...هسه لو تجيبين كرين ورافعة هم مايگدرن يزحزحني من الفي روحي انتي جيبي وتعالي
... لج عوبة اليوم أخر يوم أمتحان وراها راح ننحبس بالبيت امشي نفتر شوية نروح الأسواق اخوية
... هلو هلو واذا احد شافني رايحة للشارع العام شراح يصير بية
... ديلا عيني على أساس هلگد تخافين جريتها من ايدها گووووومي ادري بگلبج صار يتكتك لعبتلها حواجبي
...اكيد أكيف يلا امشي الشمس تصگع برأسنا الحد ما وصلنا صرنا مي
اوويلي الشارع تجاري الناس والسيارات رايحة جاية شجابني ما ادري دخلنا للأسواق اخوها من شافنا ابتسم رديتلة الأبتسامة مينا همست أروح اخذ عصير وانتي ظلي مگابلة الحب
اجة وگف گبالي الميز يفصل بينا
...گلبي علمني اليوم راح يشوف أميرتة
...هسه يطلع گلبك متفق ويا مينا تجيبني اهنا
.... ضحك بصوت يعني ميصير فديوم تسايريني
... تدري بية مو شگول مجاملات شسوي حظك وگعك بية
...أحلى حظ واحلى وگعة وداعة عيونج الله يحبني رازقني حب هالحورية
... قبل لا اجاوبة سمعت صوت من وراية جلدي كزبر ورجفت وجهي ظل ينطي الوان بلعت ريگ انداريت علية والله لو بابا شايفني ولا هو.......
_____________
...فات الأستاذ عدلت گعدتي صارت القاعة هدوء من شفتة تصنمت بمكاني عيوني تشخصت علية ما اكدر ارمش ما أكدر أتحرك ما أكدر اتنفس آحتاج صعقة كهربائية ترجعني لوعيي لا أكيد هذا حلم
فزيت على حركة صديقتي وهي تهز كتفي تسألني
... شبيج؟ لج سدي حلگج لا يروح ينتبه ويطردج مو من أول يوم تموعين
.. اباوع عليها وارجع اندار علية لا هذا مو حلم شجابة ليش طلع گدامي بعدها جروحي مطايبة بعده گلبي ينزف ليش كلما اريد ابدي من جديد يصير شي يرجعني النقطة الصفر
حبست دموعي نزلت راسي ضميت روحي ورة الطلاب الگدامي ما اريدة يشوفي أعرف هالشي مراح يطول مصيرة يعرف بوجودي لكن بهاي اللحظة وهذا وضعي ما اريدة يلمحني
القدر هالمرة وگف الجانبي أجة استاذ ثاني حجة ويا وطلعوا خارج القاعة بسرعة اخذت جنطتي ومشيت صديقاتي يصيحن وراي مالتفتتلهن مديت راسي خارج القاعة واكف بعيد ومنطيني ظهرة اخذت الأتجاه الثاني مشيت سريع او بالأحرى ركضت أطلقت العنان لدموعي صارن يتسابقن على النزول فعلاً الدنيا صغيرة والمنحوس يبقى منحوس.....
______________
السلام عليكم شلونكم ان شاء الله الجميع بخير
بما ان قصة إسوارة الدر شارفت على الأنتهاء حبيت أنزللكم مشاهد من روأيتي الجديدة ( ليلة الحنة)
هالقصة تختلف عن إسوارة الدر ١٨٠ درجة فضلت ارجع النفس نمط قصصي السابقة الـ متعودين على بسمة بكتابتها
راح تعيشون أجواء حب جميلة ورواتبط أسرية متينة وأكيد مراح تخلو من الفكاهة في بعض المواقف
اذا الله راد مراح أطول عليكم فترة قصيرة وأبلش بالنشر
تحياتي للجميع بسمة البياتي احبكم.....
توضيح قبل لا أروح المشاهد البطلتين مو بطلة وحدة 😁...
