي ترش بالباب ذبت الصوندة واجتلي
تركض ..ياا مايخافن الله شورطج وياهن ذني يمه كومي كومي
دخلي جوا..وكفت صارت كدامي مثل الستار لان دنيا غروب و
ناس تروح وناس تجي..
حاولت تكومني لزمتني من خصري وتسب وتشتم
بعمتي وبعيالي..سمعت صوت رجال من وراها..حجية بلا امر
عايج بس انطينا عباية الها..

مديت راسي من ورا المرة اريد اشوفه منو ..جان داير ظهره
علينا ومن ملابسه عرفته من حماية اسياد..
حاجته المرة مستغربة..انت ياهو يمه منين تعرفها؟؟؟
اي خالة انا ابن عمها بس استعجلي رحمة لاهلج الناس جاي
تتفرج..
خوش يمه بس تعال صير سد كدامها على ماركض اجيبلها
عباية واجي..

تقدم وهو ناطيني ظهر وكف كدامي والناس كلها كفت من الفرع
محد بقى..
راحت المرة بسرعة جابتلي عباية وشال وشحاطة وكعدت
يمي لبستني..وتدعي عليهن..الله لا يجويهن مو جديدة عليهن..
ماشردن مرة سالم الاولى عمي ذني نسرات شورطج وياهن
بس حسافة زلمهن معدلين وزينين..حجت وهي تسندني اكوم..
ايدك ويانا يمه اسند اخيتك..

دار علينا وهو مدنك..حط ايده ورا ظهري وانا كشيت بعدت
نفسي هو كل للمرة حجية هي تستحي من عدنا انت لزميها
وانا وراح حتى لا تطيح ..
وصلتني المرة ليم السيارة وصعدتني..تشكر منها هو وسد الباب
واندار صعد..
سألته وكوة اجمع الكلمات..انت من طرف اسياد مو؟
اي ست هسه تردين اوصلج لاهلج؟لو اخذج تشتكين؟؟

شمدريك بالصارلي واجيت بسرعة ؟؟
جنت مار صدفة وشفت وين تردين نروح؟حسيته يتهرب
من سؤالي..مايدري كتلتي كلها كوم وطلعته فجأة كوم ثاني ..معناها
هذا مكابل البيت وكاعد!وانا المتوقعة اسياد بعد ذاك اليوم
اختفى من حياتي انوب طلع حاط واحد يراقب!
ماكتله وين ياخذني وصار بداخلي يخوف يوديني لاسياد!
حجيت بخوف..وديني لاهلي عفية بكذا منطقة..هز راسه كال
اي اندله..

غمضت وانتجيت ع الكشن..محتارة هسه ابوي اذا شافني
بهيجي حالة راح يدافعلي!لو راح يلومني ويكول تستاهلين..
يلا ميخالف خل يحجي هو انا تحملت ذلة اهل مناضل الغرباء
اضوج من حجاية ابوي!بس اخ من مهند اكيد رح يشمت ويوكف
بطريقي..

وصلني الولد لبيتنا وراد ينزلني ماخليته كتله قرب السيارة يم الباب
كلش وانا انزل..
قربها صارت كلش قريب بابنا نزلت وتجيت ع باب السيارة
لحد مالزمت بحايط بيتنا..نزلت دموعي بقهر شكد مشتاقتله
حتى الحايط اله معزة واشتياق عجيب..
راد يبقى الولد كتله روح مشكور ماريد اهلي يشوفوك ..
صعد السيارة ومشى مسافة وركنها ..اعرف ماراح يروح الا ادخل داخل..