جيت لكً ولهـان ..

-4-

وأرَاك في كُلِّ البِقاعِ كأنما
لا جُرمَ في فلَكِي يَدورُ سِواك ♥️

كان يسكر ازاز ثوبه  ويعدل شماغه اخذ جواله وبوكه وطلع بسرعه لجرس الشقه الي يدق فتح الباب : خلاص يووه ذا هو انا طلعت شفيك ترن

سلمان وهو ما زال معلق على جرس وتركه : الله الله حبيبي تركي وش الكشخه الحلوه
قلب عيونه : تغير الموضع عبالك بعديها لك انت وجهك
: ياربي خلاص  ما راح اعيدها بس خلنا نمشي ترى الوقت بيروح

ناظر تركي ساعته وشاف الوقت قدامهم ساعه ونص عشان يوصلون للمطعم من الزحمه
طلع وسكر الباب وراه : يالله يالله

في السياره ومنطربين على اغنيه اصالة ويسولفون بنفس الوقت

تكلم سلمان بعد ما طفى الاغنيه : يا ولد قسم احس جاني حماس الف اجتماع وحركات
هز راسه وهو يوافقه براي : اتفق خصوصاً بنقابل اخيراً فرع الدمام الغثيث الي فاز علينا قبل سنه
كشر سلمان عليه : يووه لا تذكرني تكفى ذا وحنا ما تقابلنا بس كان اجتماع المدراء واخذونا طقطقه في القروب بغيت اتهاوش معهم

ضحك عليه : كله من حازم نكبنا هو وجهه يهايط علهيم لين لقمنا خساره وطقطقه
فكر سلمان شوي وبعدها قال : تروك لا يكون الحين مشاري بيقدس فرع الدمام لانهم فازو ويسحب علينا احس خيانه نعم هم مو احسن منا يصير فيه عنصريه