كابوس اليقظة

36

السلام عليكم

كابوس اليقظة
الجزء السادس والثلاثون

حط ايده ورا ظهري ويمثل الهدوء..تعاااالي..
فتنا جوا اول مادخلنا ممر ..كدامه باب فتحه ودخلني ووكف
كدامي..حجه بانفعال..خلدون تقرب منج حجى وياج
شي؟؟؟
هزيت راسي..لا ماوصل يمي ابد!

خلينا نرجع احسن..
اي افضل!جاوبته ومتعجبة تصرفه..
طلعنا بسرعة وهو احسه اعصابه تريد تنفجر..جان
يسوق بسكتة واحسه منهمك بفد تفكير باله ابد مو يمي..
لحد ماوصلني للبيت وكال فد شوية وارجع..

فتت وانا صافنة بتصرفاته الغريبة..
بقيت كاعدة لوحدي وفعلا ماطول هواي رجع..
كاعدة بالصالة وهو فات بيده باقة ورد ابيض..ابتسملي
بتعب ومدها الي..اخذتها وشكرته..عاشت ايدك تخبل..
اكيد تخبل لان بيضا مثل نقاوتج وطيبتج..

شبيك شنو صار مساع؟
ارتجى ع القنفة ورجع راسه ليورا..اصايل..راح
تحبيني بيوم ؟؟
سكتت وعقدت حاجبي..بعدها اندرت عليه وحجيت بهدوء..
الزواج مودة ورحمة..ورب العالمين اذا كتب لزواجنا يستمر
يعني راح يصير الاعظم من الحب ..

حتى لو ماحبيتيني بيوم ماريد اخسرج..
ليش تحجي هالشكل هو شنو الصار!!وليش جنت متضايق
من هذا الشفناه وخفت يكون حاجي وياي!؟
حجى وهو نفس وضعه رافع راسه وعينه بالسقف..اناا مااخاف..هذا
المطيح حظي انا مااخاف..

شنو بينك وبينه مأذيك بشي؟؟
يخسى ومايكدر..بس يعرف امور ماجان لازم يعرفها..
مثل ايش ؟؟
تعدل بكعدته ورفع رجله ع القنفة وصار مقابيلي..تردين
تسمعين؟
اكيد اريد..
اول شي تعرفين سبب تمسكي ييج؟؟
رفعت اكتافي..مادري..

ااااه..حبيتج اول ماشفتج من جنت مسافر..وبقيتي ببالي
عبالك وشم انوشمتي بعقلي..ومن لكيتج وعرفت مخطوبة
جنت بلحظة ناوي اطلكج منه..بس كلت لنفسي لا ..تاكد
من گلبها تاكد من مشاعرها..ومن تاكدت مشاعرج جانت موجهة
لشخص واحد كلت اطول خلك وياج..

دورت وراه وبحوشت وعرفته شنو من نموذج تعبان هو واهله..
حاولت انقذج منه بأي طريقة..لحد ماهو بدا يحفر لنفسه
بنفسه..وطيح روحه بالحفرة..وانا مجرد شاهد جنت..
غمضت عيوني بانزعاج..همس..شبيج!؟
حجيت وانا مغمضة..فترة تعيسة ماريد اتذكرها ابد ودي امسحها
بمساحة من حياتي..

ليش جنتي راضخة وساكتة رغم امجد بظهرج؟؟
فتحت عيوني باوعتله بحيرة..ماردت استسلم بسرعة..حاولت
انقذ زواجي..
مايستاهل الانقاذ!
يمكن بنسبة الكم انتو الرياجيل هيج..بس المرة ماتحب تهدم
حياتها بسهولة ماتتقبل هالشي..
وفائج ماكو منه اصايل!

لا اكو هواية بنات يحاولن يحافظن ع بيوتهن..
من تكون مرتبطة شخص مثله مااعتقد تحاول تحافظ بالعكس
تطفشش..
ماعرف..بس وجودك هم زاد بقراراتي الغلط..ضغطك
وتخويفك الي عيشني ايام مااحب اتذكرها..جنت اشوفك
كابوس خانكني..
هز راسه مبتسم بأسف..انا فعلا جنت هيجي..
اي واكثر..بالذات اخير فترة من تتصل و..تنهدت وسكتت..