_ لـيلـة الحنـة _
_ (بقلم بسمة البياتي) _
_البارت الثامن _
__________________
اريد اركز وافكر ماكو عقلي وكف گلبت بالذهب مو شوية وقطع ثگيلة لحظة احس روحي شايفة كم قطعة منهن طلعت تلفوني اگلب بصور العرس ومثل متوقعت الذهب العمتي.
صرت شبه مجنونة افتر على روحي داير مداير الغرفة واكل بأظافري من الخوف
القصد واضح اكيد راح تتهمني بيهن
من هاي ضاجت لان رجعت وحاولت بكل الطرق تأخرني بالصعدة للغرفة
لا عقل لاتفكير مظل برأسي شسوي شلون اتصرف بهالورطة ربي دخيلك ماعندي غيرك التجئ اله بهاي الشدة مثل ما بـ قدرتك خليتني اكتشف مكانة نور عقلي بالحل واحميني من كيدهم
ماتحملت تربعت بالگاع خليت أيدي على وجهي وبجيت ليما گلت بس
بهذا وضعي وحالتي الكسيفة أجت زلال على بالي
اي والله هي ماكو غيرها يگدر يساعدني
اعرفها ذكية وفطنة ميعصى عليها شي
كمت ادور تلفوني من الخبصة انثولت گدامي وما اشوفة فقدت التركيز من لمحتة
شلتة بأيدي ترجف طلعت رقم ماما
ادري التلفون مقيم يمها ياربي الگيها گاعدة
والحمدلله من اول رنة فتحت الخط
زلال.. هلا ليلو
... خوما نايمة وگعدتج
.. لا يابة شيجيبها للنومة اذا ما افكر بنص سكان العراق والدول المجاورة
بس اوكفي شبي صوتج جنتي تبجين؟
... العبرة خنگتني خليت أيدي على حلگي حاولت اتمالك نفسي جاوبت بقلة حيلة وقهر
لا ماببة شي شوية مغثوثة
.. عفت الفراش عدلت گعدتي من شنو مغثوثة ومنو غاثج
... مو شسمة صديقتي قبل شوية خابرتني خطية واكعة بـ مشكلة وتريد حل تدرين بية بسرعة اتأثر
.. هااا زين شبيها صديقتج؟!
... اي هو خابرتج اريد تلگيلها حل ادري بيج ذكية خصوصاً بهيج مواضيع
... اي اي احجي عاد مو الفضول يقرأ الف عندي
... ششوفي اريدج تركزين بـ كلامي
صديقتي مزوجة وشوية مو على وفاق ويا عمتها
اليوم جاي تنظف غرفتها بالصدفة لگت علبة بيها ذهب من دققت بيهن گدرت تعرف هذا الذهب عايد العمتها
... عصرت عيوني قوووي شددت قبضتي على التلفون ليال الموضوع يخصج لو يخص صديقتج
.. هاا زلال ششبيج اني شلي دخل ليش تخليني اتندم حجيتلج گتلج صديقتي
.. ارتباكها وخوفها أكدلي شكِ وين ذبت روحها الثولة وووين
مومال اجادلها لازم اساعدها
... عندج حل لو لا
... سمعي اول شي تسوي طلعي الذهب من غرفتج
.. زلال ششبيج
.. يمعودة غلطت قصدي صديقتج خلي اطلعة لاتبقي عدها
... وين تودي
.. للگبور تخلي بگبر عمتها المستقبلي يعني وين خارج الغرفة اكيد عيالها مخمودين نامت عليهم سليمة حشى الزين منهم خلي تطلع بهدوء تنزلة جوة أكيد صديقتج غرفتها فوك
